Oomvula opo dha zi ko, omumwameme Rúbia (1) ngoka ngashingeyi e na omimvo 30, okwa li i idhenge ondjila a ka talele po omumwameme Sandra (2) ngoka a li ta kokola ondjila megongalo limwe eshona li li muumbugantu waBrazil. Ihe pethimbo sho Rúbia ta talele po, opwa li pwa popiwa oshinima shoka sha li she mu inyengitha a ninge omalunduluko gontumba monkalamwenyo ye. Oshike mbela? Andiya tu uve mokana kaRúbia mwene.

“Otwa li twa yi naSandra komukiintu gumwe ngoka ha konakona naye Ombiimbeli. Sho tatu konakona, omukiintu okwa popi a fa kee na ko nasha a ti: ‘Sandra, opu na aakadhona yatatu hatu longo nayo mboka ya hala okukonakona Ombiimbeli, ihe onde ya lombwele kutya oye na okutegelela olufo  lwawo lu thike. Ondi shi shi kutya nuumvo ompito yokukonakona nayo ku yi na.’ Onda li nda kumwa shili sho nde shi uvu. Uh, aantu ya hala okutseya Jehova, ihe otaya tegelelithwa ishewe! Kegongalo lyetu osha li oshidhigu kungame okumona omukonakoni nando gumwe. Pethimbo ndyoka manga tu li megumbo lyomukonakoni ngoka, mungame omwa li mwe ya ehalo enene lyokukwathela aantu mokandoolopa kawo hoka okashona. Konima yaashoka, onda li nda tembuka mondoolopa onene, e tandi yi kokandoolopa hoka ku na Sandra ta kokola ondjila.”

Iinima oya li ye endele ngiini omumwameme Rúbia? Okwa ti: “Muule owala woomwedhi mbali sho nda tembuka, onda li nda mono aakonakonimbiimbeli 15. Otashi vulika itoo shi itaale kutya muule owala wethimbo efupi, nangame wo onda ka kala ndi na omusholondondo gwaamboka ya tegelela okukonakona, ngaashi ngoka gwa li gu niwe kuSandra!”

Omumwatate Diego (3) ngoka ngashingeyi e na omimvo 20 nasha, okwa li a yi a ka talele po aaihokani yamwe mboka taya kokola ondjila muPrudentópolis, okandoolopa okashona ke li muumbugantu waBrazil. Shoka a mono pethimbo lyetalelopo osha li she mu kumitha, nosha li lela she mu inyengitha a konakone nawa uukalele we. Okwa ti: “Kanda li lela handi longo nuudhiginini megongalo lyetu, ihe onda li handi longo owala oowili ngapingapi muukalele omwedhi kehe. Sho nda talele po aakokolindjila mboka, nokupulakena kiimoniwa yawo, enyanyu ndyoka ye na olyi inyengitha ndje ndi lundulule iikala yandje yokukala kaandi na ko nasha nuukalele. Sho nda mono nkene ya li ya nyanyukwa noyu uvite elago, onda li nda halelela ndi kale ndi na onkalamwenyo tayi ti sha nde ya fa.” Konima owala yetalelopo ndyoka, Diego okwa tameke okukokola ondjila.

Ngele owu li omugundjuka, mbela owa fa Diego ngoka a li hu uvitha nokuya kokugongala kwopaKriste, nopethimbo opo tuu mpoka oku uvite kutya uukalele we owu li owala oshinima shoka ha ningi, ihe ihawu mu etele enyanyu? Ngele osho, mbela ito vulu okuninga omalunduluko monkalamwenyo yoye wu ka longe komahala hoka ku na ompumbwe onene yaauvithi yUukwaniilwa, opo wu mone enyanyu ndyoka hali zi moku shi ninga? Oshi shi okuuviwa ko ngele owu na uumbanda wokuthiga po onkalamwenyo yuuzeko. Ihe aagundjuka oyendji oya hogolola okuthiga po onkalamwenyo ya tya ngaaka. Oya lundulula omalalakano gawo nosho wo omahalo gawo gopaumwene, opo ya ninge oshindji miilonga yaJehova. Natu tale koshiholelwa shaBruno.

Oomvula opo dha zi ko Bruno (4) ngoka e na omimvo 28 ngashingeyi, okwa li e ki ilonga kosikola ya simana yokulonga omusika, nelalakano lye olya li okuninga omuwiliki gwongundu yaahiki yiihikomwa. Okwa li te shi enditha nawa meilongo lye, nokwa li ha hiwa iikando niikando a ka kwatele komeho aahiki yiihikomwa. Okwa li e na eithano ndyoka lya li tali ke mu etela sha mondjato. Bruno okwa ti: “Natango onda li ndi wete onkalamwenyo yandje ya kambela sha. Onda li ndi iyapulila Jehova, ihe onda li ndi shi kutya kanda li tandi ningi ashihe shoka te vulu miilonga ye, naashoka osha li tashi nyenyetele ndje. Onda lombwele Jehova omaiyuvo gandje okupitila megalikano, nonda li wo nda popi naamwatate ya pyokoka megongalo. Konima sho nda talulula nawa oshinima shika, onda tokola ndi pitithe komeho uukalele, pehala lyomusika. Onde etha po osikola yokwiilonga omusika nonda yi ndi ka kwathele koshitopolwa hoka ku na ompumbwe onene yaauvithi yUukwaniilwa.” Ongiini a li a tula etokolo lye miilonga?

Bruno okwa li a tembukile kondoolopa hayi ithanwa Guapiara (ku na aantu 7 000 lwaampono), yi li ookilometa 260 okuza moshilando shedhina São Paulo. Kasha li oshipu okutembukila hoka. Bruno ota ti: “Onda li handi kala megumbo eshona moka nda li kaandi na okila, o-TV nosho wo Ointaneta. Ihe pegumbo mpoka opwa li iinima yimwe mbyoka kaanda li ndi na nale, ngaashi oshikunino shiikwamboga nosho wo oshitsambe shomiti dhiiyimati!” Sho Bruno ta kwathele megongalo eshona, lumwe moshiwike okwa li ha longele iikulya, omeya nosho wo iileshomwa mompunda ye e ta yi nomota ye a ka uvithile kiitopolwa yokuushayi. Aantu oyendji moshitopolwa shoka inayu uva nale onkundana ombwanawa. Bruno ota ti: “Onda li ndi na aakonakonimbiimbeli 18. Shoka sha li she etele ndje enyanyu noonkondo, osho okumona aakonakoni taya ningi omalunduluko moonkalamwenyo dhawo!” Okwa gwedha ko a ti: “Pompito ndjika, onda li nda dhimbulula kutya onda mona oshinima shoka nda kala nda pumbwa monkalamwenyo yandje, sha hala okutya, egwaneno ndyoka hali zi mokupititha komeho iinima yUukwaniilwa. Andola enyanyu ndika inandi li mona, ando onda li tandi lalakanene iinima yopamaliko.” Bruno okwa li ha hupu ngiini sho e li muGuapiara? Okwa popi ti imemeha a ti: “Onda li handi longo aantu okudhenga oshiketala.” Bruno natango onkulungu mokulonga aantu omusika nomoku yi hika.

Omumwameme Mariana (5) ngoka ngashingeyi ti ihilile pomimvo 30, okwa li i iyadha monkalo ya fa yaBruno. Mariana  okwa li e na iilonga yuuahende mbyoka hayi futu nawa, ihe nonando ongaaka, ka li u uvite a gwanenwa. Okwa ti: “Onda li ndu uvite nda fa omuntu ‘ta tidha ombepo.’” (Omuuv 1:17) Aamwatate naamwameme oyendji oya li ye mu ladhipike a dhiladhile kombinga yuukokolindjila. Konima sho a dhiladhila kombinga yaashoka, Mariana pamwe nookahewa ke Bianca (6), Caroline (7) nosho wo Juliana (8), oya li ya tokola ya ka kwathele egongalo ndyoka li li muBarra do Bugres, ondoolopa yi li kondje yaBolivia, oshitopolwa shoka shi li ookilometa omayuvi ogendji kokule noshilongo shawo. Uuwanawa wuni ya li ya mono?

Mariana okwa ti: “Onda li nda hala owala ndi kale moshitopolwa shoka uule woomwedhi ndatu. Ihe sho ndi li pokushuna, onda li ndi na aakonakonimbiimbeli 15. Oshili oyo kutya aakonakonimbiimbeli mboka oya li ya pumbwa ekwatho olindji opo ya hume komeho. Onkee ano, kanda li te vulu oku ya lombwela kutya otandi shuna koshilongo shetu. Onda li owala ndi na okukala muka.” Kakele owala kuye, Bianca, Caroline nosho wo Juliana nayo inaya shuna we. Mbela eithano lyaMariana epe olya li lya ningitha onkalamwenyo ye yi kale yi na eityo? Okwa ti: “Onda nyanyukwa sho Jehova ta longitha ndje ndi kwathele aantu ya lundulule iikala yawo. Oshi li elaleko nuuyamba kungame sho ndi shi kutya ngashingeyi otandi longitha ethimbo nosho wo oonkondo dhandje miilonga mbyoka tayi ti sha lela.” Caroline okwa popi paufupi omaiyuvo gawo ayehe yane a ti: “Kongulohi sho tandi ka lala, ohandi kala ndu uvite nda gwanenwa, molwaashoka onda longitha ethimbo lyandje mokupititha komeho iilonga yUukwaniilwa. Ngashingeyi ohandi kala owala tandi ipula nankene ndi na okukwathela aakonakonimbiimbeli yandje. Ohashi nyanyudha ndje oku ya mona taya ningi ehumokomeho. Ondi li tandi gwanithilwa oohapu ndhika tadhi ti: “Konakona mwene, u mone, nkene OMUWA omwaanawa.” — Eps. 34:8.

Omutima gwaJehova ihagu kala tuu tagu hunga enyanyu sho aamwatate naamwameme aagundjuka muuyuni awuhe tayi “igandja nehalo ewanawa” ye ku uvithe onkundana yUukwaniilwa we kiitopolwa yokomikandi! (Eps. 110:3, NW; Omayel. 27:11) Aamati naakadhona ayehe mboka taya longo nehalo ewanawa, Jehova naye ohe ya laleke wo nuuyamba. — Omayel. 10:22.