Oeeno yeni nayi tye aluhe eeno
“Oohapu dheni nadhi tye: ‘Eeno, eeno,’ nenge ‘aawe, aawe.’” — MAT. 5:37.
1. Jesus okwa li a popi shike kombinga yokugana, nomolwashike?
OLUNDJI ihashi kala naanaa sha pumbiwa kAakriste yashili ya gane uuna taya ningi omauvaneko gontumba. Shika oshi li ngaaka molwaashoka ohaya vulika kuJesus ngoka a ti: “Oohapu dheni nadhi tye: ‘Eeno, eeno,’ nenge ‘aawe, aawe.’” Okwa li a hala okutya omuntu oku na okugwanitha po euvaneko lye. Manga inaa gandja oshipango shoka, okwa popi oohapu ndhika tadhi ti: “Inamu gana nando okuli.” Okwa li a popi ngaaka omolwaantu oyendji mboka ya li ye na ondjigilile yokugana kiinima yontumba noyongandi mokupopya kwawo kwakehe esiku, nonando kaye na elalakano lyokugwanitha po shoka taya popi. Aantu mboka oya li yu ulike kutya kaye shi aainekelwa nosho wo kutya oya nwethwa mo ‘kuMwiinayi,’ sho haya “gwedha ko” oohapu dhilwe ngele ya ti eeno nenge aawe, opo aniwa yu ulike omalalakano gawo. — Lesha Mateus 5:33-37.
2. Yelitha kutya omolwashike okugana inaaku puka thiluthilu.
2 Mbela oohapu dhaJesus odha hala okutya okugana okwa puka thiluthilu? Mbela otashi vulika ngaa ku kale kwa puka thiluthilu? Ngaashi twa li twi ilongo moshitopolwa sha tetekele, Jehova Kalunga nosho wo omupiya gwe omudhiginini Abraham oya li ya gana poompito dha simana. Osha li wo oshitegelelwa shOmpango yaKalunga aantu ya gane ngele taya pongolola po oontamanana dhontumba. (Eks. 22:10, 11; Num. 5:21, 22) Otashi vulika shi kale sha pumbiwa Omukriste a gane mompangu opo u ulike kutya ota ka popya oshili. Omukriste otashi vulika a gane a shilipilakele yalwe shoka a hala okuninga nenge kutya ote ke ya kwathela a kandule po uupyakadhi wontumba. Ihe oshinima shoka osha pumba lela. Nokuli naasho Jesus a li pulwa a gane komuyambi omukuluntu, ine shi tinda, ihe okwa popi oshili komeho gompangu yAajuda. (Mat. 26:63, 64) Ihe nonando ongawo, Jesus ka li a pumbwa okugana komuntu gwontumba. Nokuli nongele a li a hala okukoleka shoka ta popi, olundji okwa li owala ha ti: “Ngame otandi mu lombwele oshili.” (Joh. 1:51; 13:16, 20, 21, 38) Natu ka taleni shoka tatu ilongo moshiholelwa shaJesus, shaPaulus nosho wo shayalwe mboka oeeno yawo ya li ya ti eeno.
JESUS OKU LI OSHIHOLELWA SHA DHENGA MBANDA
Jesus okwa li a gwanitha po ashihe shoka u uvanekele He, okuza pokuninginithwa kwe sigo opeso lye
3. Jesus okwa li u uvanekele Kalunga shike megalikano, na He gwomegulu okwa li a ti ngiini?
3 “Ongame nguka, otandi ya okulonga ehalo lyoye, Kalunga.” (Heb. 10:7) Noohapu ndhika tadhi gumu omutima, Jesus okwa li i igandja kuKalunga a gwanithe po ashihe shoka sha li sha hunganekwa kombinga yOluvalo lwu uvanekwa, mwa kwatelwa ‘okutsuwa kwalwo moshithi shompadhi’ kuSatana. (Gen. 3:15) Kapu na nando omuntu gulwe a li i iyamba a humbate oshinakugwanithwa oshidhigu shi thike mpoka. Jehova okwa li a popi okuza megulu kutya okwi inekela thiluthilu Omwana, nonando ka li a pula Jesus a gane kutya ota ka gwanitha po euvaneko lye. — Luk. 3:21, 22.
4. Jesus okwa li a ningi shike shoka sha ningitha oeeno ye yi kale eeno?
4 Jesus okwa kala aluhe ha longo shoka ha uvithile yalwe, kungeyi oeeno ye oya kala aluhe eeno. Ka li e etha nando osha shi mu piyaganeke a gwanithe po oshilonga she shoka a li a pewa kuHe. Jesus okwa li hu uvitha onkundana ombwanawa yUukwaniilwa waKalunga nokuninga aantu ayehe aalongwa mboka Kalunga a li e eta kuye. (Joh. 6:44) Ombiimbeli oye shi koleka kutya Jesus okwa li a gwanitha po euvaneko lye kutya ota ka longa ehalo lyaHe, sho tayi ti: “Oye tuu ngoka e li ‘eeno’ yomauvaneko agehe gaKalunga.” (2 Kor. 1:20) Jesus oku li oshiholelwa dhingi shagumwe ngoka a gwanitha po thiluthilu shoka a li u uvanekele He. Natu ka kundathaneni oshiholelwa shagumwe ngoka a li a longo nuudhiginini a holele Jesus.
PAULUS OMULUMENTU A LI HA GWANITHA PO OOHAPU DHE
5. Omuyapostoli Paulus okwe tu tulila po oshiholelwa shashike?
5 “Omuwa, ondi na okuninga shike?” (Iil. 22:10) Paulus ngoka a li a tseyika nawa Saulus okwa li i inyenge ngaaka kewiliko lyOmuwa Jesus, omutumbalekwa, ngoka a li e mu ihololele memoniko. Jesus okwa li a lombwele Saulus a hulithe po okuhepeka aalongwa ye. Shoka osha ningitha Saulus i itedhulule nokwe etha po iilonga ye iikulu, nokwa ninginithwa, e ta taamba ko oshilonga she oshipe shi ikalekelwa shokugandja uunzapo kiigwana kombinga yaJesus. Okuza mpono, Paulus okwa kala hi ithana Jesus “Omuwa” gwe, nokuvulika kuye sigo opehulilo lyonkalamwenyo ye yokombanda yevi. (Iil. 22:6-16; 2 Kor. 4:5; 2 Tim. 4:8, NW) Paulus ka li a fa aantu yamwe mboka Jesus a popi a ti: “Omolwashike hamu ithana ndje: ‘Omuwa, Omuwa,’ ihe ihamu longo shono tandi shi mú lombwele?” (Luk. 6:46) Eeno shili, Jesus okwa tegelela ayehe mboka taye mu ithana Omuwa ya gwanithe po oohapu dhawo, ngaashi omuyapostoli Paulus a li e shi ningi.
6, 7. (a) Omolwashike Paulus a li a lundulula etalelopo lye lyoku ka talela po egongalo lyaKorinto, nomolwashike mboka ya li ompinge naye ya li ya puka sho taya dhiladhila kutya ke shi omwiinekelwa? (b) Otu na okutala ko ngiini mboka ya langekwa po ye tu kwatele komeho?
6 Paulus okwa li a taandelitha onkundana yUukwaniilwa muAsia eshona alihe nosho wo muEuropa, okwa toto mo omagongalo ogendji nokwa kala wo he ga talele po. Omathimbo gamwe okwa li a mono sha pumbiwa a gane, opo u ulike kutya shoka a nyola oshoshili. (Gal. 1:20) Sho yamwe muKorinto ya li taya dhiladhila kutya Paulus ke shi omwiinekelwa, okwa nyola a ti: “Kalunga oye omunashili, onkee oohapu dhandje kune kadhi shi ‘eeno’ na ‘Aawe.’” (2 Kor. 1:18) Pethimbo ndyoka Paulus ta nyola oohapu ndhoka okwa adhika opo a zi muEfeso, nokwa li ta taakana muMakedonia u uka kuKorinto. Ihe petameko okwa li e na edhiladhilo lyoku ka talela po ishewe muKorinto, manga inaa ya kuMakedonia. (2 Kor. 1:15, 16) Osha faathana owala naatonateli aayendi kunena, omathimbo gamwe ohaya lundulula omatalelopo gawo. Omalunduluko ga tya ngaaka ihaye ga ningi owala osima nenge nelalakano lyokwiihola mwene, ihe ohaye ga ningi uuna pu na onkalo ye endelela. Sho Paulus a li a kaleke etalelopo lyegongalo lyaKorinto okwa li e shi ningi omolwuuwanawa walyo. Ngiini mbela?
7 Konima owala sho a tokola kutya ota yi kuKorinto, Paulus okwa li a lombwelwa kutya megongalo moka omu na oontamanana nomwa pitikilwa oluhondelo. (1 Kor. 1:11; 5:1) Opo e ya pukulule, okwa li a pe egongalo lyaKorinto omayele ga kwata miiti moku li nyolela ontumwafo yotango. Pehala lyokuza muEfeso u ukilila kuKorinto, Paulus okwa li a tokola a pe aamwahe ethimbo lya gwana ya tule miilonga omayele ngoka ge li montumwafo ye, opo etalelopo lye li ka kale tali ya ladhipike noonkondo. Montumwafo ye ontiyali okwa li e ya lombwele omatompelo ge kutya omolwashike a lundululile etalelopo lye a ti: “Otandi ithana Kalunga, a ninge onzapo yandje, oshoka okwa tseya omutima gwandje. Ngame onda gama kune, sho itaandi ya we kuKorinto.” (2 Kor. 1:23) Inatu kala nando twa fa aantu mboka ya li ompinge naPaulus, ihe pehala lyaashono, natu simaneke mboka ya langekwa po ye tu kwatele komeho. Oshi li nawa lela tu holele Paulus, ngaashi naanaa ye a li a holele Kristus. — 1 Kor. 11:1; Heb. 13:7.
YALWE MBOKA YE SHI OKUHOLELWA
8. Rebekka okwe tu tulila po oshiholelwa shini?
8 “Eeno, onda hala.” (Gen. 24:58) Rebekka okwa li a yamukula yina nosho wo omumwayinamati noohapu ndhoka, sho a pulwa ngele okwa hala a ka ninge omukulukadhi gwaIsak, omwanamati gwaAbraham. Okwa li e na okuthiga po yaandjawo esiku olyo tuu ndyoka nokuya molweendo oshinano shookilometa 800 nomulumentu ngoka keehe shi nando onale. (Gen. 24:50-58) Rebekka okwa li a gwanitha po oeeno ye, okwa li omudhiginini komulume Isak, ye okwa li wo omutilikalunga. Onkalamwenyo ye ayihe, Rebekka okwa kala ha zi momatsali e li omukwiilongo mEvi lyEuvaneko. Okwa li a lalekwa nuuyamba omolwuudhiginini we, sho a ningi gumwe gwomooyinakulululwa yOluvalo lwu uvanekwa, Jesus Kristus. — Heb. 11:9, 13.
9. Rut okwa li a gwanitha po ngiini oohapu dhe?
9 “Aawe, kuku. Otatu yi nangoye koyaandjeni.” (Rut 1:10) Aaselekadhi Aamoab, Rut naOrpa, oya kala taya lombwele Naemi, yinamweno ngoka naye a li omuselekadhi, oohapu ndhoka, sho a li ta tembukile kuBetlehem ta zi kuMoab. Konima sho Naemi a kala te ya indile ya shune koyaandjawo, Orpa okwa shuna, ihe Rut okwa tindi, noaawe ye oya ti aawe. (Lesha Rut 1:16, 17.) Okwa li a thigi po yaandjawo nosho wo elongelokalunga lyawo lyiifundja muMoab e ta kala kuume kaNaemi omwiinekelwa. Rut okwa kala omulongeli gwaJehova omudhiginini. Okwa li a pewa ondjambi sho a ningi gumwe gwomaakiintu yatano mboka oyo owala ya popiwa kuMateus ye li ooyinakulululwa yaKristus. — Mat. 1:1, 3, 5, 6, 16.
10. Omolwashike Jesaja e li oshiholelwa oshiwanawa kutse?
10 “Otandi yi! Tuma ndje!” (Jes. 6:8) Omanga Jesaja inaa popya oohapu ndhoka okwa li a mono emoniko lyaJehova a kuutumba koshipangelapundi shi li pombanda yotempeli yaIsraeli. Manga ta tala nawa emoniko ndyoka ekumithi, Jesaja oku uvu Jehova ta pula ta ti: “Olye ngoka tandi mu tumu? Olye ta ningi omutumwa gwetu?” Jehova okwa li ta pula gumwe a ninge omupopikalelipo gwe e mu tume a fale etumwalaka lye koshigwana shaIsraeli shoka sha li shi na omitse omikukutu. Jesaja okwa li a gwanitha po oohapu dhe, oeeno ye oya li ya ti eeno. Okwa kala nokulonga nuudhiginini omimvo 46 e li omupolofeti, tu uvitha kutya Jehova ota ka geela oshigwana she shoka oshitangalali nosho wo kutya ote ke shi galulila kevi lyasho shi ka tamekulule elongelokalunga lyashili.
11. (a) Omolwashike sha simana noonkondo tu gwanithe po oohapu dhetu? (b) Iiholelwa yoolye yi li mOmbiimbeli mbyoka yi li elondodho kutse?
11 Omolwashike Jehova a nyolitha mOmbiimbeli iiholelwa mbyoka twa zi nokukundathana? Omolwashike sha simana noonkondo oeeno yetu yi tye eeno? Ombiimbeli otayi londodha kutya aantu mboka ye li “aayoni yomauvathano” oye li yamwe yoomwaamboka yi “ilongela eso.” (Rom. 1:31, 32) Farao gwaEgipiti, omukwaniilwa gwaJuda Zedekija nosho wo Ananias naSafira oye li yamwe yomiiholelwa iiwinayi mbyoka ya tumbulwa mOmbiimbeli, mboka oeeno yawo inaayi tya eeno. Iinima oya li ye ya endele nayi, naashoka oshi li elondodho kutse kaatu landule iiholelwa yawo. — Eks. 9:27, 28, 34, 35; Hes. 17:13-15, 19, 20; Iil. 5:1-10.
12. Oshike tashi ke tu kwathela tu gwanithe po oohapu dhetu?
12 ‘Momasiku gahugunina’ ngaka tu li otwa kundukidhwa kaantu mboka “aakaanuuyuuki” yo oye na “emoniko lyowala lyetilokalunga, ihe oonkondo dhalyo ye dhi idhimbike.” (2 Tim. 3:1-5, OB-1954) Otu na okuninga ngaashi tatu vulu tu henuke aantu mboka aawinayi. Otu na wo okukala hatu gongala pandjigilile naantu mboka haya kambadhala aluhe oeeno yawo yi tye eeno. — Heb. 10:24, 25.
OEENO YOYE NDJOKA YA SIMANENENA
13. Oeeno yini ya simanenena hayi popiwa kaalunduli yaJesus Kristus?
13 Euvaneko lya simanenena ndyoka omuntu ta vulu okuninga olyo okwiiyapulila Kalunga. Mboka ya hala okwiidhimbwa yo yene ya ninge aalongwa yaJesus ohaya pulwa iikando itatu ya tye eeno kombinga yomatokolo gawo. (Mat. 16:24) Ngele aakuluntugongalo yaali taya pula omuntu gumwe ngoka a hala okuninga omuuvithi inaa ninginithwa ohaye mu pula kutya “mbela owa hala ngaa shili okuninga gumwe gwomOonzapo dhaJehova?” Konima, uuna omuntu a humu komeho pambepo nokwa hala okuninginithwa, aakuluntugongalo ohaye mu pula kutya “mbela owi iyapulila ngaa Jehova paumwene okupitila megalikano wu longe ehalo lye?” Lwahugunina, omuntu kehe ta ninginithwa oha pulwa kutya “pakankameno lyeyambo lyaJesus Kristus, mbela owi iyela ombedhi omolwomayono goye nowi iyapulila Jehova wu longe ehalo lye?” Konima yaashono, mboka taya ka ninginithwa ohaya yamukula taya ti eeno, shoka shi li euvaneko kutya oya hala okulongela Kalunga sigo aluhe.
Mbela owu li ngaa metsokumwe ‘noeeno’ yoye ndjoka ya simanenena?
14. Otu na okukala hatu ikonakona iikando niikando kombinga yashike?
14 Kutya nduno opo wa ninginithwa nenge owa ninginithwa pwa pita omimvo omilongo, owa pumbwa okukala hwi ikonakona iikando niikando e to ipula to ti: ‘Sho tandi holele Jesus Kristus, mbela otandi tsikile ngaa okukala metsokumwe noeeno yandje ndjoka ya simanenena? Mbela otandi tsikile ngaa nokuvulika kuJesus mokupititha komeho iilonga yokuuvitha noyokuninga aantu aalongwa monkalamwenyo yandje? — Lesha 2 Aakorinto 13:5.
15. Omiinima yini yonkalamwenyo sha simana tu kaleke oeeno yetu yi tye eeno?
15 Opo tu ulike kutya otu li metsokumwe negano lyeiyapulo lyetu, otu na okukala wo aadhiginini miinima yilwe ya simana. Pashiholelwa: Mbela ngoye omunandjokana? Ngele osho tsikila okukala wa lenga egano ndyoka wa ninga lyokukala wu hole nokusimaneka kuume koye kopandjokana. Mbela owa shaina euvathano lyopangeshefa nenge wu udhitha ofooloma yontumba wi iyambe wu longe mehangano lyaJehova? Kala ano metsokumwe negano lyoye nosho wo naashoka wu uvaneka. Mbela owa zimina ehiyo wu ka lye kegumbo lyagumwe ngoka kee na sha? Ngele osho ino kaleka ehiyo ndyoka ngele owa hiywa kugulwe ngoka e na sha. Mbela owu uvanekela omuntu gwontumba ngoka wa li wa tsakaneke miilonga yegumbo negumbo kutya oto galuka wu mu kwathele ishewe pambepo? Ngele osho, oeeno yoye nayi tye eeno, naJehova ota ka laleka nuuyamba uukalele woye. — Lesha Lukas 16:10.
UUWANAWA MBOKA TATU KE ETELWA KOMUYAMBI OMUKULUNTU NOMUKWANIILWA GWETU
16. Oshike tu na okuninga, ngele inatu vula okugwanitha po euvaneko lyetu?
16 Ombiimbeli otayi popi kutya tu li aantu inaatu gwanenena, “atuheni ohatu puka olwindji” unene tuu mokulongitha elaka lyetu. (Jak. 3:2) Oshike tu na okuninga ngele otwa mono kutya inatu gwanitha po shoka tu uvaneka? Ompango ndjoka Kalunga a li a pe Aaisraeli, omwa li mu na elongekidho, opo omuntu ngoka a popi sha “muuhasha” a silwe ohenda. (Lev. 5:4-7, 11) Omukriste ohashi vulika wo a dhiminwe po, ngele okwa yono momukalo gwa tya ngaaka. Uuna tatu hempululile Jehova eyono lyetu kondandalunde, ote ke tu dhimina po omolwekuliloyambo lyOmuyambi Omukuluntu, Jesus Kristus. (1 Joh. 2:1, 2) Opo Kalunga a kale e tu hokwa, otu na okuulika iiyimati yeitedhululo mokwaaha endulula eyono ndyoka nosho wo mokuninga ngaashi tatu vulu tu pongolole po uuwinayi mboka we etwa kokupopya kwetu nuuhasha. (Omayel. 6:2, 3) Eeno, osha simanenena tu dhiladhile nawa manga inaatu ninga omauvaneko ngoka itaatu vulu okugwanitha po. — Lesha Omuuvithi 5:2.
17, 18. Ayehe mboka taya kambadhala okukaleka oeeno yawo yi tye eeno, oya tegelela onakuyiwa ya tya ngiini?
17 Aapiya yaJehova ayehe mboka taya ningi ngaashi taya vulu opo oeeno yawo yi tye eeno oya tegelela onakuyiwa ombwanawa kaaku na we. Okangundu kaantu 144 000, mboka ya gwayekwa nombepo, otaya ka kala nomwenyo sigo aluhe megulu, “notaa ka pangela pamwe naKristus uule woomvula eyuvi limwe” mUukwaniilwa we. (Eh. 20:6) Omanga aantu omamiliyona ogendji, otaya ka kala nomwenyo sigo aluhe moparadisa kombanda yevi, kohi yelelo lyUukwaniilwa waKristus. Otaya ka kwathelwa ya thike megwaneneno palutu nopamadhiladhilo. — Eh. 21:3-5.
18 Opo tu ka kale nomwenyo mOparadisa otu na okukala aadhiginini sigo oosho tatu ka yelekwa hugunina pehulilo lyElelo lyaJesus lyOomvula Eyuvi. Pethimbo ndyoka omuntu kehe ota ka kala e shi okwiinekelwa thiluthilu. (Eh. 20:7-10) Oeeno kehe yaantu otayi ka tya eeno, noaawe yawo otayi ka tya aawe. Nopethimbo opo tuu mpoka kehe gumwe ota ka kala ta holele Tate yetu gwomegulu, Jehova, ngoka e li “Kalunga omudhiginini” nenge tu tye Kalunga koshili. — Eps. 31:5.
