1. Etsomukumo lini Jehova a gandja pethimbo lyuunashipotha muEden?

OKUZA ngaa sho aantu ya ningi aalunde noinaya gwanenena, Jehova okwa kala noku shi ulika kutya oku li Kalunga ngoka ha tsu aantu omukumo. Nziya konima yuunashipotha muEden, Jehova okwa pe oluvalo lwaAdam lwomonakuyiwa etompelo lyokukala lu na omukumo. Onkee ano, okwe lu pe etegameno. Sho euvaneko ndyoka lya hunganekwa muGenesis 3:15 lyu uviwa ko, olya pe aantu etegameno kutya pehulilo “eyoka” ndyoka li li Satana nosho wo iilonga ye ayihe iiwinayi, otaya ka hanagulwa po. — Eh. 12:9; 1 Joh. 3:8.

2. Jehova okwa li a tsu ngiini Noa omukumo?

² Omupiya gwaJehova, Noa, okwa li muuyuni waakeenakonashanakalunga. Ye naanegumbo lye, oyo owala ya li haya longele Jehova.  Aantu muuyuni mboka oya li aakolokoshi nokaye na omikalo. Noa okwa li ta vulu okuteka omukumo. (Gen. 6:4, 5, 11; Jud. 6). Ihe okwa li a pewa kuJehova uuyelele mboka we mu kwathele a kale e na omukumo ngoka a pumbwa, opo a kale “mekwatathano naKalunga.” (Gen. 6:9) Jehova okwa li a lombwele Noa kutya Ye ota ka hanagula po uuyuni mboka wa kolokosha, nokwe mu lombwele kombinga yaashoka e na okuninga, opo ye pamwe naanegumbo lye ya hupithwe. (Gen. 6:13-18) Jehova okwa li u ulukile Noa kutya oye Kalunga ngoka ha tsu aantu omukumo.

3. Etsomukumo lini Josua a li a pewa? (Tala kethano lyopetameko.)

³ Josua naye okwa li e na oshinakugwanithwa oshinene shokufala oshigwana shaKalunga mEvi lyEuvaneko. Osha li sha kwatela mo okusinda omatangakwiita omanankondo ngoka ga li mevi ndyoka. Josua okwa li a kwatwa kuumbanda. Molwaashono Jehova okwa li e shi kutya Josua okwa tila, okwa lombwele Moses e mu ladhipike. Kalunga okwa ti kuMoses: “Nongeka Josua. Mu tsa omukumo noku mu koleka, oshoka oye ta ka wilika oshigwana shi tokole Jordan, opo shi ka lale evi ndyoka to li tala.” (Deut. 3:28) Manga Josua inaa katuka onkatu, Jehova okwe mu tsu omukumo a ti: “Dhimbulukwa kutya onde ku lombwela, u ikolelele nou kale [nomukumo]. Ino tila ngoye ino tyololoka, oshoka ongame, Omuwa Kalunga koye, ndi li pungoye shaa nkoka to yi.” (Jos. 1:1, 9) Oohapu ndhoka kadha li tuu dha tsu Josua omukumo!

4, 5. (a) Etsomukumo lini Jehova a li a pe oshigwana she shonale? (b) Jehova okwa li a tsu ngiini Omwana omukumo?

⁴ Jehova iha tsu omukumo owala aantu pauhandimwe, ihe ohe shi ningile wo oshigwana she shi li ongundu. Pashiholelwa, Jehova okwa li e shi kutya oshigwana shaJuda otashi ka kala sha pumbwa etsomukumo, sho shi li muupongekwa muBabilonia. Jehova okwe shi lombwele a ti: “Ino tila — ongame ndi li pungoye! Ongame Kalunga koye — ino limbililwa! Otandi ku kankameke e tandi ku kwatha; otandi ku gamene notandi ku hupitha.” (Jes. 41:10) Aakriste yopetameko nayo oya li ya pewa eshilipaleko lya faathana, ndyoka natse olyo tu na kunena. — Lesha 2 Aakorinto 1:3, 4.

⁵ Jesus naye okwa li a tsuwa omukumo kuHe. Peninginitho lye, Jesus oku uvu ewi lya zi megulu lya ti: “Nguka Omumwandje omuholike nde mu hokwa.” (Mat. 3:17) Oohapu ndhoka odha li dha tsu Jesus omukumo, ethimbo alihe a kala tu uvitha kombanda yevi.

6. Eyele lyiimaliwa otali tu tsu ngiini omukumo?

⁶ Jesus okwa li a holele oshiholelwa shaHe, mokutsa yalwe omukumo. Okwe shi ningi okupitila meyele lyiimaliwa, ndyoka tali popi kombinga yehulilo lyuuyuni. Meyele moka Jesus okwa popi kombinga yomuwa ngoka a li a pandula omupiya gwe kehe omudhiginini noohapu ndhoka tadhi ti: “Iyaloo, mumati ngoye omwaanawa nomwiinekelwa! Ongoye wa kala omwiinekelwa miishona, otandi ku pe okupangela oyindji. Inda menyanyu lyomuwa gwoye.” (Mat. 25:21, 23) Oohapu ndhoka odha li lela dha tsu omukumo aalongwa ye ya tsikile okulongela Jehova nuudhiginini.

7. Etsomukumo lini Jesus a li a pe aayapostoli ye, unene tuu Petrus?

⁷ Aayapostoli yaJesus oya li haya nyenyeta olundji kutya olye omukuluntu mokati kawo, ihe Jesus okwa li e ya ladhipike yi ifupipike nokukala aapiya, ihe haahona. (Luk. 22:24-26) Petrus okwa li u uvitha nayi Jesus poompito dhimwe. (Mat. 16:21-23; 26:31-35, 75) Ihe pehala lyokwiiteka Petrus, Jesus okwe mu ladhipike e te mu lombwele nokuli a tse omukumo ooitaali ooyakwawo. — Joh. 21:16.

8. Hiskia okwa li a ladhipike ngiini omalenga omakuluntu gaakwiita ye nosho wo aantu muJerusalem?

⁸ Manga Omwana gwaJehova inee ya kombanda yevi a tule po oshiholelwa dhingi shankene tu na okutsa yalwe omukumo, aapiya aadhiginini yaJehova yonale oya kala ye shi kutya oya pumbwa okutsaathana omukumo. Sho Aayassur ya kambadhala okutilitha Aajuda, Hiskia okwa gongelitha omalenga omakuluntu gaakwiita ye naantu muJerusalem, e te ya ladhipike. Ombiimbeli otayi ti: “Aantu oya pendapala pahapu dhomukwaniilwa gwawo.” — Lesha 2 Ondjalulo 32:6-8.

9. Embo lyaJob otali tu longo shike kombinga yokutsa yalwe omukumo?

⁹ Otatu vulu wo okwiilonga sha kuJob kombinga yokutsaathana omukumo. Nonando naye okwa li a pumbwa okutsuwa omukumo, okwa li a longo ‘aahekeleki yaa na shilonga’ yatatu kombinga yokutsaathana omukumo. Okwe ya lombwele kutya ando oye a li e ya oku ya hekeleka, ando ‘okwe ya ladhipike noohapu dhe, netalaleko tali zi mokana ke, otali vulu oku ya fudhitha.’ (Job 16:1-5) Hugunina, Job okwa tsuwa omukumo kuElihu nokuJehova. — Job 33:24, 25; 36:1, 11; 42:7, 10.

10, 11. (a) Omolwashike omwanakadhona gwaJefta a li a pumbwa okutsuwa omukumo? (b) Oolye kunena nayo ya pumbwa etsomukumo lya faathana?

¹⁰ Oshiholelwa shilwe shopethimbo lyonale shomuntu ngoka a li a pumbwa etsomukumo, oshomwanakadhona gwaJefta. Manga Omutokolihapu Jefta inaa ya a ka kondjithe Aayammoni, oku uvanekele Jehova kutya ngele okwe mu kwathele a sindane, ote ke mu pa omuntu ngoka ta ka za megumbo lye tango e mu tsakaneke, konima ngele a zi kolugodhi. Omuntu ngoka ote mu gandja kuJehova e mu longele motempeli Ye. Jefta sho a ka tya ngeyi, omwanakadhona, epona, oye a zi mo tango megumbo e ya oku mu tsakaneka, ta tanta. Jefta okwa li a dhengwa pomutima. Nonando ongawo, okwa dhiginine egano lye, e ta tumu omwanakadhona kuShilo, a ka longe ketsalihangano onkalamwenyo ye ayihe. — Aatok. 11:30-35.

¹¹ Nonando Jefta okwa li u uvite nayi kombinga yaashono, otashi vulika komwanakadhona sha li oshidhigu noonkondo, ngoka a tokola nehalo ewanawa okugwanitha shoka he u uvanekela Jehova. (Aatok. 11:36, 37) Ka li we ta vulu okuhokanwa, okumona aanona nenge okukaleka po edhina lyezimo lyawo nuuthiga wezimo lyawo. Onkee ano, okwa li lela a pumbwa okuhekelekwa nokutsuwa omukumo. Ombiimbeli otayi ti: “Shika osha ningile ondjigilile mulsrael. Aakiintu aagundjuka haa yi omasiku gane omumvo kehe oku ka lila omwana omukadhona gwaJefta gwokuGilead.” (Aatok. 11:39, 40) Mbela Aakriste mboka inaaya ya mondjokana yi ipyakidhila “niilonga yOmuwa,” inaya gwana okupandulwa nokutsuwa omukumo? — 1 Kor. 7:32-35.

12, 13. Ongiini Petrus a li a ‘tsu ooitaali ooyakwawo omukumo’?

¹² Muusiku we wa hugunina manga inaa sa, Jesus okwa lombwele omuyapostoli Petrus a ti: “Simon, Simon! Pulakena! Satana okwa pula e ta pewa epitikilo, e mu makele ne amuhe, ongaashi omukiintu ta yele iilya polupale. Ihe ngame onde ku galikanene, opo eitaalo lyoye lyaa kane. Nongele wa galukile kungame, tsa wo ooyakweni omukumo.” — Luk. 22:31, 32.

¹³ Petrus okwa li u ulike kutya oku li oshiholelwa oshiwanawa megongalo lyopaKriste lyonale. (Gal. 2:9) Okwa li a ladhipike ooitaali ooyakwawo, okupitila mwaashoka a ningi pOpentekoste nosho wo konima yaashono. Okuuka  pehulilo lyuukalele we mboka a kala i ipyakidhila nawo uule wethimbo, Petrus okwa li a nyolele Aakriste ooyakwawo. Okwe ya nyolele a ti: ‘Ontumwafo ndjika ofupi onde yi nyola, oshoka onda hala oku mu kumika noku mu hokololela kutya ndika olyo esilohenda lela lyaKalunga. Kaleni mwi ikolelela mulyo.’ (1 Pet. 5:12) Oontumwafo dhaPetrus dha nwethwa mo, odha tsikile okukala ekwatho enene ngele tashi ya petsomukumo, okuza nale nongashingeyi. Etsomukumo ndyoka otwe li pumbwa sho twa tegelela omauvaneko gaJehova ga gwanithwe po! — 2 Pet. 3:13.

14, 15. Ongiini omanyolo ga nwethwa mo gomuyapostoli Johannes, ga kala etsomukumo kAakriste uule womathelemimvo?

¹⁴ Omuyapostoli Johannes okwa li wo oshiholelwa oshiwanawa megongalo lyopaKriste lyonale. Evaangeli ndyoka a nyola kombinga yuukalele waJesus, olya kala nokutsa omukumo Aakriste, uule womathelemimvo ogendji sigo okunena. MEvaangeli lye omo owala mu na oohapu dhaJesus ndhoka tadhi ti kutya ohole oyi li uukwatya mboka hawu ndhindhilikitha mo aalongwa ye yashili. — Lesha Johannes 13:34, 35.

¹⁵ Moontumwafo ndatu dhaJohannes omu na omaliko gopambepo galwe ga gwedhwa po. Uuna twa teka omukumo, omolwomapuko ngoka twa ninga, mbela ihatu hekelekwa ngele twa lesha oohapu ndhika tadhi ti kutya “nombinzi yOmwana Jesus otayi tu yogo oondjo dhetu adhihe”? (1 Joh. 1:7) Nongele otwa tsikile okukala tu uvite tu na ondjo, mbela ihashi tu tsu omukumo noku tu hekeleka, uuna tatu lesha kutya “Kalunga oye omunene e vule eiyuvo lyetu”? (1 Joh. 3:20) Johannes oye awike a nyola kutya “Kalunga oye ohole.” (1 Joh. 4:8, 16) Ontumwafo ye ontiyali nontintatu, otadhi tsu omukumo Aakriste mboka taya tsikile ‘okukala moshili.’ — 2 Joh. 4; 3 Joh. 3, 4.

16, 17. Etsomukumo lini omuyapostoli Paulus a li a pe Aakriste yopetameko?

¹⁶ Methelemimvo lyotango, otashi vulika  Paulus oye a li omuyapostoli ngoka a ladhipike unene ooitaali ooyakwawo. Oshi li ngeyi kutya pethimbo lyAakriste yopetameko, aayapostoli oyendji oya li ya thigala muJerusalem, ndyoka lya kala ehala moka mu na olutuwiliki. (Iil. 8:14; 15:2) Aakriste muJudea, oya li yu uvithile aantu kombinga yaKristus, mboka ya li nale yi itaala muKalunga gumwe. Shimwe ishewe, omuyapostoli Paulus okwa li a wilikwa kombepo ondjapuki e ku uvithile aantu yomuGreka naRoma, mboka ya li haya longele iikalunga oyindji. — Gal. 2:7-9; 1 Tim. 2:7.

¹⁷ Paulus okwa li a yi komahala gokokule, ngaashi koshilongo shoka ngashingeyi hashi ithanwa Turkey nokiilongo ngaashi Greka naItalia. Okwa li u uvithile mboka kaaye shi Aajuda miilongo moka nokutota po wo omagongalo gopaKriste. Aakriste aape oya li ya ‘hepekwa kaantu yomoshilongo shawo’ noya li ya pumbwa okutsuwa omukumo. (1 Tes. 2:14) Lwomomumvo 50 E.N., Paulus okwa li a nyolele egongalo epe lyomuTessalonika, a ti: ‘Tse ohatu hambelele Kalunga aluhe omolweni nohatu mu dhimbulukwa wo aluhe momagalikano getu. Ohatu mu dhimbulukwa nkene mu na eitaalo li na iilonga, nkene mu na ohole tayi mu longitha nuupenda nonkene okutegamena kweni kwa kola.’ (1 Tes. 1:2, 3) Okwa li wo e ya ladhipike ya tsaathane omukumo, a ti: “Kumagidhathaneni ne mu kwathathane.” — 1 Tes. 5:11.

18. Olutuwiliki lwomethelemimvo lyotango olwa li lwa tsu ngiini Filippus omukumo?

¹⁸ Olutuwiliki lwomethelemimvo lyotango, olwa li lu ulike kutya olu li ekwatho enene, ngele tashi ya pokutsa yalwe omukumo kutya nduno oomboka taya kwatele komeho nenge Aakriste yalwe. Sho omuuvithi Filippus a li u uvithile Aasamaria kombinga yaKristus, okwa li a ambidhidhwa kolutuwiliki. Olwa tumu yaali yomuyo, Petrus naJohannes, ya ka galikanene ooitaali aape ya pewe ombepo ondjapuki. (Iil. 8:5, 14-17) Filippus nosho wo aamwatate naamwameme mboka ya li aape moshili, kaya li tuu ya tsuwa omukumo, sho ya ambidhidhwa kolutuwiliki!

19. Ontumwafo ndjoka olutuwiliki lwa li lwa tumu, oya gumu ngiini Egongalo lyopaKriste lyopetameko?

¹⁹ Konima yethimbo, olutuwiliki olwa li lwa pumbwa okuninga etokolo kutya Aakriste mboka kaaye shi Aajuda oya gwana ngaa okupitithwa etanda, ngaashi sha kala tashi ningwa kAajuda pampango yaMoses. (Iil. 15:1, 2) Kohi yewiliko lyombepo ondjapuki nokutala kutya Ombiimbeli otayi ti ngiini, olutuwiliki olwa tokola kutya okupitithwa etanda inaku pumbiwa we. Olwa nyolele komagongalo ontumwafo yi na ko nasha naashoka. Aakalelipo yolutuwiliki oya li ya tumwa ya fale ontumwafo ndjoka komagongalo. Oshizemo? Ombiimbeli otayi ti: “Oohapu ndhika odha tsu aantu omukumo noye dhi nyanyukilwa noonkondo.” — Iil. 15:27-32.

20. (a) Olutuwiliki ohalu gandja etsomukumo lini kaamwatate naamwameme muuyuni awuhe kunena? (b) Epulo lini tali ka yamukulwa moshitopolwa tashi landula?

²⁰ Olutuwiliki lwOonzapo dhaJehova kunena, ohalu tsu omukumo Aabetel, mboka ye li miilonga yokuuvitha yi ikalekelwa yethimbo lyu udha nosho wo aamwatate naamwameme muuyuni awuhe. Ohatu nyanyukilwa etsomukumo ndyoka hatu pewa, ngaashi naanaa Aakriste yomethelemimvo lyotango. Shimwe ishewe, mo 2015, Olutuwiliki olwa nyanyangidha okambo kedhina Galukila kuJehova, hoka nako haka tsu oyendji omukumo muuyuni awuhe. Mbela mboka taya kwatele komeho oyo owala ye na okuholela Jehova ngele tashi ya pokutsa yalwe omukumo? Epulo ndyoka otali ka yamukulwa moshitopolwa tashi landula.