SHO ombautu tayi ende mefuta Belfast Lough, ongundu yaafaalelwa ndjoka ya thikama kondjete, oya li ya mono iikulundundu ya ziza nawa ongula onene. Shoka osha ningwa muMei 1910. Mokati kaafaalelwa omwa li omumwatate Charles T. Russell, nosha li oshikando she oshititano ta yi koIrlanda. Okwa li a mono oosikepa mbali oonene tadhi pangelwa, yimwe oyedhina Titanic nonkwawo yedhina Olympic. * Okwa li ongundu yaakonakonimbiimbeli ya thikama pomatuliloskepa, ya tegelela a thike.

Omimvo 20 lwaampono dha tetekele 1910, omumwatate Russell okwa li a kongo po omukalo omwaanawa gwokuuvitha onkundana ombwanawa muuyuni awuhe. Onkee ano, okwa li a tokola a ye kiilongo yokondje yaAmerika. Olweendo lwe lwotango, olwa tameke moIrlanda, muJuli 1891. Sho e li moskepa yedhina City of Chicago, okwa li a mono etango tali ningine kombinga komunkulofuta moQueenstown, notashi vulika a li a dhimbulukwa ethimbo mwa li aavali ye. Sho omumwatate Russell naayendi pamwe naye ya piti muundoolopa wontumba nomomahala omawanawa, oye shi mono mo kutya omu na epya lya “pya nolya gwana okutewa.”

Omumwatate Russell okwa li a ka talela po koIrlanda iikando iheyali. Oshikando she shotango a yi ko, aantu omathele oya li yu ulike ohokwe mwaashoka a li tu uvitha, noya li ya hala a galuke ishewe. Oshikando oshitiyali a yi ko, omuMei 1903, nomakugongala gomontaneho moBelfast nomOdubelini oga li ga tseyithwa miifokundaneki yomoshitopolwa. Omumwatate Russell okwa popi kutya “aapulakeni oya li ya pulakena nawa” koshipopiwa shi na oshipalanyolo “Ehunganeko ndyoka li na okugwanithwa,” tashi popi kombinga yeitaalo lyaAbraham nomayambeko ngoka aantu taya ka mona monakuyiwa.

Molwaashono aantu moIrlanda oya li ya tsikile okuulika ohokwe, shoka osha ningitha ishewe omumwatate Russell a kwatele mo oshilando shoka metalelopo lye etitatu koEuropa. MuApilili 1908, ongula yesiku limwe, omumwatate Russell sho a thiki petulilosikepa moshilando Belfast, okwa li a popithwa kaamwatate yatano. Oshipopiwa shomontaneho shoka sha li sha tseyithwa, shi na oshipalanyolo “Okusindwa kwepangelo lyaSatana,” opwa li “aapulakeni aanandunge 300 lwaampono,” ongulohi ndjoka. Omupataneki gumwe mokati kaapulakeni mboka, okwa li a gumwa mbala kokulongithwa nawa kwOmanyolo. MOdubelini, omupataneki gumwe a kukuta gwedhina O’Connor, amushanga gwo-YMCA, okwa li a kambadhala okuningitha aapulakeni ye vulithe 1 000 ya kale ompinge naakonakonimbiimbeli. Mbela oshike sha li sha ningwa po?

Natu taleni shoka tashi vulika sha li sha ningwa po poshiningwanima shoka. Omulumentu gumwe ngoka a li e na ohokwe moshili yOmbiimbeli, okwa li a tokola okuya koshipopiwa shomontaneho, shoka sha li sha tseyithwa moshifo The Irish Times. Osha li oshidhigu kuye okumona mpoka ta kuutumba mehala moka sha li sha gandjelwa. Omulumentu nguka okwa li a pulakene neitulomo komupopi, ngoka a li e na omafufu omatokele noku li mondjatha onde onduudhe. Omupopi okwa gandja oshipopiwa she a manguluka noti inyenge nokwa  li a fatulula omanyolo ombahu nokawawa, naashoka osha li sha kwathele omulumentu ngoka uve ko oshili yOmbiimbeli. Nonando omupopi ka li a popi nembako, aantu ayehe mehala moka oya li ye mu uvite, nokwe shi gandja uule wowili netata. Pethimbo lyomapulo nomayamukulo omupopi okwa li a patanekwa komulumentu gwedhina O’Connor nookuume ke, ihe omumwatate okwa li a popile etumwalaka ta longitha Ombiimbeli. Aapulakeni oya tsu kumwe naashoka a popi, noye shi ulike mokuhakela omake. Sho oonkundathana dha pu, omulumentu ngoka e na ohokwe, okwa yi kaamwatate opo e ki ilonge oshindji. Shi ikolelela kwaashoka sha hokololwa kwaamboka ya li po, oyendji oya li yi ilongo oshili momukalo nguka.

MuMei 1909, omumwatate Russell okwa li a zi mo moNew York pamwe nomumwatate Huntsinger. Osha li oshikando she oshitine oku ka talela po noya yi noskepa yedhina Mauretania. Oya yi pamwe, opo ethimbo ye li molweendo ya vule oku li longitha mokulesha nomokunyola iitopolwa yOshungolangelo. Poshipopiwa shomontaneho shomumwatate Russell moBelfast, opwa li aantu yomoshitopolwa ye li 450. Aantu 100 lwaampono yomuyo, oya li ya thikama, oshoka kaya li ye na mpoka taya kuutumba.

Omumwatate Russell okwa ka talela po oshikando oshititano, ngaashi sha tumbulwa metetekelo. Konima yoshipopiwa she shomontaneho mOdubelini, omwiilongi gumwe gwomaitaalo a tseyika nawa ngoka a li e ya pamwe nomulumentu gwedhina O’Connor, omapulo ge oga li ga yamukulwa okuza mOmbiimbeli. Aapulakeni nayo oya li ye ga nyanyukilwa. Esiku lya landula, aamwatate oya londo mombautu ndjoka ye ya fala meendelelo koLiverpool, nokonima oya londo mombautu yedhina Lusitania ya ye koNew York. *

Okutseyithwa kwiipopiwa yomontaneho okwa li wo kwa ningwa, sho omumwatate Russell a ka talela po oshikando oshitihamano noshitiheyali, mo 1911. Pethimbo lyoshikufuthinge, aakonakonimbiimbeli 20 moBelfast, oya li ya hiya aantu 2 000, opo ye ye ya pulakene koshipopiwa shi na oshipalanyolo “Onkalamwenyo konima yeso.” O’Connor okwa li e ya muOdubelini natango nomusita gumwe ngoka a li ta pula omapulo, ihe oga li ga yamukulwa okuziilila mOmbiimbeli, naapulakeni oya li ye shi hakelele omake. Pethimbo lyothinge omumvo ogo tuu ngoka, O’Connor okwa li a mono kutya piipopiwa mbyoka ya gandjwa kaamwatate moondoolopa ndhoka ya talele po, opwa li aapulakeni oyendji. Onkee ano, okwa li e ya naalumentu 100 nelalakano lyokupiyaganeka ishewe okugongala hoka kwa li mOdubelini. Nonando ongawo, aapulakeni oya li ya ambidhidha omupopi noonkondo.

Nonando omumwatate Russell oye a li ha gandja unene iipopiwa yomontaneho pethimbo mpoka, okwa li a popi kutya “kapu na omuntu a simana,” oshoka “iilonga mbika kayi shi yomuntu, ihe oyaKalunga.” Okutseyithwa kwiipopiwa yomontaneho, mbyoka ya li hayi gandjwa pokugongala kwomontaneho, okwa li kwa gandja oompito dhokufatulula oshili yOmbiimbeli. Oshizemo? Iipopiwa yomontaneho oya li ya kwathele mokutaandelitha onkundana ombwanawa, nomagongalo oga li ga totwa miilando oyindji muIrlanda. — okuza moompungulilo dhetu moBritania.