OMUMVO gwa zi ko, aamwatate omayovi muuyuni awuhe oya langekwa po ye li aakuluntugongalo naayakuligongalo. Ngele ngoye ogumwe gwomuyo, osha yela kutya owa nyanyukilwa uuthembahenda mboka.

Odhoshili kutya otashi vulika wu kale wa tila kashona. Jason, omukuluntugongalo omugundjuka, okwa ti: “Petameko sho nda langekwa po, onda li ndu uvite nda gwililwa po koshinakugwanithwa shandje oshipe.” Moses naJeremia nayo oya li yu uvite inaaya gwana, sho ya pewa iinakugwanithwa iipe kuJehova. (Eks. 4:10; Jer. 1:6) Ngele nangoye osho wu uvite ngawo, ongiini to vulu okusinda eiyuvo ndyoka e to tsikile okuninga ehumokomeho? Tala koshiholelwa shomulongwa Omukriste, Timoteus. — Iil. 16:1-3.

Otashi vulika Timoteus a li e na omimvo omulongo nasha nenge 20 nasha, sho omuyapostoli Paulus e mu hiya a kale omweendi pamwe naye. Sho Timoteus e li omugundjuka, petameko otashi vulika kaa li e na omukumo nokwa li ta kakadhala a longe oshinakugwanithwa she oshipe. (1 Tim. 4:11, 12; 2 Tim. 1:1, 2, 7) Konima yomimvo omulongo lwaampono, Paulus okwa li a lombwele egongalo lyomuFilippi, a ti: “Ngame ondi na einekelo mOmuwa Jesus kutya otandi ka vula okutuma mbala Timoteus kune . . . oshoka Timoteus oye awike he mu dhiladhila ngaashi ngame.” — Fil. 2:19, 20

Oshike sha ningitha Timoteus a kale omukuluntugongalo e li oshiholelwa sha dhenga mbanda? Tala kiinima ihamano, mbyoka tatu vulu okwiilonga moshiholelwa she.

1. Okwa li e na ko nasha lela naantu. Paulus okwa lombwele aamwahe muFilippi a ti: ‘Timoteus oku na oshimpwiyu nane.’ (Fil. 2:20) Eeno, Timoteus okwa li e na ko nasha nuupambepo waantu, nokwa li e na ehalo lyokwiigandja pehala lyawo.

Yanda okukala wa fa omuhingimbesa ngoka ha kala unene ti ipula nokuthika pethimbo pomatulilo goombesa, pehala lyokugandja eitulomo kokulondeka aantu. Omumwatate William, ngoka a kala omukuluntugongalo uule womimvo dhi vulithe po 20, okwa ladhipike mboka opo ya langekwa po a ti: “Kaleni mu hole aamwatate naamwameme. Gandjeni eitulomo koompumbwe dhawo pehala lyiinima yilwe yehangano.”

2. Okwa li a pititha komeho iilonga yokuuvitha. Paulus okwa li a popi ekondjithathano ndyoka li li pokati koshiholelwa shaTimoteus niiholelwa yayalwe, a ti: “Ooyakweni ayehe oyi ipyakidhila ashike niinima yawo yene, haambyoka yaJesus Kristus.” (Fil. 2:21) Paulus okwa li e shi mono kutya aamwahe muRoma, moka a li sho ta nyola, ohaya gandja unene eitulomo kiinima yopaumwene. Poompito dhimwe, kaya li haya kala yi ipyakidhila niinima yopambepo. Ihe Timoteus hasho a li ngawo! Sho a mono oompito dhokuhumitha komeho onkundana ombwanawa, okwa kala e na iikala ya fa yaJesaja, ngoka a ti: “Otandi yi! Tuma ndje.” — Jes. 6:8.

Ongiini to vulu okukala nondjele ngele tashi ya piinima yopambepo niinima yopaumwene? Shotango, tala kutya oshike wu na okupititha komeho. Paulus okwa ti: ‘Kaleni mu na owino yokuyoolola iinima mbyoka yi na oshilonga.’ (Fil. 1:10) Kala wa pititha  iinima yaKalunga komeho. Oshitiyali, pupaleka onkalamwenyo yoye. Longitha nawa ethimbo lyoye noonkondo dhoye. Paulus okwa li a kumagidha Timoteus a ti: “Yanda uuhalu womuugundjuka, lalakanena uuyuuki, eitaalo, ohole nombili.” — 2 Tim. 2:22.

3. Okwa li ha longo nuudhiginini miilonga iiyapuki. Paulus okwa li a dhimbulukitha ooitaali ooyakwawo yomuFilippi a ti: “Uudhiginini we [Timoteus] omu u shi, nkene twa kala tatu longo pamwe naye moshilonga shevaangeli ngashika he nomwana.” (Fil. 2:22) Timoteus ka li omunanyalo. Okwa li a longo pamwe naPaulus, shoka sha koleke ekwatathano lyawo.

Mehangano lyaJehova kunena omu na iilonga oyindji. Iilonga mbyoka ohayi nyanyudha notayi vulu oku ku hedhitha popepi naamwatate naamwameme. Onkee ano, nashi kale elalakano lyoye okukala wi “ipyakidhila aluhe niilonga yOmuwa.” — 1 Kor. 15:58.

4. Okwa li ha tula miilonga shoka ti ilongo. Paulus okwa li a nyolele Timoteus a ti: “Ngoye owa landula elongo lyandje, omikalo dhandje nelalakano lyandje; owa holele ndje meitaalo, meidhidhimiko, mohole nomomukumo.” (2 Tim. 3:10) Timoteus okwa a li a gwana okupewa iinakugwanithwa iinene, molwaashono okwa li ha tula miilonga shoka ti ilongo. — 1 Kor. 4:17.

Mbela opu na omuntu ngoka a koka pambepo, wa hala okuholela? Ngele hasho, ongiini ngele owa tala kutya oguni to vulu okuholela? Tom, ngoka a kala omukuluntugongalo uule womimvo odhindji, ota dhimbulukwa ta ti: “Omukuluntugongalo gumwe a pyokoka okwa kala ha kwathele ndje noonkondo nokudheula ndje. Onda kala aluhe handi mu pula omayele noku ga tula miilonga. Shoka osha kwathele ndje ndi kale ndi na omukumo.”

5. Okwa tsikile okukala ti idheula. Paulus okwa li a kumagidha Timoteus a ti: “Iputudha, u kale ho simaneke Kalunga.” (1 Tim. 4:7) Omutondoki otashi vulika a kale e na ngoka te mu dheula, ihe nomutondoki ye mwene okwa pumbwa okwiidheula. Paulus okwa li a ladhipike Timoteus a ti: “Longitha ethimbo lyoye mokulesha Omanyolo omayapuki montaneho yaayehe, mokuuvitha nomokulonga aantu. . . . Iinima mbika yi ninga ano, ngoye wi itule mo muyo, opo okuhuma kwoye komeho ku monike kwaayehe.” — 1 Tim. 4:13-15.

Nangoye owa pumbwa okutsikila okuhwepopaleka uunkulungu woye. Ino etha wu nkundipale pambepo. Natango, yanda okukala wi iyinekela unene, tashi vulika to dhiladhila kutya owu na owino oyindji nonokutya oto vulu okuungaunga nonkalo kehe nopwaa na okuninga omapekapeko nuukeka. Holela Timoteus, mokukala to ‘itonatele mwene nosho wo elongo lyoye.’ — 1 Tim. 4:16.

6. Okwa li i inekela mombepo yaJehova. Shi na ko nasha nuukalele waTimoteus, Paulus okwa li e mu dhimbulukitha a ti: ‘Dhiginina omagano omawanawa ngoka we ga pewa koonkondo dhombepo ondjapuki, ndjoka yi li mutse.’ (2 Tim. 1:14) Opo a gamene uukalele we, Timoteus okwa li a pumbwa okwiinekela mombepo yaKalunga.

Donald, ngoka a kala omukuluntugongalo uule womimvo odhindji, okwa ti: “Aalumentu mboka ya langekwa po naya kale ya lenga ekwatathano lyawo naKalunga. Mboka taye shi ningi ‘otaa nkondopala.’ Ngele oya galikana ya pewe ombepo yaKalunga nokwiimika iiyimati yayo, otaya ka kala eyambeko enene kaamwatate naamwameme.” — Eps. 84:7; 1 Pet. 4:11.

Otashi tsu lela omukumo okumona aamwatate oyendji mboka opo ya langekwa po, ngaashi ngoye, taya ningi ehumokomeho pambepo. Jason ngoka a tumbulwa metetekelo, okwa ti: “Uule wethimbo ndyoka nda kala omukuluntugongalo, ondi ilonga oshindji nondi na einekelo shi vulithe nale. Ngashingeyi ohandi nyanyukilwa oshinakugwanithwa shandje nonde shi tala ko shi li uuthembahenda uuwanawa.”

Mbela oto ka tsikila okuhuma komeho pambepo? Shi ninga elalakano lyoye okuholela Timoteus. Uuna we shi ningi, oto ka kala eyambeko koshigwana shaKalunga.