1, 2. (a) Iizemo yini hayi etithwa kokwaaneipangelo? (b) Omolwashike oshikundathanwa sheipangelo tashi opalele kunena?

EIKWATONAWA nenge tu tye eipangelo owo uukwatya wopakalunga. (Gal. 5:22, 23) Jehova ohu ulike eipangelo momukalo gwa gwanenena. Aantu ohaya nyengwa okwiipangela, molwaashono inaya gwanenena. Onkee ano, omaupyakadhi ogendji ngoka aantu hayi iyadha mugo kunena, ohage etithwa kokwaaneipangelo. Ohaku ningitha omuntu kaa ninge iinima ya simana pethimbo, nokee shi endithe nawa kosikola nenge kiilonga. Okwaaneipangelo ohaku etitha wo iinima iiwinayi ngaashi okupopya oohapu oombwinayi, uunkolwi, uukolokoshi, ehengathano, okulya oondjo, okukala wa pikwa, okutulwa mondholongo, okweehamekwa pamaiyuvo, okukwatwa komikithi ndhoka hadhi taandele okupitila momilalo, omategelelo inaaga tegelelwa nayilwe. — Eps. 34:11-14.

² Aantu mboka ihayi ikwata nawa, ohayi iyetele yo yene uupyakadhi nosho wo yalwe. Uupyakadhi mboka wokwaaneipangelo otawu ende tawu nayipala noonkondo. Mo 1940 nasha, opwa li pwa ningwa omakonakono ge na ko nasha neipangelo, ihe omakonakono ngoka opo ga ningwa, ogu ulika kutya aantu otaya ende taya nayipala noonkondo mokwaaneipangelo. Shika itashi tu kumitha, molwaashono Oohapu dhaKalunga odha hunganeka kutya okwaaneipangelo, oshimwe shomiinima mbyoka tayi ulike kutya otu li ‘momasiku gahugunina.’ — 2 Tim. 3:1-3.

3. Omolwashike Aakriste ya pumbwa okukala ye na eipangelo?

 ³ Omolwashike twa pumbwa eipangelo? Natu taleni komatompelo gaali ga simana. Lyotango, okwa ndhindhilikwa kutya aantu mboka ye na eipangelo, oye na omaupyakadhi omashona. Ohaya pangele omaiyuvo gawo, naashoka ohashi ya kwathele ya kale ye na ekwatathano ewanawa nayalwe. Ohaya yanda wo okukala ya geya, ye na iimpwiyu noya gwililwa po. Etompelo etiyali, opo tu kale twa hokiwa kuKalunga, otu na okukondjitha omamakelo nokupangela omahalo omawinayi. Adam naEva oya li ya ndopa okuninga ngawo. (Gen. 3:6) Dhiladhila wo kiizemo iiwinayi mbyoka ya li ya adha yalwe mboka ya ndopa okukala ye na uukwatya mboka wa simana.

4. Oshike tashi vulu okutsa omukumo mboka taya nyengwa okwiipangela?

⁴ Kapu na omuntu inaa gwanenena ta vulu okukala e na eipangelo thiluthilu. Jehova oku shi kutya kashi shi oshipu kaapiya ye okukala ye na eipangelo. Okwa hala oku ya kwathela ya kondjithe egamo lyawo lyokuyona. (1 Aak. 8:46-50) E li Kuume omunahole, ota ladhipike pahole aanamitima omiwanawa mboka ya hala oku mu longela, nonando poompito dhimwe ohaya nyengwa okuulika eipangelo. Moshitopolwa shika otatu ki ilonga koshiholelwa shaJehova sheipangelo. Otatu ka taleni wo kiiholelwa iiwanawa niiwinayi mbyoka ya popiwa mOmbiimbeli. Otatu ke endulula wo iinima mbyoka tayi vulu oku tu kwathela tu kale tu na eipangelo.

5, 6. Jehova okwe tu tulila po oshiholelwa shini, shi na ko nasha neipangelo?

⁵ Jehova ohu ulike uukwatya weipangelo momukalo gwa gwanenena, molwaashoka kehe shimwe ta ningi oshi li mondjila. (Deut. 32:4) Tse otu li aantu inaatu gwanenena. Ihe nonando ongawo, otwa pumbwa okukonakona oshiholelwa shaJehova, opo tu uve ko nawa uukwatya weipangelo, tse tu vule oku mu holela. Omiiholelwa yini iindhindhilikwedhi Jehova a li u ulike eipangelo?

⁶ Dhiladhila kunkene Jehova a li u ulike eipangelo, sho tu ungaunga noshipotha shoka a tukulilwa kuSatana. Eshongo ndyoka olya li lya pumbwa okukandulwa po. Shoka Ondiyapoli ya ningi, osha halutha nosha geyitha iishitwa yomegulu yaKalunga iidhiginini. Oshe etitha wo ondhino mokati kayo. Otashi vulika ho kala wu uvite sha faathana, ngele to dhiladhila komaupyakadhi agehe ngoka ge etithwa kuSatana. Nonando ongawo, Jehova ka li a katukile mbala Satana onkatu, ihe okwi inyenge momukalo omwaanawa. Jehova ka li a geye mbala, ihe okwa kala tu ungaunga pauyuuki noshipotha shoka. (Eks. 34:6; Job 2:2-6) Omolwashike tatu tile ngawo? Okwe etha pu pite ethimbo, molwaashono ina hala omuntu nando ogumwe a hanagulwe po, ihe “okwa hala, aantu ayehe ye ethe uulunde wawo.” — 2 Pet. 3:9.

7. Oshike tatu vulu okwiilonga koshiholelwa shaJehova sheipangelo?

⁷ Oshiholelwa shaJehova sheipangelo, otashi tu longo kutya natse otu na okukotokela oohapu dhetu noonkatu dhetu. Katu na okukatuka nziya. Uuna to ningi etokolo lya simana, dhiladhila nawa nethimbo, opo wu katuke pandunge. Galikana Jehova e ku pe uunongo wu popye nenge wu ninge shoka shi li mondjila. (Eps. 141:3) Uuna wa geya, oshipu okukatuka oonkatu dhaa li pandunge. Oyendji yomutse ohatu ki ipa uusama, omolwoohapu dhetu nenge oonkantu dhetu ndhoka inaadhi dhiladhilwa nawa. — Omayel. 14:29; 15:28; 19:2.

8. (a) Openi tatu vulu okwaadha iiholelwa yomaukwatya gaKalunga? (b) Oshike sha kwathele Josef a katuke pandunge, sho omukulukadhi gwaPotifar a li te mu heke? (Tala kethano lyopetameko.)

⁸ Iiholelwa yini yopaMbiimbeli ya tsa omuthindo esimano lyeipangelo? Otashi vulika to  dhimbulukwa po yimwe yaamboka yu ulike eipangelo, sho ya li taya makelwa. Gumwe gwomuyo oJosef, omwana gwaJakob. Okwa tindi okulonga uuwinayi, pethimbo a li ta longo megumbo lyaPotifar, elenga lyaFarao. Omukulukadhi gwaPotifar okwa li a hokwa Josef, ngoka a li “omwaanawa a shitika,” nokwa kambadhala oku mu heka lwiikando, a ye naye momilalo. Oshike sha kwathele Josef a tinde? Okwa li a dhiladhila nethimbo kiilanduliko mbyoka ta ka mona, ngele okwe shi ningi. Sho onkalo ya lulu, Josef okwa fadhuka po. Okwa popi a ti: “Ondi longe ngiini uuwinayi u thike mpono, ndi yone kuKalunga?” — Gen. 39:6, 9; lesha Omayeletumbulo 1:10.

9. Ongiini to vulu okwiilongekidhila okukondjitha omamakelo?

⁹ Oshiholelwa shaJosef otashi tu longo shike? Otashi tu longo kutya ngele otatu makelwa tu longe shoka shaa li metsokumwe nehalo lyaKalunga, otwa pumbwa okufadhuka po. Yamwe manga inaaya ninga Oonzapo, oya li ya pikwa kiinima ngaashi uufukedhi, uunkolwi, omakaya, elongitho nayi lyiingangamithi, oluhondelo nayilwe. Nokuli nokonima yokuninginithwa, otashi vulika omathimbo gamwe ya kale ya hala okuninga iinima mbyoka. Onkee ano, uuna to thiminikwa wu yone oompango dhaJehova, dhiladhila nethimbo kiilanduliko mbyoka hayi etithwa kokulandula uuhalu wuulunde. Kambadhala okutala kutya omoonkalo dhini to vulu okwaadhika komashongo, e to tala nkene to vulu oku ga yanda. (Eps. 26:4, 5; Omayel. 22:3) Ngele owi iyadha memakelo lyontumba, pula Jehova e ku pe uunongo neipangelo wu li kondjithe.

10, 11. (a) Eshongo lini aagundjuka oyendji haya kala ya taalela kosikola? (b) Oshike tashi vulu okukwathela Aakriste aagundjuka ya yande eihumbato lya nyata?

¹⁰ Aagundjuka Aakriste oyendji kunena, oya taalela eshongo lya faathana nolyaJosef. Natu taleni koshiholelwa shomumwameme Kim. Aalongwa oyendji yomongundu yawo, oya li ye hole iipala. Uuna ya zi mehuliloshiwike, oya li ye hole okupopya kutya oya ya momilalo. Kim ka li ha kutha ombinga momahokololo gawo. Okwa popi kutya okukala a yooloka ko kuyo, omathimbo gamwe osha li hashi mu ningitha a kale u uvite “uuwike nokee niwe naye.” Oomakula ye oya li haye mu tala ko a fa egoya, sho kee na omumati. Nonando ongawo, Kim okwa li e wete kutya okuya momilalo oku li eshongo enene kaagundjuka oyendji. (2 Tim. 2:22) Olundji aanasikola ooyakwawo oya li haye mu pula ngele okwa ya ngaa nale momilalo. Shono osha li hashi mu pe ompito, a yelithe kutya omolwashike ihaa kutha ombinga momilalo. Ohatu kala tu uvitile uuntsa nuunambano Aakriste aagundjuka, mboka ya tokola okukondjitha omathiminiko gokuya momilalo. Jehova naye osho ha kala e yu uvitile ngawo.

¹¹ MOmbiimbeli omu na iiholelwa tayi londodha, yaantu mboka kaaya li ye na eipangelo shi na ko nasha nomilalo. Oya popya wo kombinga yiilanduliko yinikitha oluhodhi, mbyoka hayi etithwa kokwaaneipangelo. Kehe gumwe e li monkalo ya fa yaKim, onawa a dhiladhile kombinga yomulumentu omugundjuka egoya, ngoka a popiwa mOmayeletumbulo ontopolwa 7. Dhiladhila wo kwaashoka Amnon a ningi, niilanduliko iiwinayi mbyoka ye etithwa keihumbato lye. (2 Sam. 13:1, 2, 10-15, 28-32) Aavali otaya vulu okukwathela aanona yawo ya kale ye na eipangelo nuunongo shi na ko nasha nekwatathano lyopaihole. Otaya vulu oku shi ninga pelongelokalunga lyawo lyuukwanegumbo, taya longitha iiholelwa yomOmbiimbeli.

12. (a) Josef okwa li a pangele ngiini omaiyuvo ge, sho a li tu ungaunga naamwahe? (b) Omoonkalo dhini tu na okupangela omaiyuvo getu?

¹² Pompito yilwe, Josef okwa li natango u ulike oshiholelwa oshiwanawa sheipangelo. Josef okwa li i idhimbike aamwahe, sho ye ya okulanda iikulya kuEgipiti, opo a tale shoka shi li momitima dhawo. Sho onkalo yaamwahe  ye mu gumu komwenyo, okwa zi po puyo e ta ka lilila mondunda ye. (Gen. 43:30, 31; 45:1) Ngele omwiitaali omukweni nenge ngoka wu hole, okwe ku geyitha, oshiholelwa shaJosef sheipangelo, otashi ke ku kwathela wu yande okwiinyenga momukalo omwiinayi. (Omayel. 16:32; 17:27) Ngele owu na omukwanezimo ngoka a kondwa, owa pumbwa okupangela omaiyuvo goye, opo wu yande okukala wu na ekwatathano naye. Okwiipangela monkalo ya fa mpono kashi shi oshinima oshipu, ihe ngele otwa landula oshiholelwa shaKalunga nomayele ge, otashi ka kala oshipu.

13. Oshike tatu vulu okwiilonga mehokololo lyomukwaniilwa David?

¹³ Ombiimbeli oya popya oshiholelwa shomukwaniilwa David. Okwa li omunankondo, ihe oonkondo dhe ine dhi longitha nayi, sho a li u uvithwa nayi kuSaul naShimei. (1 Sam. 26:9-11; 2 Sam. 16:5-10) Shoka itashi ti kutya David okwa li e na aluhe eipangelo. Ombiimbeli otayi ti kutya okwa li a hondele naBatseba nokwa li a hala okudhipaga Nabal omukwanyanya. (1 Sam. 25:10-13; 2 Sam. 11:2-4) Nonando ongawo, otatu vulu okwiilonga iiyilongomwa ya simana kuDavid. Shotango, mboka taya kwatele komeho oya pumbwa okukala ye na eipangelo, opo kaaya longithe nayi oonkondopangelo dhawo. Oshitiyali, kapu na ngoka ta vulu okukala u uvite kutya ke na esiku a gwile memakelo. — 1 Kor. 10:12.

14. Omumwatate gumwe okwa li i iyadha monkalo yini, nomolwashike eihumbato lyetu lya simana, uuna twi iyadha monkalo ya faathana?

¹⁴ Oshike to vulu okuninga, opo wu kale wu na eipangelo? Natu taleni koshiholelwa shimwe shoka sha ningwa shili. Ohauto yimwe oya li ya pumu ohauto yomumwatate Luigi. Nonando omuhingi ngono oye a li e na epuko, okwa tameke okutuka Luigi nokwa li a hala e mu dhenge. Luigi okwa galikana kuJehova e mu kwathele a kale a gundjila. Luigi okwa kambadhala wo a kwathele omuhingi ngoka e etitha oshiponga a gundjile, ihe inashi kwatha sha. Luigi okwa nyola uuyelele wohauto yomulumentu ngoka e ta yi, ihe omulumentu ngoka okwa tsikile oku mu nyenyetela. Konima yoshiwike, Luigi okwa ningi eishunoko komukiintu gumwe ngoka a li u uvithile, e ta mono kutya omusamane gwe oye mwene gwohauto ndjoka ya pumine ye. Omulumentu ngoka okwa li i ipe ombedhi, omolweihumbato lye ewinayi nokwa pe Luigi ombili. Okwa kwatathana nokuli nehangano ekwashilipaleki lyaLuigi, opo li pangelithe mbala ohauto yaLuigi. Omulumentu oye tuu ngoka okwa li a kutha ombinga moonkundathana dhopaMbiimbeli, nokwa li e dhi hokwa. Luigi okwa li a mono kutya sho a kala a gundjila pethimbo lyoshiponga, oshe etitha iizemo iiwanawa. — Lesha 2 Aakorinto 6:3, 4.

15, 16. Ongiini okukonakona Ombiimbeli taku vulu oku ku kwathela pamwe naanegumbo yoye, mu kale mu na eipangelo?

¹⁵ Okukala tu na ekonakonombiimbeli lyondjigilile notali ti sha, otashi vulu oku tu kwathela tu kale tu na eipangelo. Dhimbulukwa kutya Kalunga okwa li a lombwele Josua a ti: “Kotoka aluhe, embo ndika lyompango li kale aluhe tali leshwa melongelokalunga lyeni. Yi ilonga omutenya nuusiku, u vulike kwaayihe ya nyolelwa mo. Nena oto kala omusindani nomunelago.” (Jos. 1:8) Ongiini okukonakona Ombiimbeli taku vulu oku ku kwathela wu kale wu na eipangelo?

¹⁶ Ngaashi twe shi mona, mOmanyolo omu na iiholelwa mbyoka tayi tu kwathele tu mone uuwanawa mboka hawu zi mokukala tu na eipangelo, niilanduliko mbyoka hayi zi mokukala twaa li na. Jehova okwa nyolitha iiholelwa mbika, opo yi tu kwathele. (Rom. 15:4) Kashi li tuu pandunge oku yi lesha, oku yi konakona nokutedhatedha kuyo! Kambadhala okumona nkene tayi vulu oku ku kwathela nosho wo uukwanegumbo woye. Pula Jehova e ku kwathele  wu tule miilonga Oohapu dhe. Ngele owa mono kutya ku na eipangelo miinima yimwe, shi taamba ko. Galikana kombinga yasho, e to kambadhala wu ninge omalunduluko. (Jak. 1:5) Ngele owa kongo uuyelele miileshomwa yetu yopaKriste, oto ka mona mo uuyelele mboka tawu vulu oku ku kwathela.

17. Omomikalo dhini aavali taya vulu okukwathela oyana ya kale ye na eipangelo?

¹⁷ Ongiini to vulu okukwathela aamwoye ya kale ye na eipangelo? Aavali oye shi shi kutya aanona ihaya valwa nuukwatya mboka. Onkee oya pumbwa oku ya longa omaukwatya agehe omawanawa, moku ya tulila po oshiholelwa. (Ef. 6:4) Ngele owu wete kutya aamwoye otaya nyengwa okukondjitha omahalo ga puka, ipula tango ngele owe ya tulila po oshiholelwa oshiwanawa. Oto vulu oku ya tulila po oshiholelwa oshiwanawa mokukala ho kutha aluhe ombinga muukalele, ho yi kokugongala nomokukwatela komeho elongelokalunga lyuukwanegumbo. Ino kala ho pe aanona yoye kehe shimwe taya pula, uuna inaashi pumbiwa. Jehova okwa li a tulila po Adam naEva omangambeko, ngoka ga li taga vulu oku ya kwathela ya simaneke oonkondopangelo dhe. Sha faathana, uuna aavali taya putudha nawa notaya tulile po aanona yawo oshiholelwa oshiwanawa, otashi vulu oku ya kwathela ya kale ye na eipangelo. Ohole yokuhola oonkondopangelo dhaKalunga nokusimaneka omithikampango dhe, iinima ya simana mbyoka to vulu okukokeka maamwoye. — Lesha Omayeletumbulo 1:5, 7, 8.

18. Omolwashike to vulu okukala nuushili kutya eendathano ewanawa oli li elaleko nuuyamba?

¹⁸ Kutya nduno owu li omuvali nenge hasho, atuheni otwa pumbwa okuhogolola ookuume ketu pandunge. Kala ho endathana naamboka taye ku ladhipike wu adhe omalalakano ngoka ge na oshilonga, nowu yande uupyakadhi. (Omayel. 13:20) Aantu mboka ye na uupambepo wu li nawa, otaye ke ku inyengitha wu holele uukwatya wawo weipangelo. Kapu na omalimbililo kutya eihumbato lyoye ewanawa otali ke ya nwetha mo wo. Ngele otwa kala tu na eipangelo otali ke tu kwathela tu kale twa hokiwa kuKalunga, tu nyanyukilwe onkalamwenyo notu nyanyukilwe iinima iiwanawa naamboka tu hole.