OMUMWATATE ALLEN * okwa ti: “Onda li tandi ipula unene kombinga yokutembukila huka. Kanda li ndi shi ngele onandi ka mone ngaa ookuume nenge kutya otandi ka taambiwa ko ngaa.” Allen ote ende ti igilile egongalo epe moka a tembukila, ndyoka li li ookilometa dhi vulithe 1 400 naahoka a za.

Ngele nangoye owa tembukila kegongalo lilwe, otashi vulika nangoye wu na uumbanda. Oshike nduno tashi vulu oku ku kwathela wu ninge omalunduluko? Oshike to vulu okuninga po, ngele owu wete oshidhigu okuninga omalunduluko? Ngele ino tembukila kegongalo lilwe, ongiini to vulu okukwathela mboka aape ya tembukila megongalo lyeni?

Dhiladhila koshiholelwa shika: Uuna omiti dha kuthwa mpoka dha li dha mena, ihashi kala oshipu kudho petameko. Uuna tadhi lundululwa, omidhi dhadho odhindji ohadhi tetwa, opo shi kale oshipu oku dhi humbata. Ngele dha tsikwa, ohadhi tameke okumena omidhi omipe. Sha faathana, okutembukila kegongalo lilwe, otashi vulika shi kale oshidhigu kungoye. Megongalo lyoye ekulu, owa li wa menena mo omidhi, sho wa li wu na mo ookuume nosho wo ondjigilile yokulongela Jehova. Ihe ngashingeyi owu na okumena omidhi omipe, opo wu nyanyukilwe ehala mpoka wa tembukila. Oshike tashi ke ku kwathela wu shi ninge? Tula miilonga omakotampango gopamanyolo. Natu konakoneni gamwe gomugo.

Omuntu ngoka ha lesha aluhe Oohapu dhaKalunga okwa “fa omiti dha mena mooha dhomatondokelo gomeya, hadhi imi pethimbo lyu uthwa, nomafo gadho ihaga ganya. Ashihe shoka taye shi longo otashi eta eyambeko.” — Eps. 1:1-3.

Ngaashi owala omuti gwa pumbwa okutekelwa aluhe, opo gu kale gwa hapa nawa, Omukriste naye oku na aluhe okukala ti ipalutha nOohapu dhaKalunga, opo a kale a kola pambepo. Onkee ano, tsikila okulesha Ombiimbeli esiku kehe nokuya kokugongala pandjigilile. Kala ho ningi elongelokalunga lyuukwanegumbo nekonakonombiimbeli lyopaumwene pandjigilile. Kehe shimwe wa li ho ningi kegongalo lyoye ekulu, opo wu koleke ekwatathano lyoye naJehova, owa pumbwa wo oku shi ninga kegongalo lyoye epe.

‘Ngoka ta hekeleke yalwe, ota hekelekwa wo.’ — Omayel. 11:25.

Oto ka kala wu na omukumo noto ki igilila mbala egongalo moka wa tembukila, uuna to kutha ombinga nuulaadhi muukalele. Omumwatate Kevin ngoka e li omukuluntugongalo, okwa ti: “Shoka sha li she tu kwathele lela nomukulukadhi gwandje nziya konima sho twa tembukile megongalo lyetu epe, uukwathelikokolindjila. Otwa tseya mbala aamwatate naamwameme, aakokolindjila nosho wo oshitopolwa.” Omumwatate Roger ngoka a tembukila kegongalo li li ookilometa dhi vulithe 1 600 okuza kehala hoka a za, okwa ti: “Omukalo omwaanawa gwokwiigilila egongalo epe, okuya muukalele olundji ngaashi tashi vulika. Oshikwawo, tseyithila aakuluntugongalo kutya oto vulu okukwathela momikalo dhontumba, tashi vulika mokwoopaleka Oshinyanga shUukwaniilwa, okukalela po iitopolwa yayalwe pokugongala nenge okufaalela yalwe kokugongala, ngele owu na osheenditho. Uuna aamwatate naamwameme ya mono kutya owu na ombepo yokwiiyamba, otaye ku taamba ko nuupu.”

‘Egululeni omitima dheni.’ — 2 Kor. 6:13.

Mbwalangandjeka ohole yoye yokuhola aamwaho. Konima sho omumwameme Melissa naanegumbo lye ya tembukile kegongalo epe, oya li ya kambadhala okupanga uukuume nayalwe. Okwa ti: “Otwa kala hatu endathana naamwatate naamwameme pOshinyanga shUukwaniilwa  manga okugongala inaaku tameka nongele kwa piti mo. Shono osha kala hashi tu pe ethimbo lyokupopya nayo, pehala owala lyoku ya popitha.” Shoka osha li wo sha kwathele uukwanegumbo mboka wu tseye omadhina gayalwe mbala. Shimwe ishewe, oya li yu ulike ohole mokuyakula yalwe, shoka sha li sha koleke uukuume mboka ya panga nayalwe. Omumwameme ngoka okwa gwedha ko a ti: “Otwa li twa paathana oonomola dhoongodhi, opo tu vule okukwatathana notu popye iinima yopambepo nosho wo yilwe.”

Ngele kashi shi oshipu kungoye okupopya naantu aape, oto vulu okutamekela kuunima uushona. Pashiholelwa, imemeha, nonando petameko ku na naanaa ehalo lyoku shi ninga. Okwiimemeha otaku ka nanena yalwe kungoye. Ombiimbeli otayi ti: “Omeho haga adhima otaga nyanyudha.” (Omayel. 15:30) Omumwameme Rachel, ngoka a tembukila kegongalo li li kokule naahoka a kokela, okwa ti: “Ondi na ohoni paunshitwe. Omathimbo gamwe, ondi na lela okwiikondjitha ndi popye naamwatate naamwameme megongalo lyetu epe. Ohandi tala ngoka a kuutumba mOshinyanga shUukwaniilwa kee na ngoka ta popi naye. Omuntu ngoka otashi vulika e na ohoni a fa ndje.” Omolwashike itoo itulile po elalakano lyokupopya nagumwe ngoka omupe megongalo, manga okugongala inaaku tameka nenge ngele kwa piti mo?

Mepingathano naashono, otashi vulika miiwike yopetameko wu kale wa nyanyukwa okutsakanena naantu aape. Ihe mokweendela ko kwethimbo, iho kala we wu uvite ngaashi petameko. Pompito ndjoka, otashi vulika wa pumbwa okutsikila okuninga oonkambadhala wu konge ookuume aape.

Omiti dhimwe ohadhi kutha ethimbo, opo dhi tsame mehala epe moka dha tsikwa. Sha faathana, hakehe gumwe hi igilile mbala egongalo epe moka a tembukila. Ngele owa tembukila megongalo lilwe omathimbo opo ga zi ko, ihe natango oshidhigu okwiigilila mo, okutula miilonga omakotampango gOmbiimbeli ngaka otaku vulu oku ku kwathela:

“Inatu vulweni okulonga uuwanawa, oshoka ngele itatu seni uunye, nena ethimbo otali ke ya, uuna tatu ka teya iiyimati.” — Gal. 6:9.

Pehala lyokukala wa hala okwiigilila mbala egongalo epe, ipa ethimbo olindji lyoku shi ninga. Pashiholelwa, aatumwa oyendji mboka ya dheulwa kosikola yaGilead, ohaya kala manga omimvo dhontumba miilongo moka ya tuminwa, nokonima opo nee taya shuna ya ka talele po kiilongo yawo. Shono ohashi ya kwathele ya kale ye na ekwatathano lya kola naamwatate naamwameme yomoshitopolwa noyi igilile eputuko lyawo.

Omumwatate Alejandro ngoka a tembuka lwiikando, oku shi kutya okwiigilila pehala lyontumba kashi shi oshinima hashi ningwa nziya. Okwa ti: “Oshikando shahugunina twa tembuka, omukulukadhi gwandje okwa ti: ‘Ookuume kandje ayehe oye li kegongalo lyetu ekulu!’” Omusamane gwe okwa li e mu dhimbulukitha kutya shoka osho naanaa a popile omimvo mbali dha ka pita, ano oshikando sha zile ko sho ya tembuka. Ihe muule womimvo ndhoka mbali, okwa li u ulike ohokwe muyalwe, naamboka a li e wete itee ki igilila, oya ningi ookuume ke.

“Ino tya: ‘Omasiku gonale oshike ga li omawanawa ge vule gongashingeyi?’ Oshoka ito shi popi moondunge.” — Omuuv. 7:10.

Yanda okuyelekanitha egongalo lyoye epe naandyoka ekulu. Pashiholelwa, aamwatate yomegongalo ndyoka epe otashi vulika haya popi ya manguluka nenge ya mwena shi vulithe yokegongalo ekulu. Nonando ongawo, gandja eitulomo komaukwatya gawo omawanawa, ngaashi owala wa hala ya gandje eitulomo komaukwatya goye omawanawa. Yamwe mboka aape, okutembuka kwawo  ohaku ya ningitha yi ipule taya ti: “Mbela ondi hole ngaa shili ‘ooitaali ooyakwetu ayehe’?” — 1 Pet. 2:17.

“Indileni, e tamu pewa.” — Luk. 11:9.

Tsikila okupula ekwatho kuJehova. Omukuluntugongalo gwedhina David, okwa ti: “Ino kambadhala okuungaunga nonkalo kungoye mwene. Iinima oyindji otatu vulu owala oku yi ninga kekwatho lyaJehova. Galikana kombinga yasho!” Rachel ngoka a popiwa metetekelo, ota tsu kumwe nasho. Okwa ti: “Ngele ngame nomusamane gwandje otu uvite kutya katu na naanaa ekwatathano negongalo, ohatu galikana kuJehova tatu ti: ‘Jehova tu kwathela tu tseye ngele ohatu ningi shoka tashi ningitha yalwe ya kale kokule natse.’ Opo nduno ohatu kambadhala okukala ethimbo olindji naamwatate naamwameme.”

Aavali, ngele aanona yeni otaya nyengwa okwiigilila egongalo epe, galikaneni pamwe nayo kombinga yuupyakadhi mboka. Ya kwatheleni ya pange uukuume naantu yomegongalo moka, mokukonga oompito dhokunyanyukilwa eendathano tali tungu nooitaali ooyakweni.

Oshike to vulu okuninga po, wu kwathele mboka aape ya tembukila megongalo lyeni? Kambadhala okukala kuume kashili okuza petameko. Opo wu shi ninge, kambadhala okudhiladhila kutya iinima yini to ka kala wa hala okuningilwa, uuna wa ya kegongalo lilwe, opo ihe to yi ya ningile. (Mat. 7:12) Mbela mbono aape itaya vulu okukala po pelongelokalunga lyuukwanegumbo weni nenge mu tale pamwe opolohalama yotiivii JW, ndjoka hayi piti omwedhi kehe? Mbela ito vulu oku ya hiya mu ka longe pamwe nayo muukalele? Ngele owe ya hiya mu lye pamwe nayo, itaya ka dhimbwa eyakulo lyoye. Ekwatho limwe lini to vulu oku ya pa?

Omumwatate Carlos, okwa ti: “Sho twe ya megongalo lyetu epe, omumwameme gumwe okwa li e tu pe omusholondondo gwoositola ndhoka dhi na oondando dhi li hwepo. Shono osha li she tu kwathele lela.” Mboka ya za kiilongo hoka ku na onkalo yombepo ya yooloka, otashi vulika ye ke shi pandule okwiilonga nkene ye na okuzala pethimbo lyuupyu, lyuutalala nenge lyomvula. Oto vulu wo oku ya kwathela ya kuthe ombinga nuulaadhi muukalele, moku ya lombwela nkene aantu hayi inyenge moshitopolwa nenge shoka yi itaala.

Omumwatate Allen ngoka a tumbulwa metetekelo, okwa kala megongalo lye epe uule womvula nasha. Okwa ti: “Petameko, osha li oshidhigu okutseya aamwatate naamwameme. Ihe ngashingeyi oya fa aanegumbo lyandje, nonda nyanyukwa.” Omumwatate Allen, okwa mona kutya ina kanitha nando ookuume ke, sho a tembukile kegongalo lilwe. Pehala lyaashono, okwi imonena ookuume aape, mboka tashi vulika ya ka kale ookuume ke sigo aluhe.