1. Uuna gumwe a kondwa ohashi gumu ngiini yalwe?

MBELA owu na gumwe ngoka wu hole a kondwa megongalo? Shoka ohashi vulu oku tu uvitha nayi noonkondo! Omumwameme gwedhina Hilda okwa ti: “Onda li ndu uvu nayi lela sho omusamane gwandje a si konima sho twa kala mondjokana uule womimvo 41. * Ihe shoka shu uvitha ndje nayi noonkondo oosho omumwandjemati a thigi po oshili, omukulukadhi gwe noyana.”

2-3. Shi ikolelela kEpisalomi 78:40, 41, Jehova oha kala u uvite ngiini uuna gumwe e etha po oku mu longela?

² Dhiladhila owala kunkene sha li shu uvitha Jehova nayi noonkondo sho yamwe yomaayengeli ye ya etha po oku mu longela. (Jud. 6) Dhiladhila wo kunkene a li ha kala u uvite sho Aaisraeli ya kala nokweetha po oku mu longela lwiikando. (Lesha Episalomi 78:40, 41.) Oto vulu okukala nuushili kutya uuna gumwe ngoka wu hole a thigi po oshili ohashi uvitha wo nayi Tate yetu gwomegulu. Oku shi nkene ho kala wu uvite. Ote ke ku kwathela moku ku pa oonkondo neyambidhidho ndyoka wa pumbwa.

³ Moshitopolwa shika, otatu ka kundathana kombinga yaashoka tatu vulu okuninga, opo Jehova e tu kwathele uuna gumwe ngoka tu hole a kondwa. Otatu ka tala wo kunkene tatu vulu okukwathela yalwe megongalo mboka taya ungaunga nonkalo ya fa ndjoka. Ihe tango natu kundathaneni kombinga yokudhiladhila kwa puka hoka tu na okuyanda.

4. Aavali oyendji ohaya kala yu uvite ngiini uuna omwanamati nenge omwanakadhona a kondwa?

⁴ Olundji aavali uuna omwanamati nenge omwanakadhona a kondwa, ohaya kala tayi ipula ngele opu na sha shoka ya li ye na okuninga ye mu kwathele a tsikile okukala moshili. Konima sho omwanamati a kondwa, omumwatate gwedhina Luke okwa zimine a ti:  “Onda kala tandi ipe ombedhi. Onda li nokuli handi lala omayambandjodhi kombinga yasho. Omathimbo gamwe osha li hashi lilitha ndje nonda li handi kala ndi uvite nayi.” Omumwameme Elizabeth, ngoka naye omwanamati a li a kondwa okwa kala hi ipula ta ti: “Omumwandjemati onde mu putudha ngaa ngaashi nda li ndi na oku shi ninga? Onda li ndi uvite kutya onda ndopa oku mu putudhila moshili.”

5. Olye e na okupewa ombedhi uuna gumwe a etha po okulongela Jehova?

⁵ Katu na okudhimbwa kutya Jehova okwa pa kehe gumwe gwomutse emanguluko lyokuninga omatokolo. Sha hala okutya otatu vulu okuhogolola ngele otatu mu longele nenge hasho. Aagundjuka yamwe mboka inaaya putukila moshili, ohaya hogolola okulongela Jehova nohaya tsikile oku mu longela nuudhiginini. Yalwe mboka aavali yawo ya ninga ashihe shoka taya vulu ye ya putudhile moshili, ohaye ke yi etha po ngele ya koko. Kehe gumwe gwomutse oku na okuhogolola ngele okwa hala okulongela Jehova. (Jos. 24:15) Onkee ano, ngele omumwoye okwa etha po okulongela Jehova, ino ipa ombedhi!

6. Omuntu otashi vulika a gumwe ngiini uuna yina nenge he a etha po okulongela Jehova?

⁶ Omathimbo gamwe, omuvali otashi vulika a thige po oshili nosho wo uukwanegumbo we. (Eps. 27:10) Shoka otashi vulu okuguma nayi oyana mboka ya kala ye mu tala ko e li oshiholelwa oshiwanawa. Esther, ngoka he a li a kondwa, okwa ti: “Sho nda tseya kutya tate oye mwene a hogolola e ethe po okulongela Jehova, osha li sha lilitha ndje. Ondi hole tate, onkene sho a kondwa, onda kala handi ipula nonkalo ye. Onda li nokuli handi kala nda lyalyakana.”

7. Jehova oha kala e uvitile ngiini aagundjuka mboka aavali yawo ya kondwa?

⁷ Aagundjuka, ngele gumwe gwomaavali yoye okwa kondwa, otu ku uvitile uukwawo wanankali! Shilipalekwa kutya Jehova oku shi nkene wu uvite. Oku ku hole nokwa pandula sho to tsikile oku mu longela nuudhiginini. Aamwaho nayo oye ku hole noya pandula sho wu li oshitopolwa shegongalo. Dhimbulukwa wo kutya ngele omuvali gwoye okwa etha po okulongela Jehova, ombedhi kayi shi yoye. Ngaashi sha popiwa metetekelo, Jehova okwa pa kehe gumwe gwomutse emanguluko lyokuninga omatokolo. Onkee ano, kehe Omukriste a ninginithwa oku na “okuhumbata ye mwene omutenge gwe.” — Gal. 6:5.

8. Oshike iilyo yuukwanegumbo tayi vulu okuninga manga ya tegelela ngoka a kondwa a galulilwe megongalo? (Tala wo oshimpungu “ Galukila kuJehova.”)

⁸ Uuna gumwe a kondwa, oshi li paunshitwe okukala tu na etegameno kutya esiku limwe ota ka galulilwa megongalo. Oshike to vulu okuninga, manga wa tegelela esiku ndyoka? Kala to ipalutha pambepo. Ngele owa kala ho shi ningi, kungawo oto ka tulila po yaandjeni oshiholelwa oshiwanawa, mwa kwatelwa wo ngoka a kondwa. Otashi ke ku kwathela wo wu mone oonkondo ndhoka wa pumbwa wu ungaunge nonkalo ndjoka. Ngashingeyi natu ka kundathaneni kombinga yaashoka to vulu okuninga wu kaleke eitaalo lyoye lya kola.

9. Oshike to vulu okuninga wu kaleke eitaalo lyoye lya kola? (Tala wo oshimpungu “ Omanyolo ngoka taga vulu oku ku hekeleka uuna gumwe ngoka wu hole a thigi po oshili.”)

⁹ Kala ho ningi ashihe shoka to vulu wu kaleke eitaalo lyoye lya kola. Osha simana noonkondo wu koleke eitaalo lyoye nosho wo lyaanegumbo  lyoye. Ongiini to vulu oku shi ninga? Jehova ota vulu oku ku nkondopaleka, mokukala ho lesha Oohapu dhe kehe esiku nokutedhatedha kudho nosho wo mokukala pomakugongala gopaKriste. Joanna, ngoka he nosho wo omumwayinakadhona ya thigi po shili, okwa ti: “Ohandi kala ndi uvite ombili uuna tandi lesha mOmbiimbeli kombinga yaapiya yaJehova ngaashi Abigal, Ester, Job, Josef nosho wo Jesus. Iiholelwa yawo ohayi tsu ndje omukumo nohayi kwathele ndje kaandi kale ndu uvite unene nayi nondi kale ndi na etaloko ewanawa. Onda mona wo kutya omaimbilo getu ngoka haga piti mopolohalama yetu yotiivii JW ohaga tsu ndje omukumo.”

10. Episalomi 32:6-8 otali vulu ngiini oku tu kwathela uuna tu li monkalo ondhigu?

¹⁰ Mbumbulila Jehova omutima gwoye. Ino etha po oku mu galikana uuna to ungaunga nonkalo ondhigu. Mu indila e ku kwathele wu kale ho tala ko iinima ngaashi ye, e ku ‘ulukile ondjila ndjo wu na okulandula noku ku wilike.’ (Lesha Episalomi 32:6-8.) Odhoshili kutya omathimbo gamwe otashi vulika shi kale oshidhigu okulombwela Jehova nkene wu uvite. Nonando ongawo, Jehova oha kala e uvite ko thiluthilu nkene tu uvite. Oku ku hole noonkondo note ku ladhipike wu mu mbumbulile omutima gwoye. — Eks. 34:6; Eps. 62:7, 8.

11. Shi ikolelela kAahebeli 12:11, omolwashike tatu vulu okutya egeeloputudho ndyoka Jehova he tu pe oli li euliko kutya oku tu hole? (Tala wo oshimpungu “ Okukondwa oku li egeeloputudho lyopahole.”)

¹¹ Tsa kumwe netokolo lyaakuluntugongalo. Okukondwa oku li euliko kutya Jehova oku tu hole, oshoka oku lile po uuwanawa wetu atuheni, mwa kwatelwa wo ngoka a kondwa. (Lesha Aahebeli 12:11.) Uuna gumwe a kondwa megongalo, yamwe otashi vulika ya tye kutya aakuluntugongalo inaya ninga etokolo lyomondjila. Ihe dhimbulukwa kutya aantu mboka olundji ihaya kala ya hala okupopila muuwinayi ngoka a yona. Olundji ihatu kala tu shi ashihe shoka sha kwatelwa mo. Onkene shilipalekwa kutya aakuluntugongalo ohaya ningi ashihe shoka  taya vulu ya landule omithikampango dhOmbiimbeli, uuna taya ungaunga noshipotha shaangoka a yona, ngaashi “Jehova” (NW) a tegelela. — 2 Ondjal. 19:6.

12. Uuwanawa wuni yamwe ya mona sho ya tsu kumwe negeeloputudho lyaJehova?

¹² Ngele owa tsu kumwe netokolo lyaakuluntugongalo lyokukonda mo megongalo gumwe ngoka wu hole, otashi vulika shi mu kwathele a galukile kuJehova. Omumwameme Elizabeth ngoka a popiwa metetekelo okwa zimine a ti: “Osha li oshidhigu noonkondo okweetha po eendathano nomwanamati gwetu. Ihe konima sho a galukile kuJehova okwa ti kutya osha li etokolo li li mondjila sho a kondwa noshe mu longa iiyilongomwa iiwanawa oyindji. Omumwameme Elizabeth okwa gwedha ko a ti: “Shoka osha longa ndje wo ndi kale nda lenga egeeloputudho lyaJehova.” Omusamane gwe, Mark, okwa gwedha ko wo a ti: “Sho pwa piti ethimbo, omwanamati gwetu okwa lombwele ndje kutya okuyanda kwetu okweendathana naye nako okwe mu ningitha a kale a halelela okugalukila kuJehova. Onda pandula noonkondo sho Jehova e tu kwathele tu vulike kuye.”

13. Oshike tashi vulu oku ku kwathela wu ungaunge nokukala wu uvitile nayi onkalo moka wu li?

¹³ Kala ho popi nookuume koye kombinga yankene wu uvite. Kala wo ho endathana nooitaali ya pyokoka pambepo, mboka taya vulu oku ku kwathela wu kale wu na etaloko ewanawa kombinga yonkalo moka wu li. (Omayel. 12:25; 17:17) Joanna, ngoka a popiwa metetekelo, okwa ti: “Petameko onda li ndi uvite ndi li ongame awike. Ihe okupopya nookuume aainekelwa okwa kwathele ndje lela.” Oshike nduno mbela to vulu okuninga po uuna yamwe megongalo ya popi nenge ya ningi sha shoka tashi ku ningitha wu kale wu uvitile nayi onkalo moka wu li?

14. Omolwashike tu na okukala hatu ‘dhiminathana po oondjo ethimbo kehe’?

¹⁴ Kala ho idhidhimikile ooitaali ooyakweni. Katu na okutegelela ya kale ihaaya popi iinima mbyoka tayi vulu oku tu uvitha nayi. (Jak. 3:2) Atuheni inatu gwanenena, onkene ino kala wa kumwa uuna gumwe a kala kee shi shoka e na oku ku lombwela nenge a popi sha shoka tashi ku uvitha nayi. Dhimbulukwa wo omayele gomuyapostoli Paulus ngoka taga ti: “Dhiminathanii po oondjo ethimbo kehe, uuna pe na ngoka a ningathana namukwawo.” (Kol. 3:13) Omumwameme gumwe ngoka omukwanezimo gwe a kondwa okwa ti: “Jehova okwa kwathela ndje ndi dhimine po aamwatate naamwameme mboka ya li ya kambadhala okuningila ndje shoka shu uka momukalo gwa puka.” Oshike shoka ooitaali megongalo taya vulu okuninga, opo ya kwathele aanegumbo yaangoka a kondwa?

15. Oshike tatu vulu okuninga tu kwathele aanegumbo yaangoka a kondwa?

¹⁵ Kala ho taamba ko aanegumbo yaangoka a kondwa nomaako agehe pokugongala. Omumwameme gwedhina Miriam okwa zimine kutya okwa li ha kala a tila okuya kokugongala sho omumwayinamati a kondwa. Okwa ti: “Onda li handi kala nda tila kutya aantu otaya ka tila ndje ngiini. Ihe opwa li aamwatate naamwameme oyendji mboka ya li ye uvitile ndje uukwawo  wanankali nokaya li haya kala ya geela nenge ya popile muuwinayi omumwamememati ngoka a kondwa. Oya kwathele ndje wo kaandi kale ndi uvite ndi li ongame awike.” Omumwameme gumwe okwa ti: “Konima sho omwanamati gwetu a kondwa, ookuume ketu oya li ye tu hekeleke. Yamwe oya li ye shi zimine kutya kaye shi shoka ye na oku tu lombwela. Yamwe oya li ya lili pamwe nangame, omanga yalwe ya nyolele ndje oontumwafo tadhi tsu omukumo. Shoka ya ningile ndje osha li sha kwathele ndje noonkondo!”

16. Egongalo otali vulu ngiini okutsikila okukwathela aanegumbo yaangoka a kondwa?

¹⁶ Tsikila okwaambidhidha aanegumbo yaangoka a kondwa. Ngashingeyi olyo ethimbo ya pumbwa unene okuulukilwa ohole nosho wo okutsuwa omukumo. (Heb. 10:24, 25) Omathimbo gamwe, aanegumbo yaangoka a kondwa ohaye shi ndhindhilike kutya yamwe megongalo ihaya kala we ya hala okupopya nayo, ya fa andola nayo ya kondwa. Inatu etha nando ooitaali ooyakwetu ya kale ye uvite ngawo! Aagundjuka mboka aavali yawo ya thiga po oshili oyo unene ya pumbwa okupandulwa nokutsuwa omukumo. Omumwameme Maria, ngoka omusamane gwe a kondwa e ta thigi po uukwanegumbo we, okwa ti: “Ookuume kandje yamwe oya kala haye ya kaandjetu ya kwathele ndje nokuteleka noya li wo haye tu wayimine pelongelokalunga lyetu lyuukwanegumbo. Oya li haya kala ye uvitile ndje uukwawo wanankali noya li wo haya lili pamwe nangame. Oya kala wo haya popile ndje uuna aantu taya popi iinima kaayi li paushili kombinga yandje. Oya li ya tsu ndje lela omukumo!” — Rom. 12:13, 15.

17. Aakuluntugongalo otaya vulu ngiini okukwathela aanegumbo yaangoka a kondwa?

¹⁷ Aakuluntugongalo, longitheni ompito kehe tamu mono mu tse omukumo aanegumbo yaangoka a kondwa. Omu na oshinakugwanithwa shi ikalekelwa shokuhekeleka aanegumbo yaangoka a etha po okulongela Jehova. (1 Tes. 5:14) Kaleni hamu ningi oonkambadhala mu ya tse omukumo manga okugongala inaaku tameka naasho kwa pita mo. Kaleni hamu ya talele po nokugalikana pamwe nayo. Kaleni wo hamu longo pamwe nayo muukalele, nenge mu kale hamu ya hiya ye mu wayimine pelongelokalunga lyeni lyuukwanegumbo. Aakuluntugongalo oye li aasita yegongalo,  noya pumbwa okukala haya ulukile oonzi dhaJehova olukeno nohole nokuulika kutya oye na ko nasha nadho. — 1 Tes. 2:7, 8.

18. Shi ikolelela kuPetrus omutiyali 3:9, oshike shoka Jehova a hala mboka ya etha po oku mu longela ya ninge?

¹⁸ Jehova “ina hala, ku kale nando ogumwe ta geelwa, ihe okwa hala, aantu ayehe ye ethe uulunde wawo.” (Lesha 2 Petrus 3:9.) Nonando omuntu otashi vulika a yone eyono lya kwa miiti, omwenyo gwe ohagu kala natango gu na ondilo momeho gaKalunga. Dhimbulukwa kutya Jehova okwa yamba po omwenyo gwOmwana gu na ondilo, opo e tu hupithe. Jehova oha kambadhala okukwathela mboka ya etha po oku mu longela ya galukile kuye. Oha kala e na etegameno kutya otaya ka galukila kuye, ngaashi tu shi wete methaneko lyaJesus lyomumati ngoka a kanene. (Luk. 15:11-32) Oyendji mboka ya li ya thigi po oshili lwanima oya ka galukila kuTate gwawo gwomegulu omunahole, negongalo olye ya taamba ko nomaako agehe. Omumwameme Elizabeth, ngoka a popiwa metetekelo, okwa li a nyanyukwa sho omwanamati a galulilwa megongalo. Okwa ti: “Onda pandula noonkondo sho oyendji ya li ye tu ladhipike kaatu teke omukumo.”

19. Omolwashike tatu vulu okutsikila okukala tu na einekelo muJehova?

¹⁹ Otatu vulu aluhe okwiinekela muJehova. Ke na siku e tu lombwele tu ninge sha shoka tashi vulu oku tu etela oshiponga. Oku li Tate ha gandja nohu ulukile ohole nolukeno ayehe mboka ye mu hole nohaye mu longele. Kala wu na uushili kutya Jehova ite ke ku ekelahi uuna wu li monkalo ondhigu. (Heb. 13:5, 6) Mark, ngoka a popiwa metetekelo, okwa ti: “Jehova ohe tu ambidhidha aluhe momaupyakadhi getu. Oku li aluhe popepi natse uuna twa taalela onkalo ondhigu.” Jehova ota ka tsikila oku ku pa “oonkondo ndhoka dhi vule dhopaunshitwe.” (NW) (2 Kor. 4:7) Eeno, oto vulu okutsikila okukala omudhiginini nowu na etegameno lya kola, nonando gumwe ngoka wu hole okwe etha po okulongela Jehova.