1, 2. (a) Salomo okwa li a pewa oshinakugwanithwa shini sha simana? (b) Omolwashike David a li ti ipula naSalomo?

SALOMO okwa li a lombwelwa a tonatele iilonga ya simanenena yokutunga otempeli. Otempeli ndjoka oya li yi na “okukala onene noyo opala ya simana muuyuni auhe.” Ihe shoka sha simanenena, otempeli ndjoka oya li tayi ka kala ‘egumbo lyaJehova Kalunga kashili.’ Onkee ano, Jehova okwa li a lombwele Salomo a tonatele iilonga mbyoka. — 1 Ondjal. 22:1, 5, 9-11.

² Omukwaniilwa David okwa li e na omukumo kutya Kalunga ote ke mu yambidhidha, nonando Salomo okwa li “omunona noke na ontseyo.” Ihe mbela okwa li ngaa ta ka kala e na omukumo gwokutaamba ko oshinakugwanithwa shokutunga otempeli? Mbela okukala e li omugundjuka nokee na ontseyo, osha li tashi ke mu imba a tunge otempeli? Salomo opo e shi pondole, okwa li a pumbwa okukala e na omukumo, e ta tameke iilonga.

3. Salomo oku na okukala a li i ilongo shike kuhe?

³ Salomo oku na okukala a li i ilonga oshindji kombinga yankene he David, a li ulike uulaadhi. Pethimbo David a li omugundjuka, okwa li a kondjitha iiyamakuti mbyoka ya li ya ponokele oonzi dhahe. (1 Sam. 17:34, 35) David okwa li ulike lela kutya oku na omukumo, sho a li a  tokola okukondjitha omutongolume ngoka omutilithi. Kekwatho lyaKalunga nosho wo emanya ndyoka a li a longitha, David okwa li a sindi Goliat. — 1 Sam. 17:45, 49, 50.

4. Omolwashike Salomo a li a pumbwa okukala e na omukumo?

⁴ Kasha li tuu tashi opalele kuDavid a ladhipike Salomo, a kale e na omukumo noku tunge otempeli! (Lesha 1 Ondjalulo 28:20.) Ando Salomo okwa li kee na omukumo, ando uumbanda owe mu shololitha e ta kala inaa gwanitha po iilonga yokutunga otempeli.

5. Omolwashike twa pumbwa okukala tu na omukumo?

⁵ Ngaashi Salomo, natse otwa pumbwa ekwatho lyaJehova, opo tu kale tu na omukumo notu gwanithe po iilonga. Natu taleni kiiholelwa yaamboka ya li ye na omukumo monakuziwa. Otu na wo okudhiladhila kombinga yankene tatu vulu okukala tu na omukumo nosho wo nkene tu na okugwanitha po iilonga yetu.

6. Oshike she ku kumitha kombinga yuulaadhi waJosef?

⁶ Natu tale kunkene Josef a li u ulike uulaadhi, sho a li ta thiminikwa komukulukadhi gwaPotifar a ye naye momilalo. Josef otashi vulika a li e shi kutya ota ka ya muudhigu, ngele okwe mu tindi. Ihe nonando ongawo, pehala lyokwiigandja, okwa li u ulike kutya oku na uulaadhi e ta fadhuka po. — Gen. 39:10, 12.

7. Rahab okwa li u ulike ngiini kutya oku na omukumo? (Tala kethano lyopetameko.)

⁷ Rahab naye okwe tu tulila po oshiholelwa shokukala nomukumo. Sho oondaadhi dhAaisraeli dhe ya kegumbo lye kuJeriko, okwa li ta vulu okukwatwa kuumbanda, e ta tindi oku dhi kwathela. Ihe molwaashono okwa li i inekela muJehova, okwa li a holeke aalumentu mbaka yaali. Okwe ya kwathele wo ya ze mo moshilando inaaya monika kaatondi yawo. (Jos. 2:4, 5, 9, 12-16) Rahab okwa li i itaala kutya Jehova oye Kalunga kashili, nokwa li e shi kutya oshilando ote ke shi gandja kAaisraeli. Ka li nando e etha uumbanda wokutila yalwe nosho wo omukwaniilwa gwaJeriko pamwe naalumentu ye, wu mu shololithe. Pehala lyaashono, okwa katuka onkatu ndjoka ye mu kwathele a hupithwe pamwe naanegumbo lye. — Jos. 6:22, 23.

8. Uulaadhi waJesus owa li wa kwathele ngiini aayapostoli?

⁸ Aayapostoli aadhiginini yaJesus nayo oye tu tulila po oshiholelwa oshiwanawa shokukala nomukumo. Oya li ya mono nkene Jesus u ulike kutya oku na omukumo. (Mat. 8:28-32; Joh. 2:13-17; 18:3-5) Oshiholelwa she, osha li she ya kwathele ya kale aalaadhi. Nonando oya li taya patanekwa kAasadukayi, inaye etha po okulonga aantu medhina lyaJesus. — Iil. 5:17, 18, 27-29.

9. Timoteus omutiyali 1:7 otayi tu kwathele ngiini tu mone kutya olye lela onzo yuulaadhi?

⁹ Josef, Rahab, Jesus nosho wo aayapostoli, oya li ya tokola toko okulonga shoka shi li mondjila, omolwuulaadhi wawo. Kaya li yu ulike uulaadhi koonkondo dhawo yene, ihe uulaadhi wawo owa zi mokwiinekela Jehova. Ongiini kombinga yetu? Natse ohatu iyadha moonkalo moka twa pumbwa okuulika uulaadhi. Pehala lyokwiinekela mutse yene, otu na okwiinekela muJehova. (Lesha 2 Timoteus 1:7.) Natu taleni nkene tatu vulu okuulika uulaadhi megumbo nosho wo megongalo.

10. Omolwashike aagundjuka Aakriste ya pumbwa uulaadhi?

¹⁰ Aagundjuka Aakriste ohayi iyadha moonkalo odhindji, moka ye na okuulika kutya oye na uulaadhi wokulongela Jehova. Otaya vulu okwiilonga nokulandula oshiholelwa shaSalomo, ngoka a li u ulike uulaadhi, sho a ningi omatokolo gopandunge, a gwanithe po iilonga yokutunga otempeli. Nonando Aakriste aagundjuka otaya vulu okupewa omayele kaavali yawo, oye na okuninga omatokolo ga simana kuyo yene. (Omayel. 27:11) Oya pumbwa uulaadhi, opo ya ninge omatokolo gopandunge kombinga yeendathano ewanawa, yomainyanyudho, yuuyogoki  wopamikalo noyeninginitho. Aagundjuka ya tya ngaaka ohaya yanda okupukithwa kuSatana, ngoka ta sitha Kalunga ohoni.

11, 12. (a) Ongiini Moses e tu tulila po oshiholelwa shokuulika uulaadhi? (b) Aagundjuka otaya vulu ngiini okuholela Moses?

¹¹ Etokolo limwe lya simana ndyoka aagundjuka ye na okuninga olya kwatela mo omalalakano gawo. Miilongo yimwe, aagundjuka ohaya thiminikwa yi itulile po omalalakano ge na ko nasha nelongo lyopombanda nokulalakanena iilonga yoshimaliwa oshindji. Omanga miilongo yilwe moka uuhupilo tawu shongola, aagundjuka ohaya kala yu uvite kutya oye na okugandja eitulomo kokukwathela aanegumbo yawo painiwe. Ngele owi iyadha moonkalo dha tya ngawo, dhiladhila koshiholelwa shaMoses. Nonando okwa putudhwa komwanakadhona gwaFarao, ini itulila po omalalakano gokukala a simana nenge omuyamba. Oku na okukala a li ta thiminikwa e shi ninge kuyaandjawo muEgipiti, kaalongi nokaagandjimayele. Ihe pehala lyokwiigandja, Moses okwa katuka nuulaadhi a longele Kalunga kashili. Sho a thigi po Egipiti nuuyamba washo, okwi inekele thiluthilu muJehova. (Heb. 11:24-26) Moses okwa li a yambekwa kuJehova, nota ka mona natango omayambeko ogendji monakuyiwa.

¹² Sha faathana, Jehova ota ka yambeka aagundjuka mboka taya longo nuudhiginini yi itulile po omalalakano gopambepo, nokupititha komeho Uukwaniilwa moonkalamwenyo dhawo. Ote ke ya kwathela, ya sile oshimpwiyu aanegumbo yawo. Omimvo 2 000 nasha dha ka pita, omugundjuka Timoteus, okwa li i itulile po omalalakano gopambepo. Nangoye oto vulu oku shi ninga. * — Lesha Aafilippi 2:19-22.

13. Uulaadhi owa li wa kwathele ngiini omumwameme gumwe omugundjuka a adhe omalalakano ge?

¹³ Omumwameme gumwe e li moAlabama, moAmerika, okwa li a pumbwa okwiitulila po omalalakano gopambepo. Okwa nyola a ti: “Sho tandi putuka, onda kala ndi na ohoni. Kanda li naanaa handi vulu okupopya naantu pOshinyanga shUukwaniilwa, nokasha li oshipu kungame okulonga egumbo negumbo.” Kekwatho lyaavali ye nosho wo lyayalwe megongalo, omugundjuka nguka Omukriste, okwa li a adha elalakano lye lyokuninga omukokolindjila gwondjigilile. Okwa ti: “Uuyuni waSatana owa tala ko elongo lyopombanda, esimano, iimaliwa nokukala niinima oyindji yopamaliko, yi li omalalakano omawanawa. Oyendji mboka haya lalakanene iinima mbyoka, ihaya a adha omalalakano gawo, ihe ohashi ya etele owala omaipulo ogendji neyeme.”

14. Opoompito dhimwe dhini aavali Aakriste ya pumbwa okukala ye na omukumo?

¹⁴ Aavali Aakriste nayo oya pumbwa okukala ye na omukumo. Pashiholelwa, omuhona gwoye otashi vulika a kale te ku pula aluhe wu longe omalutayima koongulohi nomomahuliloshiwike. Pethimbo mpoka otashi vulika opo hamu ningi elongelokalunga lyuukwanegumbo, okuya muukalele nenge kokugongala. Pompito ndjoka owa pumbwa lela uulaadhi wu tinde omalutayima ngoka, e to tulile po aanona yoye oshiholelwa oshiwanawa. Nenge tashi vulika aavali yamwe megongalo ya pitike aanona yawo, ya ninge iinima mbyoka inoo hala okamwoye ka ninge. Aavali mboka otashi vulika ya pule kutya omolwashike okamwoye ihaaka kutha ombinga miinima mbyono. Mbela oto ka popya nomukumo kutya omolwashike ihaake shi ningi?

15. Ongiini Episalomi 37:25 nosho wo Aahebeli 13:5 taya vulu okukwathela aavali?

¹⁵ Ohatu ulike uulaadhi sho tatu kwathele aanona yetu yi itulile po noya adhe omalalakano gawo gopambepo. Pashiholelwa, aavali yamwe ohaya kakadhala okuladhipika aanona yawo yi itulile po omalalakano guukokolindjila, goku ka longa hoka ku na ompumbwe onene, gokuya koBetel nogokuya miilonga yokutunga. Aavali otashi vulika haya kala ya tila kutya aanona yawo  itaya ka vula oku ya sila oshimpwiyu, ngele ya kulupa. Onkee ano, aavali mboka aanandunge ohaya kala ye na omukumo noyi inekela momauvaneko gaJehova. (Lesha Episalomi 37:25; Aahebeli 13:5.) Omukalo gumwe to vulu okuulika kutya owu na omukumo nowi inekela muJehova, omokukwathela aamwoye ya ninge sha faathana. — 1 Sam. 1:27, 28; 2 Tim. 3:14, 15.

16. Aavali yamwe oya kwathela ngiini aanona yawo yi itulile po omalalakano gopambepo, naashika osha kwathela ngiini oyana?

¹⁶ Aaihokani yamwe yokoAmerika, oya kwathele aanona yawo yi itulile po omalalakano gopambepo. Omusamane okwa ti: “Manga aanona yetu inaaya tameka okweenda nokupopya, otwa li hatu popi nayo kombinga yenyanyu ndyoka hali zi mokukokola ondjila nomokulonga megongalo. Ngashingeyi omalalakano ngoka ogo yi itulila po. Okwiitulila po omalalakano gopambepo noku ga gwanitha po, ohashi kwathele aanona yetu ya kondjithe omashongo gomuuyuni mbuka waSatana, e taya gandja eitulomo kuJehova.” Omumwatate gumwe ngoka e na aanona yaali, okwa ti: “Aavali oyendji ohaya ningi oonkambadhala dha mana mo nohaya longitha iimaliwa oyindji, ya kwathele aanona yawo ya adhe omalalakano miinima ngaashi omaudhano, omainyanyudho nelongo. Otashi ka kala pandunge, uuna aavali taya ningi oonkambadhala dha mana mo, ya kwathele oyana ya adhe omalalakano ngoka tage ya kwathele ya kale nekwatathano ewanawa naJehova. Inashi tu etela owala enyanyu okumona aanona yetu taya gwanitha po omalalakano gawo, ihe oshe tu nyanyudha wo oku ya kwathela ye ga gwanithe po.” Oto vulu okukala nuushili kutya Kalunga ota ka yambeka aavali mboka haya kwathele aanona yawo yi itulile po omalalakano gopambepo noku ga adha.

17. Gandja oshiholelwa shankene yalwe taya vulu okuulika uulaadhi wawo megongalo.

¹⁷ Otwa pumbwa wo okuulika kutya otu na omukumo, uuna tu li megongalo. Pashiholelwa, aakuluntugongalo oya pumbwa okukala ye na uulaadhi, uuna tayu ungaunga niinima yopaveta. Aakuluntugongalo yamwe ohaya talele po oondholongo, opo ya konakone Ombiimbeli naamboka ye na ohokwe. Ongiini kombinga yaamwameme mboka inaaya hokanwa? Ngashingeyi opu na oompito odhindji dhokutamununa mo uukalele wawo. Otaya vulu okuninga aakokolindjila,  oku ka longa hoka ku na ompumbwe onene, okukutha ombinga mIilonga yokutunga nokuya kOsikola yAauvithi yUukwaniilwa. Yamwe otaya vulu nokuli okuya kosikola yaGilead.

18. Aamwameme aakokele otaya vulu ngiini okuulika uulaadhi?

¹⁸ Otu hole aamwameme aakokele, notwa pandula sho tu ya na megongalo. Yamwe otashi vulika kaaye na we oonkondo dhokulonga ngaashi ya li haya longo nale miilonga yaJehova, ihe natango oye na omukumo notaya longo shoka taya vulu. (Lesha Titus 2:3-5.) Pashiholelwa, omumwameme omukokele okwa pumbwa uulaadhi, ngele okwa pulwa a popye nomumwameme omugundjuka kombinga yokuzala nawa. Ita ka nyenyetela omumwameme kombinga yoonguwo dhe, ihe ote ke mu kwathela nombili a dhiladhile muule kombinga yoonguwo dhe nkene tadhi vulu okuguma yalwe. (1 Tim. 2:9, 10) Uuna omumwameme omukokele tu ungaunga nonkalo ya tya ngawo pahole, otashi ke eta iizemo iiwanawa.

19. (a) Ongiini aamwatate ya ninginithwa taya vulu okukala ye na omukumo? (b) Ongiini Aafilippi 2:13 nosho wo Jesaja 40:29 taya vulu okukwathela aamwatate ya kale ye na omukumo?

¹⁹ Aamwatate mboka ya ninginithwa nayo oya pumbwa okukala ye na omukumo noyi ipyakidhila niilonga yawo. Aalumentu aalaadhi mboka ye na ehalo lyokutaamba ko iinakugwanithwa, oye li ekwatho enene kegongalo. (1 Tim. 3:1) Aalumentu yamwe otashi vulika ya kakadhale okulalakanena iinakugwanithwa. Pashiholelwa, otashi vulika omumwatate a li a ninga epuko monakuziwa, ihe ngashingeyi oku uvite kutya ina gwana okukala omuyakuligongalo nenge omukuluntugongalo. Omumwatate gumwe otashi vulika a kale u uvite kutya ita vulu okugwanitha po iinakugwanithwa ye. Ngele osho wu uvite ngawo, Jehova ota vulu oku ku kwathela wu kale wu na omukumo. (Lesha Aafilippi 2:13; Jesaja 40:29.) Dhimbulukwa kutya Moses oshikando shimwe okwa li u uvite inaa gwana okupewa iinakugwanithwa. (Eks. 3:11) Nonando ongawo, Jehova okwa li e mu kwathele. Mokweendela ko kwethimbo, Moses okwa kala e na omukumo nokwa gwanitha po iilonga ye. Omumwatate a ninginithwa naye ota vulu okukala e na omukumo, ngele okwa kala ha galikana kuJehova e mu kwathele nokulesha Ombiimbeli esiku kehe. Uuna ta tedhatedha komahokololo gaamboka ya li ye na omukumo otashi ke mu kwathela wo. Ota vulu okupula aakuluntugongalo neifupipiko ye mu dheule noye mu pe kehe shimwe shoka ta vulu okulonga. Aamwatate amuhe mwa ninginithwa otamu ladhipikwa mu kale mu na omukumo nomu longe nuudhiginini megongalo.

20, 21. (a) David okwa li a shilipaleke Salomo shike? (b) Otatu vulu okukala nuushili wuni?

²⁰ Omukwaniilwa David okwa li a dhimbulukitha Salomo kutya Jehova ota ka kala pamwe naye sigo a mana okutunga otempeli. (1 Ondjal. 28:20) Salomo okwa tula miilonga omayele ga he, noine etha nando uugundjuka nokwaa na ontseyo yi mu ye moshipala. Oku ulike lela uulaadhi e ta tameke iilonga. Kekwatho lyaJehova, okwa mana okutunga otempeli onenenene muule womimvo heyali netata.

²¹ Ngaashi Jehova a li a kwathele Salomo, natse ota vulu oku tu kwathela tu kale tu na omukumo notu longe iilonga yetu momagumbo getu nomegongalo. (Jes. 41:10, 13) Uuna tatu ulike uulaadhi sho tatu longele Jehova, otatu vulu okukala nuushili kutya ote ke tu yambeka ngashingeyi nosho wo monakuyiwa. Onkee ano, ‘kala wu na omukumo, e to tameke iilonga.’