Mbela oho kongo ngaa egameno puJehova?
“Omuwa ota hupitha aantu ye; ota popile mbo taa kongo egameno puye.” — EPS. 34:22.
OMAIMBILO: 8, 54
1. Aapiya yaKalunga oyendji aadhiginini ohaya kala yu uvite ngiini, omolwuulunde?
“ONGAME omuntu omukweyi!” (Rom. 7:24) Aapiya yaKalunga oyendji aadhiginini ohaya kala yu uvite ngaashi omuyapostoli Paulus, ngoka a popi oohapu ndhoka. Atuhe ohatu mono iihuna, omolwuulunde mboka twa thigulula. Uuna itaatu ningi shoka tashi nyanyudha Jehova, otashi vulika shi tu yemateke. Aakriste yamwe mboka ya yona eyono lya kwata miiti, ohaya kala yu uvite kutya Kalunga ita vulu oku ya dhimina po.
2. (a) Episalomi 34:22 oyu ulika ngiini kutya aapiya yaKalunga inaya pumbwa okwiipa uusama unene? (b) Oshike tatu ka kundathana moshitopolwa shika? (Tala oshimpungu “Iiyilongomwa nenge omahokololo giinima mbyoka tayi ka ningwa monakuyiwa?”)
2 Omanyolo otage tu shilipaleke kutya mboka haya kongo egameno puJehova, inaya pumbwa okukala tayi ipe uusama unene. (Lesha Episalomi 34:22.) Okukonga egameno puJehova okwa kwatela mo shike? Oonkatu dhini tu na okukatuka, opo Jehova e tu sile ohenda noku tu dhimine po? Omayamukulo komapulo ngoka otatu ke ga mona, sho tatu kundathana kombinga yelongekidho lyiiholamenolando yomuIsraeli shonale. Odhoshili kutya elongekidho ndyoka olya li lya totwa po kohi yehangano lyOmpango, ndyoka lya pingenwa po pOpentekoste yomo 33 E.N. Dhimbulukwa kutya Ompango ndjoka oya li ya za kuJehova. Onkee ano, elongekidho lyiiholamenolando otali ke tu kwathela tu mone nkene Jehova ha tala ko eyono, aayoni nosho wo mboka yi iyela ombedhi. Tango, natu kundathaneni elalakano lyiilando mbyoka nankene ya li hayi longo.
“IHOGOLOLELENI IILANDO YOKWIIGAMENA”
3. Aaisraeli oya li hayu ungaunga ngiini nomuntu ngoka a dhipaga mukwawo owina?
3 MuIsraeli shonale, Jehova okwa li a tala ko okudhipaga omuntu ku li oshinima sha kwata miiti. Omuntu ngoka a dhipaga mukwawo owina, naye okwa li ha dhipagwa komunezimo omulumentu gwanakudhipagwa, ano “nakupula ombinzi.” (Num. 35:19) Onkatu ndjoka oya li hayi ulike kutya nakudhipaga okwa futila po nakudhipagwa. Omuntu ngoka a dhipaga mukwawo owina, okwa li ha dhipagwa meendelelo, opo Evi lyEuvaneko kaali nyatekwe. Nomolwaashono Jehova a li a gandja elombwelo tali ti: ‘Inamu nyateka evi moka mu li mo, oshoka etiko lyombinzi yomuntu otali nyateke evi.’ — Num. 35:33, 34.
4. Aaisraeli oya li haya ungaunga ngiini nedhipago lyaa shi lyoshiningilawina?
4 Aaisraeli oya li haya ungaunga ngiini nedhipago lyaa shi lyoshiningilawina? Omuntu ngoka a dhipaga mukwawo inee shi ningila owina, okwa li natango e na ondjo. (Gen. 9:5) Nonando ongawo, okwa li he ethwa a ye ontuku kushimwe shomiiholamenolando ihamano, opo kaa dhipagwe komunezimo gwanakudhipagwa. Hoka oko a li ta vulu okumona egameno. Omudhipagi okwa li ha kala moshilando shokwiigamena sigo omuyambimukuluntu a si. — Num. 35:15, 28.
5. Elongekidho lyiilando yokwiigamena otali tu kwathele ngiini tu uve ko nawa Jehova?
5 Elongekidho lyiilando yokwiigamena kalya li lyomuntu, ihe olyaJehova. Jehova okwa li a lombwele Josua a ti: “Lombwela Aaisraeli u tye: ‘Ihogololeleni iilando yokwiigamena.’” Onkee ano, oya li ya ‘hogolola’ iilando mbyoka. (Jos. 20:1, 2, 7, 8) Molwaashono Jehova oye a li a ningi elongekidho lyiilando yokwiigamena, otashi vulika tu pule tatu ti: Ongiini elongekidho ndika tali tu kwathele tu kale tu na etaloko li li nawa kombinga yohenda yaJehova? Notashi tu longo shike kombinga yankene tu na okukonga egameno puye?
‘OTA VULU A LOMBWELE AAKULUNTUGONGALO SHOKA A NINGI’
6, 7. (a) Hokolola onkandangala ndjoka aakuluntugongalo ya li haya dhana, mokupangula omuntu ngoka a dhipaga mukwawo kaashi shi oshiningilawina. (Tala kethano lyopetameko.) (b) Omolwashike sha li pandunge nakudhipaga a ye kaakuluntugongalo?
6 Uuna omuntu a dhipaga mukwawo, oku na okufadhuka po e ta yi a ka ‘lombwele aakuluntugongalo shoka a ningi,’ mboka ye li posheelo shoshilando shokwiigamena. Koshilando hoka oko ha pewa ehala lyokukala. (Jos. 20:4) Konima yethimbo, oha tuminwa natango kaakuluntugongalo yokoshilando hoka a dhipagela omuntu, opo ye mu pangule. (Lesha Numeri 35:24, 25.) Ngele aakuluntugongalo mboka oya mono kutya nakudhipaga ine shi ningila owina, ohaye mu lombwele a shune koshilando shokwiigamena.
7 Omolwashike aakuluntugongalo ya li ya kwatela mo moshinima shino? Opo ya kwathele egongalo lyomuIsraeli li kale lya yela nosho wo ngoka a dhipaga omuntu kaashi shi oshiningilawina, a mone mo uuwanawa mohenda yaJehova. Omulongwantu gwOmbiimbeli gumwe, okwa li a nyola kutya ngele nakudhipaga okwa tindi okuya kaakuluntugongalo, nena “oku na okudhipagwa.” Okwa gwedha ko a ti: “Ombedhi ohayi kala ye, molwaashono ina ninga shoka Kalunga a ti, opo i igamene.” Ekwatho lyokukwathela ngoka a dhipaga omuntu kaashi shi oshiningilawina opo lya li, ihe nakudhipaga okwa li e na oku li konga noku li taamba ko. Ngele okwa kala inaa konga egameno kushimwe shomiilando yokwiigamena mbyoka Jehova a li a tula po, nena oku na okudhipagwa komunezimo gwanakudhipagwa.
8, 9. Omolwashike Omukriste ngoka a yona eyono lya kwata miiti e na oku ka konga ekwatho kaakuluntugongalo?
8 Kunena, uuna Omukriste a yono eyono lya kwata miiti, okwa pumbwa okukonga ekwatho kaakuluntugongalo. Omolwashike shoka sha simana? Shotango, elongekidho lyaakuluntugongalo lyokuungaunga naamboka ya yona sha kwata miiti olya za kuJehova, ngaashi sha popiwa mOohapu dhe. (Jak. 5:14-16) Oshitiyali, elongekidho ndyoka ohali kwathele mboka yi iyela ombedhi, ya kale ya dhiginina muJehova noya yande egamo lyokuyona. (Gal. 6:1; Heb. 12:11) Oshititatu, aakuluntugongalo oya tulwa po noya dheulwa, opo ya shilipaleke omuyoni ngoka i iyela ombedhi noku mu kwathela kaa kale we u uvite e na ondjo. Aalumentu mboka Jehova ote yi ithana ye li ‘egameno kiikungulu.’ (Jes. 32:1, 2) Mbela ito tsu kumwe nasho kutya elongekidho ndika otali ulike kutya Kalunga oku na ohenda?
9 Aapiya yaKalunga oyendji oya mona epepelelo ndyoka hali zi mokukonga ekwatho kaakuluntugongalo. Pashiholelwa, omumwatate gwedhina Daniel, okwa li a yono eyono lya kwata miiti, ihe uule woomwedhi dhontumba okwa kala ta kakadhala okuya kaakuluntugongalo. Okwa ti: “Sho pwa piti ethimbo ele, okwa li tandi dhiladhila kutya aakuluntugongalo kaya li we taya vulu okukwathela ndje. Nonando ongawo, onda kala nda tegelela okumona iilanduliko yaashoka nda ninga. Uuna tandi galikana kuJehova, onda kala ndi uvite kutya onda pumbwa oku mu pa ombili, omolwaashihe shoka nda ninga.” Hugunina, Daniel okwa ka konga ekwatho kaakuluntugongalo. Okutala konima, Daniel okwa ti: “Odhoshili kutya onda li nda tila okuya kaakuluntugongalo. Ihe konima yethimbo, osha li sha fa gulwe a kutha ndje omutengi omudhigu komapepe gandje. Ngashingeyi ondu uvite kutya otandi vulu okupopya naJehova nda manguluka.” Daniel ngashingeyi oku na eiyuvo lya yela, nokwa langekwa po e li omuyakuligongalo.
“OTA VULU OKUTONDOKELA MUSHIMWE SHOMIILANDO MBIKA”
10. Opo omuntu ngoka a dhipaga mukwawo kaashi shi oshiningilawina a silwe ohenda, onkatu yini a li e na okukatuka?
10 Omuntu ngoka a dhipaga mukwawo kaashi shi owina, okwa li e na okuninga po sha, opo a silwe ohenda. Okwa li e na okufadhukila koshiholamenolando shopopepi. (Lesha Josua 20:4.) Itatu vulu okudhiladhila kutya omudhipagi okwa li ha kala kee na ko nasha, oshoka opo a hupe, okwa li e na okumatukila nziya koshilando shoka nokukala hoka. Shoka okwa li tashi ti kutya okwa gwanitha po shoka e na okuninga. Okwa li e na okuthiga po iilonga ye, egumbo lye noka li a manguluka okweenda, sigo omuyambi omukuluntu a si. * (Num. 35:25) Okuninga oonkambadhala ndhoka okwa li ku na oshilonga. Molwaashono ngele nakudhipaga okwa zi mo moshiholamenolando ethimbo kehe a hala, kungawo okwa li tu ulike kutya ke na ko nasha naangoka a dhipaga. Shoka osha li wo tashi vulu okutula onkalamwenyo ye moshiponga.
11. Oonkatu dhini Omukriste ngoka i iyela ombedhi ha katuka, opo u ulike kutya okwa pandula esilohenda lyaKalunga?
11 Opo aayoni mboka yi iyela ombedhi ya mone mo uuwanawa mohenda yaJehova kunena, nayo oye na okukatuka oonkatu. Otu na okweetha po thiluthilu okuninga shoka sha puka. Katu na owala okuyanda omayono ga kwata miiti, ihe naangoka omashona taga vulu okufala meyono lya kwata miiti. Omuyapostoli Paulus okwa li a nwethwa mo a popye oonkatu dhAakriste yomuKorinto, mboka ya li yi iyela ombedhi. Okwa nyola a ti: “Taleni ano shoka Kalunga a ningi, sho e mu pitikile oluhodhi ndoka. Oluhodhi tuu ndoka lwe mu pe uulaadhi, mu vule okuholola kutya kamu na uusama. Oshinima sha tya ngaaka oshe mu geyitha noshe mu londodha, oshe mu yuulukitha noshe mu pe uupenda nehalo okugeela uuwinayi.” (2 Kor. 7:10, 11) Uuna tatu katuka oonkatu dha mana mo tu ethe po okuyona, kungawo otatu ulukile Jehova kutya inatu hokwa shoka twa ninga nosho wo kutya itatu vulu okumona esilohenda lye, ngele inatu ninga po sha.
12. Ngele Omukriste okwa hala okukala ta silwa ohenda kuKalunga, oshike tashi vulika e na okweetha po?
12 Ngele Omukriste okwa hala okukala ta silwa ohenda kuKalunga, oshike tashi vulika e na okweetha po? Na kale i ilongekidha okweetha po naashoka e hole, ngele otashi vulu oku mu ningitha a yone. (Mat. 18:8, 9) Ngele ookuume koye yamwe otaye ku nwetha mo wu ninge shoka inaashi hokiwa kuJehova, mbela oto ke etha po okweendathana nayo? Ngele owu na uunkundi wokulongitha iikolitha sha pitilila, mbela owu na ngaa ehalo lyokuyanda oonkalo ndhoka tashi vulika dhi ku ningithe wu kolwe? Ngele oto kondjitha omahalo ga puka gopamilalo, mbela oho yanda ngaa oomuvi, omapandja gokointaneta nenge sha shilwe shoka tashi vulika shi ku nwethe mo wu kale nomadhiladhilo ga nyata? Dhimbulukwa kutya oonkambadhala kehe to ningi, opo wu kale omudhiginini kuJehova, odha simana. Okukala tu uvite Jehova e tu ekelahi, oshinima oshiwinayi noonkondo. Ihe, okukala tu uvite ‘ohole ye yuudhiginini ndjoka tayi kalelele,’ oshinima oshiwanawa kaaku na we. — Jes. 54:7, 8, yelekanitha NW.
‘OTAYI KA KALA OSHIHOLAMENO SHOYE’
13. Omolwashike omuntu ngoka a dhipaga mukwawo, a li ha vulu okukala u uvite e li megameno nokukala a nyanyukwa, sho e li moshiholamenolando? Shi yelitha.
13 Uuna omuntu ngoka a dhipaga mukwawo e li moshiholamenolando, oha kala e li megameno. Shi na ko nasha niilando mbyoka, Jehova okwa ti: ‘otayi ka kala oshiholameno shoye.’ (Jos. 20:2, 3) Jehova ka li a tegelela nakudhipaga a kale ta pangulilwa oshipotha sha faathana. Ka li wo a tegelela nakupula ombinzi yanakudhipagwa a pitikwe okuya moshiholamenolando moka mu na nakudhipaga, opo ando e ke mu dhipage. Kungawo nakudhipaga ka li ha kala a tila okukwatelwa iikonene. Uuna e li moshilando moka, oha kala e li megameno lyaJehova. Oshilando shoka kasha li ondholongo yokwiigamena. Nakudhipaga, moshilando moka okwa li ha kala e na ompito yokulonga, yokukwathela yalwe noyokulongela Jehova e na ombili. Odhoshili kutya okwa li ha vulu okukala a nyanyukwa noku na onkalamwenyo tayi ti sha.
Kala wu na einekelo kutya Jehova oha dhimine po (Tala okatendo 14-16)
14. Einekelo lini Omukriste ngoka i iyela ombedhi ta vulu okukala e na?
14 Uuna aapiya yaKalunga yamwe ya yono omayono ga kwata miiti, ohaya kala ye wete ye li “moomango” dhokukala yu uvite ye na ondjo, nokonima sho yi iyela ombedhi. Ohaya kala wo yu uvite kutya Jehova ke na siku a dhimbwe omayono gawo. Ngele osho ho kala wu uvite ngawo, kala wu na uushili kutya uuna Jehova e ku dhimine po, oto vulu okukala wu uvite kutya okwe ku sila ohenda. Daniel ngoka a popiwa metetekelo, ota tsu kumwe nasho lela. Konima sho a pukululwa nokukwathelwa kaakuluntugongalo, opo a kale e na eiyuvo lya yela, okwa ti: “Onda li ndu uvite nda pepelelwa. Konima sho nda kwathelwa nawa, kanda li we ndu uvite ndi na ondjo. Uuna oondjo dha dhimwa po, ihadhi kala po we. Jehova okwa ti kutya ota ka kutha po omutenge gwoye noku gu kaleka kokule nangoye. Ito ke gu mona we nandonando.” Uuna nakudhipaga e li moshiholamenolando, iha kala we a tila nakupula ombinzi. Sha faathana, ngele Jehova okwa dhimi po omayono getu, inatu pumbwa okukala twa tila kutya ota kongo po etompelo lilwe, opo ando natango e tu pangule, omolweyono olyo tuu ndyoka. — Lesha Episalomi 103:8-12.
15, 16. Onkandangala ndjoka Jesus a dhana e li Omukulili nosho wo Omuyambi Omukuluntu, otayi vulu ngiini okukoleka einekelo lyoye mesilohenda lyaKalunga?
15 Uushili owo kutya otu na omatompelo ogendji shi vulithe Aaisraeli, gokukala twi inekela mohenda yaJehova. Konima sho Paulus a popi uudhigu we kutya okwa ndopa okuvulika kuJehova thiluthilu, okwa ti: “Kalunga na hambelelwe omolwaJesus Kristus, Omuwa gwetu!” (Rom. 7:25) Odhoshili kutya nonando Paulus okwa li ta kondjitha egamo lyokuyona nosho wo omayono ngoka a li a ninga monakuziwa, okwa li i iyele ombedhi. Okwa li e na einekelo kutya Jehova okwe mu dhimina po okupitila muJesus. Jesus ngoka e li Omukulili gwetu, okwe shi ningitha tashi wapa tu kale neiyuvo lya yela nosho wo ombili yokomwenyo. (Heb. 9:13, 14) E li Omuyambi Omukuluntu, “ota vulu aluhe okuhupitha mboka taye ya kuKalunga taa pitile muye. Oshoka oku na omwenyo aluhe note ya galikanene koshipala shaKalunga.” (Heb. 7:24, 25) Pethimbo lyonale, omuyambi omukuluntu okwa li ha kwathele Aaisraeli ya kale ye na uushili kutya Jehova ota ka dhima po omayono gawo. Natse omolwaJesus ngoka e li Omuyambi gwetu Omukuluntu, otu na omatompelo ogendji gokukala nuushili kutya “esilohenda ndyoka otali tu kwatha pethimbo lyo opala.” — Heb. 4:15, 16.
16 Opo Jehova a kale egameno lyoye, owu na okukala wi itaala mekuliloyambo lyaJesus. Ino dhiladhila kutya aantu owala yalwe taya vulu okumona mo uuwanawa mulyo. Pehala lyaashono, kala wi itaala kutya nangoye oto vulu okumona mo uuwanawa. (Gal. 2:20, 21) Kala wi itaala kutya ekulilo olyo lye shi ningitha tashi wapa, opo oondjo dhoye dhi kale tadhi dhimwa po. Kala wo wi itaala kutya ekulilo olyo lye shi ningitha tashi wapa, wu kale netegameno lyomwenyo gwaaluhe. Ekulilo oli li omagano ngoka Jehova e ku pa.
17. Omolwashike wa hala okukonga egameno puJehova?
17 Iilando yokwiigamena otayi tu kwathele tu uve ko esilohenda lyaJehova. Elongekidho ndyoka lyaKalunga, otali tu longo kutya omwenyo omuyapuki. Otali tu kwathele wo tu mone nkene aakuluntugongalo taya vulu oku tu kwathela, nonokutya okwiiyela ombedhi kwashili okwa kwatela mo shike nosho wo kutya omolwashike tatu vulu okukala neinekelo thiluthilu kutya Jehova ota vulu oku tu dhimina po. Mbela oho kongo ngaa egameno puJehova? Kapu na mpoka pu na egameno dhingi kaapu shi puJehova. (Eps. 91:1, 2) Moshitopolwa tashi landula, otatu ka tala nkene iilando yokwiigamena tayi vulu oku tu kwathela tu holele oshiholelwa dhingi shaJehova shuuyuuki nohenda.
^ okat. 10 Shi ikolelela kaalongwantu Aajuda, aanegumbo yomuntu ngoka a dhipaga mukwawo kaashi shi owina, nayo oya li haya yi koshiholamenolando hoka, opo ya kale ko naye.
