1-3. (a) Omashongo geni aagundjuka ya taalela, naashoka oto vulu oku shi thaneka nashike? (Tala kethano lyopetameko.) (b) Ongiini aagundjuka Aakriste taya vulu okupondola monkalo ndjika?

NATU tye ne owa dhiladhila okuya koshiningwanima sha simana, kondoolopa yi li kokule. Opo wu thike ko, owu na okweenda po oshinano oshile nombesa. Sho wa yi pomathikameno goombesa, owa ngwangwana, molwaashono opu udha oombesa naafaalelwa. Ihe elago enene, owu shi mpoka wu uka nonokutya oto londo ombesa ndjoka yu uka hoka wa hala. Ngele owa londo ombesa ndjoka tayi yi kehala lilwe, oto ka falwa kokuma kwa puka.

² Aagundjuka kunena, otaya vulu okufaathanithwa naafaalelwa mboka. Aagundjuka oya taalela ondjila onde monkalamwenyo, ihe hamombesa. Omathimbo gamwe otashi vulika ya kale ya ngwangwana, omolwoompito nomatokolo ogendji ngoka ge ya taalela monkalamwenyo. Aagundjuka, ngele omu na edhiladhilo ewanawa kutya omwa hala okuya peni, nena otashi ka kala oshipu kune. Mbela openi mwa hala okuya?

³ Oshitopolwa shika otashi yamukula epulo ndyoka, mokuladhipika aagundjuka ya gandje eitulomo kokulongela Jehova. Shika otashi ti kutya mukehe etokolo tatu ningi monkalamwenyo, otu na okulandula shoka Jehova ta ti. Omatokolo ngoka ongaashi kombinga yelongo, yiilonga, yiinakugwanithwa yuukwanegumbo nosho tuu. Shoka otashi ti wo kutya  okwaadha omalalakano getu gopambepo. Aagundjuka mboka haya gandja eitulomo kokulongela Jehova, otaya vulu okukala nuushili kutya ote ke ya yambeka noku ya kwathela ya pondole monkalamwenyo. — Lesha Omayeletumbulo 16:3.

4. Otatu ka kundathana shike moshitopolwa shino?

⁴ Oshiwanawa okwiitulila po omalalakano gopambepo manga kuyele. Omolwashike? Otatu ka tala komatompelo gatatu. Omatompelo gaali gotango, otagu ulike kutya okwiitulila po omalalakano gopambepo ohaku koleke ekwatathano lyomuntu naJehova. Etompelo etitatu, otali tsu omuthindo uuwanawa mboka hawu zi mokwiitulila po omalalakano gopambepo manga kuyele.

5. Etompelo lya simanenena lyokwiitulila po omalalakano gopambepo olini?

⁵ Etompelo lya simanenena lyokwiitulila po omalalakano gopambepo, olyo okuulukila Jehova kutya otwa pandula sho e tu hole nomolwiinima mbyoka e tu ningila. Omupisalomi okwa ti: “Omuwa, osho opala oku ku hambelela. . . . Omuwa, iilongankondo yoye otayi nyanyudha ndje; otandi imbi nda nyanyukwa molwaashoka we shi longo.” (Eps. 92:1, 4) Wu li omugundjuka, dhiladhila kwaashihe shoka Jehova e ku ningila. Okwe ku pa omwenyo, eitaalo, Ombiimbeli, egongalo nosho wo etegameno lyonakuyiwa. Ngele owa pititha komeho omalalakano gopambepo, kungawo otu ulukile Kalunga kutya owe mu pandula, omolwomayambeko ngoka e ku pa, naashoka ohashi ku hedhitha popepi naye.

6. (a) Omalalakano gopambepo ohaga gumu ngiini ekwatathano lyetu naJehova? (b) Omalalakano geni tatu vulu okwiitulila po manga tu li aagundjuka?

⁶ Etompelo etiyali, olyo kutya uuna wa tameke okulonga nuudhiginini wu adhe omalalakano goye gopambepo, kungawo owa tameka okulonga shoka oshiwanawa momeho gaJehova. Shoka ohashi ku hedhitha popepi naye. Omuyapostoli Paulus oku uvaneke a ti: “Kalunga oku shi kwiinekelwa. Ita dhimbwa iilonga nohole yeni mokusimanekitha edhina lye.” (Heb. 6:10) Ngoye ku shi omushona unene nokwiitulila po omalalakano. Sho omumwameme Christine a li e na omimvo omulongo, okwi itulile po omukalondjigilile gwokulesha ondjokonona yOonzapo ndhoka dha longela Jehova nuudhiginini. Omumwatate Toby sho e na omimvo 12, okwa li i itulile po elalakano lyokulesha Ombiimbeli ayihe, manga inaa ninginithwa. Omumwatate Maxim okwa li e na omimvo 11, omanga omumwayinakadhona Noemi a li e na omimvo 10, sho ya ninginithwa. Ayehe yaali oya li ya tameke okulonga nuudhiginini, opo ya adhe elalakano lyawo lyokuya koBetel. Shoka sha li she ya kwathele ya dhiginine elalakano lyawo, oya tsilike ofooloma yaBetel kekuma megumbo. Omolwashike itoo tala kutya omalalakano geni ga simana kungoye, e to tameke okulonga nuudhiginini wu ga adhe? — Lesha Aafilippi 1:10, 11.

7, 8. (a) Ongiini okwiitulila po omalalakano haku shi ningitha oshipu tu ninge omatokolo? (b) Omolwashike omugundjuka gumwe inaa hogolola a ye kouniveesiti?

⁷ Etompelo etitatu lyokwiitulila po omalalakano manga kuyele, oli na ko nasha nokuninga omatokolo. Aagundjuka oye na okuninga omatokolo kombinga yelongo, yiilonga noyiinima yilwe. Okuninga omatokolo okwa fa to hogolola ondjila ndjoka wu na okuya nayo, uuna we ya pomatsakaneno goondjila. Ngele owu shi mpoka to yi, okuhogolola ondjila ndjoka yu uka, itaku ka kala uupyakadhi. Momukalo gwa faathana, ngele owu shi omalalakano goye, okuninga omatokolo omawanawa ohaku kala okupu. Omayeletumbulo 21:5 otayi ti: “Oompangela dhomunandjungu otadhi mu etele eliko.” Ngele owa ningi omatokolo omawanawa manga kuyele, oto ka pondola nziya. Shoka osho sha ningilwa Damaris, sho a li e na okuninga etokolo lya simana, pethimbo omugundjuka.

⁸ Damaris okwa li a mana osikola yongula niizemo iiwanawa. Okwa li ta vulu okutaamba ko oshimaliwa shoka a li ta pewa shokukiilongela uutseyiveta kouniveesiti, ihe pehala lyaashono, okwa hogolola oku ka longa mombaanga. Omolwashike mbela? Okwa ti: “Onda lundulula nziya omadhiladhilo gandje ndi ka kokole ondjila. Sha hala okutya,  onda li handi longo etata siku. Onda li tandi vulu okumona iimaliwa oyindji ando onda li ndi na onzapo yuutseyiveta yokouniveesiti, ihe ando osha kala oshidhigu okumona iilonga yetata siku.” Damaris okwa kokola ondjila ngashingeyi uule womimvo 20. Mbela oku uvite ngaa kutya okwa kala i itulila po elalakano ewanawa nokwa ninga etokolo lyomondjila e li omugundjuka? Okwa ti: “Kiilonga yandje yomombaanga, ngashingeyi ohandi longo unene naatseyiveta. Ohaya longo iilonga mbyoka nda li ndi na okulonga, ando onda li ndi ilongela uutseyiveta. Uushili owo kutya oyendji yomuyo inaya nyanyukilwa naanaa iilonga yawo. Etokolo lyandje lyokukokola ondjila olya kwathele ndje nolye egululile ndje oompito odhindji dhokunyanyukilwa iilonga yaJehova, pehala lyokukala nda yemata.”

9. Omolwashike aagundjuka oyendji ya gwana okupandulwa noonkondo?

⁹ Aagundjuka oyendjiyendji momagongalo muuyuni awuhe, oya gwana lela okupandulwa. Oya pititha Jehova komeho moonkalamwenyo dhawo noyi itulila omalalakano gopambepo. Aagundjuka mboka ohaya nyanyukilwa onkalamwenyo pakuudha, nopethimbo opo tuu mpoka, otayi ilongo okulandula ewiliko lyaJehova mukehe shoka taya ningi. Shika osha kwatela mo elongo, iilonga nonkalamwenyo yomegumbo. Salomo okwa nyola a ti: “Inekela Omuwa nomutima gwoye aguhe. . . . Mu tseya moondjila dhoye adhihe, nena oondjila dhoye ote dhi yelekanitha.” (Omayel. 3:5, 6) Aagundjuka megongalo lyopaKriste oye na ondilo momeho gaJehova, ngoka e ya hole noonkondo, he ya gamene, he ya wilike nohe ya yambeke.

10. (a) Omolwashike iilonga yokuuvitha oyo tu na okupititha komeho? (b) Ongiini tatu vulu okuuvitha shi vulithe nale?

¹⁰ Omugundjuka ngoka ha gandja eitulomo kokulongela Jehova, oha kala lela e hole uukalele. Jesus Kristus okwa tsu omuthindo a ti: “Tangotango elaka etoye oli na okuuvithilwa aantu.” (Mark. 13:10) Molwaashoka iilonga yokuuvitha oye endelela, oyo tu na okupititha komeho monkalamwenyo yetu. Mbela ito vulu okwiitulila po elalakano lyokuuvitha shi vulithe nale? Mbela ito vulu okukokola ondjila? Ihe ongiini ngele iho nyanyukilwa lela iilonga yokuuvitha? Nongiini to vulu okukutha ombinga shi vulithe nale miilonga yokuuvitha? Oonkatu ndhika mbali otadhi ke tu kwathela: Yotango, ilongekidha nawa. Ontiyali, ino etha po okuuvithila yalwe kombinga yaashoka wu shi. Otashi vulika wu ke shi kuminwe, okumona sho to uvitha nenyanyu.

11, 12. (a) Oshike aagundjuka taya vulu okuninga, opo ya kale yi ilongekidha okugandja uunzapo? (b) Ongiini omugundjuka gumwe a li a longitha ompito a gandje uunzapo kosikola?

¹¹ Oto vulu okutameka okuninga omapekapeko kombinga yomayamukulo gomapulo ngoka ho pulwa unene kaanasikola ooyakweni, ngaashi: “Omolwashike wi itaala muKalunga?” Kepandja lyetu lyokointaneta, jw.org, oku na iitopolwa ya nuninwa okukwathela aagundjuka, opo ya mone yo yene nkene taya vulu okuyamukula epulo ndyoka. Tala mpoka pwa nyolwa BIBLE TEACHINGS > TEENAGERS. Mpoka opo to adha ombapila yomapulo yi na oshipalanyolo: “Why Do I Believe in God?” (Omolwashike ndi itaala muKalunga?) Ombapila ndjoka, otayi ke ku kwathela wi ilongekidhile omayamukulo goye. Oyi na omanyolo gatatu ngoka to vulu okulongitha, uuna to yelitha eitaalo lyoye. Omanyolo ngoka ongaashi Aahebeli 3:4, Aaroma 1:20 nEpisalomi 139:14. Opu na oombapila dhilwe dhomapulo, ndhoka to vulu okulongitha wu yamukule omapulo galwe ogendji. — Lesha 1 Petrus 3:15.

¹² Mpoka ompito tayi shi pitike, ladhipika aanasikola ooyakweni ya tale yo yene kepandja lyetu lyokointaneta, jw.org. Shoka osho omumwatate Luca a li a ningi. Mongundu yawo omwa li tamu kundathanwa kombinga yomalongelokalunga gi ili nogi ili. Luca okwa li e shi mono kutya elongithwambo ndyoka oli na uuyelele wumwe wa puka kombinga yOonzapo dhaJehova. Nonando okwa li a tila, okwa pula epitikilo a pukulule uuyelele mboka wa puka, nomulongi gwe okwe shi zimine. Luca ka li owala a yelitha eitaalo lye, ihe okwa li wo u ulukile  ongundu ayihe epandja lyetu lyokointaneta. Omulongi okwa li a thigile omulongwa kehe oshinakugwanithwa shokutala okavidio: Dhenga ompote, ihe hanoongonyo. Luca okwa li a nyanyukwa noonkondo, sho a gandja uunzapo uuwanawa.

13. Omolwashike inaatu pumbwa okuteka omukumo, uuna pwa holoka omashongo?

¹³ Ino teka omukumo, nonando omathimbo gamwe owu iyadhe momamakelo. (2 Tim. 4:2) Uuna wi iyadha moonkalo oondhigu, kala wa dhiginina omalalakano goye. Omumwameme Katharina okwa li e na omimvo 17, sho i itulile po elalakano lyokuuvithila kehe gumwe kiilonga yawo. Omuniilonga gumwe okwa li e mu ula nayi lwiikando, ihe ka li e mu shunithile uuwinayi. Nonando Katharina okwa kala tu ulwa nayi, okwa li i ihumbata nawa, naashoka osha li sha kumitha omuniilonga pamwe naye, gwedhina Hans. Oshizemo? Hans okwa tameke okulesha iileshomwa yetu, okukonakona Ombiimbeli nokonima okwa ninginithwa. Katharina okwa li a tembuka, noka li e shi omalunduluko ngoka Hans a ninga. Konima yomimvo 13, manga ye nuukwanegumbo we ye li mOshinyanga shUukwaniilwa, okwa tseyithwa kutya Hans okwe ya okugandja oshipopiwa okuza kegongalo lilwe. Dhiladhila owala nkene a li a nyanyukwa sho e shi uvu! Onkee ano, Katharina okwa ningi nawa, sho inaa teka omukumo e ethe po elalakano lye lyokuuvithila aaniilonga ooyakwawo.

14, 15. (a) Uuna aagundjuka taya makelwa, oshike ye na okukaleka momadhiladhilo? (b) Ongiini aagundjuka taya vulu okukondjitha omathiminiko goomakula?

¹⁴ Sigo oompaka, oshitopolwa shika oshe ku ladhipika wu lundulule omadhiladhilo goye, opo wu gandje eitulomo kokukala wa hala okulongela Jehova. Shika otashi ti, okwiitulila po omalalakano gopambepo. Aagundjuka yalwe yepipi lyoye, otashi vulika haya gandja unene eitulomo komainyanyudho, notashi vulika nokuli ye ku ithane wu tyapule pamwe nayo. Onkee ano, oto ka kala wa pumbwa okuulika nkene wa tokola toko okukala wa dhiginina omatokolo ngoka wa ninga. Ino piyaganekwa koomakula. Ngele owa dhiladhila kethaneko lyombesa, ito ka londa mombesa ndjoka yu uka kehe pamwe, molwaashoka owala aafaalelwa mombesa moka taya nyanyukilwa pamwe.

¹⁵ Opu na omikalo odhindji dhokukondjitha omathiminiko goomakula. Pashiholelwa, yanda oonkalo ndhoka tadhi vulu okukala emakelo kungoye. (Omayel. 22:3) Ngoye dhiladhila wo kiilanduliko yiyemateka mbyoka to ka mona, ngele owa tokola okweendathana naamboka ye na eihumbato ewinayi.  (Gal. 6:7) Shoka ishewe tashi vulu oku ku kwathela, okuzimina kutya owa pumbwa omayele. Eifupipiko otali ke ku kwathela wu taambe ko omayele ngoka to pewa kaavali yoye nokwaamboka ya kola pambepo megongalo. — Lesha 1 Petrus 5:5, 6.

16. Gandja oshimoniwa shagumwe ngoka a mono uuwanawa, omolweifupipiko lye.

¹⁶ Eifupipiko olyo lya li lyi inyengitha omumwatate Christoph a taambe ko omayele omawanawa. Konima yethimbo efupi sho a ninginithwa, okwa tameke oku ka ninga omadhewo pandjigilile kehala hoka aantu haya ningile omadhewo. Aagundjuka yalwe yaahoka oya li ye mu ladhipike a kuthe ombinga momaudhano. Christoph okwa li a popi nomukuluntugongalo gumwe kombinga yaashono. Omukuluntugongalo ngoka okwa lombwele Christoph a dhiladhile kombinga yiilanduliko mbyoka ta vulu okumona, manga inaa ninga etokolo, ngaashi kombinga yankene sha nika oshiponga okukwatwa kombepo yethigathanopo. Nonando ongawo, Christoph okwa tameke okukutha ombinga muudhano. Mokweendela ko kwethimbo, okwe shi mono mo kutya uudhano mboka owa nika oshiponga. Okwa popi wo naakuluntugongalo yalwe, noye mu pe omayele gopamanyolo. Christoph okwa ti: “Jehova okwa li a tumine ndje aagandjimayele aawanawa, nonda pulakene kuYe, nonando osha pula ndje ethimbo.” Mbela oho taamba ko omayele neifupipiko?

17, 18. (a) Jehova okwa halela aagundjuka shike kunena? (b) Oonkalo dhini dhiyemateka tadhi vulu okwaadha omuntu sho a koka, nongiini to vulu oku dhi yanda? Gandja oshiholelwa.

¹⁷ Ombiimbeli otayi ti: “Mugundjuka ngoye, nyanyukwa muugundjuka woye, nou nyanyudhe omutima gwoye momathimbo guugundjuka woye.” (Omuuv. 11:9) Wu li omugundjuka, Jehova okwa hala wu kale wa nyanyukwa. Oshitopolwa shika osha tumbula omukalo gumwe ngoka tagu vulu oku ku kwathela wu kale wa nyanyukwa. Tsikila okugandja eitulomo komalalakano goye gopambepo nokukwatela mo Jehova moompangela dhoye adhihe. Ngele owa tameke okuninga ngaaka manga kuyele, oto ka mona nziya nkene Jehova te ku wilike, te ku gamene note ku yambeke. Dhiladhila komayele agehe ngoka taga adhika mOmbiimbeli, e to taamba ko ngoka taga ti: “Dhimbulukwa Omushiti gwoye momasiku guugundjuka woye.” — Omuuv. 12:1.

¹⁸ Kapu na omuntu ha kala omugundjuka sigo aluhe. Aagundjuka ohaya kokelele, e taya ningi aakuluntu. Shiyemateka, ngele ya koko, oyendji ohayi ipe uusama sho yi itulile po omalalakano ga puka pethimbo aagundjuka, nenge hashi ya uvitha nayi sho inaaya kala ye na omalalakano gasha monkalamwenyo yawo. Ihe aagundjuka mboka kunena haya gandja eitulomo komalalakano gopambepo, ngele ya koko ohaya kala ya nyanyukwa noonkondo komatokolo ngoka ya ninga. Shika osho sha ningilwa omumwameme Mirjana ngoka a li enyakwa momaudhano, pethimbo omugundjuka. Okwa li a pulwa a kuthe ombinga muudhano hawu ithanwa Winter Olympic, ihe pehala lyaashono okwa hogolola a ninge omukokolindjila. Konima yomimvo 30 nasha, natango Mirjana oku li miilonga yethimbo lyu udha, pamwe nomulume. Okwa yelitha a ti: “Okwiikongela edhina, okulalakanena esimano, oonkondo nuuyamba, omalalakano ngoka ihaga kalelele noinaga simana monkalamwenyo. Okulongela Kalunga nokukambadhala okukwathela aantu pambepo, ngoka ogo omalalakano gashili notaga kalelele.”

19. Popya paufupi uuwanawa mboka omuntu ha mono, ngele okwa gandja eitulomo komalalakano gopambepo kuyele, manga e li omugundjuka.

¹⁹ Aagundjuka megongalo oya gwana okupandulwa, sho hayi idhidhimikile oonkalo oondhigu naasho haya kala ya tokola okugandja eitulomo kokulongela Jehova. Aagundjuka oyendji ohaye shi ningi mokwiitulila po omalalakano gopambepo nokupititha komeho iilonga yokuuvitha. Shimwe ishewe, ohaya kala ya tokola kaaye ethe iinima yuuyuni yi ye omalalakano gawo moshipala. Aagundjuka otaya vulu okukala nuushili kutya iilonga yawo yuudhiginini kayi shi osima yowala. Oye na aamwatate naamwameme mboka ye ya hole nohaye ya ambidhidha. Aagundjuka ngele tayi igandja kuJehova, oompangela dhawo otadhi ka pondola.