1. Uuyuni owa tala ko ngiini emanguluko?

OOMVULA 2 500 lwaampono dha ka pita, omulumentu omunyoli gwiinyandwa Omugreka okwa nyola a ti: “Kapu na omuntu ha humbata ondjoko yuupika te shi ningi nehalo ewanawa.” Aantu oyendji kunena otaya tsu kumwe noohapu ndhoka. Ngele omuntu u uvu oshitya uupika, momadhiladhilo ge ohamu ya ethano lyaantu taya thindilwa kongudhi notaya thiminikwa, mboka iilonga yawo nomaiyambo gawo ihaayi ya etele yoyene uuwanawa washa, ihe ohayi etele owala uuwanawa ooyene yawo mboka ye ya pika.

2, 3. (a) Aapiya nenge aayakuli yaKristus oye na oshinakugwanithwa shashike? (b) Otatu ka konakona omapulo geni ge na ko nasha nuuyakuli?

² Jesus okwa li a popi kutya aalongwa ye oye na okukala aapiya aaifupipiki nenge tu tye aapika aaifupipiki. Ihe uupika mbuka wAakriste yashili kawu shi mboka wokudhinitha nenge wokuthindila omuntu kongudhi. Aapiya mbaka ohaya kala ya simanekwa, yi inekelwa noya lengwa. Pashiholelwa, konima manga Jesus inaa sa okwa li a popi kombinga ‘yomupiya’ gumwe. Kristus okwa li a hunganeke kutya ota ka langeka po “omupiya omudhiginini nomunandunge” a longe iilonga yontumba. — Mat. 24:45-47, yelekanitha NW.

³ Shoka oshindhindhilikwedhi osho kutya mehokololo lilwe lya faathana, omupiya ngoka oti ithanwa “omumati.” (Lesha Lukas 12:42-44.) Aakriste oyendji aadhiginini kunena, kaye shi iilyo yongundu ndjoka yomumati omwiinekelwa. Ihe Omanyolo otage shi ulike kutya aapiya yaKalunga ayehe oye li aayakuli. Mokukala aayakuli omwa kwatelwa iinakugwanithwa yini? Otu na oku yi tala ko ngiini? Opo tu mone omayamukulo, natu konakoneni iinakugwanithwa yaayakuli yopethimbo lyonale.

4, 5. Aapiya yopethimbo lyonale oya li haya kala ye na iinakugwanithwa yini? Gandja iiholelwa.

⁴ Pethimbo lyonale, olundji omuyakuli okwa li ha tonatele  egumbo lyamwene gwe nenge ongeshefa ye. Omupiya okwa li e na oonkondopangelo dhontumba nokwa li ha tonatele egumbo lyamwene gwe, iimaliwa ye nosho wo aapiya ooyakwawo. Otu na oshiholelwa shomupiya Eliaser, ngoka a li ha tonatele iinima yamwene gwe, Abraham. Otashi vulika Eliaser oye a li a tumwa kuAbraham a ye kuMesopotania a ka kongele Isak omukiintu. Oshinakugwanithwa shoka kashi li tuu oshinene nosha simana! — Gen. 13:2; 15:2; 24:2-4.

⁵ Josef, omutekulululwa gwAbraham okwa li i inekelelwa oshinakugwanithwa shokutonatela egumbo lyaPotifar. (Gen. 39:1, 2) Josef naye wo okwa ka kala e na omupiya gwe, ngoka a li a langeke po e li “elenga lyomegumbo” lye. Omupiya ngoka oye a li a yakula aamwahe yaJosef omulongo sho yi ile okulanda iilya. Josef okwa li wo a lombwele omupiya gwe ngoka a landule oshitenga she shoshisiliveli shoka sha li aniwa sha yakwa po kaamwahe. Osha yela kutya omupiya ngoka okwa li u uvite etumba sho i inekelwa lela. — Gen. 43:19-25; 44:1-12.

6. Aakuluntugongalo Aakriste oye na iinakugwanithwa ya yoolokathana yini yokutonatela?

⁶ Oomvula omathele konima yaashono, omuyapostoli Paulus okwa li a nyola kutya aatonateli Aakriste oye na okukala ‘aasilishimpwiyu yegumbo lyaKalunga.’ (Tit. 1:7) Ohaya wilike nokukwatela komeho momagongalo, molwaashoka oya langekwa po ya kale aasita ‘yoshigunda shaKalunga.’ (1 Pet. 5:1, 2) Odhoshili kutya oye na iinakugwanithwa yi ili noyi ili. Pashiholelwa, aakuluntugongalo oyendji ohaya kwatele komeho owala megongalo limwe. Aatonateli aayendi ohaya tonatele omagongalo ogendji. Omanga iilyo yokomitiye yoshitayimbelewa hayi tonatele omagongalo miilongo ayihe mbyoka yi li kohi yetonatelo lyayo. Ihe nonando ongaaka, ayehe oye na oshinakugwanithwa shokulonga iilonga yawo nuudhiginini, molwaashoka Kalunga ote ke ‘ya pula oomwenyo’ ndhoka e yi inekelela. — Heb. 13:17.

7. Otu shi shi ngiini kutya Aakriste ayehe oye li aayakuli?

⁷ Ongiini mbela shi na ko nasha nAakriste aadhiginini oyendji mboka kaaye shi aatonateli? Omuyapostoli Petrus okwa nyolele Aakriste ayehe ontumwafo a ti: “Kehe gumwe na longithe omagano ngoka e ga pewa okukwatha yakwawo, ongaashi sho opalela aatonateli aawanawa yomagano gaKalunga gi ili [nogi] ili.” (1 Pet. 1:1; 4:10) Omolwohenda ye Kalunga oke tu pa atuhe omagano, iinima yopamaliko, uunkulungu nenge uunyakwa wontumba iinima mbyoka tatu vulu okulongitha tu kwathele ooitaali ooyakwetu. Onkee ano, aapiya yaKalunga ayehe oye li aayakuli, kakele kaashono, Kalunga okwe ya simaneka, e yi inekela nokwe ya pa iinakugwanithwa.

8. Ekotampango limwe lini lya simana twa pumbwa okukaleka momadhiladhilo?

⁸ Ngashingeyi natu ka taleni komakotampango gatatu ngoka aayakuli ya pumbwa okukaleka momadhiladhilo. Lyotango, atuheni aapiya yaKalunga notatu ki ihokolola kuye. Paulus okwa nyola a ti: “Kamu shi yeni yene, ihe oya Kalunga. Kalunga okwe mú kulile niikulila yi na ondilo,” mbyoka yi li ombinzi yeyambo lyaKristus. (1 Kor. 6:19, 20) Molwaashoka tse oyaJehova, otu na oshinakugwanithwa shokuvulika kiipango ye, niipango ye kayi shi iidhigu. (Rom. 14:8; 1 Joh. 5:3) Ohatu ningi wo aapiya yaKristus. Ngaashi owala aayakuli yopethimbo lyonale ya li ye na emanguluko olindji natse otwa pewa emanguluko olindji, ihe emanguluko lyetu oli na ongamba. Otu na okugwanitha po iinakugwanithwa yetu ngaashi twa lombwelwa. Kutya nduno otu na omauthembahenda geni, natango otu li aapiya yaKalunga noyaKristus.

9. Jesus okwa li a longitha eyele lini a yelithe ekwatathano ndyoka li li pokati komupiya namwene gwe?

⁹ Jesus okwe tu kwathela tu uve ko ekwatathano ndyoka li na okukala pokati kooyene naapiya yawo. Oshikando shimwe Jesus okwa li a lombwele aalongwa ye kombinga yomupiya ngoka a li e ya megumbo sho a zimbuka mepya. Mbela mwene gwe okwa li a ti: “Endelela nziya, u lye?” Aawe. Okwa ti: “Pakela ndje po uulalelo e to izaleke, u yakule  ndje, manga tandi li e tandi nu. Opo ihe oto vulu okulya e to nu.” Jesus okwa li a hala okulonga aalongwa ye shike meyele ndika? Okwe shi yelitha a ti: “Ano osho nane wo ngele omwa gwanitha owala ayihe mbyoka mwe yi lombwelwa, omu na okutya: ‘Otse aamati aahethi, sho twa longo owala shoka twa li tu na oku shi longa.’” — Luk. 17:7-10.

10. Oshike tashi ulike kutya Jehova oha pandula oonkambadhala ndhoka hatu ningi tu mu longele?

¹⁰ Jehova oha pandula shili oonkambadhala ndhoka hatu ningi tu mu longele. Ombiimbeli otayi tu shilipaleke tayi ti: “Kalunga oku shi kwiinekelwa. Oye ita dhimbwa iilonga nohole yeni mokusimanekitha edhina lye.” (Heb. 6:10) Jehova ihe tu pula tu longe sha oshidhigu. Shimwe ishewe, shoka he tu pula tu longe ohe shi ningi omolwuuwanawa wetu noihashi kala nando oshidhigu unene kutse. Meyele ndyoka Jesus a longitha, omupiya iha ningi owala shoka a hala mokukala ta longo iilonga ye yopaumwene. Shoka tatu ilongo meyele ndika osho kutya sho twi iyapulile Kalunga, otwa hogolola okupititha komeho ehalo lye, ihe halyetu yene. Mbela ito tsu kumwe nasho?

11, 12. Tu li aayakuli uukwatya wuni tu na okuulika, noshike tu na okuhenuka?

¹¹ Ekotampango etiyali olyo kutya: Tu li aayakuli, atuhe ohatu vulika komithikampango dha faathana. Odhoshili kutya iinakugwanithwa yimwe ohayi pewa owala Aakriste yamwe po megongalo. Ihe Kalunga okwa tegelela atuhe tu gwanithe po iinima yontumba. Pashiholelwa, tu li aalanduli yaKristus nosho wo Oonzapo dhaJehova otwa lombwelwa tu kale tu holathane. Jesus okwa popi kutya ohole oyo hayi ndhindhilikitha mo Aakriste yashili. (Joh. 13:35) Kakele owala kaamwatate, otu hole wo aantu ooyakwetu. Ohatu kambadhala tu ulukile ohole mboka kaatu li nayo meitaalo limwe. Atuheni otatu vulu oku shi ninga notu na okuninga ngaaka.

¹² Otwa tegelelwa wo tu kale neihumbato ewanawa. Otwa hala okuhenuka eihumbato nosho wo omikalo ndhoka itaadhi popilwa kOmbiimbeli. Paulus okwa nyola a ti: “One omu shi shi kutya aakolokoshi itaa ka ya [muukwaniilwa waKalunga, NW]. Inamu ipukitha. Aantu mboka aaholume, aasimaneki yiimenka, aahondeli, omashenge naakali nomashenge, aafuthi, aanalwiho, oonkolwi, aasheki naayugi, kaku na nando ogumwe gwomaantu ya tya ngeyi ta ka ya [muukwaniilwa waKalunga, NW].” (1 Kor. 6:9, 10) Ohashi pula lela oonkambadhala tu kale metsokumwe nomithikampango dhaKalunga dhuuyuuki. Ihe oonkambadhala ndhoka odhi na oshilonga, molwaashoka ohadhi tu etele uuwanawa monkalamwenyo yetu ngaashi uukolele wopalutu, ekwatathano ewanawa nayalwe nosho wo okukala twa hokiwa kuKalunga. — Lesha Jesaja 48:17, 18.

13, 14. Aakriste ayehe oye na oshinakugwanithwa shashike, noye na oku shi tala ko ngiini?

¹³ Dhimbulukwa wo kutya omupiya ngoka a popiwa metetekelo okwa li e na iilonga mbyoka ha longo. Natse otu na iilonga mbyoka tu na okulonga. Otwa pewa omagano ge na ondilo, sha hala okutya, ontseyo yoshili. Kalunga okwa tegelela tu lombwele yalwe oshili ndjoka. (Mat. 28:19, 20) Paulus okwa nyola a ti: ‘Natu talwe kutya otse aayakuli yaKristus, mboka twa pewa iipatululo yegumbo lyiiholekwa yaKalunga.’ (1 Kor. 4:1) Paulus okwa li a mono kutya okukala omuyakuli otashi pula tu tonatele thiluthilu “iiholekwa yaKalunga” nenge oshili yOmbiimbeli noku yi hololela yalwe ngaashi Jesus Kristus, Mwene gwetu e tu lombwela tu ninge. — 1 Kor. 9:16.

¹⁴ Okuuvithila yalwe oshili, osho oshinima shopahole shoka atuheni tu na okuninga. Odhoshili kutya oonkalo dhAakriste ayehe odha yoolokathana. Onkee ano, ihaya longo shi thike pamwe muukalele. Jehova oku shi nawa onkalo yOmukriste kehe. Shoka sha simana kutse osho okulonga ashihe shoka tatu vulu pauhandimwe. Uuna tatu shi ningi, otatu ku ulika kutya otu hole shili Kalunga nosho wo aantu ooyakwetu.

15-17. (a) Omolwashike sha simanenena omuyakuli a kale omudhiginini? (b) Jesus okwa li a longitha eyele lini e tu kwathele tu uve ko iilanduliko yokukala kaatu shi aadhiginini?

¹⁵ Ekotampango etitatu, lya pambathana naangoka gaali twa zi nokukundathana olyo kutya: Otu na okukala aadhiginini naainekelwa. Omuyakuli ota vulu okukala e na omaukwatya nomagano ogendji omawanawa, ihe ngele ke na ko nasha, ye ke shi omudhiginini kumwene gwe, nena kashi na ekwatho lyasha. Uudhiginini owa simanenena opo omuyakuli a kale ha longo iilonga ye nawa, noha pondola. Dhimbulukwa oohapu dhaPaulus ndhoka tadhi ti: “Omusilishimpwiyu kehe ota tegelelwa, a kale omwiinekelwa.” — 1 Kor. 4:2.

¹⁶ Ngele otu li aadhiginini, osha yela kutya otatu ka pewa ondjambi. Ngele katu shi aadhiginini, otatu ka kana. Shika otu shi iwetele meyele lyaJesus lyiitalenti. Aapiya mboka aadhiginini oya li ya pandulwa nokupewa iinakugwanithwa kumwene gwawo, molwaashoka oya “likolitha” iimaliwa mbyoka a li e ya pe. Omupiya ngoka a li kee na ko nasha neliko ndyoka mwene gwe e mu inekelela okwa popiwa e li “omwiinayi” “nomunanyalo.” Oshitalenti shoka a li a pewa okwe shi kuthwa e tu umbilwa pondje. — Lesha Mateus 25:14-18, 23, 26, 28-30.

¹⁷ Oshikando shimwe, Jesus okwa li a popi kutya ngele katu shi aadhiginini otatu ka mona iilanduliko. Okwa ti: “Okwa li ku na omulumentu omuyamba e na elenga lye, e mu lombwelwa, ta hanagula po eliko lye. Oye okwe mu ithana nokwa ti kuye: ‘Ondu uva shike kombinga yoye? Ulukila ndje, nkene wa kala to tonatele eliko lyandje.’” (Luk. 16:1, 2) Molwaashoka elenga olya li lya halakanitha po eliko lyamwene gwalyo, mwene gwalyo okwe li tidha mo megumbo lye. Meyele ndyoka itatu ilongo mo tuu oshiilongomwa sha simana! Osha yela kutya otwa hala tu kale aadhiginini mokulonga ashihe shoka Kalunga e tu pa tu longe.

18. Omolwashike kaatu na okuyelekanitha iilonga yetu noyayalwe?

¹⁸ Kehe gumwe oku na okwiipula kutya, ‘Ngame ondi li omuyakuli a tya ngiini?’ Ihe kashi li pandunge tu kale hatu iyeleke nayalwe. Ombiimbeli otayi tu pe omayele tayi ti: “Kehe gumwe na konakone ye mwene, iilonga ye nkene ya tya. Iilonga ye ngele iiwanawa, nena ota vulu okwiitangela shoka e shi longo, ihe ita vulu okuyelekanitha iilonga ye niilonga yamukwawo.” (Gal. 6:4) Pehala lyokuyelekanitha iilonga yetu noyayalwe, otu na okugandja eitulomo kwaashoka tse yene tatu vulu okuninga. Shika otashi ke tu gamena kaatu kale tu na uuntsa, nokaatu teke omukumo. Otu na wo okukala tu shi kutya oonkalo dhetu ohashi vulika dha lunduluka. Omalunduluko ngoka hashi vulika ge etithwe kokwaahe na uukolele, kuukulupe nosho wo kiinakugwanithwa yi ili noyi ili, otashi vulika ge tu ningithe kaatu longe ngaashi twa li hatu longo nale. Mepingathano naashono, otashi vulika tu kale tatu vulu okulonga oshindji shi vulithe shito, molwaashoka oonkalo dhetu odha lunduluka. Ngele osho, omolwashike itaatu kambadhala tu ninge oshindji miilonga yetu?

19. Omolwashike kaatu na okuteka omukumo ngele inatu pewa uuthembahenda wontumba?

¹⁹ Otu na wo okutala kiinakugwanithwa mbyoka tu na nenge mbyoka twa hala. Pashiholelwa, omumwatate otashi vulika a kale a hala okuninga omukuluntugongalo nenge a pewe iinakugwanithwa piigongi. Oshi li nawa tu longe nuudhiginini opo tu kale twa gwana okupewa uuthembahenda mboka, ihe katu na okuteka omukumo ngele inatu pewa iinakugwanithwa mbyoka twa li twa tegelela tu pewe. Omolwomatompelo ngoka kaatu shi, omauthembahenda gamwe otashi vulika tu ke ga pewe nale, nonando kashi shi pethimbo ndyoka twa li twa tegelela. Dhimbulukwa kutya Moses otashi vulika a li i iwete a gwana okuwilika Aaisraeli okuza muEgipiti, ihe okwa li e na okutegelela uule woomvula 40 opo e shi ninge. Shika osha li she mu pe ethimbo lya gwana a kokeke uukwatya mboka wa li tawu ke mu kwathela a kwatele komeho oshigwana shoka oshitangalali noshi na oshityani. — Iil. 7:22-25, 30-34.

20. Oshike tatu ilongo moshiholelwa shaJonatan?

²⁰ Omathimbo gamwe uuthembahenda wontumba otashi vulika kaatu wu pewe nandonando. Jonatan naye okwa li i iyadha monkalo ya tya ngaaka. Okwa li omwanamati gwaSaul nokwa li ta vulu okuninga omukwaniilwa gwaIsraeli. Ihe nonando ongaaka, Kalunga okwa li a hogolola David ngoka a li e vulike lela moomvula kuJonatan oye a ninge omukwaniilwa. Oshinima shoka Jonatan okwa li e shi uvitile ngiini? Okwe shi taamba ko nomaako agehe nokwa li a ambidhidha David nokwa li nokuli a tula omwenyo gwe moshiponga omolwaDavid. Jonatan okwa li a lombwele David a ti: “Oto ka ninga omukwaniilwa gwaIsraeli nangame ote kala elenga lyoye lyotango.” (1 Sam. 23:17) Moshiholelwa shaJonatan otatu ilongo mo shike? Jonatan okwa li a taamba ko oshinima shoka, ihe ka li a sile ondumbo David a fa he Saul. Pehala lyokukala twa sila yalwe ondumbo, atuheni natu kale tatu gandja eitulomo kokugwanitha po iinakugwanithwa mbyoka twa pewa. Otatu vulu okukala tu na uushili kutya muuyuni uupe, Jehova ota ka sa oshimpwiyu a gwanithe po omahalo gaapiya ye ayehe ngoka ge li metsokumwe nehalo lye.

21. Otu na okukala tu uvitile ngiini oshilonga shetu shokuyakula?

²¹ Natu dhimbulukwe aluhe kutya tu li aayakuli yaKalunga aainekelwa, katu li aapiya mboka haya thiminikwa ya longele mwene gwawo ngoka e na onyanya. Pehala lyaashono, Jehova okwe tu inekela nokwe tu lenga sho e tu pa iilonga ya simana yokuuvitha onkundana ombwanawa momasiku ngaka ga hugunina, iilonga mbyoka itaayi ka longwa we. Sho tatu longo iilonga mbyoka, otwa manguluka okuhogolola nkene tu na oku yi gwanitha po. Onkee ano, natu kaleni aayakuli aadhiginini. Natu kale wo hatu nyanyukilwa uuthembahenda mboka tu na wokulongela Jehova ngoka e li omunenenene meshito alihe.