1, 2. (a) Omolwashike aagundjuka Aakriste taya sindana molugodhi lwokukondjitha Satana noompwidhuli dhe? (Tala kethano lyopetameko.) (b) Otatu ka kundathana shike?

OMUYAPOSTOLI PAULUS okwa faathanitha onkalamwenyo yetu tu li Aakriste nonkalamwenyo yaakwiita mboka ye li molugodhi. Odhoshili kutya olugodhi ndoka tatu kondjo olwopambepo, ihe kalu shi olugodhi lwo lwene. Nonando ongawo, aatondi yetu mboka tatu kondjitha oyolela. Satana noompwidhuli dhe, aakwiita ya pyokoka mboka ya kala nokukondja ethimbo nuule. Otashi vulika tu kale tu wete itaatu vulu oku ya kondjitha. Aagundjuka Aakriste otashi vulika ya kale ye wete itaaya vulu okusindana molugodhi ndoka. Oshike tashi ya kaleke netegameno kutya otaya vulu okusindana mokukondjitha Satana noompwidhuli dhe, mboka ye na oonkondo dhi vule dhaantu? Odhoshili kutya aagundjuka otaya vulu okusindana, notaya sindana! Omolwashike? Omolwaashoka oyi ‘ikolelela mOmuwa.’ Ihe ohaya ningi oshindji shi vulithe pokwiikolelela moonkondo dhaKalunga. Oya zala ya kondje olugodhi. Ngaashi aakwiita ya dheulwa nawa, naagundjuka oyi ‘ihomateka iikondjitho ayihe mbyoka Kalunga e tu pa.’ — Lesha Aaefeso 6:10-12.

² Sho Paulus a longitha ethaneko ndika, otashi vulika a li e na  momadhiladhilo iikondjitho mbyoka ya li hayi zalwa kaakwiita yaRoma. (Iil. 28:16) Natu kundathaneni kutya omolwashike ethaneko ndyoka tali opalele. Sho tatu ningi ngawo, ndhindhilika shoka aagundjuka yamwe taya ti kombinga yomashongo nosho wo omauwanawa ngoka haga zi mokuzala oshikondjitho kehe shopambepo.

3, 4. Ongiini oshili ndjoka tayi adhika mOmbiimbeli, ya fa epaya ndyoka lya li hali zalwa kaakwiita yaRoma?

³ Lesha Aaefeso 6:14. Epaya ndyoka lya li hali zalwa kaakwiita yaRoma, olya li li na iitenda mbyoka ya li hayi gamene oombunda dhawo. Olya li lya longwa li kwathele ehuuyanza li kale mpoka li na okukala. Epaya olya li wo li na uukwatitho moka hamu kala egongamwele nomwele. Uuna epaya lyomukwiita lya patwa lela lya pama, oha kala e na omukumo molugodhi.

⁴ Sha faathana, oshili ndjoka twi ilonga mOohapu dhaKalunga, ohayi tu gamene kiiponga yopambepo mbyoka hayi etithwa komalongo giifundja. (Joh. 8:31, 32; 1 Joh. 4:1) Ngele otwa kala tu hole lela oshili, otashi ka kala oshipu kutse okuhumbata “ehuuyanza” lyetu, shoka sha hala okutya, okukala metsokumwe nomithikampango dhaKalunga. (Eps. 111:7, 8; 1 Joh. 5:3) Shimwe ishewe, uuna tu uvite ko nawa oshili yOohapu dhaKalunga, otatu ka vula okukala nomukumo tu kondjithe aapataneki yetu nokugamena oshili. — 1 Pet. 3:15.

5. Omolwashike tu na okupopya oshili?

⁵ Ngele otwa kala twa zala aluhe oshili yOmbiimbeli, otashi ke tu inyengitha tu kale metsokumwe nayo nokupopya oshili aluhe. Omolwashike kaatu na okupopya iifundja? Omolwaashono iifundja oyi li shimwe shomiikondjitho yaSatana mbyoka hayi pondola lela. Iifundja ohayi yono po ngoka te yi popi nosho wo ngoka te yi itaale. (Joh. 8:44) Onkee ano, nonando inatu gwanenena, natu kambadhale tu yande okupopya iifundja. (Ef. 4:25) Ihe otashi vulu okukala eshongo. Omumwameme Abigail ngoka e na omimvo 18, ota ti: “Okupopya oshili omathimbo gamwe otashi vulika ku kale kwa fa kaaku na oshilonga, unene tuu ngele iifundja mbyoka to popi otayi vulu oku ku kutha mo monkalo ondhigu.” Omolwashike mbela ha kambadhala aluhe okupopya oshili? Ota ti: “Uuna tandi popi oshili, ohandi kala ndi na eiyuvo lya yela momeho gaJehova. Aavali yandje nookuume kandje oye shi kutya otaya vulu okwiinekela ndje.” Omumwameme Victoria ngoka e na omimvo 23, ota ti: “Uuna to popi oshili nokupopila shoka wi itaala, otashi vulika wu ningwe nayi. Ihe oho mono aluhe omauwanawa ga dhenga mbanda ngaashi: Okukala wu na omukumo, okukala wu uvite wu li popepi naJehova nokukala wa simanekwa kwaamboka ye ku hole.” Odhoshili kutya oshiwanawa aluhe ‘okuzala oshili, yi ninge epaya moombunda dhetu.’

6, 7. Omolwashike uuyuuki wa yelekanithwa nehuuyanza?

⁶ Oludhi lumwe lwehuuyanza ndyoka lya li hali zalwa kaakwiita yaRoma omimvo 2 000 dha ka pita, olya li lya papata iiyela. Iiyela mbyoka oya li ya longwa nawa, opo yi gwane pontulo yomukwiita, noya li ya mangelwa komikoya, ndhoka dha li dhi na uuhake noompate. Olutu lwomukwiita okuza moshiya okuuka pombanda, olwa li halu kala lwa siikilwa kiiyela ya mangelwa komukoya. Ehuuyanza ndika olya li lya ngambeka einyengo lyomukwiita, nokwa li a tegelelwa a kale ta tala ngele iiyela oyi li pomahala. Oshikondjitho shoka okwa li hashi mu gamene kaa tsuwe kegongamwele nenge koshikuti pomutima nenge kiitopolwa yilwe ya simana.

⁷ Ehuuyanza ndyoka otali opalele, oshoka otali ulike nkene omithikampango dhaJehova dhuuyuuki tadhi vulu okugamena omutima gwetu gwopathaneko. (Omayel. 4:23) Ngaashi owala omukwiita itaa hala okugandja po ehuuyanza ndyoka lya longwa moshiyela, opo a pewe ndyoka inaali kola, natse itatu ka pingena po omithikampango dhaJehova dhuuyuuki naashoka she tu opalela paumwene. Tse itatu vulu okwiigamena tse yene. (Omayel. 3:5, 6) Pehala lyaashono, ohatu shilipaleke aluhe kutya “ehuuyanza” ndyoka Jehova e tu pa, olya gamena omutima gwetu.

8. Omolwashike sha simana okwiigameka komithikampango dhaJehova?

 ⁸ Mbela omathimbo gamwe oho kala wu wete omithikampango dhaJehova dhuuyuuki omidhigu nenge dha ngambeka emanguluko lyoye? Omumwatate Daniel ngoka e na omimvo 21, ota ti: “Aalongi naalongwa ooyakwetu oya li haya yolo ndje, sho handi vulika komithikampango dhOmbiimbeli. Petameko, onda li nda teka omukumo nondu uvite nda gwililwa po.” Oshike sha li she mu kwathele? Okwa ti: “Hugunina, onda li nda mono omauwanawa ngoka haga zi mokukala metsokumwe nomithikampango dhaJehova. ‘Ookuume’ kandje yamwe, oya tameke okulongitha iingangamithi nayalwe oya thigi po osikola. Osha li shiyemateka okumona nkene onkalamwenyo yawo ya vundakana. Jehova ohe tu gamene shili.” Omumwameme Madison gwomimvo 15, ota ti: “Oshidhigu kungame okwiigameka komithikampango dhaJehova nokukala itaandi landula shoka oomakula yandje taya dhiladhila kutya osho oshiwanawa.” Ohu ungaunga ngiini nonkalo ndjoka? Ota ti: “Ohandi idhimbulukitha kutya onda humbata edhina lyaJehova nonokutya eshongo ndyoka oli li owala omukalo gwaSatana gwokuyaha ndje. Uuna nda sindana, ohandi kala ndi ipanda.”

9-11. (a) Aakriste oya zala oongaku dhopathaneko dhini? (b) Oshike tashi vulu oku tu kwathela tu kala twa manguluka lela, uuna tatu uvitha onkundana ombwanawa?

⁹ Lesha Aaefeso 6:15. Omukwiita gwaRoma ka li ha vulu okuya molugodhi, ngele ke na oongaku. Oongaku dhe odha li dha longwa dhi na iiyalo nenge omiya ndatu dhomukoya, opo dhi kale dha pama. Odha li hadhi kala dha kola noompu okweenditha.

¹⁰ Ngaashi oongaku ndhoka dha li hadhi zalwa kaakwiita yaRoma dha li hadhi ya kwathele ya ye kolugodhi, oongaku dhopathaneko ndhoka hadhi zalwa kAakriste, ohadhi ya kwathele yu uvithe etumwalaka lyombili. (Jes. 52:7; Rom. 10:15) Ihe ohashi pula uulaadhi okuuvithila yalwe. Omumwatate Bo gwomimvo 20, ota ti: “Onda li handi kala nda tila okuuvithila aalongwa yomongundu yetu. Ondi wete kutya onda li ndi na ohoni. Uuna tandi shi dhiladhila, kandi shi kutya omolwashike nda li ngawo. Ngashingeyi ohandi nyanyukilwa okuuvithila oomakula yandje.”

¹¹ Aagundjuka oyendji oye shi mona mo kutya, ngele oyi ilongekidha nawa okuuvitha onkundana ombwanawa, ohaya kala ya manguluka oku shi ninga. Oshike to vulu okuninga wu kale wi ilongekidha? Omumwameme Julia gwomimvo 16, ota ti: “Ohandi kala niileshomwa mondjato yandje yokosikola, nohandi pulakene kwaashoka aalongwa yomongundu yetu taya popi kombinga yaashoka yi itaala. Opo nduno tandi dhiladhila kutya oshike tashi vulu oku ya kwathela. Uuna ndi ilongekidha, ohandi vulu okupopya nayo kombinga yaashoka tashi vulu oku ya etela uuwanawa kondandalunde.” Omumwameme Makenzie gwomimvo 23, ota ti: “Ngele ngoye omunambili noho pulakene nawa, oto ka mona kutya oomakula yoye oye li monkalo yini. Ohandi shilipaleke kutya onda lesha iileshomwa ayihe mbyoka ya nuninwa aagundjuka. Momukalo ngoka, ohandi vulu okuulukila oomakula yandje sha mOmbiimbeli nenge kepandja lyetu lyokointaneta, jw.org, shoka tashi ya kwathele.” Ngaashi aagundjuka ya zi noku shi popya, otu wete kutya ngele owa kala wi ilongekidha okuuvitha, kungawo owa fa wa zala “oongaku” dhe ku gwana nawa.

12, 13. ‘Iikuti yimwe ya hwama omulilo’ yaSatana oyini?

¹² Lesha Aaefeso 6:16, yelekanitha NW. “Oshikandekitho” (NW) shoka sha li hashi humbatwa komukwiita gwaRoma oshi na oongenge ne nosha li hashi kala she mu shiga komapepe sigo omoongolo. Osha li hashi mu gamene kaa tsuwe kiikondjitho ngaashi egonga, egongamwele niikuti.

¹³ ‘Iikuti yimwe ya hwama omulilo’ mbyoka  Satana ha longitha e ku ehameke, iifundja kombinga yaJehova kutya ke na ko nasha nangoye nonokutya kapu na ngoka e ku hole. Omumwameme Ida gwomimvo 19, oha kondjitha omadhiladhilo gokukala u uvite kee na oshilonga. Ota ti: “Olundji onda li handi kala ndu uvite kutya Jehova ke li popepi nangame nonokutya ina hala okukala Kuume kandje.” Mbela ohu ungaunga ngiini nonkalo ndjoka? Ota ti: “Omakugongala ogo unene haga koleke eitaalo lyandje. Onda li handi kala owala nda kuutumba noihandi gandja nando etyokosha, tandi dhiladhila kutya kapu ngoka a hala okupulakena kwaashoka nda hala okutya. Ihe ngashingeyi ohandi ilongekidhile omakugongala nohandi kambadhala okuyamukula lwaali nenge lutatu. Oshidhigu shili, ihe ohandi kala ndu uvite nawa, uuna nde shi ningi. Aamwatate naamwameme ohaya tsu ndje omukumo lela. Kokugongala aluhe ohandi zi ko ndi shi kutya Jehova oku hole ndje.”

14. Oshimoniwa shomumwameme Ida oshe tu longa oshili yini?

¹⁴ Oshimoniwa shomumwameme Ida oshe tu longa oshili ya simana. Oyini? Oshikandekitho shoka shomukwiita kasha li hashi lunduluka nando, ihe eitaalo lyetu hasho li li ngawo, oshoka ohali vulu okukola nenge okunkundipala. Shoka oshi ikolelela kutse yene. (Mat. 14:31; 2 Tes. 1:3) Onkee ano, osha simana tu koleke eitaalo lyetu.

15, 16. Ongiini etegameno lya fa egala lyosheela?

¹⁵ Lesha Aaefeso 6:17. Egala lyosheela ndyoka lya li hali zalwa komukwiita gwaRoma, olya li lya longwa okugamena omutse, othingo noshipala shomukwiita. Omagala gamwe gosheela, oga li ge na oshikongo, opo aakwiita ya vule oku ga humbata.

¹⁶ Ngaashi owala egala lyosheela hali gamene uuluyi womukwiita, “netegameno lyehupitho”  lyetu ohali gamene uuluyi wetu, ano omadhiladhilo getu. (1 Tes. 5:8; Omayel. 3:21) Etegameno ohali tu kwathele tu tsikile okugandja eitulomo komauvaneko gaKalunga nohali tu kwathele wo twaa shune omutse miipeta, omolwomaupyakadhi getu. (Eps. 27:1, 14; Iil. 24:15) Ihe ngele otwa hala ‘egala lyetu lyosheela’ li tu gamene, otu na oku li zala komitse dhetu, ihe haku li humbata miikaha.

17, 18. (a) Ongiini Satana ta vulu oku tu heka tu kuthe ko egala lyetu lyosheela? (b) Ongiini tatu vulu okuulika kutya inatu pukithwa kuSatana?

¹⁷ Ongiini Satana ta vulu oku tu heka tu kuthe ko egala lyetu lyosheela? Tala nkene a li u ungaunga naJesus. Odhoshili kutya Satana okwa li e shi kutya Jesus oku na etegameno lyoku ka pangela aantu. Ihe Jesus okwa li e na okutegelela sigo ethimbo lyaJehova lyoku mu langeka po e li Omukwaniilwa lya thiki. Manga shoka inaashi ningwa, okwa li e na okuhepekwa nokusa. Onkee ano, Satana okwa li a pe Jesus ompito yokugwanitha po etegameno lye nziya. Satana okwa li a lombwele Jesus kutya ngele okwe mu tsile oongolo e ta galikana kuye, ote mu pe ayihe. (Luk. 4:5-7) Sha faathana, Satana oku shi kutya Jehova ote ke tu pa iinima iiwanawa muuyuni uupe. Ihe otu na okutegelela, notashi vulika tu pite moonkalo oondhigu ngashingeyi. Onkee ano, omukalo gumwe Satana he tu makele, okunyanyukilwa onkalamwenyo ombwanawa ngashingeyi. Okwa hala tu pitithe komeho iinima yopamaliko, tu kale tu yi na ayihe ngashingeyi. Satana okwa hala tu tule Uukwaniilwa pondondo ontiyali. — Mat. 6:31-33.

¹⁸ Ngaashi aagundjuka oyendji Aakriste, omumwameme Kiana gwomimvo 20, naye ka li e etha a pukithwe kuSatana. Ota ti: “Ondi shi kutya shoka owala tashi vulu okukandula po omaupyakadhi getu agehe, Uukwaniilwa waKalunga.” Etegameno lya kola ndyoka e na, olya guma ngiini okudhiladhila kwe noonkatu dhe? Ota ti: “Etegameno lyOparadisa ohali kwathele ndje ndaa pitithe komeho iinima yomuuyuni.” Okwa gwedha ko a ti: “Ihandi gandja eitulomo kiinima yomuuyuni mbuka, oshoka oyopakathimbo owala. Pehala lyaashono, ohandi longitha ethimbo lyandje olindji noonkondo dhandje miinima yopambepo.”

19, 20. Ongiini tatu vulu okuhwepopaleka uunkulungu wetu mokulongitha Oohapu dhaKalunga?

¹⁹ Pethimbo Paulus ta nyola ontumwafo ye, omagongamwele ngoka ga li haga longithwa kaakwiita yaRoma, oga li ge na uule woosendimeta 50, noga li ga longelwa olugodhi. Etompelo limwe kutya omolwashike aakwiita yaRoma ya li haya pondola, olyo kutya oya li hayi idheula niikondjitho yawo esiku kehe.

²⁰ Paulus okwa faathanitha Oohapu dhaKalunga negongamwele. Jehova okwe tu pa egongamwele ndyoka. Ihe otu na okwiilonga nkene tu na oku li longitha nawa, uuna tatu popile eitaalo lyetu nenge tatu lundulula omadhiladhilo getu. (2 Kor. 10:4, 5; 2 Tim. 2:15) Ongiini tatu vulu okuhwepopaleka uunkulungu wetu? Omumwatate Sebastian gwomimvo 21, ota ti: “Melesho lyandje lyOmbiimbeli, montopolwa kehe ohandi kutha mo ovelise yimwe noku yi nyola pokuma. Ohandi gongele oovelise ndhoka ndi hole. Okuninga ngawo, okwa kwathela ndje ndi uve ko nkene Jehova ha dhiladhila.” Omumwatate Daniel ngoka a popiwa metetekelo ota ti: “Uuna tandi ningi elesho lyandje lyOmbiimbeli, ohandi hogolola oovelise ndhoka ndi wete kutya otadhi vulu okukwathela aantu mboka tandi tsakaneke muukalele. Onda mona kutya aantu ohayi inyenge nawa, uuna ya mono kutya owu hole shili Ombiimbeli nuuna to ningi ngaashi to vulu wu ya kwathele.”

21. Omolwashike inaatu pumbwa okukala twa tila Satana noompwidhuli dhe?

²¹ Ngaashi aagundjuka ya zi noku shi popya moshitopolwa shika, inatu pumbwa okukala twa tila Satana noompwidhuli dhe. Oye na oonkondo, ihe kadhi vule dhaJehova, noitaya kala sigo aluhe. Pethimbo lyElelo lyOomvula Eyuvi lyaKristus, otaya ka kuthwa oonkondo nokonima otaya ka hanagulwa po. (Eh. 20:1-3, 7-10) Eeno, otu shi omutondi gwetu, omakoto ge nelalakano lye. Kekwatho lyaJehova otatu vulu oku mu kondjitha!