1. Oshike tashi ke tu kwathela tu kale twa tonata notu idhidhimikile omamakelo?

OPU na iinima iihaluthi yi li pokuningwa masiku. Omahunganeko gOmbiimbeli ngoka taga gwanithwa otaga gandja uunzapo kutya shoka oshi li pokuningwa. Onkee ano, otu na okukala twa tonata. Oshike tashi tu kwathele tu kale twa tonata? Omuyapostoli Paulus ote tu ladhipike ‘tu kale twa tala kiinima mbyoka kaayi wetike.’ Shika otashi ti, otu na okukaleka aluhe momadhiladhilo ondjambi yetu yomwenyo gwaaluhe, kutya nduno otatu ke yi mona megulu nenge okombanda yevi. Sho Paulus a nyola oohapu ndhoka, okwa li ta ladhipike ooitaali ooyakwawo ya kaleke momadhiladhilo uuwanawa mboka taya ka mona ngele oya kala aadhiginini sigo okehulilo. Ngele taya ningi ngaaka, otashi ke ya kwathela wo yi idhidhimikile omamakelo nomahepeko. — 2 Kor. 4:8, 9, 16-18; 5:7.

2. (a) Oshike tu na okuninga, opo tu kale tu na einekelo lya kola miinima mbyoka twa tegamena? (b) Oshike tatu ka konakona moshitopolwa shika, nomwaashoka tashi landula ko?

² Opo tu kale neinekelo lya kola miinima mbyoka twa tegamena, otu na okukala twa tala kiinima mbyoka kaayi wetike ngashingeyi. Ekotampango ndika lya simana otali adhika momayele ngoka Paulus a gandja. Otwa pumbwa okugandja eitulomo kiinima mbyoka iindhindhilikwedhi kaayi wetike ngashingeyi. (Heb. 11:1; 12:1, 2) Natu ka kundathaneni iiningwanima omulongo mbyoka ya pambathana netegameno lyetu lyomwenyo gwaaluhe. *

3. (a) Aatessalonika yotango 5:2, 3 otaya popi shike shoka tashi ka ningwa monakuyiwa? (b) Aawiliki yopapolitika otaya ka ninga shike, noolye tashi vulika ye ki imbwange mumwe nayo?

³ Paulus okwa tumbula oshinima shimwe shoka tashi ka ningwa monakuyiwa montumwafo ye ndjoka a li a nyolele  Aatessalonika. (Lesha 1 Aatessalonika 5:2, 3.) Oshinima shoka a li a popi “esiku lyaJehova.” (NW) Esiku ndyoka otali ulike kethimbo ndyoka tali tameke nehanagulo lyomalongelokalunga giifundja notali ka hula niita yaArmagedon. Ihe manga esiku lyaJehova inaali tameka, aaleli yuuyuni otaya ka igidha taya ti: “Ombili negameno!” (NW) Eigidho ndyoka otashi vulika li ka ningwe lumwe nenge lwiikando yontumba. Iigwana otashi vulika yi ka kale yi wete yi li pokukandula po omaupyakadhi gawo gamwe omanene. Ongiini shi na ko nasha naawiliki yomalongelokalunga? Molwaashoka oye li oshitopolwa shuuyuni, oshi na uupu ye ki imbwange mumwe naawiliki yopapolotika. (Eh. 17:1, 2) Kungawo, aasita otaya ka holela aapolofeti yomuJuda shonale. Jehova okwa popi kombinga yawo kutya oya li “taa ti: Ombili, ombili, ko kwaa na ombili.” — Jer. 6:14, OB-1954; 23:16, 17.

4. Oshike shoka hatu vulu okundhindhilika, shoka aantu oyendji haya ndopa okundhindhilika?

⁴ Kashi na nduno mbudhi kutya oolye taya ka kutha ombinga meigidho ‘lyombili negameno,’ oshinima shoka otashi ku ulika kutya esiku lyaJehova oli li popepyeelela. Paulus okwa ti: “Aamwameme, ne kamu [li momilema, NW] esiku ndyoka li mú adhe ando ohaluka ngaashi omufuthi. One amuhe aantu yomuuyelele.” (1 Tes. 5:4, 5) Tse ohatu vulu okundhindhilika eityo lyiiningwanima mbyoka yi li mOmanyolo, mbyoka aantu oyendji haya ndopa okundhindhilika. Ehunganeko li na ko nasha neigidho ‘lyombili negameno’ otali ka gwanithwa naanaa ngiini? Otatu ke shi imonena ko owala monakuyiwa. Onkee ano, natu kale twa tokola toko “tu kaleni twa tonata notu na eidhiliko.” — 1 Tes. 5:6; Sef. 3:8.

5. (a) “Uudhigu uunene” otawu ka tameka nashike? (b) “Omukwaniilwakiintu” guni iinima itaayi ke mu endela nawa ngaashi a li a tegelela?

⁵ Oshiningwanima shini tashi ka ningwa masiku, nonando kashi wetike? Paulus okwa ti: “Manga taa ti: Ombili [negameno! opo nduno ehanagulo lyombadhilila, NW] otali ya akele.” “Ehanagulo lyombadhilila” otali ka adha tango “Babiloni oshinene,” shoka hashi ithanwa wo ‘ohonda.’ Babiloni Oshinene otashi thaneke omalongelokalunga agehe giifundja. (Eh. 17:5, 6, 15) “Uudhigu uunene” otawu ka tameka neponokelo lyomalongelokalunga agehe giifundja, mwa kwatelwa naangoka gUukwakriste. (Mat. 24:21; 2 Tes. 2:8) Oshiningwanima shoka otashi ka halutha aantu oyendji. Omolwashike mbela? Omolwaashoka sigo opethimbo tashi ka ningwa, ohonda otayi ka kala tayi itadha kutya yo “omukwaniilwakiintu” ngoka kee na siku a ‘adhike nando koluhodhi.’ Ihe paushili wo wene, iinima itayi ke yi endela nawa ngaashi ya tegelela. Otayi ka hulithwa po ombadhidhilila mepathimo lyeho, onga tashi ningwa muule ‘wesiku limwe alike.’ — Eh. 18:7, 8.

6. Oshike tashi ka hanagula po omalongelokalunga giifundja?

 ⁶ Ombiimbeli oya popya kutya “oshilikama” shoka shi na ‘ooniga omulongo’ otashi ka ponokela ohonda. Ngele otwa konakona embo lyEhololo, otatu ka mona kutya oshilikama shoka otashi thaneke Iigwana ya Hangana. “Ooniga omulongo” otadhi thaneke omapangelo agehe gokunena ngoka haga ambidhidha ‘oshilikama shoka oshitiligane.’ * (Eh. 17:3, 5, 11, 12) Ohonda otayi ka thigwa monkalo ya tya ngiini konima yokuponokelwa? Omapangelo ngoka ge li iilyo yIigwana ya Hangana otaga ka yuga ohonda uuyamba wayo, e tage yi aneke pomutenya noku yi letheka po ‘notage ke yi lungunitha po nomulilo.’ Shoka otashi ka tya ehulilo lyaBabiloni Oshinene. — Lesha Ehololo 17:16.

7. Olye ta ka ningitha “oshilikama” shi ponokele ohonda?

⁷ Ehunganeko lyOmbiimbeli olyu ulika wo kutya olye ta ka etitha ehanagulo lyaBibiloni. Jehova oye ta ka tula oshinima shoka momitima dhaaleli yopapolotika “ya gwanithe ehalo lye,” opo ya hanagule po ohonda. (Eh. 17:17, OB-1954) Omalongelokalunga onkee ngaa taga tsikile nokweetitha iita nomaipumomumwe muuyuni. Aapangeli otashi vulika ya kale ye wete kutya shampa ya ponokele ohonda e ta ye yi hanagula po, otashi ke etela iigwana ombili. Kakele kaashono, aapangeli mboka otaya ka kala tayi ipula kutya “ompango yimwe” ndjoka taya ka tsa, sha hala okutya, edhiladhilo limwe ndyoka taya ka kala ye na, otaye ke li gwanitha po koondunge dhawo yene. Ihe oshili oyo kutya oya longithwa owala kuKalunga ya hanagule po omalongelokalunga giifundja. Sho tashi kumitha osho kutya onkalelo ndjika yiinima yaSatana otayi ki itanaukila po yo yene, na Satana ita ka kala e na oonkondo dhoku shi keelela. — Mat. 12:25, 26.

8. Eponokelo ‘lyaGog gwomevi lyaMagog’ oshike?

⁸ Konima ngele omalongelokalunga giifundja ga hanagulwa po, oshigwana shaKalunga otashi ka tsikila okukala “megameno” nonando kashi na ‘edhingililokuma.’ (Hes. 38:11, 14) Oshigwana shika tashi tsikile okulongela Jehova notashi monika sha fa kaashi na omugameni otashi ka ningilwa shike? Otashi ka ponokelwa nonyanya ‘kiigwana oyindji.’ Ombiimbeli otayi ti kutya ‘Gog gwomevi lyaMagog’ oye ta ka ponokela oshigwana shoka. (Lesha Hesekiel 38:2, 15, 16.) Eponokelo ndyoka otu na okukala tu li uvitile ngiini?

9. (a) Aakriste oye na okugandja eitulomo unene kushike? (b) Iinima yini tu na okukala hatu ningi ngele otwa hala eitaalo lyetu li kale lya kola?

⁹ Oshigwana shaKalunga itashi ka kala sha tila unene sho tashi ponokelwa kuGog, molwaashoka osha kala she shi tegelela nale. Otu na okugandja eitulomo unene kokuyapulitha edhina lyaJehova nokuyukipalitha uuthemba  we wokupangela, pehala lyokukala tatu ipula unene nehupitho lyetu. Jehova okwa popya lwiikando yi vulithe po 60 a ti: ‘Otamu ka tseya kutya ongame [Jehova, NW].’ (Hes. 6:7) Onkee ano, otwa tegelela nondjuulukwe sho ehunganeko ndyoka lya dhenga mbanda lyaHesekiel tali ka gwanithwa, tu na einekelo kutya “[Jehova, NW] oku shi shi, nkene e na okuhupitha aantu ye momakelo ngoka tage ya adha.” (2 Pet. 2:9) Ngashingeyi, otwa hala okulongitha ompito kehe tu na tu tunge eitaalo lyetu li kale lya kola, opo tu ka kale aadhiginini kuJehova kutya nduno otu ki iyadhe momamakelo ga tya ngiini. Oshike nduno tu na okuninga, opo tu kale neitaalo lya kola? Otu na okukala hatu galikana, hatu konakona Ombiimbeli, hatu tedhatedha nohatu uvithile yalwe onkundana yUukwaniilwa. Ngele otwa kala hatu ningi ngawo, etegameno lyetu lyomwenyo gwaaluhe otali ka kala lya kola lya fa “ekwatitho” lyosikepa. — Heb. 6:19, OB-1954; Eps. 25:21.

10, 11. Oshike tashi ka ulika kutya Armagedon oku li pokutameka, noshike tashi ka ningwa pethimbo ndyoka?

¹⁰ Ngele oshigwana shaJehova sha ponokelwa otapu ka ningwa oshinima shini tashi halutha? Jehova ota ka longitha Jesus nosho wo omatanga gaakwiita yomegulu a gamene oshigwana she. (Eh. 19:11-16) Mbika otayi ka kala “iita mesiku enene lyaKalunga Omunankondoadhihe.” Iita mbyoka ohayi ithanwa Armagedon. — Eh. 16:14, 16.

¹¹ Jehova okwa popya kombinga yiita yaArmagedon membo lyaHesekiel ta ti: “‘Otandi ka tilitha Gog niiponga oyindji. Ongame, OMUWA, Omupangeliawike, nda popi. Aantu ye otaya ka taganekelathana omagongamwele.’” Mboka ya gama kuSatana otaya ka mbulukuta kuumbanda notaya ka lyalyakana e ta yi itanaukile po yo yene. Satana ye mwene wo ota ka kala moshipyu. Jehova okwa ti: “Omulilo nosulufuli otandi yi mu lokithile pamwe netangakwiita lye niigwana oyindji mbyoka ya gama kuye.” (Hes. 38:21, 22) Oshizemo otashi ka kala shi li ngiini ngele Kalunga a katuka onkatu ndjoka?

12. Iigwana otayi ka thiminikwa yi ninge shike?

¹² Iigwana otayi ke shi zimina kutya ehanagulo ndyoka otali zi kuJehova. Mboka ya gama kombinga yaSatana nayo otaya ka lila ngaashi etangakwiita lyaEgipiti, ndyoka lya li lya landula Aaisraeli, lya li tali lili lya tila pEfuta Etiligane, tali ti: “OMUWA ota kondjele Aaisraeli.” (Eks. 14:25) Eeno shili, iigwana otayi ka thiminikwa yi zimine kutya Jehova oko e li. (Lesha Hesekiel 38:23.) Iiningwanima mbyoka oyi na ko ethimbo li thike peni yi tameke okuningwa?

13. Oshitopolwa oshititano shoshiyelekela otashi thaneke shike, noshike ishewe tatu ilongo kombinga yoshiyelekela shoka?

¹³ Embo lyaDaniel otali tu kwathele tu mone kutya otu li pethimbo lini. Daniel okwa hokolola oshiyelekela shi li molupe lwomuntu shoka sha ningwa miiyela yomaludhi gi ili nogi ili. (Dan. 2:28, 31-33) Oshiyelekela shoka otashi thaneke omapangelo omanankondo guuyuni ngoka ga kala nokudhana onkandangala onene mondjokonona yoshigwana shaKalunga shonale noshokunena. Omapangelo ngoka omanankondo muuyuni ongaashi Babiloni, Media naPersia, Greka, Roma nosho wo ndyoka lyahugunina tali pangele pethimbo lyetu. Ngele otwa konakona embo lyaDaniel, otatu ka mona kutya epangelo enankondo lyuuyuni lyahugunina olyo tali thanekwa koompadhi nokominwe dhoshiyelekela. Pethimbo lyIita yoTango yUuyuni, Britania nIilongo ya Hangana oya li ya panga uukuume wi ikalekelwa. Onkee ano, oshitopolwa oshititano shoshiyelekela shoka sha popiwa membo lyaDaniel otashi thaneke Epangelo Enankondo mUuyuni lyaAmerika naBritania lya Hangana. Oompadhi ndhoka dhi li oshitopolwa shahugunina shoshiyelekela otadhi ulike kutya kapu na we epangelo enankondo muuyuni lilwe tali ka holoka. Oompadhi nominwe dhoshiyelekela odha ningwa moshiyela shi li mumwe neloya, shoka tashi ulike kutya Epangelo Enankondo mUuyuni  lyaAmerika naBritania lya Hangana kali na we oonkondo ndhoka lya li li na petameko.

14. Epangelo enankondo lini tali ka kala tali panga nokutyakeleka muuyuni sho Armagedon te ya?

¹⁴ Embo lyaDaniel otali ti kutya emanya enene, ndyoka tali thaneke Uukwaniilwa waKalunga, olya pambuka kondundu ndjoka tayi thaneke uunamapangelo waJehova, mo 1914. Emanya ndyoka oli li pokudhenga oompadhi dhoshiyelekela masiku. Oompadhi dhoshiyelekela niitopolwa yasho ayihe iikwawo otayi ka nyanyagulwa po puArmagedon. (Lesha Daniel 2:44, 45.) Epangelo Enankondo mUuyuni lyaAmerika naBritania lya Hangana, olyo tali ka adhika tali panga nokutyakaleka uuyuni sho Armagedon te ya. Itashi ka kala tuu shituntula noonkondo okumona ehunganeko lyaDaniel tali gwanithwa thiluthilu! * Ihe Jehova ota ka ningila Satana shike?

15. Oshike tashi ka ningilwa Satana noompwidhuli dhe konima yaArmagedon?

¹⁵ Satana ote ke ethiwa tango i imonene ko ye mwene okuza petameko sigo opehulilo sho omahangano ge agehe kombanda yevi taga ka lethekwa po thiluthilu. Konima yaashono, Satana oye ta ka katukilwa onkatu. Omuyapostoli Johannes okwa popya nkene tashi ka ningwa. (Lesha Ehololo 20:1-3.) Okwa ti kutya ‘omuyengeli ngoka e na oshipatululo sholumbogo lwomuule,’ Jesus Kristus, ota ka manga Satana noompwidhuli dhe e te ya umbile mombwili noku ya patela mo uule woomvula eyuvi limwe. (Luk. 8:30, 31; 1 Joh. 3:8) Shoka otashi ka kala onkatu yotango yokunyanyagula omutse gweyoka. * — Gen. 3:15.

16. Satana ota ka kala monkalo ya tya ngiini, uuna u umbilwa ‘molumbogo lwomuule’?

¹⁶ ‘Olumbogo lwomuule’ moka Satana noompwidhuli dhe taya ka umbilwa oshike? Oshitya shOshigreka a′bys·sos shoka Johannes a longitha oshi na eityo lyoshinima sha ya “muuleleeka nenge sha ya mevi noonkondo.” Oshi na wo eityo lyoshinima “kaashi na ongamba” nenge “omumbwalangandjo kaagu na ehulilo.” Shoka osha hala okutya, molumbogo moka mu imbilwa Satana noompwidhuli dhe kapu na omuntu ta vulu okuya mo, kakele kaJehova nomuyengeli gwe ngoka a langeka po noku “na oshipatululo sholumbogo.” Kungeyi, Satana ita ka ‘vula we okupukitha aantu,’ molwaashoka ota ka kala a fa omuntu a sa, ngoka ihaa vulu okulonga sha. Itatu ka kala tuu twa pepelelwa sho ‘onime ndjoka hayi ndunduma’ tayi ka mwenekwa thilu! — 1 Pet. 5:8.

17, 18. (a) Otwa konakona kombinga yiiningwanima yini kaayi wetike natango? (b) Konima yiiningwanima mbyoka, otatu ka kala muuyuni wa tya ngiini?

¹⁷ Otwa tegelela iiningwanima iindhindhilikwedhi niihaluthi yi li komeho. Otwa tegelela oku ka mona nkene eigidho ‘lyombili negameno’ tali ka ningwa. Konima yaashono, otaku ka landula ehanagulo lyaBabiloni Oshinene, eponokelo lyaGog gwomevi lyaMagog, iita yaArmagedon nosho wo okuumbilwa kwaSatana noompwidhuli dhe molumbogo. Ngele iinima ayihe mbika ya ningwa, itapu ka kala we uukolokoshi. Otatu ka ya muuyuni uupe moka tatu ka kala kohi yElelo lyaKristus lyOomvula Eyuvi, notatu ka nyanyukilwa “ombili oyindji.” — Eps. 37:10, 11, OB-1954.

¹⁸ Kakele kiiningwanima itano mbyoka twa konakona, opu na natango yilwe “kaayi wetike” mbyoka twa hala okukala twa “tala” kuyo pethimbo lyetu. Iiningwanima mbyoka otayi ka kundathanwa moshitopolwa tashi landula.