1. Shi ikolelela kuMaleaki 3:16, Jehova okwa kala ta nyola embo lini, noli na shike?

 UULE womimvo omayuvi, Jehova okwa kala ta nyola embo li ikalekelwa. Embo ndyono oli na omusholondondo gwomadhina, okutameka nedhina lyonzapo yotango ondhiginini, Abel. b (Luk. 11:50, 51) Okuza pethimbo ndyono, Jehova okwa kala ta gwedha mo membo ndyoka omadhina, nokunena omu na omadhina omamiliyona. MOmbiimbeli, embo ndyoka otali ithanwa kutya “embo lyokudhimbulukwa,” (NW) ‘embo lyaanamwenyo’ nosho wo “ondhingambo yomwenyo.” (OB-1954) Moshitopolwa shino otatu ka longitha uutumbulilo ‘embo lyaanamwenyo.’ — Lesha Maleaki 3:16; Eh. 3:5; 17:8.

2. Omadhina goolye ga nyolwa membo lyaanamwenyo, noshike tatu vulu okuninga opo omadhina getu ga nyolwe membo ndyoka?

² Membo ndyoka li ikalekelwa omu na omadhina gaayehe mboka haya longele Jehova netilosimaneko, noye hole edhina lye. Aantu mboka otaya ka mona omwenyo gwaaluhe. Kunena natse omadhina getu otaga vulu okunyolwa mo membo ndyoka, ngele otwa kala tu na ekwatathano lya kola naJehova shi ikolelela kekuliloyambo lyOmwana, Jesus Kristus. (Joh. 3:16, 36) Atuheni otwa hala omadhina getu ga kale ga nyolelwa membo ndyoka, kutya nduno otu na etegameno lyoku ka kala megulu nenge okombanda yevi.

3-4. (a) Mbela osha yela nale kutya otatu ka mona omwenyo gwaaluhe, ngele omadhina getu oga nyolwa mo ngashingeyi membo lyaanamwenyo? Shi yelitha. (b) Oshike tatu ka kundathana moshitopolwa shika nomwaashoka tashi landula ko?

 ³ Mbela shino osha hala okutya aantu mboka omadhina gawo ge li membo lyaanamwenyo otaya ka mona nale omwenyo gwaaluhe? Eyamukulo kepulo ndyoka otatu li adha moohapu ndhoka Jehova a li a lombwele Moses muEksodus 32:33. Jehova okwa ti: “Ngoka a yono kungame, oye tandi dhimi mo membo lyandje.” Onkee, omadhina ngoka ge li membo ndyoka ngashingeyi, otaga vulu okudhimwa mo. Shoka osha fa Jehova petameko e ga nyola mo nopena yekala. (Eh. 3:5) Onkee otu na okushilipaleka kutya omadhina getu omo taga kala membo ndyoka, sigo ga nyolwa mo nopena yohinga pathaneko.

⁴ Otashi vulika tu ipule omapulo ngaka. Pashiholelwa, Ombiimbeli otayi ti ngiini kombinga yaamboka omadhina gawo ga nyolwa mo membo lyaanamwenyo nosho wo gaamboka omadhina gawo inaaga nyolwa mo? Uunake mboka omadhina gawo ga nyolwa membo lyaanamwenyo taya ka mona omwenyo gwaaluhe? Ongiini kombinga yaambono ya sa inaaya mona nando ompito yokutseya Jehova? Mbela otashi wapa ngaa omadhina gawo ga ka nyolwe mo membo ndyono? Omapulo ngono otaga ka yamukulwa moshitopolwa shika nomwaashoka tashi landula ko.

OMADHINA GOOLYE GE LI MEMBO LYAANAMWENYO?

5-6. (a) Ngaashi sha popiwa mAafilippi 4:3, yamwe yomwaamboka omadhina gawo ga nyolelwa membo lyaanamwenyo oolye? (b) Uunake omadhina gawo taga ka kala ga nyolelwa membo lyaanamwenyo sigo aluhe?

⁵ Omadhina goolye ga nyolelwa membo lyaanamwenyo? Opo tu yamukule epulo ndyoka, natu ka kundathaneni oongundu ntano dha yoolokathana dhaantu. Moongundu ndhono, omadhina gayamwe oga nyolelwa membo lyaanamwenyo omanga gayalwe inaga nyolelwa mo.

⁶ Ongundu yotango oyaamboka ya hogololwa ya ka pangele pamwe naJesus megulu. Mbela  omadhina gawo kunena oga nyolelwa membo lyaanamwenyo? Eeno. Shi ikolelela koohapu dhomuyapostoli Paulus ndhoka a li a lombwele “aalongi ooyakwawo” muFilippi, omadhina gaagwayekwa, mboka oyo ya hiywa ya ka pangele pamwe naJesus omo ge li membo lyaanamwenyo. (Lesha Aafilippi 4:3) Ihe opo ya kaleke omadhina gawo membo ndyoka, oye na okutsikila okukala aadhiginini. Nongele oya pewa oshihako shahugunina kutya nduno omanga inaaya sa nenge omanga uudhigu unene inawu ya, omadhina gawo otaga ka kala ga nyolelwa membo lyaanamwenyo sigo aluhe. — Eh. 7:3.

7. Shi ikolelela kEhololo 7:16, 17, uunake omadhina gongundu oonene yoonzi dhilwe taga ka kala ga nyolelwa membo lyaanamwenyo sigo aluhe?

⁷ Ongundu ontiyali oya thikama po mongundu onene yoonzi dhilwe. Mbela omadhina gawo ngashingeyi oga nyolelwa membo lyaanamwenyo? Eeno. Mbela omadhina gawo omo taga ka kala membo lyaanamwenyo konima ngele ya hupu puArmagedon? Eeno. (Eh. 7:14) Jesus okwa ti kutya mboka ya fa oonzi otaya ka ya “momwenyo gwaaluhe.” (Mat. 25:46) Ihe mboka taya ka hupa puArmagedon itaya ka mona nziya omwenyo gwaaluhe. Omadhina gawo otaga ka kala ga nyolwa membo lyaanamwenyo nopena yekala pathaneko. Pethimbo lyElelo lyOomvula Eyuvi, Jesus “ota ka kala omusita gwawo note ke ya wilika noku ya fala koothithiya dhomeya omanamwenyo.” Mboka taya ka vulika kewiliko lyaKristus nosho wo kutya Jehova okwe ya tala ko aadhiginini, omadhina gawo otaga ka nyolwa membo lyaanamwenyo ga kale mo sigo aluhe. — Lesha Ehololo 7:16, 17.

8. Omadhina goolye inaaga nyolelwa membo lyaanamwenyo, notaya ka ningilwa shike?

⁸ Ongundu ontitatu oyiikombo, aantu mboka taya ka hanagulwa po puArmagedon. Omadhina gawo inaga nyolelwa membo lyaanamwenyo. Jesus okwa ti kutya “otaa ka ya mokugeyelwa kwaaluhe.” (Mat. 25:46) Paulus okwa li a nwethwa mo nokwe tu lombwele kutya “oyo otaa ka adhika kegeelo lyehanagulo lyaaluhe.” (2 Tes. 1:9; 2 Pet. 2:9) Shono ngawo, osho naanaa tashi ka ningilwa mboka ya kala taya yonene owina kombepo ondjapuki. Nayo otaya ka hanagulwa po sigo aluhe, ihe itaya ka mona omwenyo gwaaluhe. Osha yela kutya itaya ka yumudhwa. (Mat. 12:32; Mark. 3:28, 29; Heb. 6:4-6) Natu ka taleni ishewe koongundu mbali dhaantu mboka taya ka yumudhilwa kombanda yevi.

MBOKA TAYA KA YUMUDHWA

9. Ngaashi sha popiwa mIilonga 24:15, oongundu mbali dhaantu dhini tadhi ka yumudhilwa kombanda yevi, neyooloko lini li li pokati koongundu ndhoka mbali?

⁹ Ombiimbeli otayi popi kombinga yoongundu mbali dhaantu mbono taya ka yumudhwa ya ka kale nomwenyo sigo aluhe kombanda yevi, ongundu yaantu ‘aawanawa,’ ano aayuuki nongundu yaantu ‘aawinayi,’ ano aalunde. (Lesha Iilonga 24:15.) Aantu ‘aawanawa’ oomboka ya kala taya longele Jehova nuudhiginini manga ya li ye na omwenyo. Omanga aantu ‘aawinayi’ inaya longela Jehova nuudhiginini. Nokuli oyendji yomuyo kaya li hayi ihumbata pauyuuki. Molwaashono oongundu ndhoka adhihe otadhi ka yumudhwa, mbela otatu vulu ngaa kutya omadhina gawo oga nyolelwa membo lyaanamwenyo? Opo tu yamukule epulo ndyoka, natu ka taleni koongundu ndhoka kooyimwe.

10. Omolwashike aantu ‘aawanawa’ taya ka yumudhwa, nuuthembahenda wuni yamwe yomuyo taya ka kala ye na? (Tala oshitopolwa “Omapulo ga za kaaleshi” shoka tashi popi kombinga yeyumuko tali ka ningwa kombanda yevi.)

¹⁰ Ongundu ontine oyaantu ‘aawanawa.’ Manga inaaya sa, omadhina gawo oga adhika nale ga nyolelwa membo lyaanamwenyo. Mbela omadhina gawo oga li ga dhimwa mo membo lyaanamwenyo sho ya si? Hasho nando, molwaashoka pataloko lyaJehova natango oye na “omwenyo.” Jehova ke shi “Kalunga kaasi, aawe, okaanamwenyo; oshoka mekwatathano naye ayehe otaa kala ye na omwenyo.” (Luk. 20:38) Sha hala kutya sho aayuuki taya ka yumudhwa ya  ka kale nomwenyo kombanda yevi, omadhina gawo otaga ka adhika ga nyolelwa membo lyaanamwenyo nopena yekala pathaneko. (Luk. 14:14) Kapu na omalimbililo kutya yamwe yomwaamboka taya ka yumudhwa otaya ka pewa oshinakugwanithwa shokuyakula ye li ‘aakwaniilwa kombanda yevi alihe.’ — Eps. 45:16.

11. Aantu ‘aawinayi’ otaya ka pumbwa okwiilonga shike tango, opo omadhina gawo ga nyolwe membo lyaanamwenyo?

¹¹ Hugunina, natu ka taleni kongundu ontitano yaantu ‘aawinayi.’ Molwaashono aantu mbono otashi vulika kaya li ye shi omithikampango dhaJehova, kaya li hayi ihumbata pauyuuki manga inaaya sa. Onkee omadhina gawo kaga li ga nyolelwa membo lyaanamwenyo. Ihe sho taya ka yumudhwa, Kalunga ote ke ya pa ompito omadhina gawo ga nyolelwe membo lyaanamwenyo. Aantu mbaka ‘aawinayi’ otaya ka pumbwa lela ekwatho. Oshoka sho ya li ye na omwenyo, yamwe yomuyo oya li haya longo iinima iiwinayi noonkondo. Onkee otaya ka pumbwa okulongwa nkene ye na okukala metsokumwe nomithikampango dhaJehova dhuuyuuki. Opo ya ka longwe nkene ye na oku shi ninga, pethimbo lyUukwaniilwa waKalunga otapu ka kala opolohalama onene yokulonga aantu mboka, ndjoka inaayi ningwa nando onale mondjokonona yaantu.

12. (a) Oolye taya ka longa aantu mboka aawinayi? (b) Oshike tashi ka ningilwa mboka taya ka tinda okutula miilonga shoka yi ilonga?

¹² Oolye taya ka longa aantu mboka aawinayi? Ongundu onene nosho wo aayuuki mboka taya ka yumudhwa. Opo omadhina gaantu mboka aawinayi ga nyolelwe membo lyaanamwenyo, otaya ka pumbwa okukala ye na ekwatathano naJehova noku mu iyapulila. Jesus Kristus pamwe naagwayekwa otaya ka tala kehumokomeho ndyoka tali ningwa kaantu mboka aawinayi sho taya longwa. (Eh. 20:4) Kehe ngoka ta ka tinda okukala metsokumwe nelongo ndyoka, kutya nduno oku na oomvula ethele, ota ka hanagulwa po. (Jes. 65:20) Jehova naJesus oye shi shoka shi li momitima dhaantu, onkee otaya ka shilipaleka kutya muuyuni uupe itamu ka kala nando omuntu ha longo uuwinayi. — Jes. 11:9; 60:18; 65:25; Joh. 2:25.

 MBOKA TAYA KA YUMUKILA OMWENYO NAAMBOKA TAYA KA YUMUKILA EPANGULO

13-14. (a) Monakuziwa, oohapu ndhoka tadhi adhika muJohannes 5:29 otwa li tu dhi uvite ko ngiini? (b) Oshike twa pumbwa okundhindhilika kombinga yoohapu ndhoka?

¹³ Jesus okwa popi wo kombinga yaantu mboka taya ka yumudhilwa kombanda yevi. Pashiholelwa, okwa ti: “Ethimbo otali ya, uuna oonakusa ayehe mboka ye li moombila, taa ka uva ewi lye. Yo notaa ka za mo moombila dhawo: mboka ya longo uuwanawa, otaa ka yumudhwa e taa kala ye na omwenyo, naamboka ya longo uuwinayi, otaa ka yumudhwa e taa ka pangulwa.” (Joh. 5:28, 29) Mbela Jesus okwa li a hala okutya ngiini?

¹⁴ Nale otwa li hatu ti kutya iilonga mbyoka ya popiwa kuJesus moovelise ndhoka oombyoka aayumudhwa taya ka longa konima ngele ya yumudhwa, ano kutya yamwe otaya ka yumudhwa e taya ka longa uuwanawa, omanga yalwe taya ka yumudhwa e taya ka longa uuwinayi. Ihe ndhindhilika kutya Jesus ina tya kutya mboka taya ka za mo moombila otaya ka longa uuwanawa nenge otaya ka longa uuwinayi. Okwa longitha epitathimbo. Okwa popi mboka ya “longo uuwanawa” naamboka ya “longo uuwinayi.” Shika otashi ulike kutya aantu mbono iilonga mbyono oye yi longo manga inaaya sa. Shoka oshi li lela mondjila. Omolwashike tatu tile ngawo? Omolwaashoka muuyuni uupe itamu ka pitikilwa nando omuntu ha longo uuwinayi. Onkee aantu aawinayi oye na okukala ya longo uuwinayi manga inaaya sa. Oohapu dhaJesus ndhoka tadhi popi kombinga yaamboka taya ka “yumukila omwenyo” naamboka taya ka “yumukila epangulo” odha hala nduno okutya ngiini?

15. Oolye taya ka “yumukila omwenyo gwaaluhe,” nomolwashike?

¹⁵ Aantu aawanawa, mboka ya longa uuwanawa manga inaaya sa, otaya ka “yumukila omwenyo,” molwaashoka omadhina gawo otaga ka adhika nale ga nyolelwa membo lyaanamwenyo. Shoka osha hala okutya eyumuko “lyaamboka ya longo uuwanawa” lya tumbulwa muJohannes 5:29, olya faathana neyumuko ‘lyaawanawa’ ndyoka lya popiwa mIilonga 24:15. Uuyelele mboka owu li metsokumwe naashoka sha popiwa mAaroma 6:7, ndjoka tayi ti: “Omuntu ngele okwa sa, nena okwa mangululwa moonkondo dhuulunde.” Sho aayuuki ya si, Jehova okwe ya dhimina po omayono gawo. Ihe ota ka dhimbulukwa iilonga yawo ayihe yuudhiginini mbyoka ya li ya longo manga ya li momwenyo. (Heb. 6:10) Odhoshili kutya aayuuki mboka taya ka yumudhwa otaya ka pumbwa okutsikila okukala aadhiginini, opo omadhina gawo ga kale mo sigo aluhe membo lyaanamwenyo.

16. Aantu mboka taya ka “yumudhwa e taa ka pangulwa” otaya ka pangulwa meityo lini?

¹⁶ Mboka ya longa uuwinayi manga inaaya sa otaya ka ningilwa shike? Nonando omayono gawo oga dhimwa po sho ya si, inaya kala haya longele Jehova nuudhiginini. Omadhina gawo inaga nyolwa membo lyaanamwenyo. Onkee ano, eyumuko ‘lyaamboka ya longo uuwinayi’ olya faathana neyumuko ‘lyaawinayi’ mboka ya popiwa mIilonga 24:15. Aantu mbono “otaa ka yumudhwa e taa ka pangulwa.” c Aawinayi otaya ka pangulwa meityo ndino kutya Jesus ote ke ya konakona nawa. (Luk. 22:30) Konima ngele pwa piti ethimbo lyontumba, Jesus opo owala ta ka mona kutya omadhina gawo oga gwana okunyolwa membo lyaanamwenyo. Aantu mboka aawinayi Jehova ote ke ya tala ko kutya oya gwana okunyolwa membo lyaanamwenyo, ngele oye etha po eihumbato lyawo ewinayi e taye mu iyapulile.

17-18. Aantu ayehe mboka taya ka yumukila omwenyo kombanda yevi otaya ka pumbwa okuninga shike, ‘niilonga’ mbyoka ya popiwa mEhololo 20:12, 13 oyini?

¹⁷ Kutya nduno yamwe oya li aawanawa nenge aawinayi, mboka taya ka yumudhwa otaya ka  pumbwa okuvulika koompango ndhoka tadhi ka adhika momambo omape ngoka taga ka pandjwa pethimbo lyoomvula 1 000. Omuyapostoli Johannes okwa hokolola emoniko ndyoka a ti: “Onda mono oonakusa, aanenentu naadhinwa ya thikama komeho goshipangelapundi. Omambo oga li ga pandjwa, nembo ekwawo, embo lyaanamwenyo, olya pandjwa. Oonakusa oya pangulwa noya tokolelwa shaa ngoka ngaashi e shi ilongela, ngashika sha nyolwa membo.” — Eh. 20:12, 13.

¹⁸ Mboka taya ka yumudhwa otaya ka pangulwa shi ikolelela ‘kiilonga’ yini? Mbela iilonga mbyoka ya li ya longo manga inaaya sa? Aawe! Dhimbulukwa kutya omayono gawo oga dhimwa po sho ya si. Onkee ano, ‘iilonga yawo’ itayi vulu okukala iilonga mbyoka ya li ya longo sho ya li momwenyo. Ihe, iilonga mbika oombyoka taya ka longa ngele ya longwa oshili muuyuni uupe. Aalumentu aadhiginini, Noa, Samuel, David naDaniel nayo otaye ki ilonga kombinga yaJesus Kristus nosho wo okukala yi itaala mekuliloyambo lye. Ngele aalumentu mbono otaye ki ilonga oshindji, osha yela kutya naamboka aawinayi otayi ki ilonga oshindji shi vulithe po!

19. Oshike tashi ka ningilwa mboka taya ka tinda ompito ndjoka ombwanawa?

¹⁹ Oshike tashi ka ningilwa mboka taya ka tinda ompito ndjoka ombwanawa? Ehololo 20:15 otali ti: “Kehe ngoka edhina lye inaali nyolelwa membo lyaanamwenyo, oku umbilwa mefuta lyomulilo.” Aantu mboka taya ka tinda okuvulika, otaya ka hanagulwa po thiluthilu. Onkee inashi simana tuu, tu shilipaleke kutya omadhina getu oga nyolwa membo lyaanamwenyo na omo taga kala!

20. Iilonga yini tayi nyanyudha tayi ka longwa pethimbo lyElelo lyOomvula Eyuvi? (Tala ethano lyokombanda.)

²⁰ Elelo lyOomvula Eyuvi itali ka kala tuu ethimbo ewanawa! Otali ka kwatela mo opolohalama onene yokulonga aantu ndjoka inaayi ningwa nando onale kombanda yevi. Ihe otali ka kala wo ethimbo lyokukonakona eihumbato lyaawanawa naawinayi. (Jes. 26:9; Iil. 17:31) Opolohalama ndjoka yokulonga aantu otayi ka ningwa ngiini? Oshitopolwa tashi landula, otashi ke tu kwathela tu uve ko notu kale twa pandula elongekidho ndika ewanawa kaaku na we.