1, 2. (a) Jesus okwa li u uvitile ngiini Ompango yaKalunga? (b) Aalongimpango nAafarisayi oya li haya pengitha ngiini Ompango?

JESUS okwa li e hole Ompango yaMoses. Shoka itashi kumitha, molwaashono oya za kOmuntu ngoka a simanenena monkalamwenyo ye, ano He, Jehova. Ohole yaJesus onene yokuhola ompango yaKalunga, oya li ya hunganekwa mEpisalomi 40:8, ndjoka tayi ti: “Kalunga kandje, ondi hole okugwanitha ehalo lyoye! Otandi dhiginine elongo lyoye momutima gwandje.” Jesus okwa li a koleke moohapu nomiilonga kutya Ompango yaKalunga oya gwanenena, otayi vulu okweetela omuntu uuwanawa nosho wo kutya otayi ka gwanithwa shili. — Mat. 5:17-19.

² Jesus oku na okukala a li u uvite nayi, sho a mono aalongimpango nAafarisayi taya pengitha Ompango yaHe. Aafarisayi oya li haya vulika lela kiitegelelwa iishona yOmpango. Ihe Jesus okwa li a ti kuyo: ‘Ohamu gandja kuKalunga oshitimulongo shiigwanga yaa na oshilonga oshinene; ominti, odili nokumina.’ Mbela epuko lyawo olya li peni? Okwa gwedha ko a ti: “Ihe ohamu etha iinenenima yomompango; uuyuuki, esilohenda nokwiinekelwa.” (Mat. 23:23) Jesus ka li a fa Aafarisayi mboka ya li yi ishi uuyuuki. Okwa li u uvite ko Ompango nokwa li e shi kutya oshipango kehe, otashi holola uukwatya wuni kombinga yaKalunga.

3. Otatu ka kundathana shike moshitopolwa shika?

 ³ Tu li Aakriste, katu li we kohi yOmpango yaMoses. (Rom. 7:6) Nonando ongawo, Ompango ndjoka Jehova okwe yi kwatela wo mOohapu dhe Ombiimbeli, omolwetu. Ina hala owala tu kale tu yi shi, ihe otu yi uve ko notu tule miilonga “iinenenima” yayo, mbyoka yi li omakotampango ga dhenga mbanda. Pashiholelwa, omakotampango geni tatu vulu okwiilonga melongekidho lyiilando yokwiigamena? Oshitopolwa sha tetekele, osha popi shoka tatu ilongo moonkatu ndhoka dha li hadhi katukwa kwaangoka a yona. Miilando yokwiigamena otatu ilongo mo wo kombinga yaJehova nankene tatu vulu okuulika omaukwatya ge. Onkee ano, oshitopolwa shika otashi ka yamukula omapulo ngaka gatatu: Ongiini iilando yokwiigamena tayi ulike ohenda yaJehova? Otayi tu longo shike kombinga yankene a tala ko omwenyo? Otayi ulike ngiini uuyuuki we wa gwanenena? Sho tatu konakona epulo kehe, tala kutya omomikalo dhini to vulu okuholela Tate yetu gwomegulu. — Lesha Aaefeso 5:1.

4, 5. (a) Ongiini nomolwashike sha li oshipu okuya miilando yokwiigamena? (b) Shika otashi tu longo shike kombinga yaJehova?

⁴ Osha li oshipu okuya miilando mbyoka ihamano yokwiigamena. Jehova okwa li a lombwele Aaisraeli yi ihogololele iilando mbyoka koombinga adhihe mbali dhOmulonga gwaJordan. Omolwashike? Opo shi kale oshipu kwaangoka a dhipaga mukwawo kaashi shi owina, a matukile mushimwe shomiilando mbyoka. (Num. 35:11-14) Oondjila dhokuya kiilando mbyoka, odha li hadhi kalekwa monkalo ombwanawa. (Deut. 19:3) Shi ikolelela komuthigululwakalo gwAajuda, moondjila ndhoka omwa li omandhindhiliko ngoka taga kwathele ngoka a dhipaga, a mone iilando mbyoka nuupu. Molwaashono opwa li iilando yokwiigamena, omuntu ngoka a dhipaga mukwawo kaashi shi owina ka li ha thiminikwa a ye kiilongo yilwe, hoka tashi vulika a ka makelwe a ye momalongelokalunga giifundja.

⁵ Dhiladhila kwaashika: Jehova okwa li a gandja elombwelo kutya omuntu ngoka a dhipaga mukwawo owina, naye na dhipagwe. Ihe okwa li wo a popi kutya omuntu ngoka inaa dhipagela mukwawo owina, oku na okugamenwa nokuulukilwa ohenda. Omulongwantu gumwe gwOmbiimbeli okwa ti: “Kehe shimwe osha li sha ningwa oshipu nosha yela ngaashi tashi vulika. Ngono ogwa li omukalo omwaanawa gwaKalunga.” Jehova ke shi omupanguli omwiinayi, ngoka ha kala a halelela okugeela aapiya ye. Pehala lyaashono, oku “udha esilohenda.” — Ef. 2:4.

6. Aafarisayi oya li ye na iikala yini mbyoka kaayi li metsokumwe nohenda yaKalunga?

⁶ Aafarisayi kaya li ye hole okuulukila aantu yalwe ohenda. Pashiholelwa, omuthigululwakalo gwOshijuda, ogu ulika kutya Aafarisayi kaya li ye hole okudhimina po ngoka a ninga epuko lya faathana lwiikando yi vulithe pwiitatu. Opo Jesus u ulike kutya omukalo moka Aafarisayi hayi ihumbatele  mboka ya yona ogwa puka, okwa li a longitha eyele lyOmufarisayi ngoka a li ta galikana popepi nomufendelithi, ngono a li ta galikana neifupipiko a silwe ohenda kuKalunga. Omufarisayi ngoka okwa li a galikana a ti: “Kalunga, otandi ku hambelele, oshoka ngame inandi fa aantu yalwe: aayugi, aakolokoshi naahondeli; otandi ku hambelele wo, sho inaandi fa omufendelithi ngono.” Omolwashike Aafarisayi ya li kaaye hole okuulukila yalwe ohenda? Ombiimbeli oya ti kutya oya li ya ‘dhina aantu yalwe.’ — Luk. 18:9-14.

7, 8. (a) Ngele gumwe a yono kungoye, ongiini to vulu okuholela Jehova? (b) Omolwashike okudhimina po taku pula lela eifupipiko?

⁷ Holela Jehova, ihe hAafarisayi. Ulukila yalwe olukeno. (Lesha Aakolossa 3:13.) Omukalo gumwe gwokuulika olukeno, oku shi ninga oshipu kuyalwe ya pule edhiminopo kungoye. (Luk. 17:3, 4) Ipula ngeyi: ‘Mbela ohandi dhimine po ngaa mboka yu uvitha ndje nayi, nonando otaye shi ningi lwiikando? Mbela ohe kala ngaa nda halelela okupanga ombili naangoka u uvitha ndje nayi?’

⁸ Okudhimina po gulwe oshinima tashi pula lela eifupipiko. Aafarisayi oya li ya ndopa okuulika eifupipiko, molwaashono oya li ya dhina yalwe. Tu li Aakriste, otu na okwiifupipika kiipala yayakwetu moku ya dhimina po tashi zi komutima, tse twaa ‘dhiladhile kutya otse aawanawa tu ya vule.’ (Fil. 2:3) Mbela oto ka holela ngaa uukwatya waJehova weifupipiko? Ngele otwa kala aaifupipiki, otashi ka kala oshipu kuyalwe okupula edhiminopo kutse noku ya dhimina po. Ino kala ho geye mbala, ihe kala ho ulukile nziya yalwe ohenda. — Omuuv. 7:8, 9.

9. Ongiini Jehova a li a kwathele Aaisraeli ya mone kutya omwenyo gwomuntu omuyapuki?

⁹ Elalakano lya simanenena lyiilando yokwiigamena, olya li okugamena Aaisraeli kaaya kale ye na ondjo yombinzi. (Deut. 19:10) Jehova okwa simaneka omwenyo, noku tonde “iikaha tayi tilehi ombinzi yaa na ondjo.” (Omayel. 6:16, 17) E li Kalunga omuyuuki nomuyapuki, oku na ko nasha wo nedhipago lyaa shi lyoshiningilawina. Odhoshili kutya omuntu ngoka a dhipaga mukwawo kaashi shi oshiningilawina, okwa li hu ulukilwa ohenda. Nonando ongawo, okwa li he shi lombwele aakuluntugongalo. Uuna a pangulwa, e ta monika kutya ine shi ningila owina, okwa li ha kala moshilando shokwiigamena sigo omuyambi omukuluntu a si. Moshilando moka, okwa li ha vulu okukala mo onkalamwenyo ye ayihe. Elongekidho ndika olya li lya kwathele Aaisraeli ayehe, ya mone kutya omwenyo omuyapuki. Opo ya simaneke Omugandji gwOmwenyo, oya li ye na okuyanda kehe shoka tashi vulu okufala omwenyo gwagulwe moshiponga.

10. Shi ikolelela kwaashoka Jesus a popi, aalongimpango nAafarisayi oya li yu ulike ngiini kutya kaye na ko nasha noomwenyo dhayalwe?

¹⁰ Jehova ina fa aalongimpango nAafarisayi mboka kaaya li ya simaneka omwenyo. Ngiini mbela? Jesus okwa ti kuyo: “Omwa kutha po oshipatululo shokweegulula omweelo gwegumbo lyuunongo. Ne yene sho itaamu yi mo, otamu keelele mboka ya hala okuya mo.” (Luk. 11:52) Aalongimpango nAafarisayi oya li ye na okufatululila aantu Oohapu dhaKalunga noku ya kwathela ye ende mondjila ndjoka tayi fala komwenyo gwaaluhe. Ihe pehala lyaashono, oye ya hedhitha  kokule ‘nOmugandji gwomwenyo,’ Jesus, noku ya enditha mondjila ndjoka tayi fala mehanagulo lyaaluhe. (Iil. 3:15) Molwaashono aalongimpango nAafarisayi oya li ye na uuntsa noyi ihole yo yene, kaya li ye na ko nasha lela nonkalamwenyo nosho wo onkalonawa yaantu. Kaya li tuu ye na onyanya nokaaye na ohenda!

11. (a) Omuyapostoli Paulus okwa li u ulike ngiini kutya okwa tala ko omwenyo ngaashi Kalunga e gu tala ko? (b) Oshike tashi ke tu kwathela tu kale niikala ya fa yaPaulus, uuna tu li muukalele?

¹¹ Ongiini tatu vulu okuyanda iikala yaalongimpango nAafarisayi, e tatu holele Jehova? Otu na okukala twa simaneka notwa lenga omagano gomwenyo. Omuyapostoli Paulus okwa li u ulike kutya okwa simaneka omwenyo, sho u uvithile yalwe nuulaadhi. Shoka oshe mu inyengitha a popye ta ti: “Ongame kandi na oondjo dhombinzi nando yomuntu.” (Lesha Iilonga 20:26, 27, OB-1954.) Paulus inu uvithila aantu molwaasho inaa hala okukala e na ondjo yombinzi nenge molwaasho shi li oshinakugwanithwa shoka e na okuninga. Pehala lyaashono, okwa li e hole aantu nokwe ya tala ko ye na ondilo momeho ge. (1 Kor. 9:19-23) Natse wo natu kambadhale okutala ko omwenyo ngaashi Kalunga. Jehova “okwa hala, aantu ayehe ye ethe uulunde wawo.” (2 Pet. 3:9) Mbela nangoye osho wa hala? Oto ka mona kutya okukala nohenda, otaku ke ku inyengitha wu tamunune mo uukalele woye notashi ke ku etela enyanyu enene.

12. Omolwashike egameno lya simana kaapiya yaKalunga?

¹² Opo tu kale twa tala ko omwenyo ngaashi Jehova, otwa pumbwa wo okukala netaloko ewanawa kombinga yegameno. Otwa pumbwa okuhinga nawa, uuna tatu yi komahala gokugongalela nokulonga tu li megameno, uuna tatu tungu notatu opalekulula omahala ngoka. Egameno nuukolele waantu, oya simana shi vulithe iimaliwa nomaipyakidhilo. Kalunga ketu omuyuuki, oha longo aluhe shoka shi li mondjila nosho opala. Otwa hala okukala twe mu fa. Aakuluntugongalo oye na okukala ye na ko nasha negameno lyawo nosho wo lyayalwe. (Omayel. 22:3) Ngele omukuluntugongalo okwe ku dhimbulukitha oompango nomithikampango dhi na ko nasha negameno, taamba ko omayele ge. (Gal. 6:1) Tala ko omwenyo ngaashi Jehova e gu tala ko, opo ‘waa kale wu na ondjo yombinzi.’

13, 14. Aakuluntugongalo yomuIsraeli, oya li taya vulu ngiini okuulika uuyuuki waJehova?

¹³ Jehova okwa li a lombwele aakuluntugongalo yomuIsraeli ya holele uuyuuki we, mboka wa dhenga mbanda. Tango oya li ya pumbwa okukala ye shi ashihe shoka sha kwatelwa mo. Opo nduno taya konakona nawa omainyengotompelo niikala yanakudhipaga nosho wo nkene a li i ihumbata sho taya tokola kutya ota silwa ohenda nenge hasho. Opo aakuluntugongalo yu ulike uuyuuki waKalunga, oya li ye na okutala ngele omudhipagi okwe shi ningi ‘nuutondwe nonowina.’ (Lesha Numeri 35:20-24.) Uuna omuntu ta tamanekelwa edhipago, opwa pumbwa ngaa okukala nando oonzapo mbali ndhoka dhi na okugandja uumbangi, manga inaa tokolwa. — Num. 35:30.

¹⁴ Konima ngele aakuluntugongalo ya konakona ashihe shoka sha kwatelwa mo, oya li ye na wo okudhiladhila komuntu ye mwene, ihe haku tala owala kwaashoka a ninga. Oya li ya pumbwa oondunge, okudhiladhila oshinima muule nosho wo okumona etompelo kutya omolwashike sha ningwa. Komeho gaayihe, oya li ya pumbwa ombepo ondjapuki, ndjoka ya li tayi ke ya kwathela ya kale ye na oondunge, ohenda nuuyuuki. — Eks. 34:6, 7.

15. Omukalo ngoka Jesus a li a tala ko aalunde ogwa li gwa yooloka ko ngiini kwaangoka gwAafarisayi?

¹⁵ Aafarisayi oya li haya gandja unene eitulomo kwaashoka omuyoni a ninga, pehala lyokutala kutya okwa li omuntu a tya ngiini. Sho Aafarisayi ya mono Jesus e ya koshililo kaandjaMateus, oya pula aalongwa ye ya ti: “Omulongi gweni omolwashike ta lile pamwe naafendelithi naalunde?” Jesus okwe ya yamukula a ti: “Aandjolowele itaa pumbwa omwaaludhi, ihe aavu tuu ayeke. Indeni ihe, mu ka konakone enyolo ndika, shoka tali ti:  ‘Okusila ohenda oku vulile ndje okugandja omayambo.’ Oshoka inandi ya okwiithana mboka yi iwete aayuuki, ihe aalunde tuu.” (Mat. 9:9-13) Mbela Jesus okwa li ta popile aalunde? Hasho nando. Etumwalaka lyaJesus olya li tali ladhipike aalunde yi itedhulule. (Mat. 4:17) Onkee ano, Jesus okwa li e shi dhimbulula kutya ‘aafendelithi naalunde’ yamwe oya li ya hala okuninga omalunduluko. Kaya li owala ya yi kegumbo lyaMateus nelalakano lyokulya. Pehala lyaashono, “oyendji yomuyo oya li ye mu landula [Jesus].” (Mark. 2:15) Shiyemateka, Aafarisayi oyendji oya li ya ndopa okumona shoka Jesus a mono momitima dhaafendelithi naalunde mboka. Aafarisayi oya li yi itaala kutya aantu mboka itaya vulu okuninga omalunduluko nonokutya kaye na etegameno lyasha. Etaloko lyawo kalya li tuu lya yooloka ko kulyaKalunga ngoka omuyuuki nomunahenda!

16. Aakuluntugongalo mboka ye li mookomitiye dhoompangu oye na okutala shike nuukeka?

¹⁶ Aakuluntugongalo kunena oye na okuholela Jehova, ngoka e “hole shoka shu uka.” (Eps. 37:28) Tango oya pumbwa ‘okukonakona nokupulakena nawa lela,’ opo ya mone ngele eyono ndyoka olya ningwa shili. Ngele olya ningwa shili, oye na okuungaunga nalyo shi ikolelela kOmanyolo. (Deut. 13:12-14) Aakuluntugongalo mboka ye li mookomitiye dhoompangu, oye na okutala nuukeka ngele Omukriste ngoka a yona eyono lya kwata miiti, okwi iyela ombedhi shili. Haaluhe hashi kala oshipu oku shi mona. Osha kwatela mo nkene omuyoni a tala ko eyono lye nosho wo shoka shi li momutima gwe. (Eh. 3:3) Omuyoni oku na okwi iyela ombedhi, opo a silwe ohenda. *

17, 18. Ongiini aakuluntugongalo taya vulu okumona kutya omuntu okwi iyela ombedhi shili? (Tala kethano lyopetameko.)

¹⁷ Aakuluntugongalo ihaya vulu okumona shoka shi li momitima dhaantu, ihe Jehova naJesus ohaya vulu. Ngele owu li omukuluntugongalo, ongiini nduno to vulu oku shi mona ngele omuntu okwi iyela ombedhi shili? Shotango, galikana kuKalunga e ku pe uunongo noondunge dhokuyoolola. (1 Aak. 3:9) Oshitiyali, konakona Oohapu dhaKalunga niileshomwa mbyoka ya za komupiya omudhiginini, yi ku kwathele wu mone eyooloko pokati ‘koluhodhi lwopauyuni’ ‘noluhodhi ndoka lwa hokiwa kuKalunga,’ ndoka talu ulike shili kutya omuntu okwi iyela ombedhi. (2 Kor. 7:10, 11) Tala nkene Omanyolo taga ti kombinga yaangoka i iyela ombedhi naangoka ini iyela ombedhi. Mbela Ombiimbeli otayi yelitha ngiini kombinga yomaiyuvo gawo, iikala yawo noyeihumbato lyawo?

¹⁸ Hugunina, dhiladhila kombinga yomuntu ngoka, ihe hakwaashoka owala a ninga. Tala kutya omuyoni oku na omainyengotompelo nomangambeko geni nosho wo kutya onakuziwa ye oyi li ngiini. Ombiimbeli oya hunganeka kombinga yaJesus, ngoka e li omutse gwegongalo lyopaKriste, ya ti: “Iha pangula pakutala kwomeho, ye iha tokola pakuuva omauvila, ihe ohu uthile oonakuhepa nuuyuuki nota popile uuthemba woohepele moshilongo.” (Jes. 11:3, 4) Aakuluntugongalo, Jesus okwe mu langeka po mu sile egongalo lye oshimpwiyu, note ke mu kwathela mu pangule nuuyuuki nonohenda. (Mat. 18:18-20) Mbela inatu nyanyukwa sho tu na aakuluntugongalo mboka haya kambadhala okuninga ngawo? Otwa pandula lela, sho haya ningi oonkambadhala dha mana mo ya humithe komeho ohenda nuuyuuki momagongalo.

19. Melongekidho lyiilando yokwiigamena owi ilonga mo shike, shoka wa hala okutula miilonga?

¹⁹ Ompango yaMoses oyu ulika “ehuku lyuunongo nolyoshili” kombinga yaJehova nosho wo yomakotampango ge guuyuuki. (Rom. 2:20) Pashiholelwa, iilando yokwiigamena, otayi longo aakuluntugongalo nkene ye na ‘okupangula nuuyuuki,’ notayi tu longo atuhe nkene tu na ‘okuulukilathana ohole yuudhiginini nesilohenda.’ (Sak. 7:9) Katu li we kohi yOmpango yaMoses. Nonando ongawo, Jehova iha lunduluka, nomaukwatya ge ngaashi ohenda nuuyuuki oga simana natango kuye. Oshi li uuthembahenda okulongela Kalunga, molwaashono otwa shitwa oshifetha she. Puye opo tatu vulu okumona egameno noku na omaukwatya ngoka tatu vulu okuholela.