Shi ikolelela kAakorinto yotango 15:8, Paulus okwa ti: “Hugunina okwi ihololele ndje wo, nonando ngame onda fa omuntu ngoka a pononwa.” Monakuziwa, otwa li twa yelitha kutya otashi vulika Paulus a li ta popi kombinga yoshimoniwa she mwene sho a li a mono Jesus e li meyadhimo lye megulu. Kungawo okwa fa a li a pewa uuthembahenda wokuvalwa, nenge wokuyumudhwa, e ta ningi oshishitwa shopambepo ethimbo inaali thika lyeyumuko ndyoka, manga inaali ningwa konima yomimvo omathele. Ihe sho twa konakona muule ovelise ndjika, otwa mono kutya otwa pumbwa okuninga elunduluko meyelitho ndyoka twa li tu shi nale kombinga yovelise ndjoka.

Oshoshili kutya Paulus okwa li ta popi kombinga yaashoka sha ningwa po sho a ningi Omukriste. Ihe mbela okwa li a hala okutya ngiini sho a ti kutya “okwa fa omuntu a pononwa?” Natu ka taleni komatompelo gamwe ngoka tashi vulika ogo.

Paulus okwa li a ningi Omukriste inee shi tegelela nomomukalo omukumithi. Okupononwa ohaku ya ombadhilila. Sho Saulus (ngoka konima a ka ninga Paulus) a li e li mondjila u uka kuDamaskus a ka hepeke Aakriste mbono ya li ko, ka li a tegelela a mone emoniko lyaJesus omuyumudhwa. Paulus sho a ningi Omukriste, ka li e shi tegelela, nAakriste mbono a li a hala oku ka hepeka moshilando shono nayo kaya li ye shi tegelela. Shimwe ishewe, oshimoniwa shika osha li oshikumithi lela oshoka okwa li a tsika.​—Iil. 9:1-9, 17-19.

Okwa li a ningi Omukriste “pethimbo lya puka.” Oshitya shOshigreka “a pononwa” otashi vulu wo okutolokwa “a valwa pethimbo lya puka.” The Jerusalem Bible oye shi toloka ngeyi: “Onda fa nda li nda valwa kaapu na ngoka a li e shi tegelela.” Pethimbo ndyono sho Paulus a ningi Omukriste, Jesus okwa adhika nale a shuna megulu. Onkee Paulus ka li a mono Jesus manga inaaya megulu, ngaashi aantu mboka a popi moovelise dha tetekele. (1 Kor. 15:4-8) Sho Jesus i ihololele Paulus ombaadhilila, oshe mu pe ompito yokumona Jesus, nonando osha fa sha ningwa “pethimbo lya puka.”

Okwa li ta popi kombinga ye mwene momukalo gweifupipiko. Shi ikolelela kaalongwantu yamwe, uutumbulilo mbono Paulus a longitha otawu vulu okuuviwa ko kutya okwa li ti ipopile muuwinayi. Ihe ngele shono osho sha li momadhiladhilo gaPaulus, kungawo okwa li te shi koleke kutya ka li a gwana okupewa uuthembahenda mboka a li e na. Nokuli okwa tsikile ko ta ti: “Ngame ondi vulike kaayapostoli ayehe noinandi gwana, ndi ithanwe omuyapostoli, oshoka onda tidhaganene egongalo lyaKalunga. Ihe omolwesilohenda lyaKalunga ngame ondi li ngaashi ndi li.” — 1 Kor. 15:9, 10.

Osha fa shi li ngeyi kutya Paulus okwa li ta popi kombinga yomukalo moka Jesus a li e mu ihololele ombadhilila, sho a ningi Omukriste pethimbo inee li tegelela, nenge sho a li inaa gwana okumona emoniko ndyoka ekumithi. Kashi na nduno mbudhi kutya oshike sha li sha ningwa po, Paulus okwa li a tala ko oshimoniwa shoka kutya osha simana kuye. Osha li wo she mu tompo kutya Jesus okwa yumudhwa. Nomolwaashoka a li a popi olundji kombinga yoshimoniwa shoka sha li sha ningwa inee shi tegelela, sho a li a uvithile yalwe kombinga yeyumuko lyaJesus. — Iil. 22:6-11; 26:13-18.