1. Aavali Aakriste ohaya kala ya hala okushilipaleka shike, manga oyana inaaya ninginithwa?

OMUMWAMEME Blossom Brandt okwa popi kombinga yankene a ningi etokolo lyokuninginithwa a ti: “Uule woomwedhi dhontumba, onda kala tandi lombwele Tate naMeme kutya onda hala okuninginithwa, noya kala taya popi nangame olundji kombinga yaashono. Oya li ya hala ya shilipaleke ngele ondi shi ngaa kutya etokolo lyandje olya kwata miiti shi thike peni. Onda ninginithwa mo 31 Desemba 1934, nesiku ndyoka olya li endhindhilikwedhi monkalamwenyo yandje.” Aavali Aakriste kunena ohaya ningi sha faathana, mokukwathela oyana ya ninge omatokolo gopandunge. Oku ya lombwela ya tegelele ya ka ninginithwe nale nopwaa na oku ya pa etompelo ewanawa, otashi vulika shi tule uupambepo wawo moshiponga. (Jak. 4:17) Onkee ano, aavali aanandunge ohaya shilipaleke kutya manga oyana inaaya ninginithwa, oyi ilongekidha okutaamba ko oshinakugwanithwa shokukala aalongwa yaKristus.

2. (a) Aatonatelishikandjo yamwe oya ndhindhilika shike? (b) Oshike tatu ka kundathana moshitopolwa shika?

 ² Aatonatelishikandjo yamwe oya ndhindhilika kutya aagundjuka oyendji ye na omimvo omulongo nasha nosho wo omimvo 20 nasha mboka ya kokela moshili, inaya ninginithwa natango. Poompito odhindji, aagundjuka mbaka ohaya yi kokugongala nohaya kutha wo ombinga muukalele. Ohaya kala yi itala ko nokuli ye li Oonzapo dhaJehova. Ihe omolwomatompelo gontumba, ohaya kakadhala okwiiyapulila Jehova nokuninginithwa. Mbela omatompelo ngono ogeni? Poompito dhimwe, ohaya ladhipikwa kaavali yawo ya tegelele manga. Moshitopolwa shika, otatu ka kundathana iinima ine, mbyoka hayi imbi aavali Aakriste kaaya kwathele oyana ya hume komeho sigo ya ninginithwa.

3. Aavali yaBlossom oya li tayi ipula nashike?

³ Aavali yaBlossom mboka ya tumbulwa mokatendo kotango, oya li tayi ipula ngele okamwanakadhona kawo oka thika ngaa mepipi lyokuuva ko eityo lyeninginitho nankene lya kwata miiti. Ongiini aavali taya vulu okutseya ngele okanona kawo oka gwana okwiiyapulila Jehova?

4. Elombwelo lyaJesus ndyoka tali adhika muMateus 28:19, 20, otali vulu ngiini okukwathela aavali, sho taya longo oyana?

⁴ Lesha Mateus 28:19, 20. Ngaashi sha kundathanwa moshitopolwa sha tetekele, Ombiimbeli inayi popya kondandalunde kutya omuntu oku na okuninginithwa e na omimvo ngapi. Nonando ongawo, aavali otaya vulu oku shi enditha nawa, ngele oya dhiladhila keityo lyokuninga omulongwa. Oshitya shOshigreka shoka sha tolokwa ‘ka ningeni aantu aalongwa’ muMateus 28:19, oshu ulika kutya otu na okulonga aantu nelalakano lyoku ya ninga aalongwa. Omulongwa, omuntu ngoka hi ilongo omalongo gaJesus noku gu uva ko, noha tokola okuvulika kugo. Onkee ano, elalakano lyaavali Aakriste oli na okukala okulonga oyana okuza kuuhanona, nelalakano lyoku ya kwathela ya ninge aalongwa yaKristus ya ninginithwa. Odhoshili kutya okahanona inaka gwana okuninginithwa. Nonando ongawo, Ombiimbeli oyu ulika kutya naanona aagundjuka otaya vulu okuuva ko oshili yOmbiimbeli nokukala ye yi hole.

5, 6. (a) Shoka Ombiimbeli ya popya kombinga yaTimoteus, otashi tu kwathele tu thike pehulithodhiladhilo lini kombinga yeninginitho lye? (b) Aavali mboka ye na ko nasha noyana, otaya vulu okuninga po shike ye ya kwathele ya pondole?

⁵ Omulongwa Timoteus okwa li a ningi oshili ye mwene mepipi lyuugundjuka. Omuyapostoli Paulus okwa popi kutya Timoteus okwa li i ilonga oshili yOmbiimbeli okuza kuunona. Nonando Timoteus okwa putukila muukwanegumbo wa topoka palongelokalunga, yina Omujuda nayinakulu oya li ye mu kwathele a kale e hole Omanyolo, ngaashi Aajuda ya li ye ga uvite ko. Oshizemo? Timoteus okwa kala e na eitaalo lya kola. (2 Tim. 1:5; 3:14, 15) Pethimbo e na omimvo 20 nasha, okwa li Omukriste ngoka ta vulu okupewa iinakugwanithwa yi ikalekelwa megongalo. — Iil. 16:1-3.

⁶ Uushili owo kutya aanona inaya faathana, na ihaya koko pambepo pethimbo limwe. Aanona yamwe ohaya koko moondunge nohaya ningi omatokolo gopandunge mepipi lyuugundjuka, nohaya kala ya hala okuninginithwa. Yalwe otashi vulika ya kale inaayi ilongekidha okuninginithwa sigo ya ningi aakuluntu kashona. Nonando ongawo, aavali mboka ye na ko nasha noyana ihaye ya thiminike ya ninginithwe. Pehala lyaashono, ohaye ya kwathele ya ninge oonkambadhala kuyo yene, ya hume komeho pambepo. Aavali ohaya kala ya nyanyukwa, uuna oyana taya katuka pandunge. (Lesha Omayeletumbulo 27:11.) Ihe aavali oye na okukala ye shi kutya elalakano lyawo okukwathela oyana ya ninge aalongwa Aakriste. Onkee ano, onawa aavali yi ipule ngeyi: ‘Mbela omumwandje oku na ngaa  ontseyo ya gwana i iyapulile Jehova noku ninginithwe?’

7. Mbela omuntu ngoka a hala okuninginithwa, okwa pumbwa okukala e na ontseyo oyindjiyindji yOmbiimbeli? Shi yelitha.

⁷ Molwaashoka aavali oyo ye na oshinakugwanithwa shokulonga oyana, ohaya kala ya hala oyana ya mone ontseyo ya gwana, ndjoka tayi ya kwathele yi iyapulile Jehova. Inatu tegelela ya kale ye shi kehe shimwe, opo yi iyapulile Kalunga noya ninginithwe. Aalongwa ayehe oye na okutsikila okwiilonga ontseyo yashili, nokonima ngele ya ninginithwa. (Lesha Aakolossa 1:9, 10.) Omuntu okwa pumbwa ontseyo yi thike peni yopetameko?

8, 9. Oshike tatu vulu okwiilonga kehokololo lyaPaulus nomulangeli gwondholongo?

⁸ Aavali otaya vulu okwiilonga sha kuukwanegumbo wumwe, mboka wa li ko omimvo 2 000 nasha dha ka pita. (Iil. 16:25-33) Mo 50 E.N., manga Paulus a li molweendo lwe olutiyali lwuutumwa, okwa li a ka talela po muFilippi. Manga e li hoka, ye nakuume ke Silas oya tamanekelwa iinima haayo, e taya mangwa po noya tulwa mondholongo. Pethimbo lyuusiku, evi olya tameke okukakama noonkondo, sigo okomakankameno gayo nomiyelo dhondholongo odhe eguluka. Omulangeli gwondholongo okwa dhiladhila kutya oonkwatwa odha fadhuka po. Onkee okwa li a hala okwiidhipaga, ihe Paulus okwe mu igidha mokule kee shi ninge. Opo nduno, Paulus naSilas oya longo omulangeli ngoka pamwe naanegumbo lye oshili yOmbiimbeli. Molwaashoka oya li ya hokwa oshili ndjoka yi ilongo kombinga yaJesus, oshe yi inyengitha nziya ya katuke onkatu. Yini mbela? Oya ninginithwa nopwaa na okukakadhala. Oshike tatu ilongo mehokololo ndino?

⁹ Omunandholongo ngoka otashi vulika a li nale omukwiita Omuroma. Ka li e shi Omanyolo. Opo a mone ontseyo yashili, okwa li e na okwiilonga oshili yOmbiimbeli yopetameko, opo u uve ko kutya okukala omupiya gwaKalunga otashi ti shike, ye a kale wo a tokola lela okuvulika komalongo gaJesus. Oshili ndjoka nosho wo olupandu lwe, oye mu inyengitha a ninginithwe meni lyethimbo efupi. Osha yela kutya konima sho a ninginithwa, okwa tsikile nokwiilonga oshili. Oshiholelwa shika oshiwanawa. Wu li omuvali, oto ka ninga po shike uuna omumwoye u ulike kutya oku hole omalongo gOmbiimbeli gopetameko tashi zi komutima, mwa kwatelwa eityo nesimano lyokwiiyapulila Jehova nokuninginithwa? Wu li omuvali Omukriste, oto ke mu lombwela kutya ota vulu okupopya naakuluntugongalo, ya tale ngele okwa gwanitha po iitegelelwa yeninginitho. * Ngaashi aalongwa yalwe mboka ya ninginithwa, omumwoye naye ota ka tsikila okugwedha ko kontseyo ye yokutseya omalalakano gaJehova monkalamwenyo ye, tashi vulika sigo aluhe. — Rom. 11:33, 34.

10, 11. (a) Aavali yamwe ohaya thiki pehulithodhiladhilo lini? (b) Omuvali kehe oku na okukala ti ipula nashike tango?

¹⁰ Aavali yamwe ohaya thiki pehulithodhiladhilo kutya otashi ka kala shi li nawa, ngele oyana oyi ilongele iilonga yontumba tango nokukala ye na eithano dhingi, opo nawa konima taya ninginithwa. Omadhiladhilo ga tya ngawo otashi vulika ga talike ko ge li nawa, ihe mbela otaga ka kwathela ngaa shili oyana ya pondole? Shoka ishewe sha simanenena, mbela oge li ngaa metsokumwe nOmanyolo? Oohapu dhaJehova otadhi tu ladhipikile ondjila yini? — Lesha Omuuvithi 12:1.

¹¹ Osha simana tu dhimbulukwe kutya uuyuni mbuka naashihe shoka shi li mo, otayi  kondjitha ehalo lyaJehova nosho wo omadhiladhilo ge. (Jak. 4:7, 8; 1 Joh. 2:15-17; 5:19) Ngele okanona oke na ekwatathano lyopothingo naJehova, otashi ke ka gamena kenwethomo ewinayi lyaSatana, kuuyuni we nosho wo komadhiladhilo gaakaanakalunga. Uuna omuvali ta lalakanene iinima yomuuyuni mbuka, otashi vulika shi ngwangwaneke oyana nokutula moshiponga ekwatathano lyawo naJehova. Mbela aavali Aakriste mboka ye hole oyana, otaya ka kala ngaa ya hala oyana ya kale ye na etaloko lyuuyuni mbuka, ngele tashi ya pokupondola? Osha yela kutya otatu ka mona owala enyanyu lyashili nokupondola, ngele tatu pititha komeho ehalo lyaJehova monkalamwenyo yetu. — Lesha Episalomi 1:2, 3.

12. Omolwashike aavali yamwe haya kala ya hala oyana ya tegelele ya ka ninginithwe nale?

¹² Omumwameme gumwe okwa yelitha kutya omolwashike a li inaa hala omwanakadhona a ninginithwe. Okwa ti: “Onda sa ohoni okupopya kutya etompelo lyandje enene, olyo kutya onda li nda tila omumwandje a kondwe.” Ngaashi omumwameme ngoka, aavali yamwe ohaya dhiladhila kutya oshi li nawa oyana kaaya ninginithwe manga, sigo ya piti pomimvo dhokakondapweyu. (Gen. 8:21; Omayel. 22:15) Otashi vulika ya thike pehulithodhiladhilo taya ti: ‘Manga omumwandje inaa ninginithwa, ita vulu okukondwa.’ Omolwashike etompelo ndyono kaa li li pandunge? — Jak. 1:22.

13. Ngele omuntu ina ninginithwa natango, mbela shoka otashi ti kutya ina yalulwa kuJehova? Shi yelitha.

¹³ Osha yela kutya aavali Aakriste itaya ka kala ya hala oyana ya ninginithwe, manga inaaya koka lela nokwiiyapulila Jehova. Kakele kaashono, itashi ka kala wo pandunge ya thike pehulithodhiladhilo kutya ngele okanona inaka ninginithwa, nena kungawo itake ki ihokolola kuJehova. Omolwashike mbela? Omolwaashono okwiihokolola kuJehova inaku ikwatelela konkatu yokuninginithwa. Pehala lyaashono, Jehova okwa tegelela ke ki ihokolole, uuna ke shi shoka shi li mondjila naashoka sha puka momeho Ge. (Lesha Jakob 4:17.) Onkee ano, pehala lyokuteya okanona omukumo kaaka ninginithwe, aavali mboka ye na ko nasha, ohaya kambadhala ya mana mo ya tulile po oyana oshiholelwa oshiwanawa. Ohaya kala ya hala ya longe oyana omithikampango dhaJehova dhopamikalo okuza kuunona nokukala ye dhi hole. (Luk. 6:40) Shoka ohashi gamene aanona noku yi inyengitha ya dhiginine ondjila yaJehova yuuyuuki. — Jes. 35:8.

14. Ongiini aakuluntugongalo taya vulu okwaambidhidha oonkambadhala dhaavali mboka taya kwathele oyana ya hume komeho sigo ya ninginithwa?

¹⁴ Aakuluntugongalo, mboka ye li aasita yoshigunda shaKalunga, otaya vulu okwaambidhidha oonkambadhala dhaavali, mokupopya nayo nawa kombinga yomalalakano gopambepo. Omumwameme gumwe, ngoka a kala ta kokola ondjila uule womimvo dhi vulithe po 70, ota dhimbulukwa oonkundathana ndhoka ya li ye na nomumwatate Charles T. Russell, pethimbo e na omimvo hamano. Okwa ti: “Okwa li a kundathana nangame kombinga yomalalakano gopambepo, uule wominute 15.” Eeno, oohapu oombwanawa nosho wo etsomukumo, otayi vulu okuguma onkalamwenyo yomuntu ayihe. (Omayel. 25:11) Aakuluntugongalo otaya vulu wo okukwatela mo aavali noyana mooproyeka dhOshinyanga shUukwaniilwa. Otaya vulu natango okupa aagundjuka iinakugwanithwa shi ikolelela komimvo dhawo nopokuvula kwawo.

15. Omomikalo dhimwe dhini yalwe megongalo taya vulu okutsa omukumo aagundjuka?

¹⁵ Iilyo yegongalo otayi vulu okukwathela, mokuulika kutya oyi na ko nasha naagundjuka. Shika osha kwatela mo oku ya kwathela ya  hume komeho pambepo. Mbela aagundjuka ohaya gandja ngaa omatyokosha omawanawa taga zi komutima nohaya kutha ngaa ombinga pokugongala kwomokati koshiwike? Mbela uuna taya makelwa ohayu ulike ngaa uudhiginini wawo, nohayu uvithile yakwawo kosikola? Kala ho ya pandula nziya. Shi ninga wo omukalondjigilile okupopya nayo manga okugongala inaaku tameka nokonima ngele kwa piti mo, wu ulike kutya owu na ko nasha nayo. Omikalo ndhika nadhilwe, otadhi vulu okukwathela aagundjuka ya mone kutya oye li oshitopolwa ‘shegongalo enene.’ — Eps. 35:18.

16, 17. (a) Eninginitho olya guma ngiini onakuyiwa yomuntu? (b) Aavali Aakriste ohaya kala ya nyanyukilwa shike? (Tala kethano lyopetameko.)

¹⁶ Aavali Aakriste oye na uuthembahenda uunene ‘wokuputudha oyana noku ya kumagidha pauKriste.’ (Ef. 6:4; Eps. 127:3) Aanona yomoshigwana shaIsraeli shonale, oya li haya yapulilwa Jehova ngele ya valwa, ihe aanona yaavali Aakriste kunena ihaya ningwa ngawo. Shimwe ishewe, ohole yokuhola Kalunga noshili, ihayi thigululwa. Okuza esiku okanona ka valwa, aavali oye na okukala nelalakano lyoku ka kwathela ka ninge omulongwa, ki iyapulile Jehova noka ninge omupiya gwaJehova a ninginithwa. Mbela oshike tashi vulu okukala sha simanenena? Komeho gaayihe, omuntu ngele okwi iyapulila Kalunga, a ninginithwa noku li omudhiginini, shoka otashi ke mu kwathela a ka hupithwe pethimbo lyuudhigu uunene. — Mat. 24:13.

¹⁷ Sho omumwameme Blossom Brandt a li a tokola okuninginithwa, aavali ye aatilikalunga, oya li ya hala okushilipaleka ngele okwi ilongekidha ngaa okukatuka onkatu ndjoka ya simana monkalamwenyo ye. Sho ya mono kutya okwi ilongekidha, oya ambidhidha etokolo lye. Ongulohi ndjoka ya tetekele esiku a ninginithwa, he okwa li a ningi oshinima oshihokithi. Blossom okwa ti: “Okwe tu lombwele atuhe tu tse oongolo, e ta galikana. Okwa lombwele Jehova kutya okwa nyanyukilwa noonkondo okamwana, sho ka ningi etokolo lyoku Mu iyapulila.” Konima yomimvo dhi vulithe po 60, Blossom okwa ti: “Otamu vulu okukala nuushili kutya nomomimvo adhihe dhokomeho, kandi na siku ndi dhimbwe ongulohi ndjoka!” Onkee ano, aavali kaleni mwa nyanyukwa, uuna aanona yeni tayi iyapulile Jehova nokuninginithwa.