Oshitya shOshihebeli Asher, otashi vulu okupopiwa momikalo adhihe mbali. Onkee ano, uutumbulilo mboka wa longithwa metoloko lyomo 2013 ndyoka lya pupalekwa, owi ikolelela kiinima tayi landula:

1. Uutumbulilo mboka wu li mOmbiimbeli ndjoka ya pupalekwa, otawu ambidhidhwa kiitya nokomutungilo gwelaka. Ekwatathano ndyoka li li pokati kEpisalomi 144:12-15 noovelise dha tetekele, oli ikolelela keityo ndyoka lya gandjwa koshitya shopetameko movelise 12, shoka mOshihebeli hashi ithanwa asher. Oshitya asher ohashi vulu okulongithwa momikalo dha yoolokathana. Pashiholelwa, otashi vulu okuukithwa kiityapeha ngaashi “mboka” nenge “olye.” Oshitya “Mboka” osho sha longithwa metoloko ekulu. Oshizemo? Omayambeko ngoka ga popiwa movelise 12 sigo 14 metoloko moka, ogu ukitha kaakolokoshi mboka ya tumbulwa moovelise dha tetekele. Nonando ongawo, oshitya asher otashi vulu wo okuukitha koshizemo nokoshilanduliko. Otashi vulu wo okutolokwa: “ngaaka,” “opo” nenge “opo ihe.” Uutumbulilo “opo ihe” owo wa longithwa mo-New World Translation yomo 2013 nosho wo mOombiimbeli dhilwe.

2. Uutumbulilo mboka wa longithwa mOmbiimbeli ndjoka ya pupalekwa, otawu endele pamwe nepisalomi alihe. Uutumbulilo “opo ihe” mboka wa longithwa movelise 12, otawu ti kutya omayambeko ngoka ga popiwa movelise 12 sigo 14, ogu ukithwa kaayuuki, mboka ya pula ya ‘hupithwe nokukanyatululwa’ miikaha yaakolokoshi (ovelise 11). Elunduluko ndika olya hololwa wo movelise 15, moka mwa longithwa oshitya “aanyanyukwi” lwaali notawu tsu kumwe. Shoka oshu ulike kutya enyanyu ndyoka olyu ukithwa kaantu yoludhi lumwe, ano mboka “Kalunga kawo Jehova!” Kaleka momadhiladhilo wo kutya omanyolo gopetameko gOshihebeli kaga li ge na iileshitho ngaashi iiyoololinkwanu. Onkee ano, aatoloki oye na okutala keityo lyomondjila, komunyolelo gwopaiteyo gwiitya yOshihebeli, koshikundathanwa nosho wo koovelise dhOmbiimbeli.

3. Uutumbulilo mboka wa longithwa mOmbiimbeli ndjoka ya pupalekwa, otawu tsu kumwe noovelise dhilwe ndhoka dhu uvaneka omayambeko ngoka Kalunga ta ka pa aantu ye aadhiginini. Omalunduluko ngoka ga ningwa ge na ko nasha noshitya asher, oga ningitha episalomi li ulike kutya David okwa li e na etegameno kutya konima ngele Kalunga a mangulula oshigwana shaIsraeli kaatondi yasho, ote ke ya yambeka moku ya kaleka ya nyanyukwa noya hepuluka. (Lev. 26:9, 10; Deut. 7:13; Eps. 128:1-6) Pashiholelwa, Deuteronomium 28:4 otayi ti: “Omuwa ote ku yambekele oluvalo lwoye, eloolo lyiimeno yoye niimuna yoye oongombe noonzi.” Odhoshili kutya pethimbo lyomwanamati gwaDavid, Salomo, sho a li ta pangele, oshigwana osha kala shi na ombili inaayi monika nale nosha hepuluka. Ethimbo Salomo a li ta pangele, otali tu ulukile nkene tashi ka kala, ngele Mesiasa a tameke okupangela kombanda yevi. — 1 Aak. 4:20, 21; Eps. 72:1-20.

Pehulilo, iitya mbyoka ya longithwa mEpisalomi 144, inayi lundulula euvoko lyetu lyOmbiimbeli. Pehala lyaashono, oya ningitha episalomi alihe li holole sha yela etegameno lyaapiya yaJehova, ehanagulo lyaakolokoshi nosho wo ehepuluko nombili tayi kalelele, iinima mbyoka aayuuki taya ka nyanyukilwa monakuyiwa. — Eps. 37:10, 11.