1, 2. (a) Omolwashike aantu yopethimbo lyomuyapostoli Paulus ya li haya kala tayi ipula nuupika nonemanguluko? (b) Paulus okwa li a kwathele aantu ya gandje eitulomo kulye, opo ya mone emanguluko lyashili?

MUROMA shonale, Aakriste yopetameko oya li mokati kaantu mboka yi itala ko ya pyokoka ngele tashi ya pompango, puuyuuki nopemanguluko. Epangelo lyaRoma ndyoka lya li enankondo nolya simana, olya li lyi inekela aapika yalyo, oyo ya longe iilonga iidhigu. Pompito yimwe, oopelesenda 30 dhaantu yomoshilongo moka, oya li aapika. Kapu na omalimbililo kutya uupika nemanguluko oyo ya li iinima mbyoka hayi kala momadhiladhilo goyendji, mwa kwatelwa Aakriste.

² Oontumwafo dhomuyapostoli Paulus, odha popya oshindji kombinga yemanguluko. Nonando ongawo, elalakano lyuukalele we kalya li okwiidhopa miinima yopankalathano noyopapolitika, mbyoka aantu yopethimbo mpoka ya li ya hokwa. Pehala lyokukonga ekwatho kaapangeli yopantu nenge ya konge emanguluko kuyo, Paulus nAakriste ooyakwawo oya longo nuudhiginini ya kwathele aantu yi ilonge onkundana ombwanawa yUukwaniilwa waKalunga nokombinga yongushu yekuliloyambo lyaJesus Kristus. Paulus okwa li a kwathele ooitaali ooyakwawo ya gandje eitulomo kOnzo yemanguluko lyashili.  Pashiholelwa, montumwafo ye ontiyali ndjoka a nyolele Aakriste yomuKorinto, okwa yelitha a ti: ‘Jehova menyolo ndika oye Ombepo. Mpoka pu na ombepo yOmuwa, opu na emanguluko.’ — 2 Kor. 3:17.

3, 4. (a) Paulus okwa popi shike moovelise ndhoka dha tetekele Aakorinto aatiyali 3:17? (b) Oshike tu na okuninga, opo tu mone emanguluko ndyoka hali zi kuJehova?

³ Montumwafo oyo tuu ndjoka a nyolele Aakorinto, Paulus okwa popi eadhimo ndyoka Moses a li e na sho a zi kOndundu Sinai, konima sho a holoka koshipala shomuyengeli gwaJehova. Sho aantu ya mono Moses, oya tila, na Moses okwa siikile oshipala she nelapi. (Eks. 34:29, 30, 33; 2 Kor. 3:7, 13) Paulus okwa yelitha a ti: “Ihe oomwenyo dhawo nge dhi igameke kOmuwa, oshisiikilo otashi kuthwa po.” (2 Kor. 3:16, OB-1954) Mbela oohapu dhaPaulus ndhoka odha li tadhi ti shike?

⁴ Ngaashi twi ilongo moshitopolwa sha tetekele, Jehova, Omushiti gwaayihe, oye owala e na emanguluko lyashili noinali ngambekwa. Otashi opalele lela sho taku tiwa kutya ‘mpoka pu na ombepo yaJehova,’ opu na emanguluko. Opo tu mone emanguluko lyashili nuuwanawa mulyo, otu na ‘okwiigameka kOmuwa,’ ano okukala tu na ekwatathano lyopothingo naye. Sho Aaisraeli ya li mombuga, kaya li ye na etaloko lyaJehova sho a li tu ungaunga nayo. Omitima dhawo odha li dha kukuta nomadhiladhilo gawo oga posipala, molwaashono emanguluko ndyoka ya li ye na sho ya zi muEgipiti, oye li longitha ngaashi ya hala. — Heb. 3:8-10.

5. (a) Emanguluko lini hali etwa kombepo yaJehova? (b) Otu shi shi ngiini kutya nonando omuntu oku li mondholongo, ota vulu okukala e na emanguluko ndyoka hali zi kuJehova? (c) Omapulo geni twa pumbwa okuyamukula?

⁵ Emanguluko ndyoka hali endele pamwe nombepo yaJehova, oli vule emanguluko lyokumanguluka ko kokukala omupika gwomuntu nenge gwoshilongo shontumba. Ombepo yaJehova oyi vule kokule shoka oonkambadhala dhopantu tadhi vulu okupondola po. Otayi vulu oku tu mangulula muupika wuulunde neso nosho wo muupika womalongelokalunga giifundja niilonga yago. (Rom. 6:23; 8:2) Kali shi tuu emanguluko lya dhenga mbanda ndyono! Nonando omuntu oku li mondholongo nenge muupika, ota vulu okumona mo uuwanawa memanguluko ndyoka. (Gen. 39:20-23) Shoka osha ningilwa shili omumwameme Nancy Yuen nomumwatate Harold King, mboka ya li yi idhidhimikile omimvo odhindji mondholongo, omolweitaalo lyawo. Oto vulu okutala nokupulakena nkene taya hokolola iimoniwa yawo kopolohalama yetu yotiivii JW. (Tala mpoka pwa nyolwa INTERVIEWS AND EXPERIENCES > ENDURING TRIALS.) Ongiini tatu vulu okuulika kutya otwa lenga emanguluko lyetu? Oshike tatu vulu okuninga po, opo tu longithe nawa emanguluko ndyoka?

6. Aaisraeli oya li yu ulike ngiini kutya inaya pandula emanguluko ndyoka ya pewa kuJehova?

⁶ Uuna twe shi mono kutya omagano ngoka twa pewa oge na ongushu, ohashi tu inyengitha tu pandule ngoka e ge tu pa. Aaisraeli kaya li ya pandula emanguluko ndyoka Jehova e ya pe, sho e ya mangulula mo muupika waEgipiti. Meni lyoomwedhi oonshona sho ya mangululwa mo, oya tameke okukala ya yuulukwa iikulya niikunwa yomuEgipiti. Oya tameke wo taya nyenyeta kombinga yaashoka Jehova e ya pa, noya li ya hala nokuli okushuna kuEgipiti. Shoka otashi ulike kutya oya li ya lenga ‘oohi, okatanga kombihu, ookanuwa, oomboganyanga, oonyanga noonyalanyanga,’ shi vulithe emanguluko lyawo ndyoka ya pewa kuKalunga kashili, Jehova, lyoku mu longela. Mbela otashi kumitha sho Jehova a li a geela noonkondo oshigwana she? (Num. 11:5, 6, 10; 14:3, 4) Shoka oshi li oshiilongomwa kutse!

7. Ongiini Paulus a li a katuka metsokumwe nomayele ge ngoka ge li mAakorinto aatiyali 6:1, nongiini natse tatu vulu okuninga sha faathana?

⁷ Omuyapostoli Paulus okwa li a ladhipike Aakriste  ayehe ya kale ya pandula emanguluko lyawo ndyoka ya pewa kuJehova okupitila mOmwana, Jesus Kristus. (Lesha 2 Aakorinto 6:1.) Dhimbulukwa nkene Paulus a li u uvite nayi, sho e wete e li muupika wuulunde neso. Nonando ongawo, okwa li a pandula sho a popi a ti: “Kalunga na hambelelwe omolwaJesus Kristus, Omuwa gwetu!” Omolwashike mbela? Okwa yelithile Aakriste ooyakwawo a ti: ‘Oshoka otandi pangelwa kombepo ndjoka hayi gandja omwenyo kwaamboka ye li muukumwe naJesus Kristus. Oyo oya mangulula ndje mepangelo lyuulunde nolyeso.’ (Rom. 7:24, 25; 8:2) Onkee ano, opo tu landule oshiholelwa shaPaulus, natse otu na wo okuulika kutya otwa pandula, sho Jehova e tu mangulula mo muupika wuulunde neso. Omolwekulilo, otatu vulu okulongela Kalunga ketu neiyuvo lya yela nonenyanyu. — Eps. 40:8.

8, 9. (a) Elondodho lini omuyapostoli Petrus a gandja kombinga yokulongitha emanguluko lyetu? (b) Oonkalo dhini dha nika oshiponga dhe tu taalela kunena?

⁸ Kakele kokuulika olupandu, otu na wo okukaleka momadhiladhilo kutya katu na okulongitha nayi emanguluko lyetu ndyoka li na ondilo. Omuyapostoli Petrus okwe tu londodha kaatu longithe emanguluko lyetu li li eipopilo lyokulonga uuwinayi. (Lesha 1 Petrus 2:16.) Mbela elondodho ndyoka itali ku dhimbulukitha shoka sha ningilwa Aaisraeli mombuga? Elondodho ndyoka otali longo lela kutse nokunena. Satana nuuyuni we otaya humitha komeho iinima mbyoka ya hokiwa kaantu ngaashi okuzala nokwiiyopaleka, iikulya, iikunwa, omainyanyudho niinima yilwe. Aatseyithi yiipindi mboka ya kotoka, olundji ohaya longitha aantu mboka ye na eholokopo ewanawa, ye tu ningithe tu dhiladhile kutya otwa pumbwa okulanda iinima mbyoka inaatu pumbwa nando. Oshipu okugwila momwigo ngoka nokulongitha emanguluko lyetu momukalo omwiinayi.

⁹ Omayele gaPetrus otaga longo wo nomiinima ya kwata miiti monkalamwenyo, ngaashi etokolo lyomuntu li nako nasha nelongo, niilonga nenge neithano. Pashiholelwa, aagundjuka mboka ye li mosikola kunena, ohaya thiminikwa yi ilonge ya mana mo, opo ya vule okuya kiiputudhilolongo yopombanda. Ohaya ningithwa yi itaale kutya elongo lyopombanda ohali egululile omuntu oompito dhokumona iilonga mbyoka ya simanekwa nohayi futu nawa lela. Otashi vulika yu ulukilwe eyooloko pokati kofuto ndjoka hayi futwa mboka ya mona elongo lyopombanda naandjoka hayi futwa mboka ya mana owala osikola yongula. Aagundjuka otashi vulika ya tale ko elongo lyopombanda li li oshinima oshiwanawa, shoka tashi vulu okuguma onkalamwenyo yawo ayihe. Mbela yo pamwe naavali yawo oshike ye na okukaleka momadhiladhilo?

10. Oshike tu na okukaleka momadhiladhilo, uuna tatu longitha emanguluko lyetu sho tatu ningi omatokolo gopaumwene?

¹⁰ Yamwe otashi vulika ya kale yu uvite kutya molwaashoka okuninga ehogololo miinima mbyoka oshi li etokolo lyomuntu mwene, oya manguluka okuhogolola shoka tashi ya nyanyudha, shampa owala eiyuvo lyawo tali ya pitike. Otashi vulika ye na momadhiladhilo oohapu dhaPaulus ndhoka a li a nyolele Aakriste yomuKorinto kombinga yiikulya, tadhi ti: “Omolwashike okukala kwandje ku na okupangelwa keiyuvo lyamukwetu?” (1 Kor. 10:29) Manga tu na emanguluko lyokuninga omatokolo shi na ko nasha nelongo nosho wo neithano, otwa pumbwa okukaleka momadhiladhilo kutya emanguluko lyetu olya ngambekwa nonokutya omatokolo agehe ngoka tatu ningi oge na iilanduliko. Omolwetompelo ndyoka, Paulus okwa popi oohapu ndhika tadhi ti: “Aantu yamwe otaa dhiladhila kutya oya pitikwa okuninga shaa shoka ye shi hala. Eeno osho, ihe haayihe iiwanawa. Ayihe otayi vulika okuningwa, ihe haayihe tayi kwatha.” (1 Kor. 10:23) Shoka otashi tu kwathele tu mone kutya opu na iinima ya simanenena tatu vulu okuninga, pehala lyokulalakanena iinima yetu yopaumwene.

11. Omolwashike twa mangululwa mo mompango yuulunde?

¹¹ Melondodho lyaPetrus li na ko nasha nokulongitha nayi emanguluko, okwa popi wo nkene tatu vulu oku li longitha momukalo omwaanawa. Okwe tu ladhipike tu longithe emanguluko lyetu “ongaapiya yaKalunga.” Onkee ano, etompelo lyaJehova lyokulongitha Jesus e tu mangulule mo mompango yuulunde, otu kale ‘aapiya Ye.’

12. Noa naanegumbo lye oye tu tulila po oshiholelwa shini?

¹² Okukala twi ipyakidhila niinima yopambepo, ogwo omukalo gwa dhenga mbanda gwoku tu gamena kaatu longithe nayi emanguluko lyetu nokaatu kale twa pikwa kiinima yuuyuni. (Gal. 5:16) Natu taleni koshiholelwa shatatekulululwa Noa naanegumbo lye. Oya li muuyuni wa kolokosha nowu na aantu kaaye na omikalo. Nonando ongawo, kaya li haya kutha ombinga miinima iiwinayi mbyoka hayi ningwa kaantu mboka ye ya kundukidha. Oshike sha li she ya kwathele? Oya hogolola okukala yi ipyakidhila niilonga ayihe mbyoka Jehova a li e ya pa. Iilonga mbyoka ongaashi: okutunga onguluwato, okugongela iikulya yawo, okugongela iinamwenyo nokulondodha yalwe kombinga yEyelu. Ombiimbeli otayi ti: “Noa okwa ningi, ngaashi Kalunga e mu lombwele.” (Gen. 6:22) Oshizemo? Noa naanegumbo lye oya hupu pehulilo lyuuyuni mboka. — Heb. 11:7.

13. Oshilonga shini Jesus a li a pewa, shoka konima e shi thigile aalanduli ye?

¹³ Kunena Jehova okwe tu lombwela tu ninge shike? Tu li aalongwa yaJesus, otu shi kutya Kalunga okwe tu pa oshilonga shokuuvitha. (Lesha Lukas 4:18, 19.) Aantu oyendji kunena omadhiladhilo gawo oga pukithwa komuhindadhi, kalunga kuuyuni mbuka, noye li aapika yomalongelokalunga, yiinima yopamaliko noyopapolitika. (2 Kor. 4:4) Otu na uuthembahenda wokulandula oshiholelwa shaJesus shokukwathela aantu ya tseye Jehova, Kalunga kemanguluko, noku mu longela. (Mat. 28:19, 20) Oshilonga shoka kashi shi oshipu, na ohapu kala omashongo ogendji. Miilongo yimwe, uuna aantu yamwe tayu uvithilwa ohaya kala kaaye na ko nasha, omanga yalwe haya geye nokuli. Epulo ndyoka kehe gumwe  gwomutse e na okwiipula olyo ndika tali ti: ‘Otandi vulu ngaa okulongitha emanguluko lyandje ndi ambidhidhe noonkondo iilonga yUukwaniilwa?’

14, 15. Oyendji moshigwana shaJehova ohayi inyenge ngiini kiilonga yokuuvitha? (Tala kethano lyopetameko.)

¹⁴ Otashi tsu omukumo okumona kutya aauvithi oyendji oye shi dhimbulula mo kutya ehulilo oli li popepi. Oya tameke okukala nonkalamwenyo inaayi kitakana e taya kokola ondjila. (1 Kor. 9:19, 23) Yamwe yomuyo ohaya uvithile miitopolwa moka haya zi, omanga yalwe ye ku uvithila hoka ku na ompumbwe onene. Ondjokonona oyu ulika kutya momimvo ntano dha ka pita, aauvithi ye vulithe po 250 000 oya kala taya kokola ondjila, ihe ngashingeyi aakokolindjila yondjigilile oye vulithe po 1 100 000. Otashi hokitha okumona kutya oyendji otaya longitha emanguluko lyawo mokulongela Jehova momukalo ngoka! — Eps. 110:3.

¹⁵ Oshike sha kwathele aamwatate naamwameme mboka ya longithe pandunge emanguluko lyawo? Natu taleni komumwatate John nomumwameme Judith, mboka ya kala taya uvithile miilongo yi ili noyi ili, uule womimvo 30 dha ka pita. Otaya dhimbulukwa kutya sho Osikola yOkudheula Aakokolindjila ya tameke mo 1977, mboka ya hiti osikola ndjoka, oya li ya ladhipikwa ya kale ye na ehalo lyoku ku uvithila hoka ku na ompumbwe onene. Opo ya gandje eitulomo kelalakano ndyoka, John ota ti kutya iikando oyindji, okwa kala ta lundulula iilonga ye yomboloto, opo a kale nonkalamwenyo inaayi kitakana. Hugunina, sho ye ku uvithila koshilongo shilwe, oya mono kutya okugalikana kuJehova noku mu inekela, oshe ya kwathela ya sinde omashongo ngaashi okwiilonga elaka epe, okwiigilila eputuko lyamo nokwiidhidhimikila onkalo yombepo yamo. Omimvo ndhoka ya kala taya uvithile kondje yoshilongo, odhe ya guma ngiini? John ota ti: “Onda li ndu uvite kutya otandi longo oshilonga dhingi shoka kaandi shi nenge inaandi longa nale. Jehova okwa kala gwolela kungame, ngaashi tate omunahole ha kala. Ngashingeyi ondu uvite ko nawa eityo lyaJakob 4:8, ndyoka tali ti: ‘Hedheni kuKalunga, ye nota hedha kune.’ Onda li ndi shi kutya onda mona shoka nda li tandi kongo, ano elalakano lyashili monkalamwenyo.”

16. Aauvithi oyendji oya longitha ngiini emanguluko lyawo pandunge, nonando oya ngambekwa?

¹⁶ John naJudith oya kala taya kokola ondjila ethimbo ele, ihe aauvithi yamwe ohaye shi ningi owala uule wethimbo efupi, omolwoonkalo itaadhi ya pitike. Natango, aauvithi oyendji ohaya kongo ompito yi iyambe mokukwathela mooproyeka dhetu dhokutunga muuyuni awuhe. Pashiholelwa, sho oombelewa oonene moWarwick, moNew York, dha li tadhi tungwa, aamwatate naamwameme 27 000 oya yi ya ka kwathele. Yamwe yomuyo oya kala ko uule wiiwike yontumba, yamwe uule womumvo nayamwe uule wethimbo li vulithe mpoka. Oyendji yomuyo oye etha manga okugandja eitulomo kiinima yawo yopaumwene nelalakano ya ka kwathele mokutunga hoka. Odhoshili kutya oye tu tulila po oshiholelwa oshiwanawa, sho ya longitha emanguluko ndyoka Jehova e tu pa, opo ye mu tange noku mu simaneka.

17. Ngele otwa longitha nawa emanguluko lyetu ngashingeyi, otatu ka mona omayambeko geni monakuyiwa?

¹⁷ Otwa pandula sho twa tseya Jehova naasho tatu vulu okukala tu na emanguluko ndyoka hali zi moku mu longela. Onkee ano, shoka tatu hogolola nashi ulike kutya otwa lenga emanguluko ndyoka. Pehala lyokuhepitha emanguluko lyetu nenge tu li longithe nayi, natu li longithe nawa nosho wo oompito ndhoka tatu mono, tu longele Jehova pakuudha ngaashi tashi vulika. Ngele otwe shi ningi, otatu ka mona omayambeko ngoka Jehova e tu uvanekela, uuna a gwanitha po ehunganeko ndika tali ti: “Oku na esiku ndyoka, uuna eshito alihe tali ka manguluka muupika weyonuuko, li ye memanguluko nomeadhimo lyaana yaKalunga.” — Rom. 8:21.