Edhiminathanopo olyo okukala kuu uvite we nayi nenge wa geya, uuna wa ningwa nayi. Itashi ti kutya owu na okutala ko shoka omuntu e ku ninga shi li okapulu kelume nenge wu shi ipwililikile.

SHOKA OMBIIMBELI TAYI TI: “Kwathathaneni, dhiminathanii po oondjo ethimbo kehe, uuna pe na ngoka a ningathana namukwawo.” — Aakolossa 3:13.

Tate Aaron okwa ti: “Uuna wu hole gumwe, iho gandja unene eitulomo komapuko ge, ihe oho tala koonkambadhala ndhoka ta ningi, opo a kale omuntu omwaanawa.”

Ngele oho pungula ongeyo momutima gwoye, otashi ke ku etela uuwehame wopalutu nowopamadhiladhilo, noto vulu wo okuteya po ondjokana yeni.

Meme Julia okwa ti: “Esiku limwe omusamane gwandje okwa li a pe ndje ombili, omolwoshinima shoka sha li she ehameka ndje noonkondo. Osha li oshidhigu kungaye oku mu dhimina po. Osho ngaa nde ke mu dhimina po, ihe otandi ipe uusama sho inaandi shi ninga nziya. Osha li sha gumu ekwatathano lyetu.”

IPULA MWENE

Uuna kuume koye kopandjokana a ningi sha nenge a popi sha she ku geyitha, ipula to ti:

• ‘Mbela ohandi geye kuunima uushona?’

• ‘Mbela shoka a ninga osha kwata miiti nonda pumbwa okupewa ombili, nenge pamwe onda pumbwa owala oku shi dhima po?’

AAIHOKANI KUNDATHANENI OMAPULO NGAKA

• Ohashi kutha ethimbo li thike peni, opo tu dhiminathane po?

• Oshike tu na okuninga, opo tu kale hatu idhimine po moompadhi oontalala?

SHOKA TO VULU OKUNINGA

• Uuna kuume koye kopandjokana e ku geyitha, ino thika pehulithodhiladhilo kutya ke li nawa.

• Kambadhala oku mu dhiminapo, oshoka “atuheni ohatu puka olwindji.”—Jakob 3:2.

Meme Kimberly okwa ti: “Okudhiminathana po ohaku kala okupu ngele amuhe mu na epuko, ihe ngele gumwe oye owala e na epuko, ohashi kala oshidhigu. Ohashi pula eifupipiko mu paathane ombili nomu dhiminathane po.”

SHOKA OMBIIMBELI TAYI TI: “Paathaneni ombili.” — Mateus 5:25.