1, 2. (a) Omolwashike oshiholelwa shaNoa, Daniel naJob tayi vulu oku tu tsa omukumo? (b) Hesekiel okwa li monkalo yini, sho a nyola oohapu ndhoka dhi li muHesekiel 14:14?

MBELA owu na uupyakadhi, tashi vulika to ehama, kuu na oshimaliwa nenge wa taalela omapataneko? Mbela omathimbo gamwe oho mono oshidhigu okukala wa nyanyukwa miilonga yaJehova? Ngele osho, oshiholelwa shaNoa, Daniel noshaJob, otayi vulu oku ku tsa omukumo. Kaya li ya gwanenena, noya li ya taalele omashongo ogendji ngoka natse hatu tsakaneke kunena, mwa kwatelwa ngoka ga kwata miiti. Nonando ongawo, oya li ya kakatela uudhiginini wawo, noya kala oshiholelwa sheitaalo nuudhiginini momeho gaKalunga. — Lesha Hesekiel 14:12-14.

² Hesekiel okwa nyola oohapu dhoshipalanyolo shoshitopolwa shetu, pethimbo e li muBabilonia, momumvo 612 K.E.N. * (Hes. 1:1; 8:1) Shoka osha ningwa meni lyethimbo efupi, manga Jerusalem inaashi hanagulwa po mo 607 K.E.N. Aantu owala aashona ya li yu ulike uukwatya wa fa waNoa, Daniel naJob, noyo ayeke ya li ya hupithwa.  (Hes. 9:1-5) Maantu mboka ya hupithwa omwa li mwa kwatelwa Jeremia, Baruk, Ebedmelek nAarekab.

3. Oshike tatu ka kundathana moshitopolwa shika?

³ Sha faathana kunena, aantu mboka haya vulika kuJehova, ano ya fa Noa, Daniel naJob, oyo owala taya ka hupithwa, sho uuyuni mbuka tawu ka hanagulwa po. (Eh. 7:9, 14) Onkee ano, natu taleni kutya omolwashike Jehova a longitha aalumentu mboka ye li oshiholelwa shuuyuuki. Sho tatu kundathana oshiholelwa shakehe gumwe, otatu ka gandja eitulomo (1) komashongo ngoka ya li ya taalela nosho wo (2) nkene tatu vulu okuholela eitaalo nuudhiginini wawo.

4, 5. Noa okwa li a taalela omashongo geni, nomolwashike eidhidhimiko lye endhindhilikwedhi?

⁴ Omashongo ngoka Noa a li a taalela. Pethimbo lyaEnok, hekulululwa yaNoa, aantu oya kala kaaye na ko nasha naKalunga. Oya kala nokuli taya popi “oohapu dhomatukano” kombinga yaJehova. (Jud. 14, 15) Uukolokoshi owa li we ende tawu indjipala. Nokuli nopethimbo lyaNoa, ‘iikolokosha oya li ya taandela shaa mpoka.’ Aayengeli aakolokoshi oya li ya lundulukile momalutu gopanyama, e tayi ikuthile aakiintu noya vala nayo aanona aanankondo naakwanyanya. (Gen. 6:2-4, 11, 12) Ihe Noa okwa li a yooloka ko. Ombiimbeli otayi ti: “Omuwa okwa li a hokwa Noa. . . . Noa ka li e na uusama, okwa li omuyuuki pethimbo lye. Okwa kala mekwatathano naKalunga.” — Gen. 6:8, 9.

⁵ Tala kutya oohapu ndhoka odha ti ngiini kombinga yomulumentu ngoka omuyuuki. Manga Jehova inaa hanagula po uuyuni mboka wa li wa kolokosha nEyelu, Noa ka li owala e ende naKalunga omimvo 70 nenge 80, ndhoka aantu oyendji opo haya hulile kunena okukala nomwenyo. Pehala lyaashono, okwa kala ko uule womimvo 600 lwaampono. (Gen. 7:11) Noa ka li e na egongalo lyooitaali ooyakwawo nenge aamwayina, opo ye mu ambidhidhe, ngaashi tse kunena hatu kwathelathana pambepo nooitaali ooyakwetu. *

6. Omomikalo dhini Noa a li u ulike kutya oku na shili uulaadhi?

⁶ Noa ka li a gwanenwa kokukala owala e na onkalamwenyo ombwanawa. Okwa li wo a ningi “omuuvithi guuyuuki,” nokwa li u ulike montaneho kutya okwi itaala muJehova. (2 Pet. 2:5) Omuyapostoli Paulus okwa nyola kutya Noa “okwa pe uuyuni uusama.” (Heb. 11:7) Onkee ano, kapu na omalimbililo kutya aantu oya li ye mu yolo noku mu pataneka, tashi vulika nokuli ya li ye mu ningile omatilitho. Nonando ongawo, Noa ka li a ‘tila aantu.’ (Omayel. 29:25) Pehala lyaashono, okwa li e na uulaadhi mboka Jehova ha pe aapiya ye aadhiginini.

7. Noa okwa li a taalela omashongo geni, sho a li ta tungu onguluwato?

⁷ Konima sho Noa a kala nokweenda pamwe naKalunga uule womimvo dhi vulithe pomathelemimvo gantano, Jehova okwa li e mu lombwele a tunge onguluwato, mu ka hupile aantu niinamwenyo. (Gen. 5:32; 6:14) Mbela iilonga mbyoka kaya li tuu tayi monika ya fa iidhigu! Odhoshili kutya Noa okwa li e shi kutya aantu otaye ke mu yola noku mu pataneka, omolwiilonga mbyoka. Nonando ongawo, okwa tsikile okukala omuvuliki noku na eitaalo. Ombiimbeli oya ti: “Noa okwa ningi, ngaashi Kalunga e mu lombwele.” — Gen. 6:22.

8. Omomikalo dhini Noa a kala i inekela muJehova e li Omukwathi gwe?

⁸ Eshongo limwe ndyoka Noa a li a taalela, olyokusila oshimpwiyu omukulukadhi gwe noyana. Manga Eyelu inaali ya, aantu oya li haya longo nuudhiginini ya mone iikulya mwa kwatelwa Noa. (Gen. 5:28, 29) Nonando osho sha li ngawo, okwa li a pititha komeho okulongela Kalunga, ihe haampumbwe dhawo. Nokuli  naasho a li ta tungu onguluwato, ndjoka tashi vulika ya li ya tungwa uule womimvo 40 nenge 50, Noa okwa kala ta gandja eitulomo kiinima yopambepo. Okwa tsikile okuninga ngawo omimvo 350 dha ka landula ko konima yEyelu. (Gen. 9:28) Shoka kashi shi tuu oshiholelwa oshiwanawa shevuliko neitaalo!

9, 10. (a) Ongiini tatu vulu okuholela eitaalo nuudhiginini waNoa? (b) Ngele ohatu vulika koompango dhaKalunga, otatu vulu okukala nuushili wuni?

⁹ Nkene tatu vulu okuholela eitaalo nuudhiginini waNoa. Otatu vulu oku shi ninga mokukala twa kakatela uuyuuki waKalunga, mokukala kaatu shi oshitopolwa shuuyuni waSatana nomokukala twa pititha komeho Uukwaniilwa. (Mat. 6:33; Joh. 15:19) Shoka ohashi tu ningitha tu kale tu tondike kuuyuni. Nokuli nongashingeyi, okukala twa dhiginina oompango dhaKalunga, ngaashi ndhoka dhi na ko nasha nondjokana nosho wo nomilalo, osha ningitha yalwe miilongo yilwe ya kale ye na etaloko lya puka. (Lesha Maleaki 3:17, 18.) Nonando ongawo, ngaashi Noa, tse ohatu tila Jehova ihe haantu. Otu shi shi kutya Jehova oye awike ta vulu oku tu pa omwenyo gwaaluhe. — Luk. 12:4, 5.

¹⁰ Mbela ongiini kombinga yoye paumwene? Mbela oto ka tsikila ngaa ‘okweenda pamwe naKalunga,’ nokuli nonando yalwe otaye ku sheke nenge taye ku pe uusama nenge uuna wa taalela omathiminiko gopamahupilo, ngoka taga vulu okumakela eitaalo ndyoka wu na mOmukwathi gwoye? Ngele owa holele eitaalo nuudhiginini waNoa, oto vulu okukala neinekelo kutya Jehova ote ke ku sila oshimpwiyu. — Fil. 4:6, 7.

11. Daniel nosho wo ookuume ke yatatu oya li ya taalele omashongo omanene geni muBabilonia? (Tala kethano lyopetameko.)

¹¹ Omashongo ngoka Daniel a li a taalela. Daniel okwa kala onkwatwa muBabilonia, oshilando shoka sha li shu udha iimenka nosho wo uumpulile. Shimwe ishewe, Aababilonia oya li ya dhina Aajuda, noya li haye ya sheke pamwe naKalunga kawo, Jehova. (Eps. 137:1, 3) Odhoshili kutya shika oshi na okukala sha li shu uvitha nayi Aajuda aadhiginini ngaashi Daniel. Natango, molwaashono ye pamwe nookuume ke yatatu, Hanania, Mishael naAzaria oya li taya dheulwa ya longele omukwaniilwa, aantu oyendji oya li ya gandja eitulomo kuyo. Nokuli oya li ya longekidhilwa iikulya mbyoka ye na okukala taya li. Ihe Daniel okwa li a tokola kii “inyateke a lye iikulya nokunwa omaviinu gambala.” — Dan. 1:5-8, 14-17.

12. (a) Omaukwatya omawanawa geni Daniel a li u ulike? (b) Jehova okwa li a tala ko ngiini Daniel?

¹² Eshongo limwe Daniel a li a taalela, oosho a li e na uunongo, mboka we mu ningitha a pewe omauthembahenda gi ikalekelwa. (Dan. 1:19, 20) Ihe Daniel pehala lyokwiinenepeka nokukala e na omutse omukukutu, okwa kala omwiifupipiki nokwa gundjila, naaluhe olupandu okwa li he lu gandja kuJehova. (Dan. 2:30) Manga Daniel e li omugundjuka, Jehova okwe mu popi e li oshiholelwa shuuyuuki pamwe naNoa nosho wo Job. Mbela Daniel okwa li a kanitha einekelo lye muKalunga? Hasho nando! Daniel okwa kala omudhiginini nomuvuliki onkalamwenyo ye ayihe. Pethimbo e na omimvo 90 nasha, omuyengeli gwaKalunga okwa li e mu lombwele a ti: “Daniel, Kalunga oku ku hole.” — Dan. 10:11.

13. Omomukalo guni Daniel a kala eyambeko kAajuda ooyakwawo?

¹³ Molwaashono Daniel okwa li ha vulika kuKalunga, oshe mu ningitha a kale elenga ekuluntu muBabilonia nomuMedo-Persia. (Dan. 1:21; 6:1, 2) Otashi vulika Jehova e etha Daniel a pewe ondondo ndjoka yopombanda, opo a kwathele aantu ye, ngaashi Josef a ningi muEgipiti nosho wo Ester naMordekai ya ningi muPersia. * (Dan. 2:48) Shoka kasha li tuu sha hekeleke oonkwatwa dhAajuda, mwa kwatelwa  Hesekiel, sho ya mono Jehova te ya kwathele momukalo ngoka!

14, 15. (a) Omomikalo dhini oonkalo dhetu dha faathana nodhaDaniel? (b) Aavali kunena otaya vulu okwiilonga shike koshiholelwa shaavali yaDaniel?

¹⁴ Nkene tatu vulu okuholela eitaalo nuudhiginini waDaniel. Kunena otu li onga aakwiilongo, ngaashi sha li muuyuni mbwiyaka wa li wa yonuka pamikalo nopambepo, omolwa Babiloni Oshinene, ano omalongelokalunga giifundja, “ehala lyoompwidhuli.” (Eh. 18:2) Onkee ano, natse otwa yooloka ko kaantu yomuuyuni mbuka, notwa ninga nokuli iihakanwa yokushekwa. (Mark. 13:13) Ngaashi Daniel, natu hedheni popepi naJehova, Kalunga ketu. Ngele otwa kala tatu vulika kuye nokwiinekela muye neifupipiko, otatu ka kala tu na ongushu momeho ge. — Hag. 2:7.

¹⁵ Aavali kunena otaya vulu okwiilonga sha koshiholelwa shaavali yaDaniel. Ngiini mbela? Nonando muJuda omwa li uukolokoshi pethimbo Daniel ta putuka, okwa kala e hole Kalunga okuza kuunona we. Odhoshili kutya shoka kasha li she ya po owala kusho shene. Otashi ulike kutya aavali yaDaniel oya li ya ningi oonkambadhala ye mu dheule. (Omayel. 22:6) Nokuli nedhina Daniel, ndyoka tali ti “Omupanguli gwandje oKalunga,” [enyolo lyopevi, NW] otali ulike kutya aavali ye oya li aatilikalunga. (Dan. 1:6) Onkee ano, aavali inamu teka omukumo okukwathela aanona yeni, ihe ya longeni neidhidhimiko. (Ef. 6:4) Shimwe ishewe, galikaneni pamwe nayo noku ya kwatela momagalikano geni. Ngele omwa kambadhala okunongeka oshili yOmbiimbeli momitima dhawo, Jehova ote ke mu yambeka. — Eps. 37:5.

16, 17. Omashongo omanene geni Job a li a taalela?

¹⁶ Omashongo ngoka Job a li a taalela. Job okwa li a taalela omashongo omanene monkalamwenyo ye. Manga inaa adhika komashongo, ‘okwa li omuyamba e vule aantu ayehe yokuuzilo.’ (Job 1:3) Okwa li oshipuna, a tseyika nawa nokwa simanekwa noonkondo. (Job 29:7-16) Nonando ongawo, ka li i inekela muye mwene nenge u uvite inaa pumbwa Kalunga. Jehova okwa li e mu ithana “omuntu gwandje.” Okwa gwedha ko a ti: ‘Job omuntu e shi okwiinekelwa, ha tila Kalunga noha tondo uuwinayi.’ — Job 1:8.

¹⁷ Onkalamwenyo yaJob oya li ya lunduluka thiluthilu ombadhilila. Okwa kanitha iinima mbyoka a li e na nokwa li a gwililwa po, e ta kala a hala okusa. Otu shi kutya omweetithi gwaashoka okwa li omulundili Satana, ngoka a li a lundile Job kutya ota longele owala Kalunga, omolwiinima mbyoka e na. (Lesha Job 1:9, 10.) Mbela Jehova okwa li a ningi po shike kombinga yompata ndjoka? Okwa li a pe Job ompito u ulike uudhiginini we, opo u ulike kutya  oku mu hole shili nohe mu longele tashi zi komutima.

18. (a) Oshike she ku kumitha kombinga yuudhiginini waJob? (b) Omukalo moka Jehova u ungaunga naJob, otagu ulike shike kombinga ye?

¹⁸ Satana okwa li a ponokele Job lwiikando. Okwa li e mu ponokele nomashongo ga kwata miiti noku mu ningitha a dhiladhile kutya otage etithwa kuKalunga. (Job 1:13-21) Opo nduno ookuume ke yatatu aaniifundja, oye ya kuye ye mu hekeleke, noya li ye mu ula nayi, taya ti kutya Kalunga okwe mu ningila shoka i ilongela. (Job 2:11; 22:1, 5-10) Nonando ongawo, Job okwa tsikile okukala omudhiginini. Odhoshili kutya omathimbo gamwe okwa li a popi oohapu inaadhi uka, ihe Jehova okwa li u uvite ko uuwehame mboka Job a li u uvite. (Job 6:1-3) Jehova okwa li e wete omulumentu ngoka a li a gwililwa po noonkondo, ngoka kaa li a kambadhala oku mu pilamena, nokuli nonando okwa li a dhengwa pevi kuSatana noku mu ula nayi. Konima sho omashongo ga pu, Jehova okwa li a pe Job lwaali iinima mbyoka a li a kanitha, nokwe mu gwedhele ko omimvo 140 dhokukalamwenyo. (Jak. 5:11) Uule womimvo ndhoka, Job okwa li a tsikile okukala omudhiginini kuJehova. Otu shi shi ngiini? Sho Hesekiel a nyola oohapu dhoshipalanyolo shetu, Job okwa adhika a sa nale pwa pita omathelemimvo ogendji.

19, 20. (a) Ongiini tatu vulu okuholela eitaalo nuudhiginini waJob? (b) Ongiini tatu vulu okuulika olukeno lwaKalunga, uuna tatu ungaunga nayalwe?

¹⁹ Nkene tatu vulu okuholela eitaalo nuudhiginini waJob. Kutya nduno oonkalo dhetu odhi kale dha tya ngiini, natu kale aluhe twa pititha komeho Jehova monkalamwenyo yetu, oku mu inekela thiluthilu nokuvulika kuye nomutima aguhe. Uushili owo kutya otu na omatompelo ogendji goku shi ninga, shi vulithe Job. Dhiladhila kwaashika: Otu shi oshindji kombinga yaSatana noomwigo dhe. (2 Kor. 2:11) Otatu pandula embo lyaJob, oshoka olye tu kwathela tu mone kutya omolwashike Kalunga e etha okumona iihuna ku kale po. Ehunganeko lyaDaniel olye tu kwathela tu kale tu shi kutya Uukwaniilwa waKalunga owo epangelo lyolela, ndyoka li li miikaha yaKristus Jesus. (Dan. 7:13, 14) Otu shi wo kutya Uukwaniilwa mboka masiku otawu ya wu hulithe po okumona iihuna akuhe.

²⁰ Oshimoniwa shaJob, oshe tu ulukila nkene twa pumbwa okuulukila Aakriste ooyakwetu olukeno, mboka tashi vulika tayi idhidhimikile oonkalo oondhigu. Ngaashi Job, yamwe otashi vulika nayo ya popye oohapu inaadhi uka omathimbo gamwe. (Omuuv. 7:7) Ihe pehala lyoku ya pangula, natu yu ulukile olukeno nonokutya otu yu uvite ko. Kungawo, otatu holele Tate yetu omunahole nomunamutimahenda, Jehova. — Eps. 103:8.

21. Oohapu dhomuPetrus gwotango 5:10 odhu ulika ngiini shoka sha li sha ningilwa Noa, Daniel naJob?

²¹ Nonando Noa, Daniel naJob kaya li ko pethimbo limwe noya li ya taalela oonkalo dha yoolokathana, oya li yi idhidhimikile omashongo ngoka ya li ya taalela. Ondjokonona yawo otayi tu dhimbulukitha oohapu dhomuyapostoli Petrus, ndhoka tadhi ti: ‘Omahepeko ogokathimbo kowala. Kalunga kesilohenda alihe ote mu longekidha, te mu pe oonkondo, te mu koleke note mu tula kekankameno lya kola.’ — 1 Pet. 5:10.

22. Oshike tatu ka kundathana moshitopolwa tashi landula?

²² Okupitila moohapu dhaPetrus dha nwethwa mo, Jehova okwe tu shilipaleka kutya ota ka koleka nokunkondopaleka aapiya ye. Oohapu ndhoka otadhi longo wo koshigwana shaKalunga nokunena. Atuheni otwa hala Jehova e tu pe oonkondo nokutsikila oku mu longela nuudhiginini. Onkee ano, otwa hala okuholela eitaalo nuudhiginini waNoa, Daniel naJob. Ngaashi tatu ke shi mona moshitopolwa tashi landula, shoka sha li sha simanenena kuudhiginini wawo, oosho ya li ya tseya shili Jehova. Odhoshili kutya oya li yu “uvite ko ayihe,” mbyoka Jehova a li a tegelela ya ninge. (Omayel. 28:5) Jehova okwa tegelela tu ninge sha faathana.