“MU UHALA PO! Onawa ngaa?”

Olundji nangoye osho ho popitha aantu ngaaka. Otashi vulika nokuli ho ya minike nenge ho ya papatele. Omikalondjigilile niitya mbyoka aantu haya longitha momahala gi ili nogi ili, otashi vulika yi kale ya yooloka. Ihe omikalo dhokupopithathana ndhoka aantu haya longitha kehe siku konyala odha faathana. Ngele omuntu iha popitha yalwe, otashi vulika a talike ko kee hole aantu nenge kee na omikalo.

Haantu ayehe ye hole okupopitha yalwe. Yamwe ohaya kala ya sa ohoni nenge yi isa uunye oku shi ninga. Yamwe ohaya mono oshidhigu okupopitha aantu yomihoko dhilwe, yomaputuko galwe naamboka ye na oondondo dhi ili. Ihe aantu olundji ohaya pandula nuuna we ya popitha owala paufupi.

Ipula to ti: ‘Uuwanawa wuni hawu zi mokupopitha yalwe? Ombiimbeli otayi longo ndje shike kombinga yokupopitha aantu?’

Kornelius, oye gwotango gwomwaamboka kaaye shi Aajuda a li a ningi oshilyo shegongalo lyopaKriste. Konima sho sha ningwa, omuyapostoli Petrus okwa ti: “Kalunga aantu ayehe ohe ya tala ye thike pamwe.” (Iil. 10:34) Lwanima, Petrus okwa nyola kutya Kalunga “okwa hala, aantu ayehe ye ethe uulunde wawo.” (2 Pet. 3:9) Otashi vulika natse tu ulukile omuntu ngoka opo ti ilongo oshili omanyolo ngoka. Petrus okwa li wo a kumagidha Aakriste a ti: “Simanekeni aantu ayehe, holeni ooitaali ooyakweni.” (1 Pet. 2:17) Onkene oshi li nawa lela okupopitha aantu nopwaahe na okutala komuhoko, kolwaala nokeputuko lyawo. Uuna to shi ningi, oto ulike kutya owe ya simaneka nowu ya hole.

Omuyapostoli Paulus okwa li a kumagidha aakwanegongalo a ti: “Taambathaneni ano, ngaashi Kristus e mu taamba.” (Rom. 15:7) Paulus okwa tumbula unene aamwahe mboka ya kala “ekwatho enene” kuye. Tu li aamwatate naamwameme, kunena otwa pumbwa lela etsomukumo, oshoka Satana ote tu ponokele e na ondjahi onene. — Kol. 4:11; Eh. 12:12, 17.

Iiholelwa mbyoka yi li mOmbiimbeli, otayi shi ulike kutya okupopitha ohaku eta uuwanawa owundji.

Sho ethimbo lyOmwana gwaKalunga lya thiki, opo omwenyo gwe gu lundululilwe moshivalelo shaMaria, Jehova okwa li a tumu omuyengeli kuye. Okwa tameke a ti: “Ombili nayi kale nangoye! Omuwa na kale pamwe nangoye!” Maria okwa “haluthwa” kepopitho ndyoka, noka li e shi kutya omolwashike omuyengeli ta popi naye. Opo ihe omuyengeli okwe mu shilipaleke a ti: “Maria, ino tila, owa silwa ohenda kuKalunga.” Okwe mu yelithile kutya oshi li ehalo lyaKalunga a ka vale Mesiasa. Pehala lyokukala a tila, Maria okwa vulika kelombwelo, e ta ti: “Ongame omuntu gwOmuwa. Nandi ningwe ngaashi wa ti.” — Luk. 1:26-38.

Osha li uuthembahenda komuyengeli a kale omutumwa gwaJehova, nokwa li u uvite etumba oku ka popya nomuntu gwonyama nombinzi. Omuyengeli okwa li a popitha Maria tango. Mbela otatu vulu ngaa okwiilonga mo sha moshiholelwa shoka? Otwa pumbwa okukala twi ilongekidha okupopitha yalwe noku ya tsa omukumo. Otatu vulu okukwathela yalwe ya kale ye na omukumo kutya oye li shili oshitopolwa shoshigwana shaKalunga, moku ya popitha owala paufupi.

Paulus okwa li e shi aantu oyendji momagongalo gomuAsia Eshona nomuEuropa. Moontumwafo dhe odhindji omu na omakundo ogendji gokondandalunde. Shika otu shi iwetele mAaroma ontopolwa 16. Okwa li a kundile po Aakriste ooyakwawo oyendji. Paulus okwa tumbula “omumwameme” Foibe. Okwa  ladhipike ooitaali ooyakwawo a ti kutya “mu taambeni medhina lyOmuwa, ne mu mu yakule moompumbwe dhe adhihe, ongaashi sho opalela aantu yaKalunga.” Paulus okwa li a kundile po Priska naAkula a ti: “Otandi ya pandula unene, hangame awike, ihe otaa pandulwa wo komagongalo agehe ngoka ga zi maapagani.” Okwa kundile po aantu mboka kaatu shi naanaa, ngaashi ‘kuume ke omuholike Epainetus’ nosho wo ‘Trifania naTrifosa, mboka ya li moshilonga shOmuwa.’ Odhoshili kutya Paulus okwa li ha kundile po aluhe aamwatate naamwameme. — Rom. 16:1-16.

Dhiladhila owala kenyanyu ndyoka aantu ya li ye na, sho ya mono kutya opu ngoka e na ko nasha nayo lela. Shono oshi na okukala sha li sha koleke ohole yawo yokuholathana noyokuhola Paulus. Aakriste yalwe oya li ya tsuwa omukumo, sho yu uvu omakundo ngoka gopahole noshe ya kwathele ya tsikile okukala aadhiginini. Eeno, okupopitha hoka haku ulike kutya omuntu oku na ko nasha nokwa pandula, ohaku koleke uukuume nokuhanganitha aapiya yaJehova aadhiginini.

Sho Paulus a thiki petulilosikepa lyaPuteoli, okwa zi po u uka kuRoma. Aakriste ooyakwawo oya zi kuumbugantu ye ya oku mu tsakaneka. Sho e ya monene kokule, Paulus “okwa hambelele Kalunga nokwa tsuwa omukumo.” (Iil. 28:13-15) Omathimbo gamwe oshi li nawa owala tu imemehe nokuganeka aantu. Shono otashi vulu okuladhipika gumwe, unene tuu ngoka a gwililwa po nenge a nika uupongo.

Omulongwa Jakob okwa li e na okupa Aakriste ooyakwawo omayele ga kwata miiti. Yamwe oya li ya nkundipala pambepo, omolwokupanga uukuume nuuyuni. (Jak. 4:4) Okwa tameke ontumwafo ye ta ti:

“Ontumwafo ndjika oya zi kuJakob, omumati gwaKalunga nogwOmuwa Jesus Kristus. Omakundo kaantu yaKalunga ayehe, mboka ya halakana nuuyuni auhe.” (Jak. 1:1) Sho aaleshi ye ya mono nkene e ya kundila po, osha li oshipu kuyo ya taambe ko omayele ge, oshoka oya mono kutya ayehe otaya longele Kalunga momukalo ngoka a hokwa. Eeno, okupopitha gumwe momukalo omwaanawa otaku vulu okuhingila moonkundathana tadhi ti sha.

Epopitho kutya nduno efupi, oli na okukala tali zi komutima noli li pahole. Shoka osho tu na okuninga kutya nduno omuntu ke shi wete. (Mat. 22:39) Oshikando shimwe, omumwameme gumwe moIrlanda okwa thiki pOshinyanga shUukwaniilwa pethimbo okugongala ku li pokutameka. Sho te endelele u uka mOshinyanga, omumwatate gumwe okwe mu tala ti imemeha, e ta ti: “Omutokelo. Otwa pandula oku ku mona.” Omumwameme ngoka okwa yi e ta kuutumba.

Konima yiiwike iishona, omumwameme ngoka okwe ya komumwatate, e te mu lombwele kutya okwa ningi esiku tu ungaunga nonkalo ondhigu megumbo. Omumwameme okwa ti: “Onda li nda yemata ongulohi ndjoka, nokonyala ndi faule okugongala. Itandi dhimbulukwa naanaa shoka sha popiwa po, ihe epopitho lyoye itandi li dhimbwa. Olya li lya ningitha ndje ndi kale ndi uvite nda taambiwa ko. Tangi.”

Omumwatate ka li e shi ngele epopitho lye efupi olya kwathela sha. Okwa ti: “Sho omumwameme a lombwele ndje kutya epopitho lyandje olya tya sha kuye, onda pandula sho nde shi ningi. Oshu uvitha ndje wo nawa.”

Omukwaniilwa Salomo okwa nyola a ti: “Umbila oshikwiila shoye kombanda yomeya, oshoka nge pwa piti omasiku ogendji, oto ke shi monununa.” (Omuuv. 11:1) Ngele ohatu popitha yalwe tashi zi komutima, unene tuu Aakriste ooyakwetu, otashi ke ya etela uuwanawa nosho wo tse yene. Onkee ano, natu kaleni twa simaneka okupopitha yalwe.