1, 2. (a) Uushili wuni tawu ulike kutya aantu otaya kambadhala okwiimonena emanguluko lyashili? (b) Oonkambadhala ndhono haya ningi ohadhi eta iizemo yini?

KUNENA, aantu oye hole unene okupopya kombinga yuuthikepamwe, yuuthemba wawo noyemanguluko. Aantu oyendji muuyuni, oya hala okukala ya manguluka ko komathiminiko, kokatongo nosho wo koluhepo. Yalwe ohaya kala ya hala emanguluko lyokupopya, lyokuhogolola shoka ya hala nolyokuninga omatokolo gawo yene. Kehe pamwe, aantu oya hala okuninga nenge okukala ngaashi ya hala.

² Omikalo ndhoka haya longitha, opo ya gwanithe po omahalo gawo ngono, odhi ili. Ohaya kutha ombinga mopolitika, moompata, momakanka nomomakuyunguto. Mbela omaipumomumwe ngono ohaga kandula po ngaa uupyakadhi shili? Hasho nando. Olundji iinima mbyoka ohayi eta uupyakadhi nomaso. Oohapu dha nwethwa mo dhomukwaniilwa Salomo odhoshili, ndhoka tadhi ti: “Omuntu gumwe ta dhiladhilile mukwawo oshiponga.” — Omuuv. 8:9.

3. Oshike tatu vulu okuninga, opo tu kale twa nyanyukwa shili notwa gwanenwa?

³ Omulongwa Omukriste Jakob okwa li a popi nkene tatu vulu  okumona enyanyu lyashili negwaneno. Okwa nyola a ti: “Ngoka ti italele mompango ya gwana yokumangulula . . . oye ota yambekwa moku shi ninga.” (Jak. 1:25) Jehova ngoka a gandja ompango ndjoka ya gwanenena, oku shi nawa kutya aantu oya pumbwa shike, opo ya kale ya nyanyukwa shili noya gwanenwa. Okwa li a pe aayihokani yotango kehe shoka ya pumbwa, opo ya kale ya nyanyukwa, mwa kwatelwa emanguluko lyashili.

4. Adam naEva oya li haya nyanyukilwa emanguluko lini? (Tala kethano lyopetameko.)

⁴ Uuna tatu lesha ontopolwa yotango nontiyali yaGenesis, otadhi tu kwathele tu mone kutya Adam naEva oya li haya nyanyukilwa emanguluko lyashili, ndyoka aantu kunena taya vulu owala okutegamena. Oya li ye na ashihe shoka ya pumbwa, kaya li ye na uumbanda washa nokaya li taya thiminikwa. Kaya li hayi ipula niikulya, niilonga, nuuwehame nosho wo neso. (Gen. 1:27-29; 2:8, 9, 15) Mbela shino osha hala kutya emanguluko lyaAdam naEva kalya li lya ngambekwa? Natu shi taleni.

5. Mepingathano naashoka aantu haya dhiladhila, oshike sha pumbiwa, opo aantu ya nyanyukilwe emanguluko?

⁵ Aantu oyendji kunena ohaya dhiladhila kutya otaya vulu okukala ya manguluka shili, ngele taya ningi kehe shoka ya hala, nonando otashi ye etele iilanduliko. Embo The World Book Encyclopedia olya popi kutya emanguluko olyo “okuvula okuninga omatokolo noku ga tula miilonga.” Olya gwedha ko lya ti: “Aantu oyu uvite kutya otaya ka kala ya manguluka, ngele kapu oompango ndhoka tadhi indike okwaanuuyuuki, iinima mbyoka inaayi pumbiwa nenge yaa li pandunge.” Shino otashi ulike kutya omangambeko gontumba oga pumbiwa, opo kehe gumwe a mone uuwanawa memanguluko ndyoka li li po. Epulo oli li nee mpano kutya: Olye e na uuthemba wokutokola kutya omangambeko geni ge li pauyuuki, ga pumbiwa noge li pandunge?

6. (a) Omolwashike Jehova oye awike e na emanguluko inaali ngambekwa? (b) Aantu otaya vulu okukala ye na emanguluko lini, nomolwashike?

⁶ Ngele tashi ya pemanguluko, shoka tu na okukaleka momadhiladhilo osho kutya Jehova Kalunga oye awike e na emanguluko lyashili noinali ngambekwa. Omolwashike mbela? Omolwaashoka oye Omushiti gwiinima ayihe, Omunakondoadhihe nOmunamapangelo gweshito alihe. (1 Tim. 1:17; Eh. 4:11) Dhimbulukwa oohapu oombwanawa dhomukwaniilwa David, ngoka a yelitha ondondo yi ikalekelwa noyopombanda ndjoka Jehova e na. (Lesha 1 Ondjalulo 29:11, 12.) Iishitwa ayihe megulu nokombanda yevi, oyi na emanguluko lya ngambekwa. Oyi na okudhimbulukwa kutya Jehova Kalunga oye awike ta vulu okutokola kutya omangambeko geni ge li pauyuuki, ga pumbiwa noge li pandunge. Shoka osho a li a ningile aantu mboka a shitile kombanda yevi petameko.

7. Iinima yimwe yini tu na okuninga, opo tu kale twa nyanyukwa?

⁷ Nonando petameko Adam naEva oya li ye na emanguluko miinima oyindji, emanguluko lyawo olya li lya ngambekwa. Omangambeko gamwe oga li ge li paunshitwe kuyo. Pashiholelwa, oya li ye shi kutya opo ya kale nomwenyo, oye na okufudha, okulya, okukotha nosho tuu. Mbela oya li ye wete kaaye na emanguluko lyokuninga iinima mbyono? Hasho nando. Jehova okwa li e shi kutya uuna taye yi ningi, otaye ke yi nyanyukilwa notaya ka kala ya gwanenwa. (Eps. 104:14, 15; Omuuv. 3:12, 13) Olye kee hole okufudha okambepo ka talala nawa, okulya iikulya mbyoka e hole nenge okukotha nawa? Ohatu nyanyukilwa okuninga iinima mbyoka noihatu kala tu wete twa ngambekwa. Osha yela kutya Adam naEva nayo osho ya li haya kala yu uvite ngawo.

8. Kalunga okwa li a pe Adam naEva elombwelo lini lyokondandalunde, nonelalakano lyashike?

 ⁸ Jehova okwa li a lombwele Adam naEva kondandalunde, yu udhithe evi noye li tonatele. (Gen. 1:28) Mbela elombwelo ndyono olya li lya kutha po emanguluko lyawo? Hasho nando. Olya li lye ya pe ompito ya kuthe ombinga melalakano lyOmushiti, mokuninga evi alihe oparadisa nolyi kale egumbo lyawo, moka taya vulu okukala sigo aluhe noluvalo lwawo lwa gwanenena. (Jes. 45:18) Kunena ngele omuntu ina hala okuya mondjokana nenge inaa hala okumona aanona mondjokana, kashi li ompinge nehalo lyaKalunga. Natango, aantu yamwe ohaya yi mondjokana e taya mono aanona, nonando shika ohashi ye etele omashongo gontumba. (1 Kor. 7:36-38) Omolwashike haya ningi omatokolo ngoka? Omolwaashoka uuna taye ga ningi, ohaya kala ya nyanyukwa noya gwanenwa. (Eps. 127:3) Ando Adam naEva oya vulikile kuJehova, ando oya kala taya nyanyukilwa ondjokana yawo nuukwanegumbo wawo sigo aluhe.

9. Omolwashike oshipango shaKalunga shoka shi li muGenesis 2:17 shi li pauyuuki, sha pumbiwa noshi li pandunge?

⁹ Jehova okwa li a pe Adam naEva oshipango shilwe, shoka sha kwatela mo egeelo ndyoka ya li taya ka pewa, ngele inaya vulika kusho. Okwa ti: ‘Kakele komuti gwokutseya uuwanawa nuuwinayi, iiyimati yomuti ngoka ino yi lya; ngele oto shi ningi, oto si shili.’ (Gen. 2:17) Mbela oshipango shoka osha li kaashi li pauyuuki, inaashi pumbiwa nenge kaashi li pandunge? Mbela osha li sha kutha po emanguluko lyawo? Aawe. Aalongwantu yOmbiimbeli oyendji, oya ti kutya oshipango shoka osha li pandunge notashi opalele. Pashiholelwa, omulongwantu gumwe okwa ti: “Iipango mbyoka yi li [muGenesis 2:16, 17] otayi tu longo kutya Kalunga oye awike e shi shoka oshiwanawa . . . tashi opalele aantu noye awike e shi shoka oshiwinayi . . . kuyo. Opo aantu ya nyanyukilwe shoka ‘oshiwanawa,’ oye na okwiinekela Kalunga nokuvulika kuye. Ngele itaya vulika, ote ye etha oyo ya tokole kuyo yene shoka shi li mondjila . . . naashoka sha puka.” Oshinima shoka oshidhigu kaantu okuninga.

10. Omolwashike kaatu na okudhiladhila kutya emanguluko lyokuninga omatokolo olya faathana nuuthemba wokutokola shoka shi li mondjila naashoka sha puka?

¹⁰ Sho aantu taya lesha kombinga yoshipango shono, oyendji kunena otashi vulika ya tye kutya Kalunga ka li a pa Adam emanguluko a ninge shoka a hala. Ngele osho taya ti ngawo, otaya tula emanguluko lyokuninga omatokolo mumwe nuuthemba wokutokola shoka shi li mondjila naashoka sha puka. Adam naEva oya li ye na emanguluko lyokuhogolola ngele otaya vulika kuKalunga nenge hasho. Nonando ongawo, Jehova oye awike e na uuthemba wokutokola shoka oshiwanawa naashoka oshiwinayi, ngaashi sha thanekwa ‘komuti gwokutseya uuwanawa nuuwinayi,’ ngoka gwa li moshikunino shaEden. (Gen. 2:9) Otu na okuzimina kutya haaluhe hatu kala tu shi kutya iilanduliko yomatokolo getu otayi ka kala ya tya ngiini, na ihatu kala twa tegelela aluhe okumona iizemo iiwanawa. Onkee olundji ohatu mono aantu taya ningi omatokolo ye na omatompelo omawanawa, ihe oshizemo uupyakadhi wowala. (Omayel. 14:12) Odhoshili kutya aantu oya ngambekwa mwaashoka taya vulu okuninga. Okupitila moshipango shoka Jehova a pe Adam naEva, okwa li e ya longo nkene ye na okukala nemanguluko lyashili nokuvulika kuye. Ngiini mbela? Yo Adam naEva oya li yi inyenge momukalo guni?

11, 12. Omolwashike etokolo lyaAdam naEva lye ya etele uupyakadhi? Gandja oshiholelwa.

¹¹ Mupyamunene, Adam naEva oya hogolola okwaavulika kuJehova. Eva okwa li e etha a pukithwe kuSatana, sho e mu uvanekele a ti: “Omeho geni otaga tonata, one notamu fe Kalunga mokutseya uuwanawa nuuwinayi.”  (Gen. 3:5) Mbela ehogololo lyawo olya li lye ya etele emanguluko lya gwedhwa po shili? Hasho nando. Ehogololo lyawo inali ya etela nando shoka ya lombwelwa kuSatana. Pehala lyaashono, oya mono mbala kutya okwaavulika kuJehova nokutsa mo dhawo, okwe ya etela uupyakadhi uunene. (Gen. 3:16-19) Omolwashike mbela? Omolwaashoka Jehova ina pa aantu emanguluko lyokutokola yo yene shoka shi li mondjila naashoka sha puka. — Lesha Omayeletumbulo 20:24; Jeremia 10:23.

¹² Shika otashi vulu okufaathanithwa nomuntu ta hingi ondhila. Opo a ka thike nawa kehala hoka u uka, oku na okulandula omilandu ndhoka dha tulwa po. Pethimbo lyoshinanena, omuhingindhila oha longitha okaalita hoka ka longelwa mondhila, ye natango oha kala ta kwatathana naamboka taya wilike ondhila, opo a ka thike kehala hoka u uka. Ihe ngele okwa hogolola kaa landule omilandu ndhoka, e ta tsu mo dhe, osha yela kutya otashi ke mu etela oshiponga. Ngaashi omuhingindhila ngoka, Adam naEva oya li ya hala okuninga iinima pamukalo gwawo. Oya tindi okulandula shoka ya lombwelwa kuKalunga. Oshizemo? Oyi iyetele uupyakadhi mboka we ya fala muulunde nomeso pamwe noluvalo lwawo. (Rom. 5:12) Sho ya kambadhala okutokola kuyo yene, oshe ya ningitha ya kanithe emanguluko lyashili ndyoka ya li ye na.

13, 14. Ongiini tatu vulu okumona emanguluko lyashili?

¹³ Aantu otashi vulika ya dhiladhile kutya ngele oya kala ye na emanguluko olindji, otaya ka kala ye li hwepo. Ihe uushili owo kutya okukala wu na emanguluko olindji okwa fa egongamwele lyoongenge mbali. Odhoshili kutya emanguluko lyashili ohali etele omuntu uuwanawa owundji, ihe natu dhiladhile owala kutya ando kapwa li omangambeko, ando uuyuni owu li ngiini? Embo The World Book Encyclopedia olya ti: “Oompango dhehangano kehe lyu unganekwa, ohadhi kala dha kitakana, oshoka odhi na okukala tadhi gamene nopethimbo opo tuu mpoka otadhi ngambeke emanguluko lyaantu.” Odhoshili kutya uutumbulilo “okukitakana” owo opalela. Dhiladhila owala koompango odhindjidhindji ndhoka dha nyolwa  kaantu, ndhoka ooahende naapanguli haye dhi yelitha noku dhi tula miilonga.

¹⁴ Jesus Kristus okwa popi omukalo omwaanawa gwokunyanyukilwa emanguluko lyashili. Okwa ti: “Ngele tamu vulika koohapu dhandje, nena kapu na omalimbililo, one aalongwa yandje. Ne otamu ka tseya ihe oshili, noshili otayi ke mu mangulula.” (Joh. 8:31, 32) Jesus okwa popi kutya okwiimonena emanguluko lyashili, okwa kwatela mo iitegelelwa iyali. Shotango, taamba ko oshili ndjoka a li a longo. Oshitiyali, ninga omulongwa gwe. Okuninga ngaaka otaku vulu oku ku etela emanguluko lyashili. Ihe emanguluko kushike? Jesus okwa tsikile okuyelitha ta ti: “Kehe ngoka ta longo uulunde, oye omupika guulunde. . . . Omwana ngele te mu mangulula, nena kape na omalimbililo, otamu kala mwa manguluka.” — Joh. 8:34, 36.

15. Omolwashike emanguluko ndyoka Jesus u uvaneka, tali vulu oku tu kwathela tu kale twa ‘manguluka shili’?

¹⁵ Osha yela kutya emanguluko ndyoka Jesus u uvanekela aalongwa ye, oli vule kokule emanguluko ndyoka aantu oyendji ya hala kunena. Sho Jesus a ti: “Omwana ngele te mu mangulula, nena kape na omalimbililo, otamu kala mwa manguluka,” okwa li ta popi kombinga yokumanguluka ko koshinima oshiwinayi noonkondo shoka aantu oyendji ya pita musho, ano okukala “omupika guulunde.” Uulunde ihawu tu ningitha owala tu ninge shoka oshiwinayi, ihe ohawu vulu wo oku tu imba tu ninge shoka tu shi kutya oshi li mondjila nenge twaa ninge ngaashi tatu vulu. Okukala aapika yuulunde, ohaku eta iizemo yiyemateka, ngaashi okuuva nayi, uuwehame, okumona iihuna nopehulilo eso. (Rom. 6:23) Omuyapostoli Paulus okwa li a mono nkene shi uvitha nayi okukala omupika guulunde. (Lesha Aaroma 7:21-25.) Ngele otwa manguluka ko thiluthilu kuulunde, opo owala tatu vulu okukala nemanguluko lyashili, ndyoka aavali yetu yotango ya li ye na petameko.

16. Ongiini tatu vulu okukala twa ‘manguluka shili’?

¹⁶ Oohapu dhaJesus ndhoka tadhi ti kutya “ngele tamu vulika koohapu dhandje,” otadhi ulike kutya ngele otwa hala Jesus e tu mangulule, opu na iitegelelwa mbyoka tu na okugwanitha po. Tu li Aakriste yi iyapulila Kalunga, otwi idhimbwa tse yene notwa hogolola tu kale metsokumwe nomalongo gaJesus tu li aalongwa ye. (Mat. 16:24) Ngaashi owala Jesus u uvaneka, otatu ka kala shili twa manguluka, ngele otwa mono omauwanawa agehe gekuliloyambo lye.

17. (a) Oshike tashi vulu oku tu kwathela tu kale nonkalamwenyo yi na eityo noya gwanenwa? (b) Oshike tatu ka kundathana moshitopolwa tashi landula?

¹⁷ Ngele otwa kala tatu vulika komalongo gaJesus tu li aalongwa ye, otatu kala twa nyanyukwa shili notwa gwanenwa. Shika ohashi tu egululile ompito yokukala twa manguluka ko thiluthilu kuupika wuulunde neso. (Lesha Aaroma 8:1, 2, 20, 21.) Moshitopolwa tashi landula, otatu ka kundathana nkene tatu vulu okulongitha nawa emanguluko ndyoka tu na ngashingeyi, opo tu simaneke Jehova sigo aluhe, Kalunga kemanguluko lyashili.