1. Nziya manga omuyapostoli Petrus inaa sa okwa wilikwa a ninge shike?

 OMUYAPOSTOLI Petrus okwa li e shi kutya onkalamwenyo ye, otayi ka hula po mbala. Sho kala ta longo nuudhiginini uule womimvo omilongo, okwa li ha ende pamwe naJesus, he ku uvitha kiitopolwa iipe nokwa li oshilyo sholutuwiliki. Iilonga yaPetrus hapo owala ya hulile mpoka. Lwomomumvo 62-64 E.N, okwa li a longithwa kuJehova a nyole oontumwafo mbali, Petrus gwotango nomutiyali. Petrus okwa li e na einekelo kutya oontumwafo dhe ndhoka otadhi ka kwathela Aakriste konima ngele a si. — 2 Pet. 1:12-15.

2. Omolwashike oontumwafo ndhoka Petrus a li a nyola dhi li pethimbo?

² Oontumwafo ndhoka Petrus okwa li e dhi nyola sho ooyitaali ooyakwawo ‘ya li ya sa oluhodhi omolwomamakelo ogendji ngoka ga li ge ya adha.’ (1 Pet. 1:6) Aalumentu aakolokoshi oya li taya kambadhala okweeta omalongo giifundja nosho wo eihumbato inaali yogoka megongalo. (2 Pet. 2:1, 2, 14) Aakriste mboka yomuJerusalem oya li poku ka mona “ehulilo lyiinima ayihe,” ano sho etangakwiita lyaRoma tali hanagula po oshilando shoka nonkalelo yiinima yOshijuda. (1 Pet. 4:7) Osha yela kutya oontumwafo dhaPetrus odha li dha kwathele Aakriste ya mone shoka taya vulu okuninga pethimbo lyomamakelo ngoka ga li po nokwiilongekidhila omamakelo gomonakuyiwa. b

3. Omolwashike tu na okukonakona oontumwafo dha nwetha mo dhaPetrus?

³ Nonando Petrus oontumwafo dhe ndhoka okwa li e dhi nyolela Aakriste mboka ya li ko pethimbo ndyoka, Jehova okwe dhi  kwatela mOohapu Dhe. Onkee natse otatu vulu okumona mo ngashingeyi uuwanawa moontumwafo ndhoka. (Rom. 15:4) Ngaashi Aakriste mbeyaka yonale, natse otu li muuyuni moka mu na aantu ye na eihumbato inaali yogoka, ndyoka tali vulu oku shi ningitha oshidhigu kutse okulongela Jehova. Shimwe ishewe, masiku natse otatu ka a dhika kuudhigu uunene wu vule mboka wa li wa hulitha po onkalelo yOshijuda. Moontumwafo mbali dhaPetrus ohatu mono mo omadhimbulukitho ga simanenena. Shoka otashi ke tu kwathela tu kale twa ilongekidhila esiku lyaJehova, tu sinde uumbanda wokutila aantu notu kokeke ohole yomuule yokuholathana. Omadhimbulukitho ngoka otaga vulu okukwathela aakuluntugongalo ya mone nkene ye na okukwathela aamwatate naamwameme momagongalo gawo, opo ya kale ye na eitaalo lya kola.

4. Ngaashi sha ulikwa muPetrus omutiyali 3:3, 4, oshike tashi vulu okunkundipaleka eitaalo lyetu?

⁴ Otwa kundukidhwa kaantu mboka kaaye na eitaalo momauvaneko gOmbiimbeli. Aapataneki otashi vulika ya kale taye tu sheke, molwaashoka twa kala hatu popi uule womimvo kutya ehulilo otali ya. Aantu yamwe ohaya ti kutya kali na siku li ye. (Lesha 2 Petrus 3:3, 4.) Ngele otu uvu omapopyo ga tya ngaaka komuntu ngoka tatu uvithile, komuniilonga omukwetu, komuntu gwaandjetu eitaalo lyetu otashi vulika li nkundipale. Petrus okwa yelitha shoka tashi vulu oku tu kwathela.

5. Oshike tashi ke tu kwathela tu tegelele neidhidhimiko onkalelo yuuyuni mbuka yi hanagulwe po? (2 Pet. 3:8, 9)

⁵ Kuyamwe otashi monika sha fa Jehova itaa endelele okuhulitha po uuyuni mbuka wa kolokosha. Oohapu dhaPetrus otadhi tu kwathele, molwaashoka otadhi tu dhimbulukitha kutya etaloko lyaJehova lyethimbo, olya yooloka ko thiluthilu kwaandyoka lyaantu. (Lesha 2 Petrus 3:8, 9.) KuJehova omimvo eyuvi odha fa esiku limwe. Ye omwiidhidhimiki noina hala nando ogumwe a ka hanagulwe po. Ihe ngele esiku lye lya thiki uuyuni mbuka otawu ka hanagulwa po. Onkee ano oshi li uuthembahenda tu longithe nawa ethimbo ndyoka lya hupa ko, okuuvithila aantu ayehe kombanda yevi.

6. Ongiini tatu vulu okukaleka esiku lyaJehova momadhiladhilo? (2 Pet. 3:11, 12)

⁶ Petrus okwe tu ladhipika tu hwame ‘mokutegelela esiku lyaJehova.’ (Lesha 2 Petrus 3:11, 12.) Ongiini tatu vulu oku shi ninga? Esiku kehe otatu vulu okudhiladhila nkene onkalamwenyo tayi ka kala ombwanawa muuyuni uupe. Kala ando wa fa wu iwete to fudhile mo ombepo ya yela, to li iikulya yi na uukolele, to hambelele oonakusa sho ya yumudhwa noto longo aantu mboka ya li ko omathelemimvo ga ka pita kombinga yomahunganeko gOmbiimbeli. Uuna to dhiladhila kiinima mbyoka otashi ke ku kwathela wu kale wa tegelela, ethimbo ndyoka li ye, nowu kale nuushili kutya ngaka ogo omasiku gahugunina tu li mugo. Ngele otwa kala tu shi nale ‘onakuyiwa yetu’ ‘itatu ka pukithwa’ komalongo giifundja. — 2 Pet. 3:17.

7. Uumbanda wokutila aantu ohawu tu gumu ngiini?

⁷ Ngele otwa kaleke esiku lyaJehova momadhiladhilo, otashi ke tu inyengitha tu uvithile aantu onkundana ombwanawa. Ihe omathimbo gamwe otashi vulika tu kale twa tila oku shi ninga. Omolwashike mbela? Omolwaashoka otashi vulika tu kale twa tila aantu. Shoka osho sha li sha ningilwa Petrus. Uusiku mboka Jesus a li ta hepekwa, Petrus okwa li a tila okupopya kutya ye ogumwe gwomaalongwa yaJesus, nokwa li e mu idhimbike nokuli lwiikando ta ti ke mu shi. (Mat. 26:69-75) Ihe Petrus okwa li a sindi uumbanda we, nolwanima okwa nyola a ti: “Inamu tila aantu nee, inamu kala mwa piyagana.” (1 Pet. 3:14) Oohapu dhaPetrus otadhi tu shilipaleke kutya otatu vulu okusinda uumbanda wokutila aantu.

8. Oshike tashi vulu oku tu kwathela tu sinde uumbanda wokutila aantu? (1 Petrus 3:15)

 ⁸ Oshike tashi vulu oku tu kwathela tu sinde uumbanda wokutila aantu? Petrus okwe tu lombwele a ti: “Simanekeni Kristus momitima dheni.” (Lesha 1 Petrus 3:15.) Shoka osha kwatela mo okutedhatedha kombinga yondondo nosho wo yoonkondo dhOmuwa nOmukwaniilwa gwetu, Jesus Kristus. Ngele oho kala wa tila uuna pwa holoka ompito yokuuvithila yalwe onkundana ombwanawa, dhimbulukwa Omukwaniilwa gwetu. Kala ando wu mu wete e li megulu ta pangele a kundukidhwa kaayengeli oyendjiyendji. Dhimbulukwa kutya okwa pewa “oonkondopangelo adhihe megulu nokombanda yevi” nonokutya ota kala pamwe natse “aluhe, sigo omasiku gahugunina guuyuni mbuka.” (Mat. 28:18-20) Petrus okwe tu ladhipika tu kale aluhe twa ilongekidha okupopila eitaalo lyetu. Mbela oto ka kala ngaa wa hala okugandja uunzapo, kiilonga, kosikola nenge okuuvitha momikalo dhi ili? Dhiladhila komeho yethimbo uuna to vulu oku shi ninga, opo nduno ilongekidha shoka to ka popya. Galikana wu pewe uulaadhi nokwiinekela kutya Jehova ote ke ku kwathela wu sinde uumbanda wokutila aantu. — Iil. 4:29.

9. Pompito yimwe Petrus okwa li a ndopa ngiini okuulika ohole? (Tala wo ethano.)

⁹ Petrus okwa li a ilongo nkene e na oku ulika ohole. Opo a li sho Jesus a ti: “Oshipango oshipe  otandi shi mu pe mu holathane, ngaashi naanaa nangame nda kala ndi mu hole osho nane wo omu na okuholathana.” (Joh. 13:34) Nonando ongawo, Petrus konima yethimbo okwa li a tindi okulya pamwe naamwahe, mboka kaaye shi Aajuda, molwaashoka okwa li a tila Aakriste Aajuda. Omuyapostoli Paulus okwa ti kutya shoka Petrus a ningi, uufudhime. (Gal. 2:11-14) Petrus okwa li a taamba ko epukululo ndyoka nokwa ilongo sha mulyo. Moontumwafo dhe adhihe mbali okwa nyola kutya inatu pumbwa owala okukala tu hole aamwatate naamwameme, ihe oku ya ulukila wo ohole.

10. Oshike tashi tu kwathela tu kale tu ‘hole ooitaali ooyakwetu twaa na uufudhime’? Shi yelitha. (1 Petrus 1:22)

¹⁰ Petrus okwa ti kutya natu kale tu hole ooyitaali ooyakwetu ‘twaa na uufudhime.’ (Lesha 1 Petrus 1:22.) Ohole ndjoka otatu ke yi ulika mokukala hatu “vulika koshili,” ndjoka ya kwatela mo elongo kutya “Kalunga aantu ayehe ohe ya tala ye thike pamwe.” (Iil. 10:34, 35) Itatu vulu okutya ohatu vulika kelombwelo lyaJesus li na ko nasha nohole, ngele ohatu ulukile owala ohole yamwe megongalo, ihe haantu ayehe. Odhoshili kutya otashi vulika tu kale tu hole yamwe shi vulithe puyamwe, ngaashi Jesus a ninga. (Joh. 13:23; 20:2) Ihe Petrus ote tu dhimbulukitha kutya natu lalakanene okukala tu hole ooitaali ooyakwetu, molwaashoka oyomuukwanegumbo wetu. — 1 Pet. 2:17.

11. Okuhola yalwe “lelalela nomwenyo aguhe” osha hala okutya shike?

¹¹ Petrus okwe tu ladhipika tu kale tu ‘holathane lelalela nomwenyo aguhe.’ Uutumbulilo mboka otawu ti kutya okukala wu hole gumwe, nokuli nando oshidhigu oku mu ulukila ohole. Pashiholelwa, ongiini ngele omumwatate okwe tu uvitha nayi momukalo gwontumba? Petameko otashi vulika tu kale twa hala okutameka okuungaunga naye momukalo moka ha ungaunga natse pehala lyoku mu ulukila ohole. Ihe Petrus okwa li a ilongo kuJesus kutya iikala ya tya ngawo inayi hokiwa kuKalunga. (Joh. 18:10, 11) Petrus okwa nyola a ti: “Ngoka te mu ningile uuwinayi nenge te mu thingi, inamu mu thinga. Ihe mu shunithileni elaleko nuuyamba.” (1 Pet. 3:9) Etha ohole yoye yomuule yi ku inyengithe wu kale omunambili, nokuli nokwaamboka ye ku uvitha nayi.

12. (a) Oshike ishewe ohole yomuule hayi tu inyengitha tu ninge? (b) Oshike wa hala okuninga ngaashi sha popiwa mokavidio, Kaleka po uukuume nayalwe megongalo?

¹² Petrus montumwafo ye yotango okwa longitha uutumbulilo ‘holathaneni lelalela.’ Ohole ya tya ngawo ihayi siikilile owala omayono omashona, ihe ‘ogendji.’ (1 Pet. 4:8) Otashi vulika Petrus a li a dhimbulukwa oshiilongomwa kombinga yedhiminopo, shoka Jesus a li e mu longo omimvo dha ka pita. Pompito yimwe otashi vulika Petrus a li a itaala kutya ye omuntu omwaanawa sho a ti kutya ota ka dhimina po omumwahe “luheyali.” Ihe Jesus okwe mu longa nokwe tu longa wo tu dhimine po ‘lwomilongo heyali luheyali,’ shono tashi ulike kutya kapu na ongamba. (Mat. 18:21, 22) Ngele oho mono oshidhigu okutula miilonga omayele ngaka, ino teka omukumo. Aapiya yaJehova ayehe inaaya gwanenena, olundji ohaya mono oshidhigu okudhimina po. Oshinima shoka sha simana ngashingeyi, osho okuninga ngaashi to vulu, wu dhimine po omumwaho ngoye wu kale nombili naye. c

13. Oshike tashi vulu okukala eshongo kaakuluntugongalo ya sile oshimpwiyu aamwatate naamwameme?

¹³ Osha yela kutya Petrus ka li nando a dhimbwa shoka Jesus e mu lombwele, konima sho a yumuka sho a ti: “Litha oonzi dhandje.” (Joh. 21:16) Ngele ngoye owu li omukuluntugongalo owu shi kutya omalombwelo ngoka otaga longo wo nokungoye. Ihe otashi vulu okukala eshongo komukuluntugongalo a mone ethimbo lyokugwanitha po oshinakugwanithwa shoka sha simana.  Tango aakuluntugongalo oye na okusila oshimpwiyu aanegumbo yawo palutu, pamaiyuvo nopambepo. Ohaya kwatele wo komeho iilonga yokuuvitha nosho wo okwiilongekidha iitopolwa yawo noku yi gandja pokugongala piigongi iishona niinene. Yamwe oye na wo iinakugwanithwa yokukala mOkomitiye yOkukwatathana nIipangelo nenge haya taamba ko iinakugwanithwa yOshikondo shokutunga shomoshitopolwa. Oshoshili kutya aakuluntugongalo oya ipyakidhila!

14. Oshike tashi vulu okwiinyengitha aakuluntugongalo ya lithe oshigunda shaKalunga? (1 Petrus 5:1-4)

¹⁴ Petrus okwa ladhipike aakuluntugongalo ooyakwawo a ti: “Kaleni aasita yoshigunda shoka mwe shi pewa kuKalunga.” (Lesha 1 Petrus 5:1-4.) Ngele owu li omukuluntugongalo otu shi kutya owu hole aamwaho nowa hala okuya sila oshimpwiyu. Ihe omathimbo gamwe otashi vulika wu kale wa ipyakidhila noonkondo nenge wu uvite wa vulwa noito vulu okugwanitha po oshinakugwanithwa shoka. Mbela oshike to vulu okuninga? Lombwela Jehova nkene wu uvite. Petrus okwa ti: “Ngoka ta yakula, na yakule koonkondo ndhoka e dhi pewa kuKalunga.” (1 Pet. 4:11) Aamwatate naamwameme otashi vulika ya taalela omaupyakadhi ngoka itaaga vulu okukandulwa po ngashingeyi. Ihe dhimbulukwa kutya “Omusitawiliki,” Jesus Kristus, ota vulu oku ya kwathela shi vulithe pungoye. Shoka ota vulu oku shi ninga kunena nosho wo muuyuni uupe. Kalunga okwa hala aakuluntugongalo ya kale ye hole aamwahe noku ya sila oshimpwiyu ‘nokukala ye shi okuholelwa kegongalo.’

15. Omukuluntugongalo gumwe okwa li ha sile ngiini oshimpwiyu oshigunda shaKalunga? (Tala wo ethano.)

¹⁵ William ngoka a kala omukuluntugongalo ethimbo ele, oku uvite ko kutya osha simana okusila oshimpwiyu oshigunda. Sho omukithi gwekomba gwa tameke, ye naakuluntugongalo ooyakwawo oya li ye shi ningi omukalondjigilile okudhengela oohandimwe oshiwike kehe mboka ye li kongundu yawo. Okwa yelitha kutya omolwashike, sho a ti: “Aamwatate naamwameme oyendji oye li momagumbo oyo ayeke, noha ya kala taya dhiladhila oyo ayeke, shoka hashi vulu oku ya teya omukumo. Uuna omwiitaali omukwawo e na uupyakadhi omumwatate William ohe mu pulakene neitulomo nokumona kutya oti ipula nashike noshike a pumbwa.” Opo nduno oha kambadhala okukonga uuvidio kepandja lyetu mboka ta vulu okulongitha a tse omukumo omumwatate nenge omumwameme ngoka. Okwa ti: “Okusila oshimpwiyu oshigunda shaKalunga  oshinima sha pumbiwa noonkondo ngashingeyi. Otwa pumbwa okuninga oonkambadhala twa mana mo, tu kwathele aantu mboka kaaye shi Jehova, otwa pumbwa okuninga sha faathana tu sile oshimpwiyu oshigunda shaKalunga, tu kwathele oonzi dhe dhi kale moshili.”

16. Omomikalo dhini tatu vulu okutula miilonga iiyilongomwa mbyoka twa ilonga moontumwafo dhaPetrus?

¹⁶ Otwa kundathana owala iiyilongomwa yontumba okuza moontumwafo mbali dhaPetrus dha nwethamo. Otashi vulika wa mona kutya owa hala okuhwepopala mushike. Pashiholelwa, mbela owa hala okukala ho tedhatedha olundji komalaleko nuuyamba ngoka taga ka kala muuyuni uupe? Mbela owa hala okwiitulila po elalakano lyokukala ho uvithile yalwe kiilonga kosikola nenge momikalo dhimwe dhi ili? Mbela owa mona kutya omomikalo dhini to vulu okuulukila aamwatate naamwameme ohole ya hwama shi vulithe shito? Aakuluntugongalo omwa tokola ngaa toko okulitha oonzi dhaJehova nehalo ewanawa? Kala wu na uushili nokumona kutya openi wa pumbwa okuhwepopala, ihe ino teka omukumo. ‘Omuwa omwaanawa’ note ke ku kwathela wu hwepopale. (1 Pet. 2:3) Petrus okwe tu shilipaleka a ti: ‘Kalunga ote mu longekidha, te mu pe oonkondo, te mu koleke note mu tula kekankameno lya kola.’ — 1 Pet. 5:10.

17. Ngele inatu teka omukumo nokweetha tu dheulwe kuJehova, oshizemo otashi ka kala shike?

¹⁷ Oshikando shimwe Petrus okwa li e wete kutya ina gwana okukala pOmuna gwaKalunga. (Luk. 5:8) Ihe kekwatho lyopahole lyaJehova nolyaJesus, Petrus okwa tsikile okukala omulanduli gwaKristus. Kungawo, Jehova okwa pitike Petrus a ye “mOshilongo shaaluhe shOmuwa gwetu noshOmukulili Jesus Kristus.” (2 Pet. 1:11) Shoka kasha li tuu elaleko nuuyamba! Ngele owa tsikile okukala omudhiginini ngaashi Petrus e to etha wu dheulwe kuJehova, nangoye oto ka mona ondjambi yomwenyo gwaluhe. ‘Oto ka adha elalakano lyeitaalo lyoye.’ — 1 Pet. 1:9.