1. Omomukalo guni hatu mono uunongo, nohawu tu etele uuwanawa wuni?

JEHOVA oye Onzo yuunongo, nohe wu pe wo yalwe. Jakob 1:5 otayi ti: “Ngele oku na gumwe gwomune a pumbwa oondunge, ne dhi indile kuKalunga, oye note dhi mu pe. Oshoka Kalunga ke shi omundalapata, ihe oha pe ayehe nopwaa na omanyenyeto.” Omukalo gumwe moka Kalunga he tu pe uunongo, omokutaamba ko egeeloputudho lye. Uunongo mboka ohawu tu gamene kwaashoka tashi vulu okuyona po omikalo dhetu nuupambepo wetu. (Omayel. 2:10-12) Shoka ohashi tu kwathele ‘tu ikaleke mohole yaKalunga notu ka pewe omwenyo gwaaluhe.’ — Jud. 21.

2. Ongiini tatu vulu okuulika kutya otu hole eputudho lyaKalunga?

² Okwaahagwanenena kwetu, onkaloputuko yetu niinima yilwe, ohayi shi ningitha oshidhigu kutse tu taambe ko egeeloputudho nenge tu li tale ko momukalo gu uka. Ihe uuna twa mono mo uuwanawa mulyo, ohatu kala twa pandula notu wete lela kutya Kalunga oku tu hole. Omayeletumbulo 3:11, 12 otayi ti: “Mumwandje, ino dhina eputudho lyOmuwa, . . . oshoka Omuwa ota dhenge ngoka e hole.” Eeno, natu kale aluhe tu shi kutya Jehova oku na ohokwe lela mutse. (Lesha Aahebeli 12:5-11.) Molwaashono Kalunga oku tu shi nawa pakuudha, eputudho lye aluhe ewanawa noli li pandjele. Natu ka taleni kiinima ine yi na ko nasha neputudho: (1) Eipangelomwene, (2) eputudho ndyoka aavali haya gandja, (3) egeeloputudho ndyoka hali gandjwa megongalo  lyopaKriste, nosho wo (4) shoka oshiwinayi noonkondo shi vule uuwehame mboka omuntu ha kala u uvite, ngele a pukululwa.

3. Ongiini okanona taka vulu okukala ke na eipangelo? Shi thaneka.

³ Eikwatonawa olya kwatela mo okwiipangela mwene, opo tu hwepopaleke eihumbato lyetu nomadhiladhilo getu. Inatu valwa nuukwatya weipangelo, ihe otwa pumbwa oku wi ilonga. Natu shi thaneke ngeyi: Petameko ngele okanona taki ilongo okuhinga ombasikela, omuvali oha kala e yi kwata, opo kaaka gwe ko. Ihe konima ngele oki ilongo nkene hayi hingwa, omuvali otashi vulika e ke ethe ke yi hinge ko kene poompito dhimwe. Ngele omuvali okwa mono kutya ngashingeyi oka tseya oku yi hinga, nena ote ke ka ethela po thiluthilu. Sha faathana, ngele aavali oya kala haya dheula pandjigilile noneidhidhimiko aanona yawo ‘mevuliko noku ya kumagidha pauKriste,’ kungawo otaye ya kwathele ya kale ye na eipangelo nuunongo. — Ef. 6:4, yelekanitha OB-1954.

4, 5. (a) Omolwashike eipangelomwene li li oshitopolwa ‘shomuntu omupe’? (b) Omolwashike kaatu na okuteka omukumo, nonando otu “gwile po luheyali”?

⁴ Ekotampango lya faathana otali longo nokwaamboka ya tseya Jehova pethimbo ye li aakuluntu. Odhoshili kutya otashi vulika ya kala nale ye na eipangelo kashona, ihe shoka itashi ti kutya oya koka pambepo. Ihe ngele oya zala “omuntu omupe” nokukambadhala okukala ya fa Kristus, shoka ohashi ya kwathele a koke lela pambepo. (Ef. 4:23, 24) Eipangelomwene oshinima sha simana, shoka hashi tu kwathele tu “ethe okudhina Kalunga nuuhalu wuuyuni, tse tu kale muuyuni mbuka meikwatonawa, muuyuuki nomokusimaneka Kalunga.” — Tit. 2:12.

⁵ Atuhe otu na egamo lyokuyona. (Omuuv. 7:20) Ihe ngele otwa yono, shoka itashi ti kutya katu na eipangelo nenge kutya otu li na owala kashona. Omayeletumbulo 24:16 otayi ti: “Omuyuuki nando ota gwile po luheyali, ota yambuka po.” Oshike tashi vulu oku mu kwathela a pondole? Ombepo yaKalunga, ihe haankondo dhe mwene. (Lesha Aafilippi 4:13.) Iiyimati yombepo mbyoka oya kwatela mo eikwatonawa, ndyoka lya faathana neipangelo.

6. Ongiini tatu vulu okukala aalongwa aawanawa yOohapu dhaKalunga? (Tala kethano lyopetameko.)

⁶ Iinima ngaashi egalikano tali zi komutima, ekonakonombiimbeli nokutedhatedha, ohayi kwathele omuntu a kale e na eipangelo. Ihe ongiini ngele oho mono oshidhigu okukonakona Oohapu dhaKalunga nenge tashi vulika kuu hole oku dhi konakona? Ngele osho shi li ngawo, kaleka momadhiladhilo kutya Jehova ote ke ku kwathela, ngele owe mu pula ekwatho. Ota vulu oku ku kwathela wu kale wa “sa enota” lyOohapu dhe. (1 Pet. 2:2) Shotango, galikana kuJehova e ku kwathele wu kale wu na eipangelo, opo wu mone ompito yokulesha Oohapu dhe. Opo nduno longa shoka shi li metsokumwe nomagalikano goye, pashiholelwa ngaashi okutsikila okudhiginina ethimbo lyoye lyokukonakona. Mokweendela ko kwethimbo, otashi ka kala oshipu kungoye okukonakona, noto ka kala we ku nyanyukilwa. Odhoshili kutya oto ka kala wu hole ethimbo ndyoka ho tedhatedha kombinga yomadhiladhilo gaJehova, ngoka ge li mOmbiimbeli. — 1 Tim. 4:15.

7. Ongiini eipangelo tali vulu oku tu kwathela tu adhe omalalakano getu gopambepo?

⁷ Eipangelo ohali tu kwathele tu adhe omalalakano getu gopambepo. Natu tale koshiholelwa shomusamane gumwe, ngoka a li u uvite a kanitha uulaadhi. Okwi itulile po elalakano lyokuninga omukokolindjila gwondjigilile, nokwa kala ta lesha iitopolwa mbyoka tayi popi kombinga yaashono miifo yetu. Okulesha hoka nosho wo egalikano, oye mu tungu noku mu koleka pambepo. Okwa li wo a kutha uukwathelikokolindjila poompito dhimwe. Oshizemo? Ka li e etha sha shi mu imbe a gandje eitulomo kelalakano lye lyokuninga omukokolindjila gwondjigilile. Hugunina, osho a adha elalakano lye.

8-10. Oshike tashi vulu okukwathela aavali Aakriste ya pondole mokuputudha oyana ya longele Jehova? Gandja oshiholelwa.

⁸ Aavali Aakriste oye na uuthembahenda wokuputudha oyana ‘mevuliko noku ya kumagidha pauKriste.’ (Ef. 6:4, yelekanitha OB-1954) Ihe kashi shi oshipu oku shi ninga muuyuni mbuka. (2 Tim. 3:1-5) Odhoshili kutya aanona ihaya valwa ye shi shoka shu uka nenge sha puka. Nonando ongawo, ohaya valwa ye na eiyuvo, ndyoka hali kala lya pumbwa okudheulwa. (Rom. 2:14, 15) Embo limwe lya popya kombinga yOmbiimbeli, olya ti kutya oshitya shOshigreka shoka sha tolokwa “eputudho” otashi vulu okutiwa “okuputudha okanona.”

⁹ Aanona mboka haya dheulwa pahole, ohaya kala yu uvite ya gamenwa. Ohayi ilongo kutya emanguluko ndyoka ye na olya ngambekwa nonokutya kehe shoka taya ningi monkalamwenyo, oshi na iilanduliko iiwanawa nenge iiwinayi. Onkee ano, osha simana sho aavali Aakriste haya kongo ewiliko kuJehova. Tseya kutya omikalo moka aavali haya putudha oyana odha yoolokathana, omolwomaputuko gi ili nogi ili, nohadhi ende tadhi lunduluka. Ihe aavali mboka haya wilikwa kuKalunga, ohaya kala ye shi kutya ongiini ye na okuputudha oyana, nohaye shi ningi momukalo ngoka Kalunga a hokwa.

¹⁰ Natu tale koshiholelwa shaNoa. Sho Jehova e mu lombwele a tunge onguluwato, Noa ka li ta vulu oku yi tunga kuye mwene, oshoka ine yi tunga nando onale. Onkee ano, okwa li e na okwiinekela muJehova, nokuninga ‘ngaashi e mu lombwele.’ (Gen. 6:22) Oshizemo? Noa okwa li e shi pondola, nonando osha li oshikando she shotango oku yi tunga. Odhoshili kutya shoka osho a li e na okuninga! Noa okwa li a pondola e li omuvali, molwaashoka okwa li i inekela muunongo waKalunga. Okwa li a longo oyana nawa noku ya tulila po oshiholelwa oshiwanawa, nonando osha li eshongo enene pethimbo ndyoka lyuukolokoshi mboka wa tetekele Eyelu. — Gen. 6:5.

11. Omolwashike sha simana aavali ya dheule oyana?

¹¹ Aavali, ongiini tamu vulu okuninga “ngaashi Kalunga e mu lombwele”? Ongele tamu pulakene kuye. Mu etheni e mu pukulule nkene tamu vulu okuputudha aanona yeni, mokulongitha Oohapu dhe newiliko ndyoka hatu mono okupitila mehangano lye. Mokweendela ko kwethimbo, aanona yeni otashi vulika ye ke mu pandule, sho mwa ningi ngawo. Omumwatate gumwe okwa nyola a ti: “Onda pandula unene omukalo moka aavali yandje ya putudha yandje. Oya ningi ngaashi taya vulu ya adhe omutima gwandje. Olupandu olunene nalu ye kuyo, sho ndi na uupambepo uuwanawa.” Ihe nonando otashi vulika aavali ya ninge oonkambadhala, aanona yamwe ohaye etha po okulongela Jehova. Aavali mboka ya kambadhala ngaashi taya vulu ya thindile oshili momitima dhoyana, oye na eiyuvo lya yela. Ngele okanona kawo oke etha po okulongela Jehova, otaya vulu wo okukala neinekelo kutya onaka ka galukile “kegumbo,” ano kuJehova.

12, 13. (a) Ongiini aavali Aakriste taya vulu okuulika kutya otaya vulika kuKalunga, uuna omwana gwawo a kondwa? (b) Ongiini aavali yamwe ya mono mo uuwanawa, sho ya vulika kuJehova?

¹² Eshongo limwe edhigu ndyoka hali makele  ekwatathano lyaavali yamwe ndyoka ye na naJehova, ongele okanona kawo ka kondwa. Natu tale koshiholelwa shomumwameme gumwe, ngoka omwanakadhona gwe a li a kondwa e ta zi mo megumbo. Omumwameme ngoka okwa ti: “Miileshomwa yetu onda kala tandi kongo mo omikalo, ndhoka tandi vulu okulongitha, opo ndi kale he kwatathana nomwanakadhona gwandje nosho wo nokatekulu kandje kokakadhona.” Okwa gwedha ko a ti: “Ihe omusamane gwandje okwa kwathele ndje nombili ndi mone kutya omwana gwetu ke li we miikaha yetu nonokutya katu na okuya mo olunyala.”

¹³ Konima yomimvo dhontumba, omwanakadhona gwawo okwa galulilwa megongalo. Meme gwe okwa ti: “Ngashingeyi oha dhengele ndje nokunyolela ndje omatumwalaka konyala esiku kehe! Okwa simaneka ndje noonkondo nosho wo omusamane gwandje, oshoka oku shi kutya otwa vulika kuKalunga. Otu na ekwatathano ewanawa noonkondo.” Ngele owu na omumwoye a kondwa, mbela ito ka kala wi ‘inekela Omuwa nomutima gwoye aguhe nokukala inoo igameka koondunge dhoye mwene’? (Omayel. 3:5, 6) Dhimbulukwa kutya egeeloputudho lyaJehova, ohali ulike uunongo we kaawu shi okuyelekwa nosho wo ohole ye onene. Ino dhimbwa nando kutya okwa gandja Omwana a sile aantu ayehe, mwa kwatelwa omumwoye. Kalunga ina hala nando omuntu gumwe a ka hanagulwe po. (Lesha 2 Petrus 3:9.) Onkee ano, kala wi itaala megeeloputudho lyaJehova nomewiliko lye. Shi ninga nopoompito mpoka kaashi shi oshipu, nokuninga shoka Jehova ta ti. Eeno, kala to vulika kegeeloputudho lyaKalunga, ihe ino kala wu li ompinge nalyo.

14. Ongiini tatu vulu okumona mo uuwanawa mewiliko lyaJehova ndyoka he tu pe okupitila ‘momupiya omudhiginini’?

¹⁴ Jehova oku uvaneka kutya ota sile oshimpwiyu egongalo lyopaKriste nonokutya ote li gamene noku li wilika. Ohe shi ningi momikalo odhindji. Pashiholelwa, egongalo okwe li tula kohi yesiloshimpwiyu lyOmwana, ngoka a langeka po “omumati omwiinekelwa” nenge tu tye “omupiya omudhiginini,” opo e tu pe iikulya yopambepo pethimbo lyo opala. (Luk. 12:42, yelekanitha NW) Iikulya mbyoka ohayi longekidhwa momalaka ogendji nohayi tu pe ewiliko nenge eputudho tali ti sha. Ipula ngeyi: ‘Olungapi nda pulakena koshipopiwa nenge nda lesha oshitopolwa shontumba, e tashi inyengitha ndje ndi lundulule okudhiladhila kwandje nenge eihumbato lyandje?’ Ngele owe shi ninga, nyanyukwa! Shoka otashi ulike kutya oho etha Jehova e ku zule nenge e ku pukulule, opo wu mone uuwanawa. — Omayel. 2:1-5.

15, 16. (a) Ongiini tatu vulu okumona mo uuwanawa ‘maantu’ mboka ya langekwa po megongalo? (b) Ongiini tatu vulu okuningitha aakuluntugongalo ya longe iilonga yawo nenyanyu?

¹⁵ Megongalo, Kristus okwa langeka mo wo “aantu omagano,” ano aakuluntugongalo, opo ya lithe oshigunda shaKalunga. (Ef. 4:8, 11-13) Ongiini omagano ngoka taga vulu oku tu etela uuwanawa? Omukalo gumwe ongele tatu holele eitaalo lyaakuluntugongalo noshiholelwa shawo oshiwanawa. Omukalo gulwe, ongele tatu taamba ko omayele ngoka taye tu pe ga kankamena kOmbiimbeli. (Lesha Aahebeli 13:7, 17.) Dhimbulukwa kutya aakuluntugongalo oye tu hole noya hala tu kale twa koka pambepo. Pashiholelwa, ngele oya mono kutya ohatu faula kokugongala nenge twa kanitha uulaadhi, otaya ka katuka nziya ye tu kwathele. Otaye ke tu pulakena nokukambadhala oku tu tsa omukumo, e taye tu pe wo omayele gopamanyolo ngoka taga opalele. Mbela ekwatho ndyono owe li tala ko ngaa li li euliko lyohole yaJehova yoku ku hola?  

¹⁶ Kaleka momadhiladhilo kutya otashi vulika kaashi kale oshipu kaakuluntugongalo ye ye kutse ye tu pe omayele ngoka ga pumbiwa. Pashiholelwa, dhiladhila owala kunkene tashi vulika sha li oshidhigu komuhunganeki Natan a ka popye naDavid, konima sho omukwaniilwa ngoka a holeke eyono lye. (2 Sam. 12:1-14) Sha faathana, omuyapostoli Paulus okwa li e na oku ka pukulula Petrus, ngoka a li gumwe gwomaayapostoli, sho u ungaunga owala nawa naamwahe  Aajuda. (Gal. 2:11-14) Onkee ano, ongiini to vulu oku shi ningitha oshipu kaakuluntugongalo yomegongalo lyeni ye ku pe omayele? Kala omwiifupipiki, omupu okupopiwa nangoye noho pandula. Ekwatho ndyoka taye ku pe li tala ko li li euliko lyohole yaKalunga yoku ku hola. Shoka itashi ke ku etela owala uuwanawa, ihe otashi ka kwathela wo aakuluntugongalo ya longe iilonga yawo nenyanyu.

17. Ongiini omumwameme gumwe a mono mo uuwanawa mekwatho lyopahole ndyoka a pewa kaakuluntugongalo yomegongalo lyawo?

¹⁷ Omumwameme gumwe okwa li e wete oshidhigu a kale e hole Jehova, omolwiinima mbyoka a pita muyo monakuziwa. Okwa ti: “Iinima mbyoka nosho wo yilwe oya ningitha ndje ndi kale nda gwililwa po. Onda li ndi shi kutya onda pumbwa okupopya naakuluntugongalo. Sho nda popi nayo, inaya nyenyetela ndje nenge ya pe ndje uusama, ihe oya tsu ndje omukumo noya kwathele ndje ndi kale ndi na oonkondo. Konima yokugongala kehe, nonando aakuluntugongalo oya kale yi ipyakidhila shi thike peni, gumwe gwomuyo oha pula ndje kutya ondi li po ngiini. Omolwonakuziwa yandje, onda li nde shi mono oshidhigu okukala ndi holike kuKalunga. Nonando ongawo, ethimbo nethimbo, Jehova okwa kala ta longitha egongalo nosho wo aakuluntugongalo yu ulukile ndje kutya oku hole ndje. Onda galikana kutya kandi na siku ndi mu thige po.”

18, 19. Oshike oshiwinayi noonkondo shi vulithe pewuvonayi ndyoka omuntu ha kala u uvite, ngele a pukululwa? Gandja oshiholelwa.

¹⁸ Odhoshili kutya omuntu ngele ta pukululwa otashi vulika a kale u uvite nayi. Ihe, ota vulu okukala u uvite nayi noonkondo, ngele okwa tindi epukululo ndyoka. (Heb. 12:11) Natu tale kiiholelwa iyali, shaKain noshomukwaniilwa Sedekia. Sho Kalunga a mono kutya Kain oku tonde Abel nokwa hala oku mu dhipaga, okwe mu kumagidha a ti: “Omolwashike wa geya? Oshike wa sizimaneka oshipala? Ngele to longo uuwanawa, nena oshipala shoye oshi li nawa, ihe ngele to longo uuwinayi, nena uulunde owe ku langele posheelo. Owo wa hala oku ku pangela, ihe ou na oku u pangela.” (Gen. 4:6, 7) Nonando ongawo, Kain ka li a pulakene kuKalunga. Okwe etha a pangelwe kuulunde. Kain ka li tuu i iyetele uudhigu nokumona iihuna! (Gen. 4:11, 12) Ando Kain okwa pulakenene kuKalunga, ando ini iyadha muudhigu.

¹⁹ Omukwaniilwa omunkundi nomukolokoshi, Sedekia, okwa li a pangele pethimbo Jerusalem shi li monkalo ondhigu. Omuhunganeki Jeremia okwa li a londodha omukwaniilwa ngoka lwiikando, e ethe po omikalo dhe omiwinayi, ihe okwa tindi a pukululwe. Naashoka oshe etitha iilanduliko yinikitha oluhodhi. (Jer. 52:8-11) Jehova ina hala tu mone iihuna, omolwoshinima sha tya ngawo! — Lesha Jesaja 48:17, 18.

20. Mboka haya taamba ko egeeloputudho lyaKalunga naamboka ihaaye li taamba ko, otaya ka mona iizemo yini monakuyiwa?

²⁰ Aantu oyendji muuyuni inaya simaneka eputudho lyaKalunga nosho wo eipangelo. Ihe masiku aantu mboka otaya ka mona iilanduliko yinyanyalitha. (Omayel. 1:24-31) Onkee ano, natu ‘pulakeneni omagando, tse tu pukuluke.’ Omayeletumbulo 4:13 otayi ti: “Dhiginina eputudho, ino li etha tuu, li pungula, oshoka olyo omwenyo gwoye.”