1. Ongiini tatu vulu okumona kutya omuntu gwontumba omwiinekelwa?

 OMUNTU ngoka omwiinekelwa oha kambadhala aluhe okukala metsokumwe nomauvaneko ge noha popi oshili. (Eps. 15:4) Aantu oye shi kutya otaya vulu okwiinekela omuntu ngoka. Otwa hala aamwatate naamwameme ya kale ye tu uvitile ngawo. Oshike tatu vulu okuninga, opo ya kale ye tu inekela?

2. Ongiini tatu vulu okuulika kutya tse aainekelwa?

² Itatu vulu okukondjitha yalwe ye tu inekele. Ihe otu na oku shi ulika miilonga yetu kutya otaya vulu oku tu inekela. Opu na omupopyo gumwe hagu ti kutya okwiinekelwa okwa fa iimaliwa. Okudhigu oku ku mona, ihe oshipu oku ku kanitha. Jehova okwa gwana lela okwiinekelwa kutse. Otatu vulu aluhe oku mu inekela, molwaashoka ‘iilonga ye ayihe oyi shi okwiinekelwa.’ (Eps. 33:4) Okwa tegelela wo tu mu holele. (Ef. 5:1) Ngashingeyi natu ka taleni kiiholelwa yimwe yaapiya yaJehova mboka ya li ya holele He gwawo gwomegulu noya li ye shi ulike kutya yo aainekelwa. Otatu ka tala wo komaukwatya gatano ngoka tage tu kwathele tu kale aainekelwa.

3-4. Omuhunganeki Daniel okwa li e shi ulike ngiini kutya ye omwiinekelwa, naashoka oshi na oku tu inyengitha tu ipule omapulo geni?

³ Omuhunganeki Daniel okwe tu tulila oshiholelwa sha dhenga mbanda shokukala omwiinekelwa. Nonando okwa li a falwa muukwatwa kAababilonia, okwa li e shi ulike kutya ye omwiinekelwa. Aantu oya li ya tameke okukala ye mu inekela shi vulithe nale nokuli, sho kekwatho lyaJehova a li a vulu okufatulula oondjodhi dhomukwaniilwa gwaBabilonia, Nebukadnezzar. Pompito yimwe, Daniel okwa li e na okulombwela omukwaniilwa ngoka kutya Jehova ine mu hokwa, etumwalaka ndyoka omukwaniilwa kehe a  li itaa ka kala a hala okuuva. Daniel okwa li a pumbwa uulaadhi opo a lombwele Nebukadnezzar etumwalaka ndyoka, molwaashoka okwa li omukwaniilwa omugeyintu. (Dan. 2:12; 4:20-22, 25) Konima yomimvo odhindji, Daniel okwa li e shi ulike natango kutya ye omwiinekelwa sho a li a fatulula mondjila etumwalaka kaali shiwike ndyoka lya li lya holoka kekuma lyuuwa muBabilon. (Dan. 5:5, 25-29) Konima yethimbo, Darius Omumedia nosho wo omalenga ge nayo oya li ya ndhindhilike kutya Daniel okwa li “a pita ooyakwawo miilonga.” Oya li ye shi zimine kutya Daniel “okwa li omwiinekelwa noina longa sha shuusama nenge sha puka.” (Dan. 6:3, 4) Aapangeli aapagani nayo oya li ye shi ndhindhilike kutya omulongeli gwaJehova nguka oku shi okwiinekelwa!

⁴ Tu na oshiholelwa shaDaniel momadhiladhilo, oshiwanawa tu ipule omapulo ngaka: ‘Ohandi ihumbata ngiini uuna ndi li naamboka kaaye shi Oonzapo dhaJehova? Mbela ondi shiwike ngaa ndi li omuntu ngoka ha gwanitha po iinakugwanithwa ye nota vulu okwiinekelwa?’ Omolwashike twa pumbwa okwiipula omapulo ngaka ga simana? Omolwaashoka uuna tu li aainekelwa, ohatu simanekitha Jehova.

5. Omolwashike Hanania a li e shiwike kutya omwiinekelwa?

⁵ Momumvo 455 K.E.N., konima sho Omunashikandjo Nehemia a tungulula edhingililokuma lyaJerusalem, okwa li a kongo aalumentu ye shi okwiinekelwa ya tonatele oshilando shoka. Maalumentu mboka, Nehemia okwa hogolola mo elenga ekuluntu lyepopilongulu, Hanania. Ombiimbeli otayi popi kutya Hanania okwa li “omwiinekelwa nomutilikalunga kee shi kuyelekwa.” (Neh. 7:2) Ohole yokuhola Jehova  nuumbanda woku mu yemateka owi inyengitha Hanania a longe nuudhiginini oshilonga kehe a li a pewa. Uukwatya mboka natse otawu vulu oku tu kwathela tu kale tu shi okwiinekelwa miilonga yaKalunga.

6. Tikikus okwa li a ulike ngiini kutya ye oku li kuume omwiinekelwa komuyapostoli Paulus?

⁶ Natu ka taleni koshiholelwa shaTikikus, omumwatate ngoka a li a inekelwa komuyapostoli Paulus. Sho Paulus a li mondholongo yomegumbo, okwa li i inekela Tikikus, nokwa popi kombinga ye a ti kutya ye ‘omuyakuli omwiinekelwa.’ (Ef. 6:21, 22) Paulus kali owala e mu inekelele okufala oontumwafo kaamwatate muEfeso nosho wo muKolossa, ihe oku ke ya tse wo omukumo noku ya hekeleka. Tikikus ohe tu dhimbulukitha aalumentu aadhiginini noye shi okwiinekelwa mboka haye tu sile oshimpwiyu pambepo. — Kol. 4:7-9.

7. Oshike to vulu okwiilonga kombinga yokukala omwiinekelwa kaakuluntugongalo nokaayakuligongalo yomegongalo lyeni?

⁷ Kunena ohatu kala twa pandula noonkondo aakuluntugongalo naayakuligongalo sho ye shi okwiinekelwa. Ngaashi Daniel, Hanania nosho wo Tikikus, aamwatate mbaka ohaya gwanitha po iinakugwanithwa yawo nuudhiginini. Pashiholelwa, uuna twe ya kokugongala kwomokati koshiwike ohatu kala tu shi kutya iitopolwa ayihe mbyoka tayi ka gandjwa po opu na mboka ye yi pewa. Shimwe ishewe, aakuluntugongalo ihaya kala tuu ya pandula aamwatate naamwameme mboka ya pewa iitopolwa mbyoka, ngele oye yi ilongekidhila notaye yi gandja! Pashiholelwa, ihatu ongaonga okuhiya aakonakonimbiimbeli yetu kokugongala kwomokati koshiwike, molwaashoka twa tila kutya omumwatate ngoka ta ka gandja oshipopiwa shomontaneho okwa dhimbwa. Ohatu kala wo tu na einekelo kutya iileshomwa mbyoka twa pumbwa oku ka longitha miilonga yokuuvitha omo yi li megongalo. Ohatu silwa nawa oshimpwiyu kaamwatate mboka aadhiginini, nohatu pandula Jehova omolwayo! Ihe omomikalo dhini nduno tatu vulu okuulika kutya tse aainekelwa?

8. Ongiini tatu vulu okuulika ondjele uuna tatu ulike kutya otu na ko nasha nayalwe? (Omayeletumbulo 11:13)

⁸ Otu hole aamwatate naamwameme nohatu kala twa hala okuuva kutya oye li po ngiini. Ihe otu na okukala tu na ondjele nokukala ihaatu holola iinima yawo yopaumwene. Aakriste yamwe yomethelemumvo lyotango oya li haya ‘hokola yakwawo nokwiitula miinima yaantu, nokupopya iinima mbyoka itaayi pumbwa okupopiwa.’ (1 Tim. 5:13, yelekanitha NW) Onkee inatu hala okukala nando twe ya fa. Ihe natu tye andola gumwe okwe tu lombwele uuyelele we wopaumwene, e na einekelo kutya itatu ke wu lombwela yalwe. Pashiholelwa, omumwameme gumwe otashi vulika e tu lombwele kombinga yomukithi gwontumba e gu na nenge kombinga yeshongo lilwe ndyoka e na, e te tu lombwele kaatu shi popye puyalwe. Otu na okuninga shoka a ti. b (Lesha Omayeletumbulo 11:13.) Ngashingeyi natu ka taleni koonkalo dhilwe moka sha simana tu kale hatu siikilile iinima.

9. Iilyo yuukwanegumbo tayi vulu okuulika ngiini kutya yo iiyinekelwa?

⁹ Megumbo. Oshilyo kehe megumbo oshi na oshinakugwanithwa shokukaleka iinima yontumba megumbo iiholekwa. Pashiholelwa, omukulukadhi Omukriste otashi vulika a kale ha ningi oshinima shontumba hashi yolitha omusamane gwe. Mbela omusamane ngoka ota ka popya kombinga yasho puyalwe nokusitha ohoni omukulukadhi gwe? Hasho nando! Oku hole omukulukadhi gwe, noita ka hala okuninga sha tashi mu yemateke. (Ef. 5:33) Aagundjuka nayo oya hala okuungaungiwa nayo nesimaneko. Onkee osha  simana aavali ya kaleke oshinima shoka momadhiladhilo. Kaye na okusitha ohoni oyana mokulombwela yalwe omapuko ngoka oyana ya ninga. (Kol. 3:21) Aanona nayo oya pumbwa okwiilonga okukala ya kotoka, mokukala ihaaya lombwele yalwe iinima mbyoka tayi vulu okusitha ohoni yalwe megumbo. (Deut. 5:16) Ngele kehe gumwe megumbo okwa kala ha kaleke iinima yomegumbo iiholekwa, otashi ka koleka ekwatathano megumbo.

10. Kuume kashili oku li ngiini? (Omayeletumbulo 17:17)

¹⁰ Kala omuntu ngoka ookuume koye taya vulu okwiinekela. Poompito dhimwe, oyendji yomutse ohatu kala tu uvite twa hala okulombwela kuume ketu kopothingo kutya otu uvite lela ngiini. Ihe oshinima shoka omathimbo gamwe ohashi vulika shi kale oshidhigu. Omolwashike mbela? Omolwaashoka otashi vulika tu kale inaatu igilila okulombwela aantu nkene lela tu uvite, notashi ke tu uvitha nayi ngele otwe ku uva kutya kuume ketu ngoka twa lombwela okwe ke shi lombwela yalwe. Ihe ohatu kala twa pandula lela, ngele otu na kuume ngoka hatu vulu okulombwela omaiyuvo getu, notu shi kutya ke na esiku e ke shi lombwele yalwe! Ngoka oye nduno “kuume” kashili. — Lesha Omayeletumbulo 17:17.

11. (a) Aakuluntugongalo nosho wo aakulukadhi yawo ohaya ulike ngiini kutya yo aainekelwa? (b) Oshike tatu vulu okwiilonga komukuluntugongalo gumwe ngoka a ungaunga noshiholekwa shegongalo lyontumba nokonima oshuukwanegumbo we? (Tala ethano.)

¹¹ Megongalo. Aakuluntugongalo mboka ye shiwikile kutya ohaya siikilile iiholekwa, oye li “eshigo lyokushiga ombepo negameno” kaamwatate. (Jes. 32:2) Otu shi kutya otatu vulu okupopya nayo twa manguluka, tu shi kutya ashihe shoka tatu ya lombwele otaye ke shi kaleka oshiholekwa. Ihatu ya thiminike ye tu lombwele iinima mbyoka ye na okukaleka iiholekwa. Shimwe ishewe, ohatu pandula aakulukadhi yaakuluntugongalo molwaashoka ihaya kambadhala okupulapula aasamane yawo ye ya lombwele uuyelele mboka wu li oshiholekwa. Odhoshili kutya oshi li elalekonuuyamba sho aakulukadhi yaakuluntugongalo ihaaya lombwelwa uuyelele wopaumwene kombinga yaamwatate naamwameme. Omukulukadhi gumwe gwomukuluntugongalo  okwa ti: “Onda pandula sho omusamane gwandje ha kaleke uuyelele oshiholekwa waamboka ha popi nayo petalelopo lyuusita nenge ya pumbwa ekwatho lyaakuluntugongalo, nokuli nopwaahe na okupopya omadhina gawo. Ohandi mu pandula wo sho ihaa lombwele ndje iinima mbyoka itaandi vulu okuninga po sha kombinga yayo. Onda manguluka okupopya naamwatate naamwameme ayehe megongalo. Ondi shi wo kutya ngele onda lombwele omusamane gwandje omaiyuvo gandje gopaumwene nenge omaupyakadhi gandje, ite ke ga lombwela yalwe.” Odhoshili kutya atuheni otwa hala okukala tu shiwikile tu li aainekelwa. Omaukwatya geni taga vulu oku tu kwathela tu adhe elalakano ndyoka? Natu ka taleni gatano gomugo.

12. Omolwashike tatu vulu okutya ohole oyo uukwatya wa simanenena mboka tawu tu kwathele tu kale tu shi okwiinekelwa? Gandja oshiholelwa.

¹² Ohole oyo ekankameno lyokukala twi inekelwa. Jesus okwa ti kutya iipango iinene iyali oyo okuhola Jehova nokuhola aantu ooyakwetu. (Mat. 22:37-39) Ohole yetu yokuhola Jehova ohayi tu inyengitha tu landule oshiholelwa she sha dhenga mbanda shokukala omwiinekelwa. Pashiholelwa, ohole yokuhola aamwatate naamwameme ohayi tu inyengitha kaatu lombwele yalwe iinima yawo yopaumwene. Katu na nando okuholola sha shoka tashi vulu oku ya etela oshiponga, tashi ya sitha ohoni, nenge tashi ya uvitha nayi.​—Joh. 15:12.

13. Omomukalo guni eifupipiko hali tu kwathele tu kale aainekelwa?

¹³ Eifupipiko otali tu kwathele tu kale aainekelwa. Omukriste ngoka omwiifupipiki iha kambadhala okupandika kuyalwe mokukala oye gwotango oku ya lombwela oshinima shontumba. (Fil. 2:3) Iha kambadhala okuningitha yalwe ya dhiladhile kutya oku shi iinima ya simana mbyoka inaa pitikwa okupopya kombinga yayo. Eifupipiko otali ke tu keelela wo tu taandelithe omataloko getu yene kombinga yiinima mbyoka inaayi kundathanwa mo mOmbiimbeli nenge miileshomwa yetu ya kankamena kOmbiimbeli.

14. Oondunge dhokuyoolola otadhi vulu oku tu kwathela ngiini tu kale tu shi okwiinekelwa?

¹⁴ Oondunge dhokuyoolola otadhi vulu okukwathela Omukriste a mone kutya “ethimbo lyokumwena, nethimbo lyokupopya” olini. (Omuuv. 3:7) “Okupopya oshisiliveli, ihe okumwena oshingoli,” oshipopiwamayele shimwe shi shiwike nawa momihoko dhimwe. Niitya yimwe, oshi li nawa ethimbo limwe omuntu a mwene pehala lyokupopya. Sho osho Omayeletumbulo 11:12 tage tu ladhipike taga ti: “Omunandunge oha kala a mwena.” Natu taleni koshiholelwa shika. Omukuluntugongalo gumwe a pyokoka olundji oha pulwa a kwathele omagongalo galwe ngoka ge na omaupyakadhi ga kwata miiti. Omukuluntugongalo gumwe okwa popi kombinga yomukuluntugongalo ngoka a ti: “Oha kala aluhe a kotoka uuna tashi ya puuyelele mboka wu li oshiholekwa kombinga yomagongalo galwe.” Molwaashoka omukuluntugongalo ngoka oha longitha oondunge dhokuyoolola moshinima shoka, oshe mu ningitha a kale a simanekwa kaakuluntugongalo ooyakwawo yomegongalo moka e li. Oye shi kutya ke na esiku a ka lombwele yalwe uuyelele mboka wu li oshiholekwa.

15. Gandja oshiholelwa shoka tashi ulike kutya okupopya oshili taku vulu okuningitha yalwe ya kale ye ku inekela.

¹⁵ Okupopya oshili osho oshinima shilwe ishewe twa pumbwa okukala hatu ningi ngele otwa hala tu kale aainekelwa. Ohatu kala twa inekela omuntu ngoka omunashili, molwaashoka otu shi kutya oha popi aluhe oshili. (Ef. 4:25; Heb. 13:18) Pashiholelwa, natu tye nduno owa hala okuhwepopala munkene ho longo yalwe Ombiimbeli. Onkee owa pula gumwe a pulakene koshipopiwa shoye sho to ilongekidha noku ku pe omaetopo ngoka taga vulu oku ku kwathela wu hwepopale. Olye wu wete te ku pe omayele ge li paushili?  Mbela omuntu ngoka he ku lombwele shoka wa hala okuuva nenge omuntu ngoka he ku lombwele oshili? Eyamukulo olya yela. Ombiimbeli otayi ti: “Ekumagidho lyomontaneho oli vule ohole ya holekwa. Iinoto ya notolwa komuholike, oyi na elalakano lyu uka.” (Omayel. 27:5, 6) Nonando ohashi kala oshidhigu okuuva ko petameko, omayele ge li paushili ngoka twa pewa kukuume ketu, otaga vulu oku tu kwathela uule wethimbo ele.

16. Omayeletumbulo 10:19 otaga tsu ngiini omuthindo okukala tu na eipangelo?

¹⁶ Eipangelo olya simana ngele otwa hala yalwe yetu inekele. Uukwatya mboka ohawu tu kwathele tu kale twa mwena uuna tatu makelwa tu holole uuyelele mboka twa lombwelwa tu wu kaleke oshiholekwa. (Lesha Omayeletumbulo 10:19.) Otashi vulika tu shi mone oshidhigu tu kale tu na eipangelo, uuna tatu longitha omakwatathano gopaintaneta. Ngele inatu kotoka, otashi vulika tu lombwele aantu oyendji uuyelele mboka twa li tu na okukaleka oshiholekwa kaashi shi oshiningilawina. Shimwe ishewe, ngele otwa taandeleke uuyelele mboka niikwaelektronika yetu, ihatu vulu okuninga po sha kombinga yankene yalwe taye ke wu longitha nenge kutya otawu ka eta uupyakadhi wu thike peni. Eipangelo ohali tu kwathele wo tu kale twa mwena, ngele aapataneki otaya kambadhala oku tu heka tu holole iinima mbyoka tayi vulu okweetela aamwatate naamwameme oshiponga. Shika ohashi vulu okuholoka uuna tatu pulwa kopolisi miilongo moka iilonga yetu yi indikwa mo thiluthilu nenge inaatu manguluka oku yi longa. Otatu vulu okutula miilonga ekotampango “itandi ti sha,” monkalo ndjoka nosho wo mudhilwe. (Eps. 39:1) Kutya nduno otatu ungaunga naantu yaandjetu, nookuume ketu, naamwatate naamwameme, nenge nomuntu kehe i ili, otwa pumbwa okukala aainekelwa. Ihe opo tu kale aainekelwa, otwa pumbwa wo eipangelo.

17. Ongiini tatu vulu okuhumitha komeho ombepo yeinekelathano megongalo lyetu?

¹⁷ Inatu pandula tuu Jehova sho e tu nanena kongundu yaantu mboka ye holathane noye li aainekelwa! Atuheni otu na oshinakugwanithwa shokukala twa inekelwa kaamwatate naamwameme. Sho tatu ilongo pauhandimwe okuulika ohole, eifupipiko, oondunge dhokuyoolola, okupopya oshili nosho wo eipangelo, ohatu humitha komeho ombepo yeinekelathano megongalo lyetu. Otu na okutsikila okulonga nuudhiginini tu ulike kutya otatu vulu okwiinekelwa kuyalwe. Onkee ano, natu holeleni Kalunga ketu, Jehova, nokutsikila okuulika kutya tse aainekelwa.