1. Onkalo yini ondhigu Joas, Ussia naJosia ya li ya taalela?

 DHILADHILA ando wa ningwa omukwaniilwa gwoshigwana shaKalunga omanga wu li okanona. Oto ka kala wu uvite ngiini noto ka longitha ngiini oonkondopangelo dhoye? Ombiimbeli otayi tu lombwele kombinga yaagundjuka yi ili noyi ili mboka ya li aakwaniilwa yaJuda. Pashiholelwa, Joas, okwa li a langekwa po a ninge omukwaniilwa e na omimvo 7, Ussia omimvo 16 naJosia omimvo 8. Oshi na okukala sha li oshidhigu kuyo. Nonando kasha li oshipu, Jehova nosho wo yalwe oya li ye ya kwathele ya longe uuwanawa owundji.

2. Omolwashike tu na okugandja eitulomo koshiholelwa shaJoas, Ussia naJosia?

² Nonando tse katu shi aakwaniilwa nenge aakwaniilwakiintu, otatu vulu okwiilonga oshindji kuJoas, Ussia naJosia. Oya li ya ningi omatokolo omawanawa nopoompito dhimwe omatokolo omawinayi. Sho tatu longitha iiholelwa yawo, otatu ka mona kutya omolwashike tu na okuhogolola ookuume aawanawa, tu na okukala aayifupipiki notu na okulongela Jehova nuudhiginini.

3. Jehoiada okwa li a kwathele ngiini omukwaniilwa Joas a ninge omatokolo gopandunge?

³ Holela omatokolo omawanawa gaJoas. Sho omukwaniilwa Joas a li omugundjuka, he okwa si, na Omuyambi Omukuluntu, Jehoiada oye a li e mu tekula e te mu longo wo kombinga yaJehova. Joas okwa li e na oondunge, oshoka okwa vulika komayele ngoka a li a pewa kuJehoiada. Joas okwa tokola okulongela Jehova nokukwathela wo yalwe ye mu longele, molwaashoka Jehoiada okwe mu tulila po oshiholelwa oshiwanawa. Joas okwa li wo a shilipaleke kutya otempeli yaJehova oyo opalekululwa. — 2 Ondjal. 24:1, 2, 4, 13, 14.

4. Ohatu mono mo ngiini uuwanawa uuna tu hole nohatu vulika kiipango yaJehova? (Omayeletumbulo 2:1, 10-12)

⁴ Ngele oto longwa wu kale wu hole Jehova nowu kale ho vulika  komithikampango dhe, shono oshi li omagano ga dhenga mbanda. (Lesha Omayeletumbulo 2:1, 10-12.) Aavali yoye otaya vulu oku ku dheula nawa momikalo dhi i li nodhi ili. Ngashingeyi natu ka taleni nkene tate gwaKatya a li e mu kwathele a ninge omatokolo omawanawa. Esiku kehe sho he te mu fala kosikola, okwa li haya kundathana enyolo lyesiku. Katya okwa ti: “Oonkundathana ndhoka twa li hatu ningi natate odha kwathela ndje ndi vule okuungaunga noonkalo oondhigu ndhoka dha li hadhi holoka po momukokomoko gwesiku.” Ongiini ngele owu uvite kutya oompango dha kankamena kOmbiimbeli ndhoka aavali yoye ye ku tulila po, odhe ku manga? Oshike tashi ke ku kwathela wu vulike kudho? Omumwameme gwedhina Anastasia ota dhimbulukwa kutya aavali ye oya li haya kongo ethimbo ye mu yelithile kutya omolwashike ya tula po oompango dhontumba. Okwa ti: “Shoka osha li sha kwathele ndje ndi uve ko kutya inaya tulila ndje po omangambeko ngoka nelalakano lyokulitha ndje, ihe omolwegameno lyandje, shaashi oye hole ndje.”

5. Oonkatu dhoye otadhi ka guma ngiini aavali yoye nosho wo Jehova? (Omayeletumbulo 22:6; 23:15, 24, 25)

⁵ Aavali yoye otaya ka kala ya nyanyukwa ngele owa kala ho vulika komayele ngoka taye ku pe, ga za mOmbiimbeli. Shoka sha simanenena, oto ka nyanyudha Kalunga nekwatathano lyoye naye otali ka kala lya kola. (Lesha Omayeletumbulo 22:6; 23:15, 24, 25.) Ngoka kage shi tuu omatompelo omawanawa tage tu kwathele tu landule oshiholelwa shaJoas sho a li omugundjuka?

6. Sho Jehoiada a si, Joas okwa kala ha pulakene komayele galye, noshizemo oshini? (2 Ondjalulo 24:17, 18)

⁶ Ilonga sha komatokolo omawinayi ngoka Joas a li a ningi. Konima sho Jehoiada a si, Joas okwa li a hogolola ookuume aawinayi. (Lesha 2 Ondjalulo 24:17, 18.) Okwa li a tokola okupulakena komuwiliki gwAajuda, ngoka a li e tonde Jehova. Joas okwa li e na okuyanda okweendathana naantu mboka, molwaashoka oya li haya longo uuwinayi. (Omayel. 1:10) Pehala lyaashono, okwa pulakene komayele gawo. Sho Sakaria, omuna gwomuyambi Jehoiada, a li a kambadhala oku mu pukulula, Joas okwe mu dhipagitha. (2 Ondjal. 24:20, 21; Mat. 23:35) Shoka osha li oshinima oshiwinayi nosha nika uugoya. Petameko, onkalamwenyo yaJoas oya li ombwanawa, ihe shinikitha oluhodhi okwa ka ninga omushunimonima nomudhipagi. Lwanima, okwa li a dhipagwa komupiya gwe. (2 Ondjal. 24:22-25) Andola okwa pulakenene kuJehova nokwaamboka ye mu hole, ando onkalamwenyo ye hasho ya kala ngawo. Owi ilonga mo shike moshiholelwa shaJoas?

7. Oolye wu na okuhogolola ya kale ookuume koye? (Tala wo ethano.)

⁷ Shimwe shoka tatu ilongo ketokolo lyaJoas ndyoka inaali dhiladhilwa nawa, osho kutya otwa pumbwa okuhogolola ookuume mboka ye hole Jehova noya hala oku mu nyanyudha, nookuume  mbono otaye ke tu kwathela tu longe shoka oshiwanawa. Otatu vulu okupanga uukuume naamboka aakuluntu kutse nenge aashona kutse. Dhimbulukwa kutya Joas okwa li omushona moomvula kukuume ke, Jehoiada. Ngele tashi ya pookuume mboka to hogolola ipula to ti: ‘Mbela otaya kwathele ndje ngaa ndi koleke eitaalo lyandje muJehova? Otaya ladhipike ndje ngaa ndi kale handi vulika komithikampango dhaKalunga? Ohaya popi ngaa kombinga yaJehova nokombinga yoshili ndjoka ya ilonga mOmbiimbeli? Oya simaneka ngaa omithikampango dhaKalunga? Mbela ohaya lombwele ndje shoka tashi nywitha omakutsi, nenge ohaya pukulula ndje nopwaa na okukakadhala?’ (Omayel. 27:5, 6, 17) Uushili owo mbono kutya, ngele ookuume koye kaye hole Jehova, nena inaye ku opalela. Ihe ngele owu na ookuume mboka ye hole Jehova, otaya ka kala aluhe taye ku kwathele. — Omayel. 13:20.

8. Ngele ohatu longitha omakwatathano gopaintaneta, oshike tu na okukala twa kotokela?

⁸ Kunena, omakwatathano gopaintaneta ohage shi ningitha oshipu, opo tu kwatathane naakwanezimo yetu nosho wo nookuume ketu. Ihe aantu oyendji ohaya longitha omakwatathano ngoka nelalakano lyokwiiyulika, taya tula ko omathano nosho wo uuvidio wiinima mbyoka ya landa nenge ya li taya ningi. Ngele oho longitha omakwatathano gopaintaneta, ipula to ti: ‘Mbela elalakano lyandje okwiiyulika? Mbela ohandi kala nda hala okuulukila yalwe oshinima shontumba oshiwanawa nenge ohandi kala nda hala aantu ya kale taya pandula ndje nenge taya gandja unene eitulomo kungame? Mbela ohandi etha omataloko gayalwe ga nwethe mo okudhiladhila, okupopya nosho wo oonkatu dhandje momukala omwiinayi? Omumwatate Nathan Knorr, ngoka a li Oshilyo shOlutuwiliki okwa gandja omayele taga ti: “Ino kambadhala okwoopalela aantu. Ngele owe shi ningi, oto ka iyadha inoo opalela nando ogumwe. Kambadhala okwoopalela Jehova, noto ka nyanyudha ayehe mboka ye hole Jehova.”

9. Jehova okwa li a kwathele Ussia a ninge shike? (2 Ondjalulo 26:1-5)

⁹ Holela omatokolo omawanawa ngoka Ussia a li a ningi. Omukwaniilwa Ussia sho a li omugundjuka, okwa li omwiifupipiki nokwa “longele Omuwa nuudhiginini.” Okwa kala nomwenyo uule womimvo 68, na Jehova okwa li e mu laleke nuuyamba monkalamwenyo ye. (Lesha 2 Ondjalulo 26:1-5.) Ussia okwa li a sindi iigwana oyindji mbyoka ya li aatondi yawo nokwa shilipaleke kutya Jerusalem osha gamenwa. (2 Ondjal. 26:6-15) Okwa li shili a nyanyukwa omolwaashihe shoka Kalunga e mu kwathela a pondole. — Omuuv. 3:12, 13.

10. Oshike sha li sha ningilwa Ussia?

¹⁰ Ilonga sha komatokolo omawinayi ngoka Ussia a li a ningi. Omukwaniilwa Ussia okwa li a igilila okugandja omalombwelo kaantu. Otashi vulika shoka sha li she mu ningitha a kale e na omutse omunene, ye ta kala e uvite kutya ota vulu okuninga kehe shoka a hala. Esiku limwe, Ussia okwa li a tokola a ye motempeli, e ta kambadhala okufika iitsinino ketsininoyambelo, oshinima shoka aakwaniilwa ya li inaaya pitikwa ya ninge. (2 Ondjal. 26:16-18) Omuyambi Omukuluntu Azaria okwa li a kambadhala oku mu pukulula, ihe Ussia okwa geye noonkondo. Shinikitha oluhodhi, Ussia ina kala we omudhiginini, na Jehova okwe mu geele nuuvu woshilundu. (2 Ondjal. 26:19-21) Onkalamwenyo ye oya li tayi vulu okukala ombwanawa ando okwa kalele omwiifupipiki.

11. Oshike tashi vulu oku tu kwathela tu kale aayifupipiki? (Tala wo ethano.)

¹¹ Sho Ussia a kala e na oonkondopangelo, okwa dhimbwa kutya Jehova oye Onzo yoonkondo dhe noka li we e na olupandu omolwiinima ayihe iiwanawa mbyoka e mu ningila. Shono otashi tu longo shike? Natu dhimbulukwe aluhe kutya omalaleko nuuyamba getu nosho wo iinakugwanithwa mbyoka tu na oya za kuJehova. Pehala lyokukala tatu itangele shoka twa pondola, olupandu  natu kale hatu lu ukitha kuJehova. b (1 Kor. 4:7) Natu zimine neifupipiko kutya inatu gwanenena notwa pumbwa egeeloputudho. Omumwatate ngoka e na omimvo tadhi ihilile po 60 okwa ti: “Ondi ilonga okukala ihaandi geye mbala uuna gumwe a popi epuko lyandje. Uuna nda pukululwa omolwepuko lya nika uugoya ndyoka nda ninga, ohandi kambadhala okulundulula e tandi tsikile okupa Jehova shoka sha dhenga mbanda.” Uushili owo kutya ngele ohatu vulika kuJehova nokukala aayifupipiki, otatu ka kala shili tu na ombili monkalamwenyo. — Omayel. 22:4.

12. Sho Josia a li omugundjuka okwa li a kongo ngiini Jehova? (2 Ondjalulo 34:1-3)

¹² Holela omatokolo omawanawa gaJosia. Josia okwa li e na omimvo 16 sho a tameke okukonga Jehova. Okwa li a hala okwiilonga kombinga yaJehova nokulonga ehalo lye. Ihe onkalamwenyo ye kaya li ompu. Pethimbo ndyono, aantu oyendji oya li taya longele iikalunga, na Josia okwa li e na okukatuka nuulaadhi, opo a hulithe po oshinima shoka. Manga inaa gwanitha omimvo 20, okwa tameke okuhulitha po elongelokalunga lyiifundja mokati koshigwana. — Lesha 2 Ondjalulo 34:1-3.

13. Okwiiyapulila Jehova otaku ti shike kungoye?

¹³ Nonando owu li omugundjuka, oto vulu okuholela Josia mokwiilonga oshindji kombinga yaJehova nosho wo yomaukwatya ge omawanawa. Shono otashi ke ku inyengitha wu mu iyapulile. Okwiiyapulila Jehova otaku ka guma ngiini onkalamwenyo yoye? Luke, ngoka a ninginithwa sho a li e na omimvo 14, okwa ti: “Okuza nena, otandi kala nda pititha komeho okulongela Jehova monkalamwenyo yandje, notandi ka ninga ngaashi tandi vulu ndi mu nyanyudhe. (Mark. 12:30) Ngele owa ningi ngawo, Jehova ote ke ku laleka nuuyamba.

14. Gandja oshiholelwa shankene aagundjuka yamwe haya holele omukwaniilwa Josia.

¹⁴ Omashongo geni aapiya yaJehova aagundjuka taya vulu okukala ya taalela? Johan, ngoka a ninginithwa sho a li e na omimvo 12, okwa ti kutya aanasikola ooyakwawo ohaye mu thiminike a hile omakaya. Opo Johan a yande omwigo ngoka, oha dhimbulukwa kutya okuhila omakaya otaku vulu okuteya po uukolele we nosho wo ekwatathano  lye naJehova. Rachel, ngoka a ninginithwa sho a li e na omimvo 14, okwa popya shoka hashi mu kwathele a ungaunge nomashongo ngoka ha kala a taalela kosikola. Okwa ti: “Ohandi kambadhala okudhiladhila kombinga yiinima mbyoka tayi dhimbulukitha ndje kombinga yaJehova nosho wo yOmbiimbeli. Pashiholelwa, oshilongwa shondjokonona ohashi vulu okudhimbulukitha ndje ehokololo lyontumba lyomOmbiimbeli nenge ehunganeko. Nenge omathimbo gamwe uuna tandi kundathana nomuntu kosikola, ohandi dhiladhila enyolo ndyoka tandi vulu oku mu ulukila.” Omashongo ngoka wa taalela otaga vulu okukala ga yooloka ko kwaangoka omukwaniilwa Josia a li a taalela, ashike nangoye oto vulu okukala wu na oondunge nokukala omudhiginini kuJehova ngaashi ye. Okusinda omamakelo manga wu li omugundjuka otashi ke ku kwathela wu ungaunge nomupondo nomashongo ngoka to ki iyadha mugo monakwiiwa.

15. Oshike sha li sha kwathele Josia a longele Jehova nuudhiginini? (2 Ondjalulo 34:14, 18-21)

¹⁵ Omukwaniilwa Josia sho a li e na omimvo 26, okwa li a tameke okwoopalekulula otempeli. Manga yi ipyakidhila niilonga, oya li yi itsu “embo lyompango yOmuwa, ndjoka Omuwa a gandjele kuMoses.” Sho lya leshwa, omukwaniilwa okwa ningi omalunduluko nziya, opo a vulike kwaashoka sha nyolwa mo. (Lesha 2 Ondjalulo 34:14, 18-21.) Mbela owa hala okukala ho lesha Ombiimbeli pandjigilile? Nongele oho shi ningi nale, mbela oho tyapula ngaa oku yi lesha? Mbela oho ndhindhilike ngaa omanyolo ngoka taga vulu oku ku kwathela pauhandimwe? Luke ngoka a tumbulwa metetekelo, oha nyola mokambo iitsa ya simana mbyoka a mona sho ta lesha Ombiimbeli. Nangoye oto vulu okuninga sha faathana, opo wu kale ho dhimbulukwa oovelise dhOmbiimbeli nenge shoka wa ilonga mo. Ngele owa kala wu shi nowu hole Ombiimbeli, oto ka kala wa hala okulongela Jehova. Ngaashi owala Oohapu dhaKalunga dha li dha kwathele Josia a longe shoka shi li mondjila, nangoye otadhi ke ku kwathele wo.

16. Omolwashike Josia a li a ningi epuko lya kwata miiti, noshike tatu ilongo mo?

¹⁶ Ilonga sha komatokolo omawinayi ngoka Josia a li a ningi. Sho Josia a li e na omimvo 39,  okwa ningi epuko ndyoka lya pula omwenyo gwe. Okwa li a inekela muye mwene pehala lyokupula ewiliko kuJehova. (2 Ondjal. 35:20-25) Oshiilongomwa oshini? Kashi na nduno mbudhi kutya otu na omimvo ngapi nenge otwa kala tatu konakona Ombiimbeli uule womimvo dhi thike peni, otwa pumbwa okutsikila okulongela Jehova nuudhiginini. Shono osha kwatela mo oku mu galikana pandjigilile e tu wilike, okukala hatu konakona Oohapu dhe nokupulakena komayele ngoka tatu pewa kAakriste ya pyokoka. Ngele otwa ningi ngawo, otatu ka kala twa nyanyukwa noitatu ka ninga omayono ga kwata miiti. — Jak. 1:25.

17. Iiyilongomwa yini ya simana twa ilonga momahokololo gaakwaniilwa yatatu yaJuda?

¹⁷ Opu na iinima oyindji iiwanawa mbyoka to vulu okuninga omanga wu li omugundjuka. Oshiholelwa shaJoas, Ussia naJosia otashi ulike kutya aagundjuka otamu vulu okuninga omatokolo omawanawa nokunyanyudha Jehova monkalamwenyo yeni. Ihe nando ongawo, aagundjuka mboka oya li ya ningi omapuko ngoka ge ya etela iilanduliko iiwinayi. Ngele omwa holele iinima iiwanawa mbyoka ya li ya ningi e tamu yanda omapuko ngoka, otamu ka kala mwa nyanyukwa. Onkalamwenyo yeni otayi ka kala wo yi na eityo.

18. Iiholelwa yopamanyolo yini tayi ulike kutya otatu vulu okukala nonkalamwenyo ombwanawa? (Tala wo ethano.)

¹⁸ MOmbiimbeli otamu adhika omahokololo taga popi kombinga yaagundjuka mboka ya hedha kuJehova, e ta kala e ya hokwa noya mono kutya onkalamwenyo yawo oya kala tayi ende nawa. David oye gumwe gwomuyo. Sho a li omugundjuka okwa li a tokola okulongela Jehova, nolwanima okwa ningi omukwaniilwa omulaadhi. Odhoshili kutya omathimbo gamwe okwa li a ningi omapuko, ihe nando ongawo Kalunga okwa li e mu tala ko omudhiginini. (1 Aak. 3:6; 9:4, 5; 14:8) Ngele otwa konakona onkalamwenyo yaDavid niilonga ye yuudhiginini, otashi vulu oku tu tsa omukumo noku tu inyengitha tu longele wo Jehova nuudhiginini. Oto vulu wo okwiilonga koshiholelwa shaMarkus naTimoteus. Otatu ka mona kutya oya li ya longele Jehova nuudhiginini manga ya li aagundjuka, noya tsikile oku mu longela nuudhiginini. Etokolo lyawo lyokulongela Jehova olya li lye mu nyanyudha nayo oya li wo ya nyanyukwa.

19. Oto vulu okukala nonkalamwenyo ya tya ngiini?

¹⁹ Shoka ho ningi ngashingeyi otashi ka guma onkalamwenyo yoye yomonakuyiwa. Ngele owa inekela muJehova, ihe hamoondunge dhoye mwene, otashi ke ku kwathela wu ninge omatokolo ge li nawa. (Omayel. 20:24) Oto vulu okukala wu na onkalamwenyo ombwanawa noya lalekwa nuuyamba. Dhimbulukwa kutya Jehova okwa lenga shoka ho mu ningile. Kapu na we omukalo gumwe to vulu okulongitha onkalamwenyo yoye shi vulithe okulongela Tate yetu gwomegulu, Jehova.