MuDesemba mo 2009 Ompangu yoPombanda yaRusia oya li ya tokola okuhulitha po ehangano lyOonzapo dhaJehova moTaganrog shaRusia, okukwata ko Oshinyanga shUukwaniilwa nokupopya kutya iileshomwa yetu 34 oya nika oshiponga noonkondo. Omalunduluko ngaka nosho wo omathano gOonzapo ndhoka dha gumwa ketokolo ndyoka mwa kwatelwa naanona, oga li ga tulwa kehala lyopambelewa lyokOintaneta lyOonzapo dhaJehova.

Konima yoomwedhi oonshona oombelewa dhOonzapo dhaJehova moRusia ndhoka hadhi ungaunga niinima yopaveta odha li dha tuminwa oshipakete pamwe nontumwafo ndjika tayi landula mpaka ya za kaanegumbo yOonzapo koQueensland shaAustralia mboka ya li yu uvu shoka ompangu ya tokola. Ontumwafo ndjoka otayi ti: “Aamwatate aaholike, aanona yetu, Cody naLarissa oya li yi inyengithwa noonkondo keitaalo nosho wo komamakelo ngoka ookuume ketu moRusia taya idhidhimikile. Oya nyola uukalata nosho wo oontumwafo, notwa longekidha omagano omashona ngoka twa hala ga tuminwe kaanona yokoTaganrog, opo tu ya ulukile kutya kiitopolwa yokokule oku na aanona mboka nayo taya longele Jehova nuudhiginini notaya dhiladhila kombinga yawo. Cody naLarissa otaye ya tumine omakundo gopahole.”

Sho aanona yokoTaganrog ya yakula omagano ngoka oya nyola wo oontumwafo taya pandula aanegumbo mboka yokoAustralia. Onzapo yimwe ndjoka hayi longo koshitayimbelewa shetu moRusia oya li ya gumwa keladhipiko ndyoka lya zi ‘kaanona’ mboka Cody naLarissa, e ta yi ya nyolele tayi ti: “Dhiladhila owala kunkene aanona nosho wo aakuluntu haya kala yu uvite ngele taya geelwa omolwoshinima shoka inaaya ninga. Aamwatate naamwameme yokoTaganrog inaya ninga sha sha puka, ihe oshinyanga shawo shuukwaniilwa oya li ye shi kuthwa. Shika oshe ya uvitha nayi noonkondo. Otashi ke ya ladhipika okutseya kutya opu na ngoka a za koshitopolwa shilwe shuuyuni te ya dhiladhila. Tangi unene omolwombepo yeni yokugandja.” — Eps. 8:2.

Otu li shili oshitopolwa shuumwayinathana womuuyuni auhe, nohole yetu yokuhola yakwetu ohayi tu kwathele atuhe tu idhidhimikile omashongo nomaupyakadhi gonkalamwenyo. Manga ompangu tayi ti kutya iileshomwa yOonzapo dhaJehova ohayi eta uutondwe pokati kaantu, aanona yetu otayu ulike oku na ko nasha kwawo nayalwe, kashi na nduno mbudhi kutya oyomoshigwana shini nenge oya za momithigululwakalo dha tya ngiini otaya ulike uushili woohapu dhaJesus ndhoka tadhi ti: “Ngele omu holathane, nena aantu ayehe otaa ka dhimbulula kutya one aalongwa yandje.” — Joh. 13:35.