Natu ka taleni nkene Ombiimbeli tayi yamukula omapulo ngoka.

Iilonga 24:15 otayi tu lombwele kutya “Kalunga ota ka yumudha aantu ayehe kuusi, naawanawa naawinayi.” Aawanawa aantu mboka ya li haya vulika kuKalunga manga inaaya sa, onkee omadhina gawo oga nyolelwa membo lyaanamwenyo. (Mal. 3:16) Omanga aawinayi oya kwatela mo aantu mboka ya sa inaaya mona ompito yokwiilonga kombinga yaJehova, onkee omadhina gawo inaga nyolelwa membo lyaanamwenyo.

Oohapu ndhoka dha popiwa muJohannes 5:28, 29 odha faathana noongundu mbali ndhoka dha popiwa mIilonga 24:15. Jesus okwa ti kutya “mboka ya longo uuwanawa” otaa ka yumudhwa e taa kala ye na omwenyo, naamboka ya longo uuwinayi, otaa ka yumudhwa e taa ka pangulwa.” Aantu aawanawa oomboka ya longo uuwanawa manga inaaya sa. Otaya ka yumudhwa e taya ka kala ye na omwenyo, molwaashoka omadhina gawo oga nyolelwa membo lyaanamwenyo. Ihe mboka aawinayi oya longa uuwinayi manga inaaya sa. Otaya ka yumudhwa e taa ka pangulwa. Omadhina gawo inaga nyolelwa natango membo lyaanamwenyo, nopu na ethimbo taya ka pangulwa. Pethimbo ndyono, otaya ka kala ye na ompito yokwiilonga kombinga yaJehova, opo omadhina gawo ga nyolelwe membo lyaanamwenyo.

Ehololo 20:12, 13 otali yelitha kutya aantu ayehe mboka taya ka yumudhwa, otaya ka pumbwa okuvulika “kwaashono sha nyolwa momambo,” ano kutya koompango oompe ndhono Kalunga te ke tu pa muuyuni uupe. Mbono itaaya ka vulika koompango ndhono otaya ka hanagulwa po. — Jes. 65:20.

Daniel 12:2 otayi popi kutya yamwe yomwaamboka ya sa otaya ka yumudhwa ya ka mone “omwenyo gwaaluhe, nayamwe otaa ke ehamekwa kekano lyaaluhe.” Ovelise ndjika otayi popi kombinga yoshizemo shahugunina shaamboka taya ka yumudhwa, yamwe otaya ka mona “omwenyo gwaaluhe” omanga yamwe otaa ke ehamekwa “kekano lyaaluhe.” Onkee pehulilo lyomimvo eyuvi, aantu yamwe otaya ka mona omwenyo gwaaluhe, omanga yalwe otaya ka hanagulwa po. — Eh. 20:15; 21:3, 4.

Dhiladhila kethaneko ndika. Oongundu mbali dhaantu mboka taya ka yumudhwa, otatu vulu oku dhi yelekanitha naakwiilongo mboka ya hala okukala moshilongo shontumba. Aantu mboka aawanawa, oya fa mboka ya pewa oombapila dhokulongela nenge dhokukala moshilongo shoka, ndhoka dhe ya pa omauthemba ogendji noya vule okumona omauwanawa ngaashi aantu yomoshilongo shoka. Omanga aantu mboka aawinayi, oya fa aakwiilongo mboka tashi vulika ya pewe oombapila dhokukala moshilongo pakathimbo nenge dhokutalela po owala. Aakwiilongo mboka oye na okuulika kutya otaya vulika, opo ya vule okweethiwa ya kale moshilongo shoka. Sha faathana, aantu mboka aawinayi taya ka yumudhwa nayo otaya ka pumbwa okuvulika koompango dhaJehova nokuulika kutya oye li aayuuki, opo ya vule okukala mOparadisa. Kutya nduno aakwiilongo mboka oya pewa oombapila dhini sho ye ya moshilongo moka, otashi vulika yamwe ya ka pewe omauthemba ya ninge aantu yomoshilongo moka omanga yalwe otashi vulika ya ka shunithwe ko. Etokolo lyahugunina moshinima shoka oli ikolelela keihumbato nokiikala yaakwiilongo mboka moshilongo moka. Momukalo gwa faathana, etokolo lyahugunina lyaamboka taya ka yumudhwa otali ka kala li ikolelela kuudhiginini wawo nokeihumbato lyawo muuyuni uupe.

Jehova ke shi owala Kalunga kohenda, ihe oKalunga wo kuuyuuki. (Deut. 32:4; Eps. 33:5) Ote ku ulika ohole ye sho ta ka yumudha aantu ayehe aawanawa naawinayi. Ota ka tegelela wo aantu ayehe ya vulike komithikampango dhe dhaashoka shi li mondjila naashoka sha puka. Mbono taya ka kala ye mu hole nohaya vulika komithikampango dhe oyo owala ta ka pitika ya ka kale nomwenyo sigo aluhe muuyuni uupe.