Owa leshele ngaa nale Ooshungolangelo opo dha piti? Tala ngele oto vulu okuyamukula omapulo taga landula:

Iinima ine yini tatu vulu okuninga, opo tu hwepopaleke okwiimba kwetu?

Otatu vulu okuthikama nawa mokuyelutha omaimbilo getu. Natu fudhe nawa. Otatu vulu okwiimba muule lela, uuna okana ketu taka makuka ka pwa ko. — w17.11, ep. 5.

Oshike shi na oku tu kumitha kombinga yomahala noondjila ndhoka dha li dhu uka kiilando yokwiigamena muIsraeli?

Opwa li iilando ihamano yokwiigamena mbyoka ya li ya hogololwa. Oondjila dhokuya kiilando mbyoka, odha li hadhi kalekwa monkalo ombwanawa. Osha li oshipu kwaangoka a dhipaga mukwawo kaashi shi owina a mone egameno nziya. — w17.11, ep. 14.

Omolwashike omagano gaKalunga gekulilo okupitila muJesus, ge li omagano dhingi ngoka twa pewa?

Otaga gwanitha po ehalo lyetu lyokukala nomwenyo notaga gwanitha po ompumbwe yetu yokukala twa manguluka mo muupika wuulunde neso. Tu li oluvalo lwaAdam, Kalunga okwe tu pe Jesus e tu sile manga twa li aalunde, molwaashoka oku tu hole. — wp17.6, ep. 6-7.

Ongiini Episalomi 118:22 lya li tali ulike keyumuko lyaJesus?

Jesus okwa li a tindwa e li Mesiasa e ta dhipagwa. Opo a vule okukala “emanya li na oshilonga li vule agehe,” okwa li e na okuyumudhwa. — w17.12, ep. 9-10.

Mbela mezimo moka mwa li tamu ka za Mesiasa olyi ikolelela kuuthemba wuusheeli?

Omulumentu ka li a pumbwa okukala osheeli, opo ando a kale hekulululwa yaMesiasa. Pashiholelwa, David ka li osheeli shaIsai, ihe Mesiasa okwa ka za mezimo lyaDavid. — w17.12, ep. 14-15.

Omakotampango gamwe geni ge na ko nasha nuunamiti taga adhika mOmbiimbeli?

Kohi yompango yaMoses, mboka ya li ye na omikithi dhontumba oya li hayi ikalekelwa. Aantu oya li hayi iyogo koonyala konima yokuguma omudhimba. Ompango oya ti kutya oonyata odhi na okukalekwa kokule naantu. Aanona yaamati oya li haya kenkwa sho ye na omasiku gahetatu, oshoka ombinzi yawo ohayi vulu owala okuhekela nawa konima yoshiwike. — wp18.1, ep. 7.

Omolwashike tashi opalele Omukriste a kale i ihole pandjele?

Otu na okukala tu hole yalwe ngaashi tu ihole tse yene. (Mark. 12:31) Aasamane oye na “okuhola [aakulukadhi] yawo, naanaa ngashika ye hole omalutu gawo yene.” (Ef. 5:28) Odhoshili kutya ohole yokwiihola mwene otayi vulu okuholoka nayi. — w18.01, ep. 23.

Oonkatu dhini to vulu okukatuka, opo wu hume komeho pambepo?

Otwa pumbwa okukonakona Oohapu dhaKalunga nokutedhatedha kudho e tatu tula miilonga shoka twi ilonga. Natu ethe wo ombepo ondjapuki yi nwethe mo omadhiladhilo getu nomitima dhetu nokutaamba ko wo ekwatho lyayalwe. — w18.02, ep. 26.

Omolwashike uuyanekelinyothi nokwaanekela onakuyiwa kaayi shi iinima yoku tu kwathela tu tseye onakuyiwa?

Opu na omatompelo ogendji, ihe ndyoka enene olyo kutya Ombiimbeli oyi indika iinima mbyoka. — wp18.2, ep. 4-5.

Otu na okutala ko ngiini okuzimina ehiyo lyoku ka lya kegumbo lyagumwe?

Ngele otwa zimine ehiyo lyontumba, otu na okudhiginina oohapu dhetu. (Eps. 15:4) Inatu kala inaatu ya ko, omolwiinima yanathangwa. Ngoka e tu hiya otashi vulika a kale e tu longekidhila sha shokulya. — w18.03, ep. 18.

Aamwatate mboka ya langekwa po, otaya vulu okwiilonga shike koshiholelwa shaTimoteus?

Timoteus okwa li e na ko nasha lela naantu nokwa pititha komeho iilonga yokuuvitha. Okwa li ha longo nuudhiginini miilonga iiyapuki noha tula miilonga shoka ti ilongo. Okwa tsikile okukala ti idheula nokwa li i inekela mombepo yaJehova. Kutya nduno aakuluntugongalo nenge oyalwe, ayehe otaya vulu okulandula oshiholelwa she. — w18.04, ep. 13-14.