1. Oshike sha ningitha aantu ya kale ye vule iinamwenyo?

AANTU oya shitwa neiyuvo, oshinima shoka she ya ningitha ya kale ye na oondunge ye vule iinamwenyo. Shoka osha kala shoshili, okuza ngaa sho kombanda yevi kwa shitilwa aantu. Konima sho Adam naEva ya yono ompango yaJehova, oya li ya holama. Shika otashi tu ulukile kutya eiyuvo lyawo olya li tali ya nyenyetele.

2. Ongiini eiyuvo lyetu tali vulu okufaathanithwa nokompasa? (Tala kethano lyopetameko.)

² Aantu mboka ye na eiyuvo inaali dheulwa nawa, otaya vulu okufaathanithwa noskepa ndjoka yi na okompasa itaayi longo nawa. Okuya molweendo noskepa yi na okompasa itaayi longo nawa, okwa nika oshiponga. Ombepo nomakuthikuthi gefuta, otayi vulu okufala nuupu oskepa kehala lya puka. Onkee ano, ngele okompasa oyi li nawa, otayi vulu okukwathela nakuhinga oskepa kaa puke. Eiyuvo lyetu otali vulu okufaathanithwa nokompasa ndjoka yi li nawa. Eiyuvo olyo okanona kokomutima hoka hake tu kwathele tu yoolole shoka shi li mondjila naashoka sha puka, nohaka vulu oku tu wilika  tu ninge shoka shi li mondjila. Ihe opo eiyuvo lyetu li tu wilike nawa, oli na okudheulwa nawa.

3. Ngele eiyuvo inali dheulwa nawa, oshizemo otashi vulu okukala shini?

³ Ngele eiyuvo lyomuntu inali dheulwa nawa, itali vulu oku mu londodha kaa ninge shoka sha puka. (1 Tim. 4:1, 2) Otali vulu nokuli oku mu tompa kutya “uuwinayi owo uuwanawa.” (Jes. 5:20) Jesus okwa li a londodha aalanduli ye a ti: “Ethimbo otali ke ya, uuna kehe gumwe ngoka te mu dhipaga, ta ka dhiladhila kutya [mokuninga] ngaaka ota longele Kalunga.” (Joh. 16:2) Mboka ya li ya dhipaga omulongwa Stefanus, osho ya li taya dhiladhila ngaaka nosho wo yamwe. (Iil. 6:8, 12; 7:54-60) Iilyo oyindji yomalongelokalunga oya kala tayi longo omiyonena ngaashi okudhipaga yalwe, oshinima shoka shi li ompinge noompango dhaKalunga, ngoka tayi longele aniwa. (Eks. 20:13) Osha yela kutya eiyuvo lyawo kalya li tali ya wilike nawa.

4. Ongiini tatu vulu okushilipaleka kutya eiyuvo lyetu otali longo nawa?

⁴ Ongiini tatu vulu okushilipaleka kutya eiyuvo lyetu otali longo nawa? Oompango nomakotampango ngoka ge li mOohapu dhaKalunga oge na “oshilonga shokulonga oshili, okukumagidha, okupukulula nokuulukila omuntu ondjila yu uka.” (2 Tim. 3:16) Onkee ano, okukonakona Ombiimbeli nuukeka, okutedhatedha kuyo nokutula miilonga, otaku vulu okudheula eiyuvo lyetu li kale metsokumwe naashoka Kalunga a hala, noli vule oku tu wilika nawa. Natu ka taleni nkene oompango nomakotampango gaJehova taga vulu okudheula eiyuvo lyetu.

5, 6. Uuwanawa wuni hatu mono, uuna tatu landula oompango dhaKalunga?

⁵ Opo tu mone uuwanawa moompango dhaKalunga, otwa pumbwa okuninga oshindji kaashi shi owala oku dhi lesha noku dhi tseya. Otwa pumbwa okukala tu dhi hole noku dhi simaneka. Ombiimbeli otayi ti: “Tondeni uuwinayi, holeni uuyuuki.” (Amos 5:15) Ongiini tatu vulu oku shi ninga? Shoka sha simana, otwa pumbwa okwiilonga okutala ko iinima ngaashi Jehova he yi tala ko. Pashiholelwa, natu tye ando iho kotha nawa. Ye ndohotola te ku lombwele wu lye iikulya yontumba, wu ninge omadhewo nowu ninge omalunduluko galwe monkalamwenyo. Konima sho we shi ningi, owa mono kutya oshe ku kwathela. Oto ka kala wu uvite ngiini? Odhoshili kutya oto ka pandula ndohotola ngoka, sho e ku kwathele.

⁶ Momukalo gwa faathana, Omushiti okwe tu pa oompango ndhoka tadhi vulu oku tu gamena kiilanduliko mbyoka hayi zi mokuyona notu hwepopaleke onkalamwenyo yetu. Dhiladhila owala kuuwanawa mboka hatu mono, uuna tatu landula oompango dhOmbiimbeli. Otadhi tu lombwele tu yande okufundja, okukengelela, okuyaka, oluhondelo, elongithonkondo nuumpulile. (Lesha Omayeletumbulo 6:16-19; Eh. 21:8) Uuna tatu mono omayambeko ngoka haga zi mokulonga shoka Jehova a hokwa, ohatu mu pandula, nohole yetu yoku mu hola noyokuhola oompango dhe ohayi koko.

7. Okulesha nokutedhatedha komahokololo gaantu mboka ya popiwa mOmbiimbeli, otaku vulu oku tu kwathela tu ninge shike?

⁷ Inatu pumbwa okumona iihuna omolwiilanduliko yokupogola oompango dhaKalunga, opo tu ilonge omupetuko. Otatu vulu okwiilonga sha komapuko gayalwe ngoka ga nyolwa mOmbiimbeli. Omayeletumbulo 1:5 otayi ti: “Omayeletumbulo ngaka otaga gwedhele kontseyo yaanongo nokugandja ewiliko kaanandunge.” Eeno, ohatu mono omayele omawanawa okuza kuKalunga, uuna tatu lesha nokutedhatedha komahokololo gaantu mboka ya popiwa mOmbiimbeli. Pashiholelwa, dhiladhila kiihuna mbyoka omukwaniilwa David a li i iyetele, konima sho a taaguluka oshipango shaKalunga, e ta hondele naBatseba. (2 Sam. 12:7-14) Uuna tatu lesha nokutedhatedha  kehokololo ndika, otashi vulika tu ipule ngeyi: ‘Omukwaniilwa David okwa li ta vulu okuninga po shike, opo a yande uupyakadhi mboka i iyetele, sho a hondele naBatseba?’ Ando ongame nda li nda taalelwa keshongo ndyoka, andola onda ningi po shike? Mbela ando onda fadhuka po ngaashi Josef nenge ando ondi igandja ngaashi David? (Gen. 39:11-15) Okutedhatedha kiilanduliko iiwinayi mbyoka hayi zi mokuyona, otaku ke tu kwathela tu ‘tonde uuwinayi, nokuhola uuyuuki.’

8, 9. (a) Eiyuvo ohali tu kwathele tu ninge shike? (b) Ekwatathano lini li li pokati komakotampango gOmbiimbeli neiyuvo lyetu?

⁸ Otashi vulika shili tu ikaleke kokule nokulonga iinima mbyoka Kalunga e tonde. Ihe otu na shoka tu na okuninga po, ngele otwi iyadha moonkalo ndhoka Ombiimbeli inaayi popya kondandalunde. Moonkalo dha tya ngawo, ongiini tatu vulu okumona shoka Kalunga a hala naashoka a hokwa? Ngele eiyuvo lyetu olya dheulwa kOmbiimbeli, otali ke tu kwathela tu ninge etokolo li li mondjila.

⁹ Jehova oku tu hole, sho e tu pa omakotampango ge tu wilike tu longe metsokumwe neiyuvo lyetu ndyoka lya dheulwa kOmbiimbeli. Jehova ye mwene ota ti: “Ongame Omuwa Kalunga koye, ngoka tii ku [longo] shoka she ku opalela noku ku ulukila ondjila u na okweenda nayo.” (Jes. 48:17, 18) Ngele otwe etha omadhiladhilo getu nomitima dhetu dhi nwethwe mo komakotampango gOmbiimbeli, otatu ka vula okupukulula, okulombwela nokudheula eiyuvo lyetu. Shoka otashi ke tu kwathela tu ninge omatokolo gopandunge.

10. Omakotampango oshike, na Jesus okwa li e ga longitha nawa ngiini?

¹⁰ Omakotampango ogo oshili ya simana ndjoka hayi wilike omadhiladhilo getu noku tu kwathela tu ninge omatokolo gomondjila. Okutseya omakotampango gaKalunga okwa kwatela mo okuuva ko nkene Omugandjimpango ha dhiladhila nosho wo omatompelo ge goku tu pa oompango. Jesus okwa li a longo oshili ya simana muukalele we, opo a kwathele aalongwa ye ya mone kutya iikala noonkatu dhontumba odhi na iilanduliko. Pashiholelwa, okwa longo kutya ondjahi otayi vulu okufala melongithonkondo, omanga okahalu kiipala haka vulu okufala moluhondelo. (Mat. 5:21, 22, 27, 28) Opo tu kale tu na eiyuvo lya dheulwa nawa, otu na okweetha omakotampango gaKalunga ge tu wilike, shoka hashi mu simanekitha. — 1 Kor. 10:31.

11. Ongiini eiyuvo lyagulwe tali vulu okukala lya yooloka ko kulyamukwawo?

¹¹ Aakriste yaali mboka ye na eiyuvo lya dheulwa kOmbiimbeli, otashi vulika ya kale ye na omataloko ga yoolokathana miinima yontumba. Pashiholelwa, natu taleni kokunwa iikunwa yoalkoholi. Ombiimbeli inayi indika okunwa iikunwa mbyoka pandjele. Ihe oyi indika uunkolwe noku yi longitha sha pitilila. (Omayel. 20:1; 1 Tim. 3:8) Mbela shoka otashi ti kutya Omukriste ngoka he yi nu pandjele, ina pumbwa okudhiladhila kombinga yayalwe? Hasho nando. Nonando eiyuvo lye itali mu nyenyetele, oku na okukaleka momadhiladhilo omaiyuvo gayalwe.

12. Oohapu ndhoka dhi li mAaroma 14:21, otadhi tu kwathele ngiini tu simaneke eiyuvo lyayalwe?

¹² Paulus okwe shi ulike kutya otwa pumbwa okuyaalela omaiyuvo gayalwe. Okwa ti: “Oshinima shoka oshiwanawa okuninga, okukala ihoo li onyama noihoo nu omaviinu nenge okuninga kehe tuu shoka tashi pundukitha mukweni.” (Rom. 14:21) Mbela oto ke etha ngaa wu ninge sha shoka wu shi kutya otashi pundukitha omumwaho, ngoka e na eiyuvo lya yooloka ko kulyoye? Otu wete kutya ito ke shi ninga. Aamwatate naamwameme yamwe manga inaaya tseya oshili, oya li haya nu iikunwa yoalkoholi shimwe to nyengwa, ihe ngashingeyi oya tokola yi ikaleke kokule nayo. Osha yela kutya kapu na gumwe gwomutse ta ka hala okuninga shoka tashi fala  omumwahe mondjila ndjoka tayi mu etele oshiponga. (1 Kor. 6:9, 10) Onkee ano, uuna wa hiya omumwaho kegumbo lyoye, ino mu thiminika e yi nwe, ngele ina hala.

13. Timoteus okwe tu tulila oshiholelwa oshiwanawa shini, shokuhumitha komeho iinima yUukwaniilwa?

¹³ Pethimbo Timoteus a li omugundjuka nenge e na omimvo 20 nasha, okwa zimine a pitithwe etanda, nonando okwa li haku ehama. Okwe shi ningi, opo kaa pundukithe Aajuda mboka a li ta ka uvithila. Timoteus okwa li e na iikala ya fa yomuyapostoli Paulus. (Iil. 16:3; 1 Kor. 9:19-23) Ngaashi Timoteus, mbela nangoye owu na ngaa ehalo lyokuninga omaiyambo, omolwuuwanawa wayalwe?

14, 15. (a) Okukoka pambepo okwa kwatela mo shike? (b) Omomukalo guni okuulukila yalwe ohole kwa pambathana nuukuluntu wopaKriste?

¹⁴ Aakriste ayehe oye na okweetha “iilongwa yopetameko yomuukriste” e taya ‘lalakanene uukuluntu.’ (Heb. 6:1) Shika ihashi ya po owala ohaluka. Otwa pumbwa tu wu “lalakaneni” nenge tu tsikile okukoka pambepo. Okukoka pambepo okwa kwatela mo okugwedha ko kontseyo yetu nokoondunge. Nomolwaashono hatu ladhipikwa lwiikando tu leshe Ombiimbeli esiku kehe. (Eps. 1:1-3) Mbela owe shi ninga ngaa elalakano lyoye? Okulesha Ombiimbeli otaku vulu oku ku pa uunongo owundji wu na ko nasha noompango dhaJehova nomakotampango ge. Otaku ke ku kwathela wo wu uve ko Ombiimbeli muule.

¹⁵ Ompango yAakriste ndjoka ya simanenena oyo ompango yohole. Jesus okwa lombwele aalongwa ye a ti: “Ngele omu holathane, nena aantu ayehe otaa ka dhimbulula kutya one aalongwa yandje.” (Joh. 13:35) Jakob omumwayinagona gwaJesus, okwa ti kutya ohole oyi li ‘ompango yOshilongo shaKalunga.’ (Jak. 2:8) Paulus okwa ti: “Ohole oyo egwanitho lyompango ayihe.” (Rom. 13:10) Itashi tu kumitha sho ohole ya tsuwa omuthindo, shaashi Ombiimbeli otayi tu lombwele kutya “Kalunga oye ohole.” (1 Joh. 4:8) Ohole yaKalunga kayi shi owala oshinima shomokana. Johannes okwa nyola a ti: “Kalunga okwe tu hololele ohole ye, sho a tumu Omuvalwa gwe awike muuyuni, opo tu kale tu na omwenyo omolwe.” (1 Joh. 4:9) Eeno, ohole yaKalunga oye mu inyengitha a ninge sha. Ohatu ulike kutya otwa koka pambepo, uuna tu hole Jehova nOmwana, aamwatate naamwameme nosho wo aantu yalwe. — Mat. 22:37-39.

16. Sho tatu ende tatu koko pambepo, omolwashike omakotampango haga tameke okukala ga simanenena kutse?

 ¹⁶ Sho to ende to koko pambepo, omakotampango ohaga tameke okukala ga simanenena kungoye. Omolwashike mbela? Oompango otashi vulika dhi longe owala moonkalo dhokondandalunde, ihe omakotampango ohaga vulu okulonga poompito odhindji. Pashiholelwa, olundji aanona ihaya uvu ko kutya eendathano ewinayi olya nika oshiponga. Onkee aavali ohaya tula po oompango dhontumba, opo ye ya gamene. (1 Kor. 15:33) Sho aanona taya koko, ohaye ende taya ningi oondunge nohaya vulu okuninga omatokolo gi ikolelela komakotampango gOmbiimbeli. Shoka ohashi ya kwathele ya ninge omatokolo gopandunge, ngele tashi ya pokuhogolola ookuume. (Lesha 1 Aakorinto 13:11; 14:20.) Uuna tatu ningi omatokolo ga kankamena komakotampango gaKalunga, eiyuvo lyetu otali ke tu wilika nawa, oshoka otatu ka dhiladhila metsokumwe nehalo lye.

17. Omolwashike tatu vulu okutya otu na shoka tashi tu kwathele tu ninge omatokolo gopandunge?

¹⁷ Mbela otu na ngaa shoka tashi vulu oku tu kwathela tu ninge omatokolo ngoka taga nyanyudha Jehova? Eeno. Ngele otatu longitha nawa oompango nomakotampango gOmbiimbeli, otatu ka kala twa ‘gwana twa pwa nokwoopalela oshilonga kehe oshiwanawa.’ (2 Tim. 3:16, 17) Onkee ano, konga ewiliko momakotampango gOmbiimbeli, opo wu vule ‘okukonakona kutya Omuwa okwa hala, wu ninge shike.’ (Ef. 5:17) Longitha wo nawa iinima mbyoka twa pewa kehangano lyetu ngaashi: Watch Tower Publications Index, Embo lyokukonga uuyelele lyOonzapo dhaJehova, Watchtower Library, ONGULUMAMBO MOINTANETA nosho wo opoloholama JW Library. Iinima mbyoka oya longekidhwa yi tu kwathele tu mone mo uuwanwa mekonakonombiimbeli lyopaumwene nosho wo melongelokalunga lyuukwanegumbo.

18. Omayambeko geni tatu ka mona, ngele otwa katuka metsokumwe noompango nonomakotampango gaKalunga?

¹⁸ Ohatu yambekwa, uuna tatu vulika koompango nokomakotampango gaJehova. Episalomi 119:97-100 otali ti: “Ompango yoye ondi yi hole ngiini! Ohandi yi dhiladhila esiku alihe. Iipango yoye otayi ndungike ndje ndi vule aatondi yandje, oshoka ondi yi na aluhe. Ondi na euvoko ndi vule aanongeki yandje ayehe, oshoka ohandi dhiladhila omalongo goye. Ondi na omayele ndi vule aakuluntu kungame, oshoka ohandi vulika komautho goye.” Ngele ohatu “dhiladhila” koompango nokomakotampango gaKalunga, nena otatu ka gwedha ko kuunongo wetu, kontseyo yetu nokeuvoko lyetu. Ngele otwa ningi oonkambadhala dha mana mo, otatu ka “thika kegwano lyuukuluntu waKristus,” uuna tatu etha oompango nomakotampango gaKalunga ga dheule eiyuvo lyetu. — Ef. 4:13.