SHOKA TASHI KWATHELE AAIHOKANI
1: Einekelathano
EINEKELATHANO OSHIKE?
Aasamane naakulukadhi mboka yi inekelathana oya tala ko ondjokana yawo yi li oshinima tashi kalelele. Etaloko ndyono ohali ya kwathele ya kale yu uvitathane mondjokana. Kehe gumwe oha kala u uvite kutya mukwawo ota kala omudhiginini, nomoonkalo oondhigu.
Aaihokani yamwe otashi vulika ya kale yu uvite kutya oye na owala okukala mondjokana, oshoka aantu momudhingoloko, ookuume kawo nenge aakwanezimo oye wete kutya okuteya ondjokana oshinima oshiwinayi. Ihe oshi li nawa aaihokani ya kale yi inekelathana, molwaashoka ye holathane noya simanekathana.
SHOKA OMBIIMBELI TAYI TI: “Omulumentu ina henga po nando omukadhi.” — 1 Aakorinto 7:11.
Tate Micah okwa ti: “Ngele owa lenga ondjokana yeni, ito ka kala ho geye mbala. Oto ka kala ho dhimine po noho gandja ombili nziya. Omaupyakadhi oto ke ga tala ko ge li omandangalati, ihe hampito yokuteya ondjokana.”
OMOLWASHIKE EINEKELATHANO LYA SIMANA?
Ngele aaihokani inayi inekelathana, uuna pwa holoka omaupyakadhi otaya ka kala yu uvite kutya inaya opalelathana notaya ka konga omatompelo gokuteya ondjokana.
Meme Jean okwa ti: “Aantu oyendji ngele taya yi mondjokana, ohaya kala nale ya tokola kutya ngele iinima itayi ende nawa, otaya vulu oku yi teya. Aantu mboka haya yi mondjokana ye na omadhiladhilo ngono, nena ihaya kala yi inekelathana okuza petameko.”
SHOKA TO VULU OKUNINGA
IPULA MWENE
Uuna tamu nyenyeta . . .
-
Mbela oho iyadha to ipe uusama sho wa yi mondjokana nakuume koye ngono?
-
Momwenyo gwoye ohamu ya omuntu gumwe i ili, oye a kale kuume koye kopandjokana?
-
Oho lombwele mukweni to ti: “Otandi ku etha po” nenge “otandi ka konga gumwe ngoka e hole ndje”?
Ngele eyamukulo lyoye oeeno kulimwe nenge kugamwe gomomapulo ngano, osha hala kutya, owa pumbwa okulonga nuudhiginini mu kale mwi inekelathana mondjokana yeni.
AAIHOKANI KUNDATHANENI OMAPULO NGAKA
-
Mbela omwi inekelathana ngaa natango mondjokana yeni? Ngele hasho, oshike she ende mongaya?
-
Oonkatu dhini mu na okukatuka ngashingeyi mu kale mwi inekelathana shi vulithe nale?
SHOKA TO VULU OKUNINGA
-
Kala ho nyolele kuume koye kopandjokana okambapila wu mu lombwele kutya owu mu hole
-
Ulika kutya owu li omudhiginini kukuume koye kopandjokana mokukala ho tula omathano ge poshitaafula shoye kiilonga
-
Kala ho dhengele nenge ho tumine kuume koye kopandjokana omatumwalaka esiku kehe, uuna wu li kiilonga nenge uuna kaamu li pamwe
SHOKA OMBIIMBELI TAYI TI: “Shono Kalunga e shi tula kumwe, inashi kuthwa kumwe komuntu.” — Mateus 19:6.
