1. Omolwetompelo lini li ikalekelwa tatu vulu okukala twa nyanyukwa?

Ohashi nyanyudha okuuva omwaalu gwaapiya yaJehova tagu indjipala. Omumvo gwa zi ko, Oonzapo odha konakona Ombiimbeli naantu ye vulithe po 10 000 000. Shika otashi ulike kutya oshigwana shaJehova otashi etha uuyelele washo wu yele. Dhiladhila wo kaantu omamiliyona mboka ya li ye ya kEdhimbuluko. Oya li ya vulu okwiilonga kombinga yohole yaKalunga ndjoka e tu ulukila okupitila mekuliloyambo. — 1 Joh. 4:9.

2, 3. (a) Endangalati lini ihaali tu imbi nando tu kale “ngashika oonyothi tadhi adhima pombanda kegulu”? (b) Okutala koohapu dhaJesus ndhoka dhi li muMateus 5:14-16, otatu ka kundathana shike?

² Oonzapo dhaJehova muuyuni ohadhi popi omalaka ga yoolokathana. Nonando ongawo, shika ihashi tu imbi tu tange Tate yetu, Jehova, twa hangana. (Eh. 7:9) Kutya nduno ohatu popi elaka lini nenge ohatu zi moshilongo shini, otatu vulu okukala “ngashika oonyothi tadhi adhima pombanda kegulu.” — Fil. 2:15.

³ Ohatu simanekitha Jehova, uuna omwaalu gwetu tagu indjipala, tu na uukumwe nuuna twa tonata. Moshitopolwa shika, otatu ka  kundathana nkene tatu vulu oku shi ninga. — Lesha Mateus 5:14-16.

4, 5. (a) Kakele kokuuvitha, ongiini ishewe tatu vulu okweetha uuyelele wetu wu yele? (b) Uuwanawa wuni hawu zi meihumbato lyetu ewanawa? (Tala kethano lyopetameko.)

⁴ Moshifo shOshungolangelo yOshiingilisa ye 1 Juni 1925, omwa li mu na oshitopolwa shi na oshipalanyolo: “Light in the Darkness” (Uuyelele momilema). Osha ti: “Kapu na ngoka ta ka kala omudhiginini nomunashili kOmuwa momasiku ngaka ga hupa ko . . . ngele ite etha ye mwene uuyelele we wu yele.” Oshitopolwa osha yelitha ishewe tashi ti: “Oku na oku shi ninga okupitila mokulombwela aantu kombanda yevi onkundana ombwanawa, nomokwiikaleka mondjila yuuyelele.” Osha yela kutya omukalo gumwe gwokweetha uuyelele wetu wu yele, okuuvitha onkundana ombwanawa nokuninga aantu aalongwa. (Mat. 28:19, 20) Shimwe ishewe, otatu vulu okusimanekitha Jehova okupitila meihumbato lyetu tu li Aakriste. Aantu momagumbo nosho wo mboka taya piti putse, ohaya tala komikalo dhetu. Uuna tatu imemeha nokupopitha yalwe nohamu, ohashi gandja ethano kutya tse aantu ya tya ngiini nohatu longele Kalunga keni.

⁵ Jesus okwa li a lombwele aalongwa ye a ti: “Ngele tamu yi megumbo, kundii mo.” (Mat. 10:12) Aantu moshitopolwa moka Jesus naayapostoli ye ya li haya uvithile olundji, oya li haya taamba aayenda nombili momagumbo gawo. Momahala ogendji kunena, hasho shi li ngawo. Aantu oyendji ohaya kala ya tila nenge ya limbililwa, uuna ye tu mono pomagumbo gawo. Ihe ngele otwa popi nayo momukalo gwombili, ohashi ya kwathele ya ze momalimbililo. Olundji etameko ewanawa olyo okwiimemeha. Aamwatate naamwameme mboka haya longo nuutemba wiileshomwa, otaya vulu okukoleka uushili mboka. Uuna tatu uvitha nuutemba, ohatu shi mono kutya aantu olundji ohaya kala ye tu mangulukila, ngele tatu imemeha notatu ya popitha nombili. Shoka ohashi vulika shi yi inyengithe ye ye pokatemba nokukutha iileshomwa yetu. Eihumbato lyetu ewanawa otali vulu wo oku tu kwathela tu tameke oonkundathana nayo.

6. Aaihokani yamwe aakokele oya ningi po shike ya tamunune mo uukalele wawo?

⁶ Aaihokani yamwe aakokele moIngilanda ihaya kutha naanaa ombinga miilonga yegumbo negumbo, molwaashoka ihaya pu pombanza. Oya tokola okweetha uuyelele wawo wu yele mokuuvithila pondje yolugumbo lwegumbo lyawo. Ohaya tula iileshomwa yopaMbiimbeli poshitaafula, pethimbo aavali tayi ile oyana posikola ndjoka yi li popepi negumbo lyawo. Aantu oyendji ohaya kutha po omambo Questions Young People Ask — Answers That Work, Embo lyo-1 neti-2 nosho wo uumbo wulwe. Omumwameme gumwe omukokolindjila megongalo lyawo, olundji oha longo nayo poshitaafula shawo. Omolwomikalo dhe omiwanawa nosho wo dhaaihokani mboka, oshi inyengitha omuvali gumwe a zimine ekonakonombiimbeli.

7. Oshike to vulu okuninga po, wu kwathele oontauki moshitopolwa sheni?

⁷ Omimvo opo dha zi ko, miilongo oyindji omwa taukila oontauki odhindji. Oshike to ka ninga po wu dhi kwathele dhi tseye Jehova nosho wo elalakano lye? Opo wu shi ende nawa, tango ilonga oku dhi popitha melaka lyadho. Opolohalama JW Language otayi vulu oku ku kwathela wu shi ninge. Shimwe ishewe, oto vulu okwiilonga omautumbulilo gontumba ngoka taga hokitha melaka lyadho. Okuza mpono, oto vulu oku dhi ulukila epandja lyetu lyokointaneta, jw.org, noku dhi ulukila uuvidio niileshomwa mbyoka yi li ko melaka lyadho. — Deut. 10:19.

8, 9. (a) Omaetopo geni taga longo hatu pewa pokugongala, Onkalamwenyo yopaKriste niilonga yokuuvitha? (b) Aavali otaya vulu ngiini okukwathela oyana ya kuthe ombinga pokugongala?

⁸ Omolwohole ye, Jehova okwe tu longekidhila  okugongala: Onkalamwenyo yopaKriste niilonga yokuuvitha, opo tu kale twa pyokoka miilonga yokuuvitha. Omayele taga longo ngoka hatu pewa pokugongala hoka, ohage tu kwathele tu kale tu na omukumo gwokuninga omaishunoko nosho wo omakonakonombiimbeli.

⁹ Mboka aape moshitopolwa, ohaya kala ya kumwa okumona aanona taya kutha ombinga mokugongala kwetu kehe. Aavali kwatheleni oyana yeni, ye ethe uuyelele wawo wu yele, moku ya longa ya kale haya yamukula niitya yawo yene. Omayamukulo gawo omafupi notaga zi komutima, omathimbo gamwe ohagi inyengitha aantu aape mboka ye na ohokwe ya ndhindhilike mo oshili. — 1 Kor. 14:25.

10. Elongelokalunga lyUukwanegumbo ohali dhana onkandangala yini mokuhumitha komeho uukumwe megumbo?

¹⁰ Omukalo gulwe gwokweetha uuyelele wetu wu yele, okuhumitha komeho uukumwe megumbo nomegongalo. Omukalo gumwe aavali taya vulu oku shi ninga, omokuninga Elongelokalunga lyUukwanegumbo pandjigilile. Omathimbo gamwe, oyendji ohaya tala opolohalama yotiivii JW ndjoka hayi piti omwedhi kehe. Uuna mwe yi tala, ongiini ngele omwa kundathana nkene tamu vulu okutula miilonga iitsa mbyoka yi li mo? Uuna aavali taya kwatele komeho Elongelokalunga lyUukwanegumbo, oye na okutseya kutya aanona yomimvo omulongo nasha, otashi vulika ya kale ya pumbwa okupewa eputudho lya yooloka ko kulyaamboka aashona. Onkee ano, ningeni ngaashi tamu vulu, opo kehe gumwe megumbo a mone mo uuwanawa mElongelokalunga lyUukwanegumbo. — Eps. 148:12, 13.

11-13. Atuheni otatu vulu ngiini okuhumitha komeho uukumwe megongalo nokukwathela yalwe ye ethe uuyelele wawo wu yele?

¹¹ Aanona otaya vulu ngiini okuhumitha komeho uukumwe megongalo nokuladhipika yalwe ye ethe uuyelele wawo wu yele? Ngele owu li okanona, oto vulu okupanga uukuume naakokele megongalo. Oto vulu oku ya pula nesimaneko ye ku lombwele kombinga yiimoniwa yawo, sho ya kala taya longele Jehova. Otashi ke ku tunga noonkondo. Shimwe natango, amuhe otashi ke mu inyengitha, opo uuyelele weni woshili wu yele shi vulithe nale. Atuheni otatu vulu okukala hatu hambelele ayehe mboka haye ya okugongala pamwe natse pOshinyanga shUukwaniilwa. Oku shi ninga, otashi ka humitha komeho uukumwe. Otashi ki inyengitha wo mboka opo taye ya kokugongala ya kale ya hala uuyelele wawo wu yele. Kala ho ya popitha to imemeha noku ya kwathela  ya mone mpoka taya kuutumba. Ya kwathela ya tseye yalwe megongalo, opo ya kale ya manguluka.

¹² Ngele oto kwatele komeho elongekidho lyiilonga yomomapya, oto vulu okuninga oshindji wu kwathele aakokele ya kuthe ombinga muyo. Mbela opu na oshitopolwa shoka tashi ya opalele? Omathimbo gamwe, oto vulu oku ya topola ya ka longe nomugundjuka ngoka ta vulu oku ya kwathela. Mboka kaaye na uukolele naamboka oonkalo dhawo tadhi ya imbi ya ninge oshindji, ya ulukileni wo kutya omu na ko nasha nayo. Okunakonasha kweni nosho wo oondunge dheni dhokuyoolola otayi vulu okukwathela aanona naakokele, mboka ya kala moshili ethimbo ele naamboka aape, yu uvithe onkundana ombwanawa nuulaadhi. — Lev. 19:32.

¹³ Omupisalomi okwa li i inyengithwa a tye: “Osho opala sho opalelela aantu ayehe ngele taa kala ye [holathane] ngaashi aamwayinathana.” (Lesha Episalomi 133:1, 2.) Uuna Aaisraeli ya gongala pamwe, oya li haya tungathana lela nooyakwawo mokulongela Jehova. Osha li hashi kala sha fa okugwayekwa omagadhi ngoka omawanawa notaga vululukitha. Omolwashike itoo kambadhala okuhumitha komeho uukumwe mokati kaamwatate naamwameme? Ngele osho ho ningi, otatu ku pupula kombunda. Mbela ito vulu okweegulula ‘omutima gwoye,’ sha hala okutya, oku shi ninga shi vulithe shito nosho wo pandjigilile? — 2 Kor. 6:11-13.

14. Oshike to vulu okuninga, opo uuyelele woye wu yelele aashiinda?

¹⁴ Ongiini to vulu okuninga oonkambadhala dha mana mo wu ethe uuyelele woshili yOmbiimbeli wu yelele aashiinda? Oohapu dhombili niilonga yoye iiwanawa otayi vulu okunanena omushiinda moshili. Ipula to ti: ‘Aashiinda yandje oya tala ndje ko ngiini? Ohandi opaleke ngaa egumbo lyandje meni nokombanda, shono tashi gandja ethano ewanawa kuyo? Mbela ohandi kambadhala ngaa okukwathela yalwe?’ Uuna to kundathana nOonzapo dhilwe, dhi pula nkene olukeno neihumbato ewanawa lyadho lya nwetha mo aakwanezimo, aashiinda, aaniilonga pamwe nadho nosho wo aanasikola ooyakwawo. Odhoshili kutya oto ka uva iimoniwa iiwanawa. — Ef. 5:9.

15. Omolwashike sha simanenena tu kale twa tonata?

¹⁵ Ngele otwa hala uuyelele wetu wu yele shi vulithe nale, otu na okukala twa kotokela ethimbo ndika tu li mulyo. Jesus okwa li a lombwele aalongwa ye lwiikando a ti: “Tonateni.” (Mat. 24:42; 25:13; 26:41) Odhoshili kutya ngele otwa kala twi itaala kutya “uudhigu uunene” owu li natango kokule, itatu ka kala twi ipyakidhila niilonga yokuuvitha. (Mat. 24:21) Pehala uuyelele wetu wu kale tawu yela, otawu ka enda tawu dhimi, sigo wa dhiminine nokuli.

16, 17. Oshike to vulu okuninga po wu kale wa tonata?

¹⁶ Sho omasiku ngaka gahugunina taga ende taga pindjala, atuheni otwa pumbwa okukala twa tonata. Jehova ota ka katuka onkatu pethimbo lyo opala. Otu na uushili kutya ote ke shi ninga. (Mat. 24:42-44) Omanga twa tegeleleni, natu kaleni twa tonata shi vulithe nale notu na eidhidhimiko. Natu kaleni wo hatu lesha Oohapu dhaKalunga esiku kehe nokutsikila okugalikana. (1 Pet. 4:7) Landula iiholelwa iiwanawa yaamwatate naamwameme mboka ya kala ya tonata monkalamwenyo yawo nokweetha uuyelele wawo wu yele. Oshiholelwa shimwe oshiwanawa, oshi li mOshungolangelo yokukonakonwa yaApilili 2012, pepandja 18-21, kohi yoshipalanyolo: “Onda kala nda kwata konguwo yOmujuda uule woomvula 70.”

¹⁷ Kala wi ipyakidhila nokulongela Jehova nokweendathana nookuume aawanawa. Otashi ke ku etela enyanyu noto ka mona ethimbo tali matuka. (Ef. 5:16) Omimvo 100 nasha dha ka pita, aamwatate oya kala yi ipyakidhila lela noya pondola oshindji. Ihe natse otatu shi dhenge komutse kunena, oshoka otatu wilikwa kuJehova.  Uuyelele wetu otawu yela inaashi monika nale.

18, 19. Ongiini aakuluntugongalo taya vulu oku tu kwathela tu longele Jehova nuulaadhi? Gandja oshiholelwa.

¹⁸ Otashi koleke eitaalo lyetu okutseya kutya okwaagwanenena, itaku tu imbi nando tu longele Jehova. Otwa pumbwa oku mu pandula, sho e tu pa “omagano” ngoka ge li aakuluntugongalo. (Lesha Aaefeso 4:8, 11, 12.) Uuna omukuluntugongalo te ku talele po, pulakena nawa komadhiladhilo ge nokomayele ngoka te ku pe.

¹⁹ Pashiholelwa, aakuluntugongalo yaali moIngilanda oya li ya tondoka onkugo yaaihokani mboka ya li kaaya uvitathane. Omukulukadhi okwa li e wete omulume itee shi enditha nawa mokukwatela komeho miinima yopambepo. Omusamane okwa li e shi zimine kutya ke shi lela omulongi omwaanawa, ye iha ningi omalongekidho ya ninge Elongelokalunga lyUukwanegumbo pandjigilile. Aakuluntugongalo oye ya kwathele ya landule oshiholelwa shaJesus. Okwa li ha sile oshimpwiyu aalongwa ye nokwa li e na ko nasha noompumbwe dhawo. Aakuluntugongalo oya ladhipike omusamane a holele Jesus, omanga omukulukadhi ye mu ladhipike a kale omwiidhidhimiki. Oye ya pe wo omayele omawanawa nkene taya vulu okulongela kumwe, opo ya kale haya ningi Elongelokalunga lyUukwanegumbo pamwe noyana yaali. (Ef. 5:21-29) Konima yethimbo, aakuluntugongalo oya li ya pandula omusamane, omolwoonkambadhala dhe. Oye mu kumike kaa shune omutse miipeta nosho wo a pule ekwatho lyombepo ondjapuki, opo a kwatele komeho nawa egumbo lye pambepo. Ohole ndjoka aakuluntugongalo yu ulike nosho wo ekwatho ndyoka ya gandja, oya ningitha uuyelele waaihokani mboka wu yele.

20. Oshike to ka mona, ngele owe etha uuyelele woye wu yele?

²⁰ Omupisalomi okwi imbi a ti: “Aanelago oomboka haa simaneke Omuwa nohaa vulika kiipango ye.” (Eps. 128:1) Oto ka kala wa nyanyukwa, ngele owe etha uuyelele woye wu yele. Ngiini mbela? Omokuuvithila yalwe ya vule okulongela Kalunga, omokuhumitha komeho uukumwe nomokukala wa tonata. Aantu otaya ka mona iilonga yoye iiwanawa, notashi ki inyengitha oyendji yomuyo ya hambelele Tate yetu. — Mat. 5:16.