DON ngoka e li Onzapo yaJehova moKanada, okwa li ha ningi oonkambadhala a popye naantu mboka haya kala momapandaanda. Don okwa popi kombinga yomulumentu gumwe Peter ngoka a li ha kala momapandaanda a ti: “Okwa li ha kala a kaka noonkondo nokwa li hi ihumbatele aantu nayi, opo ya kale kokule naye. Olundji okwa li ha tindi ekwatho ndyoka ta pewa kaantu.” Uule womimvo dhi vulithe 14, Don okwa kala hi ihumbatele nawa omulumentu ngoka kee na mpoka ha zi.

Esiku limwe Peter okwa pula Don a ti: “Omolwashike hwi ipula nangaye? Aantu oyendji kaye hole ndje. Omolwashike wu na ko nasha nangame?” Don okwa longitha omanyolo gatatu nuukeka, opo a adhe omutima gwaPeter. Tango okwa pula Peter ngele oku shi ngaa kutya Kalunga oku na edhina e te mu pula e li leshe ye mwene mOmbiimbeli mEpisalomi 83:18, NW. Oshikwawo, opo e mu ulukile kutya omolwashike e na ko nasha naye, Don okwa lombwele Peter a leshe Aaroma 10:13, 14, ndjoka tayi yelitha kutya “kehe ngoka ti ithana edhina lyOmuwa, ota hupithwa.” Hugunina, Don okwa lesha enyolo lyaMateus 9:36 e ta pula Peter e li leshe wo ye mwene. Ovelise ndjoka otayi ti: “Sho a tala oongundu dhaantu, okwa li e ya uvitile ohenda, oshoka oya li ya hepekwa noya loloka ya fa oonzi dhaa na omusita.” Peter okwa pula nomeho gu udha omahodhi a ti: “Mbela nangaye ogumwe gwomoonzi ndhono tadhi popiwa?”

Peter okwa tameke okuninga omalunduluko. Okwi iyogo a yela, ta kulula ko oombenzi dhe e ta zala oonguwo dha yela ndhoka a pewa kuDon. Okwa tsikile okukala hi iyopaleke.

Peter okwa li a nyola okambo. Oshitopolwa shako shopetameko osha li tashi popi nkene a kala monkalo ondhigu, omanga oshitopolwa shako oshindji sha li tashi popi kombinga ya nkene onkalamwenyo ye ya lunduluka. Omu na oohapu dhimwe tadhi ti: “Ngashingeyi ondi ilonga edhina lyaKalunga. Uuna tandi galikana, otandi vulu okugalikana kuJehova. Oshinima oshiwanawa shili okutseya edhina lye. Don okwa ti kutya  Jehova ota vulu okukala kuume kandje, ngoka e na aluhe ethimbo lyokupulakena kungaye ethimbo kehe.”

Omatumbulo gahugunina mokambo ke okwa li e ga ukitha kuumwayina we. Okwa nyola a ti:

“Kandi uvite nawa nena. Ondi wete kutya omimvo otadhi ende tadhi yi. Ihe nonando ndika olyo esiku lyandje lyahugunina, ondi shi shi kutya otandi ka mona kuume kandje Don natango mOparadisa. Sho tamu ka lesha okambo hano, ngame kandi li we momwenyo. Ihe ngele omwa mono omulumentu pefumviko lyandje kaamu mu shi, popyeni naye ne tamu lesha okambo okambulau [oshileshomwa shoka hashi longithwa okukonakona naantu Ombiimbeli, shi na oshipalanyolo, “Oshili Ndjoka Tayi Fala kOmwenyo Gwaaluhe,” hoka nda pelwe kuDon omimvo dha pita]. * Otaka ti kutya otandi ka mona natango kuume kandje mOparadisa. Shika onde shi itaala nomutima gwandje aguhe. Omumwanyoko, Peter.”

Konima yefumviko lyaPeter, Ummi, omumwayinakadhona gwe okwa ti: “Omimvo mbali lwaampono dha ka pita, otwa li twa tsakanene naPeter. Osha li oshikando shandje shotango te mono Peter a nyanyukwa noti imemeha nokuli.” Okwa lombwele Don a ti: “Ondi na okulesha okambo hoka, molwaashono oke na sha shi ikalekelwa shoka sha kwathele omumwameme.” Ummi okwa zimine wo a konakone nOnzapo yaJehova embo ndyoka opo lya piti Omalongo gashili gOmbiimbeli ogeni naanaa?

Natse wo otatu vulu okutala uukwatya womuntu womeni, tatu ulukile aantu ayehe ohole notatu ungaunga nayo neidhidhimiko. (1 Tim. 2:3, 4) Uuna tatu shi ningi, otatu ki inyengitha aantu mboka ya fa Peter ngoka a li inyengithwa keihumbato ewanawa lyaDon. Otatu vulu okukala nuushili kutya Kalunga ngoka ‘ha tala momutima,’ ota ka kokitha ombuto yoshili momitima dhaamboka ye na iikala iiwanawa. —  1 Sam. 16:7; Joh. 6:44.