1, 2. Aapiya yaKalunga kunena oya taalela eshongo lini? (Tala omathano gopetameko.)

OONDOHOTOLA naapangi oyendji, ohaya longo mokati kaantu mboka ye na omikithi dhomikwawu. Ohaye ya kwathele, molwaashono oye na ko nasha nayo. Uuna taye shi ningi, ohaya kala ya pumbwa okwiigamena, opo kaaya kwatwe komikithi ndhoka taya panga. Sha faathana, natse ohatu kala nohatu longo naantu mboka ye na iikala nomaukwatya ngoka taga kondjithathana naangoka gopakalunga. Shika oshi li lela eshongo kutse.

² Momasiku ngaka gahugunina, omu na aantu oyendji kaaye na omikalo. Montumwafo ontiyali yomuyapostoli Paulus ndjoka a li a nyolela Timoteus, okwa popi kombinga yomaukwatya gaantu mboka ihaaya longele Kalunga. Okwa popi wo kutya omaukwatya ngoka otaga ka nayipala momasiku gokomeho. (Lesha 2 Timoteus 3:1-5, 13.) Nonando otashi vulika tu kale twa kuminwa omaukwatya ngoka, otatu vulu okunwethwa mo keihumbato lyawo nokiikala yawo. (Omayel. 13:20) Moshitopolwa shika, otatu ka mona nkene omaukwatya ngoka ge niwe kaantu oyendji momasiku ngaka gahugunina, ga yooloka ko kwaangoka gaapiya yaKalunga. Otatu ka tala wo nkene tatu vulu okwiigamena kaatu nwethwe mo kiikala iiwinayi, sho tatu kwathele yalwe pambepo.

3. Omaukwatya ngoka ga popiwa muTimoteus omutiyali 3:2-5 otaga popi oolye?

 ³ Omuyapostoli Paulus okwa nyola kutya ‘momasiku gahugunina’ otamu ka kala “omathimbo omadhigu” okukaliwa mugo. Okwa li a popi omaukwatya omawinayi ge li 19, ngoka taga ka kala maantu yopethimbo ndika. Omaukwatya ngoka oga faathana naangoka ga popiwa mAaroma 1:29-31, nonando ngoka ga popiwa montumwafo yaPaulus ndjoka a nyolela Timoteus oga kwatela mo omautumbulilo ngoka kaage li mOmanyolo gopaKriste gOshigreka. Paulus okwa tameke nuutumbulilo “aantu otaa ka kala . . . ,” opo nduno okwa landulitha ko omaukwatya ngoka omawinayi. Ihe haantu ayehe ye na omaukwatya ngoka. Aakriste oye na omaukwatya ga yooloka ko thiluthilu kwaangoka. — Lesha Maleaki 3:18.

4. Aantu mboka ye na uuntsa oya tya ngiini?

⁴ Konima sho Paulus a popi kutya oyendji otaya ka kala yi ihole yo yene noye hole iimaliwa, okwa nyola wo kutya otaya ka kala aainomi, aanuuntsa nohaya tuwalala. Aantu mboka ye na omaukwatya ngoka olundji ohaya kala ye wete ye vule yalwe, omolwiinima mbyoka haya vulu okuninga, eholokopo lyawo, omaliko gawo nenge ondondo yawo. Ohaya kala ya halelela okupandika nokusimanekwa. Omulongwantu gumwe okwa nyola kombinga yomuntu ngoka e na uuntsa a ti: ‘Oha kala i itala ko a simanenena e vule ayehe.’ Yamwe oya ti kutya uuntsa wa pitilila owu li oshinima oshiwinayi noonkondo, nokuli naamboka ye wu na kaye hole oku wu mona muyalwe.

5. Ongiini aapiya yamwe aadhiginini ya li ya kwatwa kuuntsa?

⁵ Jehova oku tonde uuntsa noonkondo. Oku tonde “omeho ge na uuntsa.” (Omayel. 6:16, 17) Uuntsa ohawu ningitha omuntu a kale kokule naKalunga. (Eps. 10:4) Uuntsa uukwatya wOmuhindadhi. (1 Tim. 3:6) Shiyemateka, aapiya yamwe yaJehova aadhiginini ohaya kwatwa kuuntsa. Pashiholelwa, omukwaniilwa gwaJuda, Ussia, okwa kala omudhiginini uule womimvo odhindji. Ihe Ombiimbeli oya ti: “Ussia sho a ningi omunankondo, okwa tumbu pombanda, naashika oshe mu fala mepunduko. Okwa hindi Omuwa, Kalunga ke, sho a yi motempeli a fike iitsinino ketsininoyambelo.” Konima, omukwaniilwa Hiskia okwa li wo a kwatwa kuuntsa, ihe ka li a kala nawo ethimbo ele. — 2 Ondjal. 26:16; 32:25, 26.

6. Oshike sha li tashi vulu okuningitha David a kale e na uuntsa, ihe omolwashike kaa li e wu na?

⁶ Aantu yamwe ohaya kwatwa kuuntsa, omolwuunkulungu wokwiimba, eholokopo lyawo ewanawa, okukala ya tseyika nawa, aanankondo nenge uuna ya simanekwa kuyalwe. David ka li owala e na shimwe shomwaambika, ihe okwa li e yi na ayihe, ndele okwa tsikile okukala omwiifupipiki monkalamwenyo ye ayihe. Konima sho a dhipaga Goliat, okwa li a pewa omwanakadhona gwomukwaniilwa Saul a ninge omukulukadhi gwe, ihe okwa ti: “Ongame lye, nezimo lyandje oshike, ndi ninge oshitenya shuuwa?” (1 Sam. 18:18) Oshike sha li sha kwathele David a kale omwiifupipiki? Okwa li e shi kutya omaukwatya, uunkulungu nuuthembahenda mboka a li e na, owe ya po sho Kalunga a “nyongama” nenge tu tye i ifupipike, opo a gandje eitulomo kuye. (Eps. 113:5-8) David okwa li e shi kutya kehe shimwe oshiwanawa e na, okwe shi pewa kuJehova. — Yelekanitha 1 Aakorinto 4:7.

7. Oshike tashi ke tu kwathela tu ulike eifupipiko?

⁷ Ngaashi David, aapiya yaJehova kunena nayo ohaya kambadhala ya kale aaifupipiki. Otwa nyanyukwa okutseya kutya Jehova, ngoka e li Omuntu omunene meshito alihe, omwiifupipiki. (Eps. 18:35, yelekanitha OB-1954) Ohatu vulika komayele ngoka taga ti: “Kaleni mu na olukeno, ohenda, eifupipiko, ombili neidhidhimiko.” (Kol. 3:12) Otu shi shi wo kutya ohole  ‘ihayi si efupa, yo ihayi tuwalala.’ (1 Kor. 13:4) Uuna tatu ulike eifupipiko, aantu otashi vulika ya hedhe kuJehova. Ngaashi owala aasamane taya vulu okufalwa meitaalo komikalo dhaakulukadhi yawo nopwaahe na oku shi ninga noohapu, yalwe otaya vulu wo okuhedha kuKalunga, omolweifupipiko ndyoka tali ulikwa koshigwana she. — 1 Pet. 3:1.

8. (a) Okwaavulika kaavali kunena okwa talika ko ngiini kuyamwe? (b) Omanyolo otaga ladhipike aanona ya ninge shike?

⁸ Paulus okwa li a popi nkene aantu taye ku ungaunga nayalwe momasiku gahugunina. Okwa nyola a ti kutya momasiku gahugunina, aanona itaya ka vulika kaavali yawo. Aantu yamwe eihumbato lya tya ngawo oye li taamba ko notali humithwa komeho nokuli okupitila momambo, moomuvi nomoopolohalama dhokotiivii kunena. Okwaavulika ohaku nkundipaleke uukumwe wuukwanegumbo. Ekotampango ndika olya kala li shiwike okuza nale. Pashiholelwa, muGreka shonale, ngele omulumentu okwa dhenge aavali ye, okwa li ha kanitha omauthemba agehe ngoka e na; kohi yompango yaRoma, omuntu ngele okwa dhenge he, osha li eyono lya kwata miiti lya fa okudhipaga. Omanyolo gOshihebeli nosho wo Omanyolo gopaKriste gOshigreka otaga ladhipike aanona ya kale haya simaneke aavali yawo. — Eks. 20:12; Ef. 6:1-3.

9. Oshike tashi vulu okukwathela aagundjuka ya vulike kaavali yawo?

⁹ Aanona ngele oya dhiladhila kwaashoka aavali yawo ye ya ningila, otashi vulu oku ya kwathela yi igamene kaaya nwethwe mo kombepo yokwaavulika. Uuna aanona ye shi kutya okuvulika oshinima shoka Kalunga, ngoka e li He yaantu ayehe a hala ya ninge, otashi ke ya kwathela ya kale ye na olupandu. Ngele aagundjuka oya kala haya popile aavali yawo muuwanawa, otashi ka kwathela aagundjuka yalwe ya kale ya tala ko nawa aavali yawo. Odhoshili kutya ngele aavali kaye hole aanona yawo, otashi vulika shi kale oshidhigu kuyo ya vulike tashi zi komutima. Shimwe ishewe, uuna okanona ka mono kutya oke holike lela kaavali yako, otashi ke ki inyengitha ka vulike kuyo, nonando oshi kale oshidhigu uuna taka makelwa kaake shi ninge. Omugundjuka gwedhina Austin okwa ti: “Nonando olundji onda li handi kala ndu uvite nda hala okuya noondjila dhandje, aavali yandje oya tulile ndje po iikwatiketi yi li pandjele, oya yelithile ndje elalakano lyoompango ndhoka ya tula po nokupopya nangame ya manguluka. Shika osha kwathela ndje ndi kale omuvuliki. Onda li ndi shi wete kutya oye na ko nasha nangame, naashoka oshi inyengitha ndje ndi vulike kuyo.”

10, 11. (a) Omaukwatya omawinayi geni tagu ulike kutya aantu kaye holathane? (b) Aakriste yashili oye hole aantu ooyakwawo shi thike peni?

¹⁰ Paulus okwa tumbula omaukwatya galwe omawinayi, ngoka tagu ulike kutya aantu kaye holathane. Konima sho a popi kutya aantu otaya ka kala “ihaa vulika kaakuluntu yawo,” okwa landulitha ko uutumbulilo ihaaya pandula. Shoka otashi opalele, molwaashoka aantu ya tya ngaaka, ihaya kala ye na olupandu lwuuwanawa mboka ya ningilwa kuyalwe. Okwa ti wo kutya aantu otaya ka kala ya pota. Otaya ka kala aayoni yeuvaneno, ano tayu ulike kutya kaye na ehalo lyokukala ye na euvathano nayalwe. Oyo otaya ka kala aasheki naakotokeli, taya popi omalaka omawinayi notage ehameke kombinga yaantu noyaKalunga. Okwa popi wo kutya aantu otaya ka kala haya lundilathana, ano haya popile yalwe muuwinayi, opo ya nyateke omadhina gawo. *   

¹¹ Mepingathano naantu mboka kaaye na  ohole kunena, mboka haya longele Jehova oye hole shili aantu ooyakwawo. Oshinima shoka osho sha kala aluhe ngawo. Jesus okwa li a popi kutya ohole yokuhola aantu ooyakwetu, ano a·gaʹpe, oyo ya li oshipango oshitiyali sha simanenena mOmpango yaMoses, shoka sha landula ohole yokuhola Kalunga. (Mat. 22:38, 39) Jesus okwa li wo a popi kutya ohole yokuhola aantu ooyakwetu, oyo uukwatya mboka tawu ka ndhindhilikitha mo Aakriste yashili. (Lesha Johannes 13:34, 35.) Aakriste oya li wo taya ka kala ye hole aatondi yawo. — Mat. 5:43, 44.

12. Jesus okwa li u ulike ngiini kutya oku hole yalwe?

¹² Jesus okwa li u ulike kutya oku hole yalwe noonkondo. Okwa li e ende niilando, tu uvithile aantu onkundana ombwanawa yUukwaniilwa waKalunga. Okwa li a tonatitha omeho gaaposi, a aludha iilema, aanashilundu noombolo. Okwa li wo a yumudha aasi. (Luk. 7:22) Jesus okwa li nokuli a gandja omwenyo gwe, omolwaantu, nonando oyendji oya li ye mu tonde. Jesus okwa li a holele ohole yaHe thiluthilu. Muuyuni awuhe, Oonzapo dhaJehova ohadhi ulukile aantu ooyakwawo ohole yopakalunga.

13. Ohole ndjoka hatu ulukile yalwe, otayi vulu ngiini oku ya kwathela ya hedhe popepi naJehova?

¹³ Uuna tatu ulukile yalwe ohole, ohashi ya hedhitha kuTate yetu gwomegulu. Pashiholelwa, omulumentu gumwe moTailand, okwa li a gumwa kohole ndjoka a li a mono mokati kaamwatate naamwameme poshigongi shoshitopolwa. Sho a yi kegumbo, okwa pula a kale ha konakona Ombiimbeli lwaali moshiwike. Okwa li u uvithile aakwanezimo ye ayehe, nokonima owala yoomwedhi hamano konima yoshigongi shoka, okwa gandja elesho lye lyOmbiimbeli lyotango pOshinyanga shUukwaniilwa. Opo tu mone kutya ohatu ulukile yalwe ohole shi thike peni, otatu vulu okwiipula ngeyi: ‘Mbela ohandi ningi ngaa ngaashi tandi vulu ndi kwathele aantu yaandjetu, yomegongalo naamboka tandi uvithile? Mbela ohandi kambadhala ngaa okutala ko yalwe ngaashi Jehova he ya tala ko?’

14, 15. Omaukwatya geni omawinayi aantu oyendji haya ulike, nongiini yamwe ya ninga omalunduluko?

¹⁴ Aantu mboka hayu ulike omaukwatya galwe omawinayi momasiku ngaka gahugunina, ohaya  ningitha Aakriste ya kale kokule nayo. Omaukwatya ngoka ongaashi, otaya ka kala ye tonde uuwanawa. Omatoloko gamwe oga longitha uutumbulilo “aatondi yuuwanawa” nenge “okutonda uuwanawa awuhe.” Ombiimbeli oya popi wo kutya aantu yamwe otaya ka kala aapwidhi naadhudhu nayamwe otaya ka kala ihaa yawala.

¹⁵ Oyendji mboka ya li ye na omaukwatya ngoka, oya ninga omalunduluko. Omalunduluko ngoka oga hunganekwa nawa mOmbiimbeli. (Lesha Jesaja 11:6, 7.) Menyolo moka omwa popiwa kutya iilikama ngaashi omambungu noonkoshi, otayi ka kala nombili niimuna ngaashi uutana nuunzigona. Ndhindhilika kutya shika otashi ka ningwa, “oshoka evi otali ka udha okutseya Omuwa.” (Jes. 11:9) Molwaashoka iinamwenyo ihayi vulu okwiilonga kombinga yaJehova, ehunganeko ndika otali popi omalunduluko ngoka aantu taya ningi.

16. Ombiimbeli oya kwathela ngiini aantu ya ninge omalunduluko monkalamwenyo yawo?

¹⁶ Oyendji oya li aahahu ya fa omambungu, ihe ngashingeyi oye na ombili nayalwe. Oto vulu okulesha kombinga yiimoniwa yawo moshitopolwa “Ombiimbeli ohayi lundulula onkalamwenyo yaantu,” shoka shi li kepandja lyetu lyokointaneta, jw.org. Mboka ya tseya Jehova notaye mu longele, inaya fa mboka ya fa haya simaneke Kalunga, ihe otayi idhimbike oonkondo dhe nohaya kala ya fa taya longele Kalunga, ihe eihumbato lyawo itali shi ulike. Pehala lyaashono, aantu mboka ya li aahahu ngashingeyi oya ‘zala omuntu omupe, ngoka a shitwa a fa Kalunga nohi iholola ye mwene mokukalamwenyo ku uka nokwa yapuka.’ (Ef. 4:23, 24) Sho aantu tayi ilongo kombinga yaKalunga, ohaya kala ye wete sha pumbiwa okwiiyutha komithikampango dhe. Ohayi inyengithwa ye ethe po shoka yi itaala, noya lundulule iikala yawo neihumbato lyawo. Ihashi kala oshipu okuninga omalunduluko ngoka, ihe otaga vulu okuningwa kekwatho lyombepo yaKalunga, ndjoka hayi kwathele mboka ya halelela okulonga ehalo lyaKalunga.

17. Ongiini tatu vulu okuyanda okunwethwa mo kwaamboka ye na omaukwatya omawinayi?

¹⁷ Eyooloko pokati kaantu mboka haya longele Kalunga naamboka ihaaye mu longele, otali ende tali imonikila. Tse mboka hatu longele Kalunga, natu kale twa kotoka kaatu nwethwe mo kiikala iiwinayi yayalwe. Otashi ka kala pandunge, ngele otwa landula omayele ngoka taga ti kutya natu yande aantu mboka ya popiwa muTimoteus omutiyali 3:2-5. Odhoshili kutya itatu vulu okuyanda thiluthilu mboka ye na omaukwatya omawinayi. Otashi vulika hatu longo nayo, hatu yi nayo kosikola nenge hatu zi pamwe nayo. Ihe otatu vulu okuyanda okudhiladhila ngaashi yo nokaatu holele iikala yawo. Shika otatu vulu oku shi ninga, mokukoleka uupambepo wetu okupitila mekonakonombiimbeli nokukala hatu endathana naamboka ya tokola okulongela Jehova.

18. Ongiini okupopya kwetu neihumbato lyetu tali vulu okukwathela yalwe pambepo?

¹⁸ Otu na wo okukambadhala okukwathela yalwe pambepo. Konga oompito wu uvithile yalwe, ngoye pula wo Jehova e ku kwathele wu popye iinima yi li mondjila pethimbo lyo opala. Natu tseyithile wo yalwe kutya tse Oonzapo dhaJehova. Kungawo, eihumbato lyetu otali ka simanekitha Kalunga, ihe hatse. Otwa longwa “tu ethe okudhina Kalunga nuuhalu wuuyuni, tse tu kale muuyuni mbuka meikwatonawa, muuyuuki nomokusimaneka Kalunga.” (Tit. 2:11-14) Ngele ohatu ihumbata momukalo ngoka gwa hokiwa kuKalunga, yalwe otaye ke tu dhimbulula mo. Yamwe otashi vulika nokuli ya tye: “Otwa hala okukala pamwe nane, oshoka tse otu uvu kutya Omuwa oku li nane.” — Sak. 8:23.