Ngele aaihokani ohaya longele kumwe, oya fa aantu yaali ye li mondhila. Gumwe omuhingi gumwe ota kwathele nakuhinga. Ngele pwa holoka uupyakadhi, ohaya kambadhala oku wu kandula po momukalo ngoka tagu ya etele uuwanawa, pehala lyokudhiladhila owala kehe gumwe polwe.

SHOKA OMBIIMBELI TAYI TI: “Kaye li we yaali, aawe, oyo omuntu gumwe.” — Mateus 19:6.

Tate Christopher ota ti: “Omusamane nomukulukadhi oye na okukala haya longele kumwe, opo ya pondole mondjokana.”

Aaihokani mboka ihaaya longele kumwe ohayi ipilukile po uuna pwa holoka uupyakadhi, pehala lyoku wu kandula po. Uunima wanathangwa ohaye wu ningi omandangalati omanenenene.

Meme Alexandra ota ti: “Elongelokumwe olya simana noonkondo mondjokana. Ando ngaye nomusamane gwandje otwa li ihaatu longele kumwe, andola otwa fa owala aantu yaali haya zi pamwe, ihe katu shi we aaihokani. Ando ihatu tu tsu kumwe uuna tatu ningi omatokolo ga simana.”

IPULA MWENE

• Mbela iimaliwa mbyoka handi kwata onde yi tala ko kutya ayihe oyandje owala?

• Mbela ohandi thuwa nawa, ngele ndi li kokule nakuume kandje kopandjokana?

• Mbela ondi yele aakwanezimo yakuume kandje kopandjokana, nonando ye okuhole oku ya talela po?

AAIHOKANI KUNDATHANENI OMAPULO NGAKA

• Omiinima yini hatu longele kumwe mondjokana?

• Openi tu na okuninga omalunduluko?

• Oonkatu dhini tu na okukatuka, opo tu kale tatu longele kumwe shi vulithe nale?

SHOKA TO VULU OKUNINGA

• Dhiladhila ando tamu dhana etanga, ihe kehe gumwe oku li mosipana yi ili. Oshike tamu vulu okuninga po, opo mu kale amuhe mosipana yimwe?

• Pehala lyokutya, ‘oshike ndi na okuninga, opo ndi sindane?’ ipula to ti: ‘Oshike tu na okuninga, opo tu sindane?’

Tate Ethan okwa ti: “Ino kala unene to gandja eitulomo kutya olye e li mondjila nolye a puka. Shoka sha simana mondjokana ombili nosho wo uukumwe.”

SHOKA OMBIIMBELI TAYI TI: “Lalakaneneni uuwanawa wooyakweni wo, haamboka ashike weni yene.” — Aafilippi 2:3, 4.