1. Omolwashike omuyapostoli Paulus a li a ladhipike Aakriste yonale Aahebeli ya tse yalwe omukumo, ‘unene sho ye wete esiku lyOmuwa tali hedha popepi’?

OMOLWASHIKE tu na okuninga oonkambadhala dha gwedhwa po, tu tse yalwe omukumo? Omuyapostoli Paulus okwa gandja eyamukulo montumwafo ye ndjoka a nyolele Aakriste Aahebeli. Okwa ti: “Tu silathaneni oshimpwiyu, tu kwathathaneni mokuholathana nomokulongelathana uuwanawa. Inatu etha po okugongala pamwe, ngaashi yamwe haa ningi. Ihe natu kumagidhathaneni, unene sho tu wete esiku lyOmuwa tali hedha popepi.” (Heb. 10:24, 25) Meni lyomimvo ntano, Aakriste Aajuda mboka ya kala muJerusalem, oya li taya ka mona “esiku ndyoka lyOmuwa” sho tali hedha popepi, nokudhimbulula mo endhindhiliko ndyoka Jesus a li e ya pe lyokuza mo musho. (Iil. 2:19, 20; Luk. 21:20-22) Esiku lyaJehova ndyoka olya li lye ya mo 70 E.N., sho Aaroma ya hanagula po Jerusalem.

2. Omolwashike natse kunena tu na okuninga ngaashi tatu vulu tu tse yalwe omukumo?

² Kunena otu na omatompelo gokwiitaala kutya esiku “etilithi” lyaJehova  oli li popepi. (Joel 2:11) Omuhunganeki Sefania okwa ti: “Esiku enene lyOmuwa oli li popepi — popepilela notali ya tali endelele.” (Sef. 1:14) Elondodho lyopahunganeko ndyoka otali longo wo nopethimbo lyetu. Kombinga yesiku lyaJehova ndyoka li li popepi, Paulus okwe tu lombwele “tu silathaneni oshimpwiyu, tu kwathathaneni mokuholathana nomokulongelathana uuwanawa.” (Heb. 10:24) Onkee ano, otu na lela okukala tu na ko nasha nAakriste ooyakwetu, opo tu vule oku ya tsa omukumo pompito kehe sha pumbiwa.

3. Omuyapostoli Paulus okwa li a popi shike kombinga yetsomukumo? (Tala kethano lyopetameko.)

³ Ombiimbeli otayi ti: “Oshimpwiyu shomomutima gwomuntu otashi mu thindile pohi, ihe oohapu dhuukuume ohadhi gu nyanyudha.” (Omayel. 12:25) Oohapu ndhoka otadhi longo kutse. Omathimbo nomathimbo, atuheni ohatu kala twa pumbwa etsomukumo. Paulus okwa li u ulike kutya mboka ye na oshinakugwanithwa shokutsa yalwe omukumo, nayo oya pumbwa etsomukumo. Okwa li a nyolele Aakriste yomuRoma a ti: “Onda hala noonkondo oku mu talela po, opo ndi gandje sha kune kombinga yomagano gopambepo. Osho ngaaka otatu vulu okutsaathana omukumo kombinga yeitaalo lyetweni atuhe.” (Rom. 1:11, 12) Paulus ngoka a li lela ha tsu yalwe omukumo, naye okwa li a pumbwa okutsuwa omukumo omathimbo gamwe. — Lesha Aaroma 15:30-32.

4, 5. Oolye tu na okutsa omukumo kunena, nomolwashike?

⁴ Mboka ye li miilonga yethimbo lyu udha, oya pumbwa okupandulwa. Yamwe yomuyo aakokolindjila aadhiginini. Oyendji yomuyo oya kambadhala okukaleka oonkalamwenyo dhawo inaadhi kitakana, opo ya kokole ondjila. Aatumwa, Aabetel, aatonatelishikandjo naakulukadhi yawo naamboka haya longo moombelewa dhokutoloka, nayo osho ya ninga. Ayehe oya kambadhala okuninga omalunduluko moonkalamwenyo dhawo, opo ya longithe ethimbo lyawo olindji miilonga iiyapuki. Onkee ano, oya pumbwa okutsuwa omukumo. Mboka wo ya li miilonga yethimbo lyu udha, ihe ngashingeyi oya za mo, omolwomangambeko gontumba, nayo oya pumbwa etsomukumo.

⁵ Aamwatate naamwameme mboka inaaya ya mondjokana, molwaashoka ya hala okuvulika kelombwelo ndyoka tali ti kutya natu hokane “owala mOmuwa” (NW), nayo oya pumbwa etsomukumo. (1 Kor. 7:39) Sha faathana, aakulukadhi mboka haya longo nuudhiginini, ohaya tsuwa omukumo, uuna taya pandulwa kaasamane yawo. (Omayel. 31:28, 31) Natango, Aakriste mboka haya tsikile okukala aadhiginini, nonando otaya hepekwa nenge taye ehama, nayo oya pumbwa okutsuwa omukumo. (2 Tes. 1:3-5) Jehova naKristus ohaya hekeleke aapiya ayehe mboka aadhiginini. — Lesha 2 Aatessalonika 2:16, 17.

6. Oshinakugwanithwa shaakuluntugongalo shoka sha popiwa muJesaja 32: 1, 2 oshashike?

⁶ Lesha Jesaja 32:1, 2. Jesus Kristus oha gandja etsomukumo newiliko kwaamboka ya teka omukumo okupitila maamwatate aagwayekwa nosho wo ‘momalenga,’ ano aakuluntugongalo mboka ye li oshitopolwa shoonzi dhilwe. Aakuluntugongalo mboka kaye shi ‘aathiminiki’ yetu, ihe ‘ohaya longo pamwe natse,’ omolwuuwanawa wetu. — 2 Kor. 1:24.

7, 8. Kakele kokutsa omukumo noohapu, ongiini aakuluntugongalo taya vulu okuulika kutya oye na ko nasha nayalwe?

⁷ Omuyapostoli Paulus okwe tu tulila po oshiholelwa shoka tu na okulandula. Okwa li a nyolele Aakriste yomuTessalonika mboka taya hepekwa, a ti: “Omolwohole yetu yoku mu hola inatu ya kune owala nelaka etoye lya za kuKalunga, ihe otwa hupula wo oomwenyo dhetu molweni. Ne aaholike yetu.” — 1 Tes. 2:8.

 ⁸ Inashi gwana owala aakuluntugongalo ya tse omukumo aamwatate naamwameme noohapu. Paulus okwa li a lombwele aakuluntugongalo yokuEfeso a ti: “Otatu vulu okukwatha aankundi. Dhimbulukweni oohapu ndhoka Omuwa Jesus mwene e dhi popi, sho a ti: ‘Okugandja oku na elago ku vule okutaamba.’” (Iil. 20:35) Paulus ka li owala a hala okutsa ooitaali ooyakwawo omukumo, ihe okwa li wo ‘a gandja nenyanyu ashihe shoka e na nokwi igandja wo, omolwoomwenyo dhawo.’ (2 Kor. 12:15) Sha faathana, aakuluntugongalo kaye na owala okutsa yalwe omukumo noohapu, ihe oya pumbwa wo okuulika lela kutya oye na ko nasha nakehe gumwe. — 1 Kor. 14:3.

9. Ongiini aakuluntugongalo taya vulu okugandja omayele momukalo tagu tsu omukumo?

⁹ Okuulika okunakonasha okwa kwatela mo okugandja omayele. Ihe sho aakululuntugongalo taye shi ningi, oye na okulandula oshiholelwa shoka shi li mOmbiimbeli shankene ye na okugandja omayele momukalo tagu tsu omukumo. Jesus okwe tu tulila po oshiholelwa sha dhenga mbanda moshinima shoka, konima yeso neyumuko lye. Okwa li a gandja omayele omawanawa komagongalo gamwe muAsia Eshona, ihe ndhindhilika nkene e ga gandja. Manga inee ga gandja, okwa li a pandula pahole omagongalo gomuEfeso, muPergamo nomuTiatira. (Eh. 2:1-5, 12, 13, 18, 19) Okwa li a lombwele egongalo lyomuLaodikea a ti: “Ayehe mboka ndi ya hole, ohandi ya geele nohandi ya dhenge. Itedhulula ano wa mana mo.” (Eh. 3:19) Aakuluntugongalo otaya ningi nawa, ngele taya landula oshiholelwa shaKristus, uuna taya gandja omayele.

10. Ongiini atuheni tatu vulu okutsaathana omukumo?

¹⁰ Okutsa yalwe omukumo kashi shi owala oshinakugwanithwa shaakuluntugongalo. Paulus okwa li a ladhipike Aakriste ayehe a ti: “Popyeni ashike oohapu ndhoka oombwanawa tadhi tungu nodha pumbiwa.” (Ef. 4:29) Kehe gumwe gwomutse okwa ‘pumbwa’ okukala e na ko nasha nayalwe. Paulus okwa li a pe Aakriste Aahebeli  omayele a ti: “Yelutheni ano omaako geni ga vulwa ne mu koleke oongolo dheni dha loloka. Tsikileni okweenda moondjila dhu ukilila, opo ompadhi ndjoka ya lemana yaa dhomoke, ihe yi vule okwaaludhwa.” (Heb. 12:12, 13) Atuheni mwa kwatelwa naanona, otatu vulu okutsa yalwe omukumo.

11. Omumwameme Marthe, okwa li a kwathelwa ngiini, sho a li a polimana?

¹¹ Omumwameme Marthe, * ngoka a li a kwatwa kepolimano, okwa nyola a ti: “Esiku limwe sho nda galikana ndi tsuwe omukumo, onda li nda tsakanene nomumwameme omukokele, ngoka u ulukile ndje ohole nolukeno ndoka nda li nda pumbwa pethimbo mpoka. Okwa lombwele ndje wo kombinga ye sho a li monkalo ya fa yandje, naashoka osha li sha tsu ndje omukumo.” Omumwameme ngoka omukokele, otashi vulika ka li naanaa e shi nkene oohapu dhe tadhi ka guma Marthe.

12, 13. Omomikalo omiwanawa dhini tatu vulu okutula miilonga omayele ngoka ge li mAafilippi 2:1-4?

¹² Paulus okwa li a pe iilyo ayihe yegongalo lyomuFilippi omayele, a ti: “Okukala kweni muKristus otaku mu koleke tuu? Ohole otayi mu hekeleke tuu? Omu na tuu ehangano [lyombepo]? Omu holathane nomu na tuu olukeno mokukalathana kweni? Ngame otandi mu indile, nyanyudhii ndje nenyanyu lya tsakana. Kaleni mwa tsa ompango yimwe. Holathaneni, ne mu kale mu na ombepo yimwe nedhiladhilo limwe. Inamu longa nando osha mombepo yokwiihola nenge yokukonga esimano lyowala, ihe ifupipikeni kiipala yayakweni, ne mwaa dhiladhile kutya one aawanawa mu ya vule. Lalakaneneni uuwanawa wooyakweni wo, haamboka ashike weni yene.” — Fil. 2:1-4.

¹³ Atuheni natu ninge oonkambadhala tu ulike kutya otu na ko nasha naamwatate naamwameme, moku ya ‘hekeleka pahole,’ moku ya ‘kwathela pambepo’ noku ya ‘ulukila olukeno.’

14. Omomukalo gumwe guni tatu vulu okutsa yalwe omukumo?

¹⁴ Ohashi tu nyanyudha okuuva kutya mboka twa kwathela nale, oye li natango aadhiginini. Shoka oshi li metsokumwe naashoka omuyapostoli Johannes a nyola, sho a ti: “Kape na sha shilwe hashi nyanyudha ndje, shi vulithe okuuva kutya aamwandje oya kala moshili.” (3 Joh. 4) Aakokolindjila oyendji ohaya ya tsuwa omukumo okumona yamwe mboka ya kwathela yi ilonge oshili omimvo dha ka pita ye li aadhiginini, tashi vulika nokuli taya kokola ondjila. Uuna omukokolindjila a teka omukumo, otatu vulu oku mu dhimbulukitha oonkambadhala adhihe ndhoka a ninga monakuziwa, opo a kwathele yalwe.

15. Omomukalo gumwe guni tatu vulu okutsa omukumo mboka haya longo nuudhiginini?

¹⁵ Aatonatelishikandjo oyendji naakulukadhi yawo, oya ti kutya ohaya tsuwa omukumo, uuna ya pewa uukalata wolupandu kaantu momagongalo ngoka haya talele po. Sha faathana, ngele otwa kala hatu pandula aakuluntugongalo, aatumwa, aakokolindjila nAabetel omolwiilonga yawo yuudhiginini, otashi ke ya tsa omukumo.

16. Oshike shoka omuntu ta vulu okuninga, opo a tse gulwe omukumo?

¹⁶ Otashi ka kala sha puka, ngele otwa kala tu uvite kutya itatu vulu okutsa yalwe omukumo, molwaashoka katu shi naanaa okupopya naantu. Okutsa yalwe omukumo ihashi pula naanaa oshindji. Otashi vulika wa pumbwa owala okwiimemeha, uuna to popitha omuntu. Ngele ngoka wa popitha ini imemeha, otashi vulika e na uupyakadhi washa. Onkee ano, omukalo moka to vulu oku mu hekeleka, omokupulakena kuye. — Jak. 1:19.

17. Omumwatate gumwe omugundjuka okwa kwathelwa ngiini pethimbo a li a gwililwa po?

 ¹⁷ Omumwatate omugundjuka gwedhina Henri, okwa li a gwililwa po noonkondo, sho aakwanezimo ye nosho wo he ngoka a kala omukuluntugongalo, ya thigi po oshili. Omutonatelishikandjo okwa mono kutya Henri okwa yemata. Onkee ano, okwe mu hiya ya ka nwe okoothiwa pehala lyontumba, e te mu lombwele a popye nkene u uvite. Henri okwe shi mono kutya omukalo moka ta vulu owala okukwathela aakwanezimo ye ya galukile moshili, ongele a kala omudhiginini. Okwa li a hekelekwa noonkondo, sho a lesha Episalomi 46; Sefanja 3:17 naMarkus 10:29, 30.

18. (a) Omukwaniilwa Salomo okwa nyola shike kombinga yetsomukumo? (b) Omuyapostoli Paulus okwa popi ishewe shike kombinga yaashono?

¹⁸ Oshiholelwa shaMarthe naHenri, otayi ulike kutya otatu vulu okutsa omukumo omumwatate nenge omumwameme ngoka a pumbwa ekwatho. Omukwaniilwa Salomo okwa li a nyola a ti: “Nohapu oyo opala ngiini pethimbo lyu uka! Omeho haga adhima otaga nyanyudha, noonkundana oombwanawa otadhi ondokitha omasipa.” (Omayel. 15:23, 30) Oshikwawo, okuleshela omuntu ngoka a teka omukumo sha mOshungolangelo nenge kepandja lyetu kointaneta, otashi vulu oku mu kwathela. Paulus oku ulike kutya okwiimba pamwe eimbilo lyUukwaniilwa, nagwo omukalo gwokutsaathana omukumo. Okwa nyola a ti: “Longathaneni nokupukululathana noondunge adhihe. Imbeni omapisalomi, omaimbilo noondjimbo oondjapuki. Imbileni Kalunga omahambelelo taga zi meni moomwenyo dheni.” — Kol. 3:16; Iil. 16:25.

19. Omolwashike etsomukumo tali ka kala lya pumbiwa unene komasiku gokomeho, noshike tu na okuninga po?

¹⁹ Etsomukumo otali ka kala lya pumbiwa unene, sho tu wete esiku lyaJehova tali “hedha popepi.” (Heb. 10:25) Paulus okwa li a lombwele Aakriste ooyakwawo yopethimbo lye a ti: “Kumagidhathaneni ne mu kwathathane, ngaashi hamu shi ningi nokuli.” — 1 Tes. 5:11.