1, 2. Mo 2018, oshiningwanima shini tashi ka hanganitha aantu momukalo gwi ikalekelwa, nomolwashike? (Tala kethano lyopetameko.)

MO 31 Maalitsa 2018, sho etango tali ningine, aapiya yaKalunga nosho wo oyendji mboka ye na ohokwe, otaya ka kala pedhimbuluko lyUulalelo wOmuwa lyokomumvo. Odhoshili kutya aantu omamiliyona otaya gongala ya dhimbulukwe eso lyaKristus. Edhimbuluko olyo oshiningwanima shinyanyudha shoka hashi hanganitha aantu omumvo kehe, kongonga yevi.

² Natu dhiladhile owala nkene Jehova naJesus haya kala ya nyanyukwa, sho ya tala aantu omamiliyona taya gongala poshiningwanima shika shi ikalekelwa. Ombiimbeli oya hunganeka kutya ‘engathithi lyaantu ya nyengana okuyalula ya za momihoko adhihe, momaludhi agehe, miigwana ayihe nomomalaka agehe’ oyi igidha ya ti: “Ehupitho otali tu zile kuKalunga ketu ngoka a kuutumba koshipangelapundi, notali tu zile wo kOnzigona!” (Eh. 7:9, 10) Oshi li oshinima oshiwanawa, sho Jehova naJesus haya simanekwa momukalo nguka gwokudhimbulukwa Uulalelo wOmuwa.

3. Omapulo geni taga ka yamukulwa moshitopolwa shika?

 ³ Mpaka otapu landula omapulo gamwe ngoka ga holoka po, ngoka taga ka yamukulwa moshitopolwa shika. (1) Ongiini kehe gumwe gwomutse ta vulu okwiilongekidhila Edhimbuluko nokumona mo uuwanawa mokukala po? (2) Omomikalo dhini Edhimbuluko hali hanganitha aapiya yaKalunga? (3) Ongiini kehe gumwe gwomutse ta vulu okuhumitha komeho uukumwe? (4) Mbela otapu ka ningwa ngaa Edhimbuluko lyahugunina? Ngele osho, otali ka kala ko uunake?

4. Omolwashike sha simana kutse okukala pEdhimbuluko ngele onkalo otayi shi pitike?

⁴ Dhiladhila kunkene sha simana okukala pEdhimbuluko. Kala wu shi kutya okuya kokugongala oku li oshitopolwa shokulongela Kalunga. Odhoshili kutya Jehova naJesus oye wete mboka taya ningi oonkambadhala dhokukala po pokugongala huka kwa simanenena kwokomumvo. Onkee ano, otwa hala ya mone kutya otatu ka kala pEdhimbuluko, kakele owala ngele opu na oonkalo tadhi tu imbi. Uuna tatu ulike miilonga yetu kutya okuya kokugongala okwa simana kutse, otatu pe Jehova etompelo lya gwedhwa po lyoku tu kaleka “membo” lye, ano “membo lyaanamwenyo” moka mu na omadhina gaamboka taya ka mona omwenyo gwaaluhe. — Mal. 3:16; Eh. 20:15.

5. Momasiku ngoka taga tetekele Edhimbuluko, ongiini tatu vulu ‘okwiikonakona nokwiiyeleka, opo tu tale, ngele otu li tuu meitaalo’?

⁵ Momasiku ngoka taga tetekele Edhimbuluko, otatu vulu okukonga ethimbo lyokugalikana nokukonakona nuukeka kombinga yekwatathano lyetu naJehova. (Lesha 2 Aakorinto 13:5.) Ongiini tatu vulu oku shi ninga? Ongele tatu ‘ikonakona nokwiiyeleka, opo tu tale, ngele otu li tuu meitaalo.’ Opo tu ninge ngawo, oshiwanawa tu ipule tatu ti: ‘Mbela ondi itaala ngaa lela kutya ngame ogumwe gwomehangano ndyoka lya hokiwa kuJehova li gwanithe po ehalo lye? Mbela ohandi ningi ngaa ngaashi tandi vulu ndi uvithe nokulonga aantu onkundana ombwanawa yUukwaniilwa? Mbela iilonga yandje ohayi ulike ngaa shili kutya ondi itaala kutya otu li momasiku gahugunina nonokutya Satana oku li pokuhanagulwa po? Mbela ngashingeyi ondi na ngaa einekelo muJehova naJesus ngaashi ndyoka nda li ndi na sho ndi iyapulile Jehova Kalunga?’ (Mat. 24:14; 2 Tim. 3:1; Heb. 3:14) Okutedhatedha komayamukulo gomapulo ngoka, otashi ke tu kwathela tu mone kutya tse aantu twa tya ngiini.

6. (a) Oshike owala tashi vulu oku tu kwathela tu ka mone omwenyo gwaaluhe? (b) Omukuluntugongalo gumwe ohi ilongekidhile ngiini Edhimbuluko omumvo kehe, nongiini to vulu okuninga sha faathana?

⁶ Lesha nokutedhatedha kiitopolwa ya kankamena kOmanyolo, mbyoka tayi popi esimano lyEdhimbuluko. (Lesha Johannes 3:16; 17:3.) Opo omuntu a vule oku ka mona omwenyo gwaaluhe, okwa pumbwa ‘okutseya’ Jehova ‘nokwiitaala’ Omwana awike, Jesus. Opo wi ilongekidhile Edhimbuluko, omolwashike itoo hogolola iinima mbyoka to vulu okukonakona, yi ku kwathele wu hedhe popepi naJehova nosho wo naJesus? Natu taleni kwaashoka omumwatate gumwe ngoka a kala omukuluntugongalo ethimbo ele, a li a ningi. Uule womimvo, okwa kala ta gongele iitopolwa yOshungolangelo mbyoka tayi popi kombinga yEdhimbuluko nosho wo yohole ndjoka Jehova naJesus ye tu ulukila. Miiwike mbyoka ya tetekele edhimbuluko, okwa li ha leshulula iitopolwa mbyoka nokutedhatedha kunkene Edhimbuluko lya simana. Omathimbo gamwe, piitopolwa ye okwa li ha gwedha po shimwe nenge iyali mbyoka opo ya piti. Omukuluntugongalo nguka okwa li a mona kutya okuleshulula iitopolwa mbyoka nosho wo okulesha nokutedhatedha kelesho lyOmbiimbeli lyEdhimbuluko, ohashi mu kwathele i ilonge mo iinima iipe omumvo kehe. Shoka sha simanenena, oha kala u uvite ohole ye yokuhola Jehova naJesus tayi ende tayi koko omumvo kehe. Onkee ano, ngele owa ningi sha faathana, otashi vulu oku ku kwathela wu kokeke ohole yoye yokuhola Jehova naJesus. Oto ka  kala wo wa pandula noonkondo shoka ye ku ningila, naashoka otashi ke ku kwathela wu mone mo uuwanawa owundji mEdhimbuluko.

7. (a) Jesus okwa li a galikana kombinga yashike ongulohi yotango yUulalelo wOmuwa? (b) Oshike tashi ulike kutya Jehova okwa yamukula egalikano lyaJesus?

⁷ Ongulohi yotango yUulalelo wOmuwa, Jesus okwa li a galikana kutya aalongwa ye otaya ka kala ya hangana nonokutya otaya ka nyanyukilwa uukumwe mboka ye naHe ya lenga. (Lesha Johannes 17:20, 21.) Odhoshili kutya Jehova okwa li a yamukula egalikano lyOmwana omuholike, nongashingeyi aantu omamiliyona oyi itaala kutya Jehova oye a li a tumu Omwana. Kakele komakugongala galwe, Edhimbuluko olyo hali ulike kutya Oonzapo dhaJehova odha hangana. Aantu yomiigwana noyomomaludhi gi ili nogi ili muuyuni awuhe, ohaya gongala ya dhimbulukwe eso lyaJesus. Momahala gamwe, osha pumba okumona aantu yomihoko dha yoolokathana taya gongala pamwe, nayalwe ohaye shi tala ko itaashi shi shiwa. Ihe uukumwe wa tya ngawo, ohawu nyanyudha Jehova naJesus.

8. Etumwalaka lini Jehova a li a pe Hesekiel li na ko nasha nuukumwe?

⁸ Tu li aapiya yaJehova, ihatu kala twa kuminwa uukumwe mboka hatu nyanyukilwa. Jehova okwe shi popya nale kutya osho tashi ka kala ngawo. Dhiladhila ketumwalaka ndyoka a li a pe omuhunganeki Hesekiel shi na ko nasha nokutula kumwe iipilangi iyali, oshipilangi ‘shaJuda’ ‘noshaIsrael.’ (Lesha Hesekiel 37:15-17.) Oshitopolwa “Omapulo ga za kaaleshi” shi li mOshungolangelo yaJuli 2016, osha yelitha sha ti: “Jehova okwa pe Hesekiel etumwalaka lyetegameno, tu uvaneke kutya ota ka hanganitha oshigwana shaIsraeli konima ngele sha galukile kEvi lyEuvaneko. Etumwalaka ndyoka otali hunganeke wo ehanganitho lyoshigwana shaKalunga ndyoka lya tameke pomasiku gahugunina.”

9. Ohatu shi mono ngiini nkene ehunganeko lyaHesekiel tali gwanithwa omumvo kehe pEdhimbuluko?

⁹ Okuza mo 1919 okuuka komeho, oshinima shotango Jehova a ningi, okwa li a longekidha nokuhanganitha ishewe aagwayekwa, mboka pathaneko ya li ya fa oshipilangi ‘shaJuda.’ Sho mboka ye na etegameno lyoku ka kala kombanda yevi, ano mboka pathaneko ya fa oshipilangi ‘shaIsrael’ taya hangana naagwayekwa, kungawo oongundu ndhika mbali odha ninga “oshigunda shimwe.” (Joh. 10:16; Sak. 8:23) Jehova okwa li u uvaneke kutya iiti ote ke yi tula kumwe e tayi ningi shimwe miikaha ye. (Hes. 37:19) Ngashingeyi oongundu ndhika mbali otadhi longo dha hangana kohi yOmukwaniilwa Jesus Kristus, ngoka a popiwa mehunganeko lyaHesekiel e li ‘omuntu gwaKalunga David.’ (Hes. 37:24, 25) Omumvo kehe, sho aagwayekwa nosho wo ‘oonzi dhilwe’ taya gongala ya dhimbulukwe eso lyaKristus, ohashi ulike uukumwe woongundu ndhoka mbali ngaashi sha hunganekwa okupitila muHesekiel. Oshike tatu vulu okuninga paumwene, opo tu kaleke po uukumwe mboka noku wu humitha komeho?

10. Ongiini tatu vulu okuhumitha komeho uukumwe mokati koshigwana shaKalunga?

¹⁰ Omukalo gumwe moka tatu vulu okuhumitha komeho uukumwe mokati koshigwana shaKalunga, omokukala aaifupipiki. Sho Jesus a li kombanda yevi, okwa ladhipike aalongwa ye ya kale aaishonopeki. (Mat. 23:12) Ngele otwa kala aaifupipiki, itatu ke etha ombepo yuuyuni yokwiinenepeka yi tu nwethe mo. Niishewe, uukwatya weifupipiko otawu ke tu kwathela tu vulike kwaamboka taya kwatele komeho. Uukwatya mboka owa simana wo, molwaashono ohawu tu kwathele tu kale twa hangana megongalo. Komeho gaayihe, ngele otwa kala aaifupipiki, otatu ka hokiwa kuKalunga ngoka ha “tondo aainenepeki, ihe oha sile ohenda aaishonopeki.” — 1 Pet. 5:5.

11. Ongiini okudhiladhila keityo lyomandhindhiliko ngoka haga longithwa pEdhimbuluko, taku vulu oku tu kwathela tu humithe komeho uukumwe?

¹¹ Omukalo gumwe ishewe tatu vulu okuhumitha komeho uukumwe, omokudhiladhila keityo  lyomandhindhiliko ngoka haga longithwa pEdhimbuluko. Manga Edhimbuluko inaali thika, unene tuu ongulohi ndjoka tatu ka kala tu na Edhimbuluko, dhiladhila nkene oshikwiila inaashi tulwa efulika nomaviinu omatiligane ya simana. (1 Kor. 11:23-25) Oshikwiila otashi thaneke olutu lwaJesus kaalu na ondjo ndwoka lwa gandjwa lu li eyambo, omanga omaviinu taga thaneke ombinzi ye ndjoka ya tika. Ihe otwa pumbwa okutseya oshindji shi vulithe owala okukala tu shi eityo lyomandhindhiliko ngoka. Dhimbulukwa kutya ekuliloyambo lyaKristus olya kwatela mo ohole onene ndjoka Jehova u ulika, sho a gandja Omwana omolwetu nosho wo ndjoka Jesus u ulika, sho i gandja nehalo ewanawa opo e tu sile. Sho tatu dhiladhila kohole ndjoka ye tu ulukila, nashi tu inyengithe tu kale tu ya hole wo. Ohole ndjoka tse nooitaali ooyakwetu tu hole Jehova, oya fa ongodhi ye tu mangela kumwe notayi koleke uukumwe wetu.

12. Meyele lyaJesus lyomukwaniilwa ta yalula oongunga, Jesus okwa li e shi yelitha ngiini kutya Jehova okwa tegelela tu kale hatu dhimine po?

¹² Omukalo omutitatu tatu vulu okuhumitha komeho uukumwe, omokukala hatu dhimine po yalwe tashi zi komutima. Uuna tatu dhimine po mboka ye tu uvitha nayi, ohatu ulike kutya otwa pandula edhiminopo lyoondjo dhetu, ndyoka lya ningwa tashi wapa okupitila mekuliloyambo lyaKristus. Dhiladhila keyele lyaJesus ndyoka li li muMateus 18:23-34. Ipula ngeyi: ‘Shoka Jesus a popi oshi inyengitha ndje ngaa ndi shi tule miilonga? Mbela ohandi idhidhimikile ngaa ooitaali ooyakwetu noku yu uva ko? Mbela ondi ilongekidha ngaa okudhimina po mboka ya yona kungame?’ Odhoshili kutya omayono gamwe oga kwata miiti ge vule galwe, notashi vulika shi kale oshidhigu lela kaantu inaatu gwanenena okudhimina po yalwe. Onkee ano, eyele lyaJesus otali tu longo shoka Jehova a tegelela tu ninge. (Lesha Mateus 18:35.) Jesus okwe shi yelitha kutya Jehova ite ke tu dhimina po, ngele ihatu dhimine po ooitaali ooyakwetu, uuna pu na etompelo ewanawa lyoku shi ninga. Shoka oshinima tu na okudhiladhila muule kombinga yasho. Ohatu gamene nokukaleka po uukumwe wetu, uuna tatu dhimine po yalwe ngaashi Jesus e tu longa tu shi ninge.

13. Ongiini okuulika kutya tse aakondjeli yombili, taku vulu okuhumitha komeho uukumwe?

¹³ Uuna tatu dhimine po yalwe, otatu ulike kutya  tse aakondjeli yombili. Dhimbulukwa omayele gomuyapostoli Paulus, ngoka tage tu ladhipike tu ‘ninge ashihe shoka tatu vulu okukoleka uukumwe wetu womombepo ondjapuki, omolwombili ndjoka tayi tu mangele kumwe.’ (Ef. 4:3) Pethimbo lyoomwedhi dhEdhimbuluko, unene tuu ongulohi ndjoka tatu ka kala tu na Edhimbuluko, dhiladhila muule kunkene ho ungaunga nayalwe. Ipula to ti: ‘Mbela ohandi ulike ngaa kutya ihandi kwatele aantu onkone? Mbela aantu oye shi ndje ndi li gumwe gwomwaamboka haya humitha komeho ombili nuukumwe?’ Ngaka omapulo ga kwata miiti tatu vulu okutedhatedha kugo pethimbo ndika lyomumvo.

14. Ongiini tatu vulu okuulika kutya otatu ‘idhidhimikilathana mohole’?

¹⁴ Omukalo omutine tatu vulu okuhumitha komeho uukumwe, omokuulika ohole, tatu holele Jehova ngoka e li Kalunga kohole. (1 Joh. 4:8) Katu na nando okupopya ooitaali ooyakwetu tatu ti: “Ondi ya hole ngaa, ihe kandi ya hole lela!” Okupopya ngawo kaku li metsokumwe nomayele gaPaulus, ngoka taga ti kutya otu na ‘okwiidhidhimikilathana mohole.’ (Ef. 4:2, OB-1954) Ndhindhilika kutya Paulus ina tya owala otu na ‘okwiidhidhimikilathana,’ ihe okwa gwedha ko a ti kutya otu na oku shi ninga “mohole.” Onkee ano, opu na eyooloko. Momagongalo getu omu na aantu ya yoolokathana, mboka Jehova a nanena kuye. (Joh. 6:44) Okwa mona mo uuwanawa washa muyo, sho e ya nanene kuye. Ngele Jehova oku ya hole, ongiini nduno tatu vulu okutya inaya gwana okukala tu ya hole? Katu na nando okungungunina ohole ndjoka Jehova a tegelela tu ulike. — 1 Joh. 4:20, 21.

15. Otu shi shi ngiini kutya otapu ka ningwa Edhimbuluko lyahugunina?

¹⁵ Opu na esiku Edhimbuluko tali ka ningwa lwahugunina. Otu shi shi ngiini? Omuyapostoli Paulus montumwafo ye yotango kAakorinto, okwa nyolele Aakriste aagwayekwa kutya uuna taya dhimbulukwa eso lyaJesus omumvo kehe, otaya ‘hokolola eso lyOmuwa, sigo ote ya.’ (1 Kor. 11:26) Uutumbulilo “ote ya” pompito ndjino otawu popi oshinima sha faathana nuutumbulilo “te ya,” mboka Jesus a popi mehunganeko lye kombinga yehulilo. Shi na ko nasha nuudhigu uunene mboka wu li pokuya, Jesus okwa ti: “Endhindhiliko lyOmuna gwOmuntu otali ka holoka ihe kegulu. Nena aantu ayehe yokombanda yevi otaa ka lilagana, sho taa ka mona Omuna gwOmuntu te ya te ende kiikogo yokegulu e na oonkondo odhindji neadhimo. Enkuma enene otali ka hikwa, oye [Jesus] sho ta ka tuma ko aayengeli ye, ya ka gongele aahogololwa ye koombinga ne dhevi, okuza kombinga yimwe sigo okonkwawo.” (Mat. 24:29-31) ‘Okugongelwa kwaahogololwa,’ otaku ulike kethimbo sho Aakriste aagwayekwa ayehe mboka ye li natango kombanda yevi taya ka pewa ondjambi yawo megulu. Otashi ka ningwa konima yuudhigu uunene, ihe omanga iita yaArmagedon inaayi tameka. Konima yaashono, aagwayekwa ayehe 144 000 pamwe naJesus, otaya ka kondjitha aakwaniilwa yokombanda yevi noku ya sinda. (Eh. 17:12-14) Onkee ano, Edhimbuluko ndyoka tali ka ningwa manga okugongelwa kwaagwayekwa ya ye megulu inaaku tameka, olyo tali ka kala lyahugunina, oshoka Jesus ‘ote ke ya.’

16. Omolwashike wa tokola toko okukala pEdhimbuluko omumvo nguno?

¹⁶ Natu kambadhaleni tu ninge ngaashi tatu vulu tu kale pEdhimbuluko ndyoka tali ka ningwa mo 31 Maalitsa 2018, opo tu mone mo uuwanawa. Natu pule wo Jehova e tu kwathele tu tsikile okukala twa hangana. (Lesha Episalomi 133:1.) Dhimbulukwa kutya opu na esiku Edhimbuluko tali ka ningwa lwahugunina. Ngashingeyi, natu ningeni ngaashi tatu vulu tu kale pEdhimbuluko, nokukala twa lenga uukumwe wetu mboka hatu kala tu na pethimbo lyEdhimbuluko.