Owa lesha ngaa nawa Ooshungolangelo ndhoka opo dha piti? Tala ngele oto vulu okuyamukula omapulo taga landula:

Omolwashike aavali mboka ya tembukila kiilongo yilwe ye na okutala kelaka, sho taya kwathele aanona yawo pambepo?

Aanona otashi vulika ye ki ilonge kosikola nomomudhingoloko, elaka ndyoka hali popiwa moshitopolwa. Otashi ka kala ekwatho enene ngele okanona oka tseya omalaka ge vulithe pulimwe. Aavali oye na okutala mpoka oyana taya vulu okuuva ko nawa oshili naampoka taya vulu okuhuma komeho pambepo. Otashi vulika omokweendathana negongalo ndyoka hali longitha elaka lyomoshitopolwa nenge ndyoka hali longitha elaka lyokoshilongo shawo. Aavali oye na okupititha komeho uupambepo woyana, pehala lyiinima yawo yopaumwene. — w17.05, ep. 9-11.

Jesus okwa li a pula Petrus a ti: “Ou hole ndje tuu u vule mbaka?” Mbela uutumbulilo “mbaka” owa li wu ukitha kushike? (Joh. 21:15)

Jesus okwa fa a li ta popi oohi dhi li popepi naye nenge ongeshefa yoohi. Konima sho Jesus a si, Petrus okwa shuna kiilonga ye yokukwata oohi. Aakriste oye na okudhiladhila nuukeka kutya iilonga yokwiikongela omboloto mbyoka ye na, oyi li pondondo yini monkalamwenyo yawo. — w17.05, ep. 22-23.

Omolwashike Abraham a li a lombwele omukadhi a tye kutya omumwayina gwe? (Gen. 12:10-13)

Sara okwa li omumwahe gwaAbraham. Ando Sara okwa li a popi kutya ye omukulukadhi gwaAbraham, ando otashi vulika Abraham a dhipagwa, nomuye ando inamu ka za oluvalo ndoka Kalunga a li e mu uvanekela. — wp17.3, ep. 14-15.

Omukalo dhingi guni Elias Hutter a li e eta po, opo a kwathele mboka ya li ya hala okwiilonga Oshihebeli?

Okwa li a hala a kwathele aalongwa ye, ya mone eyooloko pokati kekota lyiitya yOshihebeli mbyoka yi li mOmbiimbeli niitetekeli kehe nenge iihuguninitya mbyoka hayi endele pamwe nayo. Okuza mpoka, okwa pilinta ekota lyoshitya kehe shOshihebeli moondanda dha luudhikwa, ihe iitetekeli niihuguninitya omoondanda inaadhi luudhikwa. Omukalo gwa faathana otagu adhika momanyolo gopevi mOmbiimbeli yo-New World Translation of the Holy Scriptures — With References. — wp17.4, ep. 11-12.

Iinima yini tayi vulu okukwathela Omukriste ngoka e wete kutya okwa pumbwa okukala nondjembo, nelalakano lyokwiigamena kaantu?

Yimwe ongaashi: Kalunga okwa tala ko omwenyo gwa simana. Jesus ka li a lombwele aalanduli ye ya kuthe omagongamwele nelalakano lyokwiigamena. (Luk. 22:36, 38) Otu na okuhambula omagonga getu omatemo. Omwenyo ogwa simana gu vule iinima yopamaliko. Ohatu simaneke omaiyuvo gayalwe notwa hala okukala oshiholelwa oshiwanawa. (2 Kor. 4:2) — w17.07, ep. 31-32.

Omolwashike ehokololo lyaMateus li na ko nasha nonkalamwenyo yaJesus yopetameko inaali faathana nolyaLukas?

Mateus okwa hokolola unene kombinga yaJosef. Pashiholelwa, okwa popi nkene a li i inyenge sho a mono kutya Maria oku li metegelelo. Okwa popi wo nkene a li i inyenge komatumwalaka gaKalunga ge na ko nasha nokuya ontuku kuEgipiti nokushuna kuIsrael. Lukas okwa hokolola unene kombinga yaMaria. Pashiholelwa, okwa popi kombinga yaMaria sho a ka talela po Elisabet nankene i inyenge pethimbo sho Jesus e na omimvo omulongo nasha, a thigalele kotempeli. — w17.08, ep. 32.

Ombiimbeli oya hupu miinima yimwepo yini?

Mokweendela ko kwethimbo, iitya nomautumbulilo ngoka ga li haga longithwa mOmbiimbeli, oga kala taga lunduluka. Omahumokomeho gopapolotika, oga li ga nwetha mo elaka ndyoka lya kala hali popiwa koyendji. Okutolokwa kwOmbiimbeli momalaka ngoka ge shiwike nawa, okwa kala taku patanekwa. — w17.09, ep. 19-21.

Mbela otu na omuyengeli ngoka he tu gamene?

Hasho nando. Jesus okwa li a popi aayengeli yaalongwa ye, ye li aluhe koshipala shaKalunga. (Mat. 18:10) Mbela okwa li ta ti ngiini? Okwa li ta ti kutya aayengeli oye na ko nasha naalongwa ye, ihe ka li ta ti ohaya gamene omulongwa kehe pashikumithalonga. — wp17.5, ep. 5.

Ohole yini ya dhenga mbanda?

Ohole ndjoka ya kankamena komakotampango guuyuuki, hayi ithanwa a·gaʹpe, oyo ya dhenga mbanda. Oya kwatela mo omakotampango dhingi ngaashi okukala wu na ko nasha nayalwe noku ya ningila uuwanawa. — w17.10, ep. 7.