1. Omolwashike tu na uushili kutya Oohapu dhaKalunga odhi na oonkondo dhokulonga sha? (Tala kethano lyopetameko.)

TU LI aapiya yaJehova, otu shi kutya Oohapu dhaKalunga, ndhoka dhi li etumwalaka ndyoka a pa aantu, “odhi na omwenyo nodhi na oonkondo dhokulonga sha.” (Heb. 4:12) Oyendji yomutse otwa mona nkene oonkondo dhOohapu dhaKalunga dha lundulula oonkalamwenyo dhetu. Aamwatate naamwameme yamwe oya li aafuthi, oonkolwi naahondeli. Yalwe oya li ye na iinima oyindji yomuuyuni mbuka, ihe natango oya li yu uvite pu na shoka sha kambela po moonkalamwenyo dhawo. (Omuuv. 2:3-11) Omathimbo nomathimbo, yamwe mboka ya li ya kana nokaaye na etegameno, ngashingeyi oya mona ondjila ndjoka tayi fala komwenyo, sho ye etha oonkondo dhOohapu dhaKalunga dhi ya lundulule. Otashi vulika wu hole okulesha iimoniwa yoyendji, mbyoka hayi holoka mOshungolangelo, moshitopolwa “Ombiimbeli ohayi lundulula onkalamwenyo yaantu.” Nonando Aakriste mboka oya taamba ko oshili, otaya tsikile okuninga ehumokomeho pambepo, taya kwathelwa kOmanyolo.

2. Oohapu dhaKalunga odha li dha kwathele aantu mboka ya li ko omimvo 2 000 nasha dha ka pita, ya ninge shike?

² Aantu oyendji kunena oya ninga omalunduluko gi iwetikile, sho ya konakona Ombiimbeli. Mbela shoka oshi na oku tu kumitha? Aawe. Iimoniwa mbyoka otayi tu dhimbulukitha aamwatate naamwameme  mboka ya li ko omimvo 2 000 nasha dha ka pita, mboka ya li ye na etegameno lyomegulu. (Lesha 1 Aakorinto 6:9-11.) Konima sho omuyapostoli Paulus a popi kombinga yaantu mboka itaaya ka ya mUukwaniilwa waKalunga, okwa gwedha ko a ti: “Yamwe yomune osho mwa li mwa tya ngaaka.” Ihe oya li ya ningi omalunduluko kekwatho lyOmbiimbeli nolyombepo ondjapuki yaKalunga. Nokuli nokonima sho ya taamba ko oshili, yamwe oya li ya ningi omapuko ga kwata miiti. Pashiholelwa, Ombiimbeli oya popya Omukriste gumwe omugwayekwa ngoka a li ko omimvo 2 000 nasha dha ka pita. Okwa li a kondwa, nokonima okwa ningi omalunduluko e ta galulilwa megongalo. (1 Kor. 5:1-5; 2 Kor. 2:5-8) Otashi tsu omukumo okumona kutya ooitaali ooyakwetu mboka ya li ya ningi omapuko, oya li ya vulu okuninga omalunduluko kekwatho lyOohapu dhaKalunga.

3. Oshike tatu ka kundathana moshitopolwa shika?

³ Jehova okwe tu pa Oohapu dhe dhi na oonkondo. Onkee ano, otwa hala okuninga ngaashi tatu vulu tu dhi longithe nawa. (2 Tim. 2:15) Moshitopolwa shika, otatu ka kundathana nkene tatu vulu lela okweetha oonkondo dhOohapu dhaKalunga dhi tu kwathele (1) monkalamwenyo yetu, (2) muukalele (3) nuuna tatu gandja oshipopiwa komutuni. Omadhimbulukitho ngaka otage ke tu kwathela tu ulike kutya otu hole notwa pandula Tate gwetu omunahole, ngoka te tu longo shoka she tu opalela. — Isa. 48:17.

4. (a) Ngele otwa hala Oohapu dhaKalunga dhi tu kwathele, oshike twa pumbwa okuninga? (b) Ongiini to vulu okwiitulila po ethimbo lyokulesha Ombiimbeli?

⁴ Ngele otwa hala Oohapu dhaKalunga dhi tu kwathele, otwa pumbwa oku dhi lesha esiku kehe. (Jos. 1:8) Odhoshili kutya oyendji yomutse otwi ipyakidhila monkalamwenyo. Ihe nonando ongawo, katu na okweetha sha shilwe mwa kwatelwa iinakugwanithwa yetu, yi tu ethithe po okulesha Ombiimbeli. (Lesha Aaefeso 5:15, 16.) Aapiya yaJehova oyendji oyi itulila po ethimbo lyokulesha Ombiimbeli esiku kehe. Yamwe ohaye yi lesha ethimbo lyongula, yamwe omutenya nayamwe okongulohi. Oyu uvite ngaashi omupisalomi a li u uvite, ngoka a nyola a ti: “Ompango yoye ondi yi hole ngiini! Ohandi yi dhiladhila esiku alihe.” — Eps. 119:97.

5, 6. (a) Omolwashike sha simana okutedhatedha? (b) Ongiini tatu vulu okutedhatedha momukalo ngoka tagu tu kwathele tu pondole? (c) Ongiini to vulu okumona uuwanawa mokulesha nomokutedhatedha kOohapu dhaKalunga?

⁵ Oshikwawo, sho tatu lesha Ombiimbeli, osha simana tu tedhatedhe kwaashoka tatu lesha. (Eps. 1:1-3) Ngele otwe shi ningi, opo owala tatu ka vula okutula miilonga uunongo mboka wu li mo. Kutya nduno otatu lesha Oohapu dhaKalunga mOmbiimbeli mo mwene nenge miikwaelektronika yetu, elalakano lyetu otwa hala dhi tu lundulule nodhi inyengithe omitima dhetu.

⁶ Ongiini tatu vulu okutedhatedha momukalo ngoka tagu tu kwathele tu pondole? Oyendji sho taya lesha oovelise dhontumba mOmbiimbeli,  ohaya mono hashi kwathele okumwena po manga, e taya tedhatedha komapulo ngaka: ‘Shika otashi longo ndje shike kombinga yaJehova? Mbela ohandi tula ngaa nale miilonga omakotampango ngono taga popiwa moovelise ndhika? Mbela openi nda pumbwa okuninga omalunduluko?’ Sho tatu tedhatedha pamwe negalikano, otatu ka kala twa hala okutula lela miilonga shoka tatu ilongo. Kungawo, otatu ka mona nkene oonkondo dhoohapu dhaKalunga tadhi longo monkalamwenyo yetu. — 2 Kor. 10:4, 5.

7. Ongiini tatu vulu okulongitha nawa Oohapu dhaKalunga muukalele?

⁷ Oshike tashi vulu oku tu kwathela tu longithe nawa Oohapu dhaKalunga muukalele? Otwa pumbwa oku dhi longitha aluhe, sho tatu longo aantu. Omumwatate gumwe okwa pula a ti: “Ando owa li to uvitha naJehova egumbo negumbo, mbela ongoye owala to ka kala to popi nenge oto ke mu etha naye a popye ko?” Mbela omolwashike omumwatate a pula ngawo? Okwa li a hala okutsa omuthindo kutya uuna tatu lesha mOmbiimbeli mo mwene sho tu li muukalele, kungawo otatu etha Jehova a popye nomunegumbo. Omanyolo ga hogololekekeka otaga ka kala ekwatho enene, shi vulithe kehe shimwe shoka tatu ka popya. (1 Tes. 2:13) Ipula ngeyi: ‘Mbela ohandi kongo ngaa oompito tadhi opalele ndi kundathane oovelise dhontumba mOmbiimbeli naamboka tandi uvithile onkundana ombwanawa?’

8. Omolwashike twa pumbwa okuninga oshindji, shi vulithe owala okulesha omanyolo sho tatu uvitha?

⁸ Odhoshili kutya otwa pumbwa okuninga oshindji kaashi shi owala okuleshela omanyolo ngoka tatu kundathana naye. Omolwashike? Omolwaashoka aantu oyendji Ombiimbeli oye yi shi owala kashona nayamwe kaye yi uvite ko. Shono osho sha li ngaaka pethimbo lyonale nosho shi li kunena. (Rom. 10:2) Onkee ano, inatu dhiladhila kutya ngele otwa leshele omuntu ovelise mOmbiimbeli, ote ke yi uva ko. Otwa pumbwa ethimbo, opo tu yi ndjandjukunune nawa, tashi vulika tatu leshulula iitsa mbyoka ya simana e tatu yi yelitha nawa. Okuninga ngawo, otashi  ka kwathela aapulakeni yu uve ko nawa Oohapu dhakalunga. — Lesha Lukas 24:32.

9. Ongiini tatu vulu okulongitha omanyolo momukalo ngoka tagu ulike kutya otwa simaneka Ombiimbeli? Gandja oshiholelwa.

⁹ Otashi ka kala wo shi li nawa tu longithe Omanyolo momukalo ngoka tagu simanekitha Ombiimbeli. Pashiholelwa, otatu vulu okulombwela ngoka tatu uvithile tatu ti: “Natu tale kutya Omushiti ote tu lombwele shike moshikundathanwa shika.” Uuna tatu popi nagumwe ngoka kee shi Omukriste mokuputuka kwe, otatu vulu okutya: “Tala shoka Omanyolo Omayapuki tage tu lombwele.” Uuna tatu uvithile omuntu ngoka kee na ko nasha nomalongelokalunga, otatu vulu oku mu pula tatu ti: “Mbela owu uva ngaa nale eyeletumbulo ndika lyonale?” Ngele otwa kala tu shi kutya aantu oya za momaputuko nomomaitaalo ga yoolokathana, otatu ke ya kwathela shi ikolelela koonkalo dhawo. — 1 Kor. 9:22, 23.

10. (a) Hokolola oshimoniwa shomumwatate gumwe. (b) Owe shi mona ngiini kutya Oohapu dhaKalunga odhi na oonkondo dhokulonga sha muukalele?

¹⁰ Oyendji oya mona kutya okulongitha Oohapu dhaKalunga muukalele, otashi vulu okukala ekwatho enene kwaamboka tayu uvithile. Tala koshiholelwa shika. Omumwatate gumwe okwa li a shuna komusamane omukokele ngoka a li u ulika ohokwe. Omusamane ngoka okwa kala ha lesha iileshomwa yetu uule womimvo. Pehala lyo ku mu pa owala Oshungolangelo ndjoka opo ya piti, omumwatate okwa tokola a kundathane naye enyolo limwe li li moshileshomwa shoka. Okwe mu leshele Aakorinto aatiyali 1:3, 4, ndjoka tayi ti: ‘Tate omunahenda, Kalunga, ngoka kuye haku zi ekwatho alihe, ohe tu kwatha muudhigu wetu awuhe.’ Omunegumbo ngoka okwa li a gumwa lela koohapu ndhoka, nokwe mu pula nokuli e dhi leshe ishewe. Omusamane ngoka okwa popi kutya ye nomukulukadhi gwe, oya li ya pumbwa lela ehekeleko. Omolwenyolo ndyoka, ngashingeyi omusamane ngoka okwa hala okutseya oshindji kombinga yOmbiimbeli. Mbela ito tsu kumwe nasho kutya Oohapu dhaKalunga odhi na oonkondo dhokulonga sha muukalele? — Iil. 19:20.

11. Aamwatate mboka haya gandja iipopiwa komutuni, oye na oshinakugwanithwa shini?

¹¹ Atuhe ohatu nyanyukilwa okukala pokugongala kwopaKriste nopiigongi iishona niinene. Etompelo lya simanenena kutya omolwashike hatu kala po, olyo okulongela Jehova. Ohatu mono wo uuwanawa miikulya yopambepo mbyoka hatu pewa. Aamwatate mboka haya gandja iipopiwa komutuni, ohaya nyanyukilwa uuthembahenda mboka. Ihe oye na okukaleka momadhiladhilo kutya iinakugwanithwa mbyoka ye na, iinene. (Jak. 3:1) Oye na aluhe okushilipaleka kutya shoka taya longo, osha kankamena kOmbiimbeli. Ngele owa pewa oshinakugwanithwa shokugandja oshipopiwa komutuni, ongiini to vulu okweetha oonkondo dhOohapu dhaKalunga dhi kwathele aapulakeni yoye?

12. Ongiini ngoka ta gandja oshipopiwa ta vulu okushilipaleka kutya omanyolo ogo taga dhana onkandangala moshipopiwa she?

¹² Shilipaleka kutya Omanyolo ogo taga dhana onkandangala moshipopiwa shoye. (Joh. 7:16) Mbela shoka osha kwatelwa mo shike? Kala wa kotokela omukalo moka to gandja oshipopiwa shoye. Iimoniwa yoye nomathaneko goye hayo yi kala tayi dhana onkandangala yi vulithe Omanyolo. Dhimbulukwa wo kutya okulesha Omanyolo ogendji mOmbiimbeli hako okulonga. Ngele owa lesha Omanyolo ogendji, aapulakeni yoye itaye ke ga dhimbulukwa naanaa. Onkee ano, hogolola nuukeka omanyolo ngoka ge na enenedhiladhilo. Ga lesha, ga yelitha noku ga longitha nawa. Gandja wo omathaneko. (Neh. 8:8) Ngele oshipopiwa oshi ikolelela kuuyelele mboka wa gandjwa kehangano, shi konakona nawa e to tala nkene omanyolo ga longithwa. Kambadhala okuuva ko oshipopiwa nkene sha kwatathana nomanyolo ngoka ga tothwa mo. Hogolola omanyolo wu longe aantu iitsa ya  simana mbyoka ye etwa moshipopiwa. (Oto vulu okutala omaetopo gamwe ngoka taga vulu oku ku kwathela pepandja 21 sigo 23 membo Mona ouwa mOfikola yOukalele woPauteokratika.) Komeho gaayihe, galikana kuJehova e ku kwathele wu gandje omadhiladhilo ge ngoka ge li mOohapu dhe. — Lesha Esra 7:10; Omayeletumbulo 3:13, 14.

13. (a) Omumwameme gumwe okwa li a gumwa ngiini kOohapu dhaKalunga ndhoka u uvu pokugongala kwoPakriste? (b) Ongiini ho mono uuwanawa momukalo moka Omanyolo haga longithwa pokugongala kwopaKriste?

¹³ Omumwameme gumwe gwokoAustralia, okwa li a gumwa noonkondo komanyolo ngoka ga li ga gandjwa mokugongala kwopaKriste. Nonando okwa li a monithwa iihuna noonkondo pethimbo sho a li okanona, okwa li a taamba ko etumwalaka lyOmbiimbeli nokwa li iyapulile Jehova. Ihe nonando ongawo, osha li oshidhigu kuye okwiitaala kutya oku holike kuJehova. Mokweendela ko kwethimbo, okwa li a mono lela kutya Jehova Kalunga oku mu hole. Oshike sha li she mu kwathele? Onkalo oya lunduluka, sho a tedhatedha kenyolo limwe ndyoka a li u uvu pokugongala nolya li lye mu ningitha a leshe omanyolo galwe. * Mbela opu na oshikando shimwe wa li wa gumwa kOohapu dhaKalunga pokugongala, poshigongi shoshikandjo nenge shoshitopolwa? — Neh. 8:12.

14. Ongiini tatu vulu okuulika kutya otwa pandula Oohapu dhaKalunga, Ombiimbeli?

¹⁴ Mbela inatu pandula sho Jehova e tu pa Oohapu dhe, Ombiimbeli? Jehova ine tu pa owala Oohapu dhe, ihe oku uvaneka kutya kadhi na siku dhi hule po. (1 Pet. 1:24, 25) Onkee ano, atuhe otwa pumbwa oku dhi lesha pandjigilile, oku dhi tula miilonga monkalamwenyo yetu noku dhi longitha tu kwathele yalwe. Kungawo, otatu ulike kutya otu hole notwa pandula Ombiimbeli, ihe unene tuu Omunyoli gwayo, Jehova Kalunga.