1, 2. (a) Aapiya yaKalunga oya tegelela oku ka mona ondjambi yini? (b) Oshike tashi tu kwathele tu kale twa tala kondjambi? (Tala kethano lyopetameko.)

NGAASHI omuyapostoli Paulus, Aakriste aagwayekwa kunena oye na etegameno li na ondilo lyokumona ‘ondjambi yomwenyo gwomegulu, ngoka Kalunga e gu ya ithanena.’ (Fil. 3:14) Oya tegelela oku ka pangela pamwe naJesus Kristus mUukwaniilwa we womegulu, noku ka longa pamwe naye mokukwathela aantu ya kale ya gwanenena. (Eh. 20:6) Odhoshili kutya ndyoka elalakano ewanawa yi ithanenwa kuKalunga. Oonzi dhilwe odhi na etegameno lya yooloka ko kwaandyoka. Odha tegelela oku ka mona ondjambi yomwenyo gwaaluhe kombanda yevi, ndjoka yi li etegameno linyanyudha. — 2 Pet. 3:13.

² Paulus okwa li a ladhipike Aakriste ooyakwawo aagwayekwa, ya kale aadhiginini, opo ya vule okumona ondjambi yawo. Okwa ti: “Dhiladhileni iinima yaahwiyaka kombanda.” (Kol. 3:2) Oya li ye na okukaleka momadhiladhilo etegameno ndyoka li na ondilo, lyokumona uuthiga wawo womegulu. (Kol. 1:4, 5) Odhoshili kutya okudhiladhila komayambeko ngoka Jehova a nunina aantu ye, otaku kwathele aapiya ye ayehe kutya nduno oomboka ye na etegameno lyomegulu nenge  lyokukala kombanda yevi, ya kale ya tala kondjambi. — 1 Kor. 9:24.

3. Paulus okwa li a londodha Aakriste ooyakwawo kombinga yiinima yini ya nika oshiponga?

³ Paulus okwa li wo a londodha Aakriste ooyakwawo, kombinga yiinima ya nika oshiponga mbyoka tayi vulu oku ya keelela kaaya mone ondjambi. Pashiholelwa, okwa li a nyolele egongalo lyomuKolossa kombinga yAakriste yiifundja, mboka ya li taya kambadhala okukala ya hokiwa kuKalunga okupitila miilonga yOmpango, pehala lyokukala ye na eitaalo muKristus. (Kol. 2:16-18) Paulus okwa li wo a popi kombinga yiinima ya nika oshiponga, mbyoka yi li ko kunena tayi vulu oku tu keelela kaatu ka mone ondjambi. Pashiholelwa, okwa li a yelitha nkene tatu vulu okukondjitha omahalo ga puka, nkene tatu vulu okuungaunga nomaupyakadhi pokati ketu nooitaali ooyakwetu nosho wo pokati ketu naanegumbo lyetu. Omayele gaPaulus ngoka, otaga vulu oku tu kwathela nokunena. Onkee ano, natu ka kundathaneni gamwe gomomalondodho ge gopahole, ngoka taga adhika montumwafo ndjoka a li a nyolele Aakolossa.

4. Omolwashike omahalo ga puka taga vulu oku tu keelela kaatu ka mone ondjambi?

⁴ Konima sho Paulus a dhimbulukitha aamwahe kombinga yetegameno lyawo ekumithi, okwa nyola a ti: “Dhipageni ano uuhalu weni wopavi mboka tau longo mune ngashika oluhondelo, iipala, uuholume nuuhalu uuwinayi nolwiho.” (Kol. 3:5) Omahalo ga puka otaga vulu okukala ge na oonkondo notaga vulu oku tu ningitha tu kanithe ekwatathano lyetu naJehova nosho wo etegameno lyetu. Omumwatate gumwe ngoka a li a yi moluhondelo, omolwomahalo ga puka, nokonima e ta galulilwa megongalo, okwa ti: “Omahalo oga li ga tono ndje oonkondo, nokanda li we tandi vulu oku ga kondjitha.”

5. Ongiini tatu vulu okwiigamena, uuna tu li moonkalo dha nika oshiponga?

⁵ Osha simanenena okukala twa kotoka, uuna twa taalelwa koonkalo ndhoka tadhi vulu oku tu ningitha kaatu vulike komithikampango dhaJehova dhopamikalo. Pashiholelwa, oshi li pandunge kwaamboka taye endelathana yi itulile po omangambeko kombinga yiinima ngaashi okwiiguma komalutu, okwiihupita nenge okukala pehala oyo ayeke. (Omayel. 22:3) Onkalo yimwe ishewe tashi vulika yi kale ya nika oshiponga, ongele Omukriste a yi niilonga kehala lyontumba nenge ta longo nomuntu gwuukashikekookantu wa yooloka ko kuwe. (Omayel. 2:10-12, 16) Ngele owi iyadha moonkalo ndhoka, ulika kutya ngoye Onzapo yaJehova. Ihumbata wo momukalo gwesimaneko, ngoye dhimbulukwa natango kutya okukala wu na iihole nomuntu, otashi vulu oku ku etela iilanduliko yinikitha oluhodhi. Ngele otwa gwililwa po notu uvite kaatu niwe natse, iinima mbyoka otayi vulu wo oku tu falitha muupyakadhi lela. Poompito dha tya ngawo, otashi vulika tu kale twa halelela omuntu ngoka te tu ningitha tu kale tu uvite tu na oshilonga. Otashi vulika nokuli tu kale twa halelela okuulukilwa ohole kukehe gumwe. Ngele oho kala wu uvite ngawo, pula Jehova e ku kwathele. Pula wo aapiya ye ye ku kwathele, opo kuu ethe sha shilwe shi ku imbe oku ka mona ondjambi. — Lesha Episalomi 34:18; Omayeletumbulo 13:20.

6. Oshike tu na okukaleka momadhiladhilo, uuna tatu hogolola omainyanyudho?

⁶ Opo tu dhipage omahalo omawinayi, otwa pumbwa okukala kokule nomainyanyudho ga nyata. Omainyanyudho ogendji kunena, oga faathana naashoka sha li tashi ningwa muSodom naGomorra. (Jud. 7) Mboka taya kwatele komeho omainyanyudho ngoka, otaya humitha komeho edhiladhilo ndyoka kutya oluhondelo oshinima shi li nawa, nonokutya itashi vulu okweetela omuntu iilanduliko yinikitha oluhodhi. Nonando ongawo, tse otu na okukala twa kotoka, katu na nando okweetha tu taambe ko omainyanyudho ngoka ga puka. Otwa pumbwa okuhogolola omainyanyudho ngoka itaage tu keelele okutala kondjambi yoku ka mona omwenyo gwaaluhe. — Omayel. 4:23.

7. Uupyakadhi wuni tashi vulika wu holoke megongalo lyopaKriste?

⁷ Atuhe otatu tsu kumwe kutya okukala megongalo lyopaKriste oshi li eyambeko. Okukonakona Oohapu dhaKalunga pokugongala nosho wo okuyambidhidhathana pahole, ohayi tu kwathele tu kale twa tala kondjambi. Nonando ongawo, okwaauvathana hoka haku holoka omathimbo gamwe pokati kaamwatate naamwameme, otashi vulika ku ete uupyakadhi megongalo. Ngele otwa ndopa okukandula po uupyakadhi mboka, otashi vulu oku tu ningitha tu kale tu ninathane iikonene. — Lesha 1 Petrus 3:8, 9.

8, 9. (a) Omaukwatya geni twa pumbwa okukala tu na, ngoka tage ke tu kwathela tu mone ondjambi? (b) Oshike tashi vulu oku tu kwathela tu kaleke po ombili, uuna Omukriste omukwetu e tu uvitha nayi?

⁸ Ongiini tatu vulu okuyanda okukwatelathana onkone, hoka taku vulu oku tu imba tu ka mone ondjambi? Paulus okwa li a ladhipike Aakolossa a ti: “One aantu yaKalunga. Kalunga oku mu hole nokwe mu hogolola, mu kale aantu ye mwene. Onkee ano kaleni mu na olukeno, ohenda, eifupipiko, ombili neidhidhimiko. Kwathathaneni, dhiminathanii po oondjo ethimbo kehe, uuna pe na ngoka a ningathana namukwawo. Dhiminathanii po oondjo naanaa, ngashika Omuwa e mu dhimine po. Kumbika ayihe gwedhii ko ohole, oshoka ohole oyo epaya tali vulu okumangela iinima ayihe kumwe.” — Kol. 3:12-14.

⁹ Ohole nohenda otayi vulu oku tu kwathela tu kale hatu dhiminathana po. Pashiholelwa, ngele otu uvite tu uvithwa nayi koohapu nenge keihumbato lyOmukriste omukwetu, natu kambadhale okudhimbulukwa oompito ndhoka wo natse twa li twa popi momukalo kaagu shi gwombili nenge twi ihumbata nayi. Mbela ohatu pandula tuu ohole nohenda yaamwatate naamwameme mboka ihaaya tala komapuko getu? (Lesha Omuuvithi 7:21, 22.) Otwa pandula noonkondo, sho Kristus e tu hanganitha omolwohenda ye, tu li aalongelikalunga yashili. (Kol. 3:15) Atuhe otu hole Kalunga gumwe, ohatu uvitha etumwalaka limwe nohatu adhika komamakelo ogendji ga faathana. Ngele otwa kala hatu dhiminathana po pahole, kungawo otatu ambidhidha uukumwe wetu wopaKriste nokukala twa tala kondjambi yoku ka mona omwenyo gwaaluhe.

10, 11. (a) Omolwashike efupa lya nika oshiponga? (b) Ongiini tatu vulu okuyanda efupa, ndyoka tali vulu oku tu imba tu ka mone ondjambi?

¹⁰ MOmbiimbeli omu na iiholelwa tayi londodha, mbyoka tayi tu dhimbulukitha kutya okusilathana efupa otaku vulu oku tu imba kaatu ka mone ondjambi. Pashiholelwa, Kain okwa li a sile efupa omumwayinamati, Abel, e te mu dhipaga. Kora, Datan naAbiram oya li ya sile efupa Moses noya li ye mu pataneke. Natango, omukwaniilwa Saul okwa li a sile David efupa sho te shi enditha nawa, e ta kambadhala oku mu dhipaga. Shoka otashi tsu kumwe lela nOmbiimbeli, sho tayi ti: “Mpoka aantu ya silathana efupa noye hole olugodhi, opo wo pu na evundakano nuuwinayi auhe.” — Jak. 3:16.

¹¹ Ngele otwa kala tu na ohole nohenda, itatu ka sila yalwe efupa nuupu. Oohapu dhaKalunga otadhi ti: “Ohole ohayi idhidhimikile ayihe noyi na olukeno. Ohole ihayi si efupa.” (1 Kor. 13:4) Opo tu yande okukokeka efupa momitima dhetu, otu na okukala hatu tala ko iinima ngaashi Jehova he yi tala ko. Otu na wo okutala ko aamwatate naamwameme ye li iilyo yolutu lumwe, sha hala okutya yegongalo lyopaKriste. Shoka otashi ke tu kwathela tu ulike uukwawo wanankali, shoka shi li metsokumwe nomayele ga nwethwa mo ngaka taga ti: ‘Ngele oshilyo shimwe otashi simanekwa, nena iilyo ayihe otayi nyanyukwa pamwe nasho.’ (1 Kor. 12:16-18, 26) Onkee ano, pehala lyokusila yalwe efupa, otatu ka kala twa nyanyukwa, uuna ya mono omayambeko. Natu taleni koshiholelwa shomwanamati gwomukwaniilwa Saul, Jonatan. Sho David a hogololwa a ninge omukwaniilwa, ka li e mu sile efupa. Pehala lyaashono, okwa li a ladhipike David. (1 Sam. 23:16-18) Mbela itatu vulu okukala tu na ohenda nohole ngaashi Jonatan?

12. Omayele geni gopamanyolo tage ke tu kwathela tu li uukwanegumbo, tu ka mone ondjambi?

¹² Okutula omakotampango gOmbiimbeli miilonga, otaku vulu okweetela uukwanegumbo ombili nenyanyu, noku wu kwathela wu ka mone ondjambi. Omayele geni gopamanyolo ga nuninwa aanegumbo, ngoka Paulus a li a pe Aakriste yomuKolossa? Paulus okwa li e ya pe omayele ngaka taga ti: ‘Aakulukadhi, vulikeni kaasamane yeni, oshoka osho oshinakugwanithwa sheni shAakriste. Aasamane, holeni aakulukadhi yeni, ne inamu kala mu na onyanya nayo. Aanona, vulikeni aluhe kaakuluntu yeni, oshoka osho oshinakugwanithwa sheni shopakriste nosho opalela Kalunga. Aakuluntu, inamu hinda aana yeni, opo yaa kanithe einekelo.’ (Kol. 3:18-21, yelekanitha NW.) Odhoshili kutya oto ka tsa kumwe kutya okutula miilonga omayele gaPaulus ga nwethwa mo, otaku ka kwathela natango aasamane, aakulukadhi naanona.

13. Omumwameme Omukriste ota vulu ngiini okunanena omusamane gwe moshili ngoka kee shi omwiitaali?

¹³ Ongiini ngele ngoye omukulukadhi, nowu uvite kutya omusamane gwoye ngoka kee shi omwiitaali ihu ungaunga nangoye nawa? Mbela oto ka kala to nyenyeta kombinga yeihumbato lye, opo ando wu hwepopaleke onkalo? Nokuli nonando owe shi pondola moku mu ningitha a ninge shoka wa hala, mbela oto ka pondola oku mu kwathela e ye moshili? Hasho nando. Ihe ngele owu ulike kutya owa simaneka uukwamutse womusamane gwoye, oto vulu okuhumitha komeho  ombili muukwanegumbo. Oto ka simanekitha wo Jehova notashi vulika nokuli wu nanene omusamane gwoye melongelokalunga lyashili. Kungawo, amuhe yaali otamu vulu oku ka mona ondjambi. — Lesha 1 Petrus 3:1, 2.

14. Omusamane Omukriste oku na okuninga po shike, ngele omukulukadhi gwe ngoka kee shi omwiitaali ine mu simaneka?

¹⁴ Ongiini ngele ngoye omusamane, nowu uvite kutya omukulukadhi gwoye ngoka kee shi omwiitaali ine ku simaneka? Mbela oto ka longitha nayi uukwamutse woye, moku mu gandagula, opo ando e ku simaneke shi vulithe nale? Hasho nando. Kalunga okwa tegelela wu longithe uukwamutse woye pahole, mokuholela Jesus. (Ef. 5:23) Jesus ngoka e li omutse gwegongalo, ohu ulike aluhe ohole neidhidhimiko. (Luk. 9:46-48) Ngele owa holele oshiholelwa shaJesus, otashi vulika wu ka kwathele omukulukadhi gwoye e ye melongelokalunga lyashili.

15. Omusamane Omukriste ota vulu ngiini okuulika kutya oku hole omukadhi?

¹⁵ Aasamane oya lombwelwa ngeyi: ‘Holeni aakulukadhi yeni, ne inamu kala mu na onyanya nayo.’ (Kol. 3:19) Omusamane omunahole oha kala a simaneka omukulukadhi gwe, mokupulakena komaetopo ge nomoku mu ulukila kutya shoka a popi oshi na oshilonga. (1 Pet. 3:7) Nonando ita vulu aluhe okuninga kehe shoka omukulukadhi ta pula, okupulakena kuye otaku vulu oku mu kwathela a ninge omatokolo ge li pandunge. (Omayel. 15:22) Omusamane omunahole oha kambadhala okwiilongela okusimanekwa komukulukadhi gwe, pehala lyoku mu thiminika e shi ninge. Ngele omusamane oku hole omukadhi noyana, ohashi ya kwathele ya kale ya nyanyukwa, sho taya longele Jehova noya ka mone ondjambi yomwenyo.

16, 17. Wu li omugundjuka, ongiini to vulu okuyanda okuuvila nayi unene aavali yoye?

¹⁶ Ongiini ngele ngoye omugundjuka gwomimvo omulongo nasha, nowu uvite kutya aavali yoye Aakriste ihaye ku uvu ko noye na oompango oondhigu? Shoka otashi vulika shi ku uvithe nayi, notashi vulika wu kale wa limbililwa ngele okulongela Jehova oku li ngaa shili omukalo dhingi monkalamwenyo. Ihe ngele owe etha okuuva nayi kwoye ku ku ningithe wu ethe po okulongela Jehova, mokweendela ko kwethimbo oto ka mona kutya kapu na gumwe e na ko nasha nangoye lela e vule aavali yoye aatilikalunga negongalo.

¹⁷ Ngele aavali yoye ihaye ku pukulula, mbela ito ka kala wa limbililwa ngele oye na ko ngaa nasha nangoye shili? (Heb. 12:8) Ihe otashi vulika omukalo moka aavali yoye haye ku pe egeeloputudho, ogwo hagu ku uvitha nayi. Pehala lyokuuva nayi, kambadhala okuuva ko kutya ngiika opu na etompelo sho taye ku pukulula momukalo ngoka. Onkene kala wa gundjila nokuninga ngaashi to vulu wu yande okwiihumbata nayi, sho to kwathelwa. Oohapu dhaKalunga otadhi ti: “Ngoka ti ikwata mokupopya, oye omunongo, naangoka ti idhidhimike momwenyo gwe, oye omunandunge.” (Omayel. 17:27) Elalakano lyoye nali kale okukala omuntu a koka moondunge, ngoka ha taamba ko omayele nokumona mo uuwanawa nokaapu na okuuvila nayi omukalo moka we ga pewa. (Omayel. 1:8) Okukala wu na aavali mboka ye hole shili Jehova, oshi li eyambeko. Otaya ka kala shili ya hala oku ku kwathela wu ka mone ondjambi yomwenyo gwaaluhe.

18. Omolwashike wa tokola okukala wa tala kondjambi?

¹⁸ Ondjambi ndjoka twa tegelela oku ka mona kutya nduno omwenyo gwaaluhe megulu nenge omoparadisa kombanda yevi, ombwanawa lela. Etegameno ndyoka olyashili, nolya kankamena keuvaneko lyOmushiti ye mwene. Shi na ko nasha nOparadisa kombanda yevi, Kalunga okwa ti: “Evi otali ka udha okutseya Omuwa.” (Jes. 11:9) Kehe gumwe ta ka kala kombanda yevi, ota ka longwa kuKalunga. Odhoshili kutya ndjoka ondjambi ya gwana okulongelwa. Onkee ano, kala to dhiladhila kwaashoka Jehova u uvaneka, noino etha nando osha shi ku imbe oku ka mona ondjambi.