1, 2. Petrus okwa li ta popi oolye sho a longitha oshitya “aahogololwa,” nomolwashike a ti kutya yo ‘aakwiilongo muuyuni mbuka’?

OOMVULA 30 lwaampono konima sho Jesus a yi megulu, omuyapostoli Petrus okwa li a nyola ontumwafo ndjoka ya li ya nyolelwa “aahogololwa yaKalunga, [aakwiilongo, NW] mboka yi ihanena iitopolwa yomuPontus, Galatia, Kapadokia, Asia naBitinia.” (1 Pet. 1:1) Osha yela kutya sho Petrus a longitha oshitya “aahogololwa,” okwa li ta popi mboka ye na ondondo ya fa ye, sha hala okutya, aantu mboka ya gwayekwa nombepo ondjapuki noya pewa ‘omwenyo omupe, ngoka gwe ya pa etegameno lya kola’ lyoku ka pangela pamwe naKristus megulu. (Lesha 1 Petrus 1:3, 4.) Ihe mbela omolwashike i ithana aahogololwa mbaka ye li “oondjendi naakwiilongo muuyuni mbuka”? (1 Pet. 2:11) Omolwashike atuheni kunena tu na okukala tu na ko nasha noshinima shika, ngele nani Oonzapo owala oonshona muuyuni awuhe hadhi ti odhi li aagwayekwa nenge tu tye aahogololwa?

² Methelemumvo lyotango osha li she eleka okupopya kutya aagwayekwa oye li ‘aakwiilongo muuyuni mbuka.’ Ngaashi owala sha li pethimbo ndiyaka, oshihupe shaagwayekwa mboka ye na omwenyo kunena, okukala kwawo kombanda yevi oku li oshinima shopakathimbo. Omuyapostoli Paulus ngoka oshilyo ‘shoshigunda oshishona’ shaagwayekwa okwa yelitha a ti: “Tse uukwashilongo wetu ou li megulu notwa tegelela nondjuulukwe onene Omuwa gwetu Jesus Kristus, a ze megulu, e ye e tu hupithe.” (Luk. 12:32; Fil. 3:20) Molwaashoka ‘uukwashilongo wawo owu li megulu’ ngele aagwayekwa ya si ohaya thigi po evi ya ka mone oshinima shilwe oshiwanawa kaaku na we, shoka shi li omwenyo ihaagu si megulu. (Lesha Aafilippi 1:21-23.) Kungawo, meityo lyolelalela otaku vulu okutiwa kutya yo ‘aakwiilongo muuyuni mbuka’ wu li mepangelo lyaSatana.

3. Epulo lini li li po shi na ko nasha ‘noonzi dhilwe’?

 ³ Ihe ongiini mbela kombinga ‘yoonzi dhilwe’? (Joh. 10:16) Mbela dho kadhi na etegameno lya kankamena kOmanyolo lyoku ka mona uukwashigwana tawu kalele kombanda yevi? Uushili owo kutya evi otali ka ninga egumbo lyadho sigo aluhe. Ihe nonando ongawo, meityo lyontumba nadho odhi li aakwiilongo muuyuni mbuka ngashingeyi. Omeityo lini mbela?

4. Oshike shoka aawiliki muuyuni itaaya vulu okukeelela?

⁴ Manga owala tu li muuyuni mbuka waSatana, kehe gumwe, mwa kwatelwa Aakriste, atuheni otatu tsikile nokumona iihuna omolwoshipotha shoka Satana a li a tukulile Jehova. Aaroma 8:22 otaya ti: “Otu shi shi kutya sigo ongashingeyi kehe shimwe shomeshito otashi fudhagana kuuwehame wa fa mboka wopevalo lyokanona.” Aawiliki muuyuni, aanongononi nosho wo aagandji yomakwatho, nonando oya kale ye na ehalo lyokuninga po sha, itaya vulu okukeelela iinima mbyoka.

5. Okuza mo 1914, aantu oomiliyona oya kala nokuninga shike, nomolwashike?

⁵ Okuza mo 1914, aantu oomiliyona oya kala nokuhogolola nehalo ewanawa ya kale aalelwa yOmukwaniilwa Jesus Kristus, ngoka a tulwa po kuKalunga. Ihaya kutha ombinga miinima yomuuyuni waSatana nenge ye wu ambidhidhe. Ihe pehala lyaashono, ohaya longitha iiniwe yawo nosho wo onkalamwenyo yawo ya humithe komeho Uukwaniilwa waKalunga. — Rom. 14:7, 8.

6. Omeityo lini Oonzapo dhaJehova dhi li aakwiilongo muuyuni mbuka?

⁶ Oonzapo dhaJehova miilongo yi vulithe 200 ohadhi vulika shili koompango dhomapangelo. Ihe nonando ongawo, kehe mpoka dhi li odha fa aakwiilongo. Ihadhi kutha ombinga miinima yopapolotika nenge moontamanana ndhoka hadhi holoka po miilongo moka dhi li. Ngashingeyi odhi itala ko dhi li aakwashigwana yuuyuni uupe, mboka Kalunga u uvaneka. Odha nyanyukwa sho dhi shi kutya omasiku gokukala kwadho dhi li aakwiilongo muuyuni mbuka waSatana oge li pokuhula po ngashingeyi.

7. Otashi ke enda ngiini aapiya yaKalunga ya ka ninge aakwashigwana taya kalelele, nopeni taya ka kala?

 ⁷ Masiku Kristus ota ka hanagula po uuyuni waSatana mbuka wa kolokosha. Epangelo lyaKristus lya gwanenena otali ka mangulula aantu kombanda yevi muulunde nomoluhodhi moka ye li. Otali ka hulitha po ayehe mboka ye li ompinge nuunamapangelo waJehova kutya nduno oomboka hatu mono nenge oomboka ihaatu mono. Aapiya yaKalunga aadhiginini otaya ka mona ompito ya ka kale aakwashigwana sigo aluhe meviparadisa. (Lesha Ehololo 21:1-5.) Eshito otali ka “manguluka muupika weyonuuko, li ye memanguluko nomeadhimo lyaana yaKalunga” meityo lyolelalela. — Rom. 8:21.

8, 9. Yelitha shoka Petrus a li a hala okutya sho a ti “inamu etha, mu pangelwe kuuhalu wopantu.”

⁸ Petrus okwa li a yelitha kutya Aakriste oya tegelelwa yi ihumbate ngiini sho a ti: “Aaholike, one oondjendi naakwiilongo muuyuni mbuka. Onkee otandi mú kumagidha, inamu etha, mu pangelwe kuuhalu wopantu mboka tau hindi aluhe omwenyo.” (1 Pet. 2:11) Oohapu ndhoka Petrus okwa li e dhi nyolele Aakriste aagwayekwa, ihe otadhi longo wo nokoonzi dhilwe dhaJesus.

⁹ Iinima yimwe mbyoka aantu haya kala ya hala inayi puka, uuna tayi ningwa momukalo ngoka Omushiti a hokwa. Iinima mbyoka ohayi gwedha ko kenyanyu lyetu monkalamwenyo. Pashiholelwa, oshi li paunshitwe okukala twa hala okulya iikulya iitoye nosho wo okunwa iikunwa iiwanawa, okukutha ombinga momainyanyudho nosho wo okweendathana nookuume aawanawa. Oshi li wo paunshitwe okukala wa hala okuya momilalo naakuume koye kopandjokana, ihe aaihokani oye na okukala ye na ondjele. (1 Kor. 7:3-5) Petrus okwa li ta popi kombinga ‘yuuhalu wopantu’ mboka ‘hawu hindi aluhe oomwenyo’ dhawo. Uuhalu mboka owu li omahalo gopanyama ngoka ga puka. Oombiimbeli dhimwe odha toloka uutumbulilo mbuka tadhi ti: “okahalu kiipala” (King James Version) nenge “okahalu kuulunde” (New International Version). Osha yela kutya otu na okukala twa kotokela kehe shimwe shoka itaashi tsu kumwe naashoka Jehova e tu lombwela nosho wo nakehe shimwe shoka tashi vulu okuyona po ekwatathano lyetu ewanawa naKalunga. Ngele ohatu gwanitha po omahalo getu momukalo gwa puka, otashi ke tu etela eso.

10. Satana oha longitha shike a heke Aakriste ya ninge oshitopolwa shuuyuni we?

¹⁰ Elalakano lyaSatana olyo okunkundipaleka etokolotoko lyAakriste yashili lyokukala yi itala ko ye li ‘aakwiilongo’ monkalelo ndjika. Satana okwa hala tu kale twa hokwa iinima yopamaliko, onyata yiipala, esimano, okukala tu iholele komeho nokwa hala tu kale tu na uuntsa omolwuukwashigwana wetu. Iinima ayihe mbika oyi li oomwiigo dhaSatana notu na okukala twe yi kotokela. Ohatu ulike kutya inatu hala okukala oshitopolwa shuuyuni mbuka waSatana, mokukala twa tokola toko tu kale kokule nomahalo gopanyama ngoka ga puka. Kungawo, ohatu ulike kutya tse otu li aakwiilongo muuyuni mbuka. Shoka twa halelela osho oku ka kala nuukwashigwana tawu kalelele muuyuni uupe waKalunga wuuyuuki.

11, 12. Omathimbo gamwe aakwiilongo ohaya kala ya talika ko ngiini, naantu yamwe ohaya dhiladhila ngiini kombinga yOonzapo dhaJehova?

¹¹ Petrus okwa tsikile ko nokuyelitha movelise 12 kombinga yaashoka ‘aakwiilongo’ ya tegelelwa ya ninge a ti: “Kaleni wo mu na omikalo omiwanawa mokati kaapagani, opo uuna taye mú lundile kutya one aayoni, ya dhimbulule iilonga yeni iiwanawa noya ka hambelele Kalunga mesiku ndyoka te ke ya.” Omathimbo gamwe aakwiilongo ohaya kala tayu ulwa nayi. Ohashi vulika nokuli aantu ya kale ye ya tala ko ye li aakolokoshi, molwaashoka owala ya yooloka ko kaantu yomoshitopolwa  moka ye li. Okupopya kwawo, iikala yawo, okuzala kwawo nosho wo eholokopo lyawo otashi vulika li kale lya yooloka ko kulyaantu yalwe. Ihe ngele ohayi ihumbata nawa, ohashi ningitha yalwe kaaye ya popile muuwinayi.

¹² Shika osha faathana nAakriste yashili. Oya yooloka ko kaantu yalwe miinima yontumba, ngaashi mokupopya nosho wo mokwiinyanyudha. Omizalo dhawo nosho wo eiyopaleko lyawo ohali kala olundji lya yooloka ko kulyaantu oyendji yomoshitopolwa. Omathimbo gamwe, eyooloko ndika ohali ningitha oohandimwe ye ya lundile nokutya yo aantu aawinayi. Ihe opu na yamwe mboka haye ya popile muuwanawa omolweihumbato lyawo.

13, 14. Uunongo waKalunga ‘ohawu hololwa ngiini kiilonga’? Gandja oshiholelwa.

¹³ Eihumbato lyetu ewanawa ohali ningitha yalwe kaaye tu popile muuwinayi. Nokuli naJesus ngoka a li omulumentu omudhiginini lela kuKalunga okwa li a popilwa muuwinayi nokulundilwa. Aantu yamwe oya li ye mu ula ‘omufukedhi nonkolwi, kuume kaafendelithi nokaalunde.’ Ihe iilonga ye oya li ye shi ulike kutya ye ka li ngaaka nando. Jesus okwa ti: “Uunongo waKalunga owa hololwa kiilonga ye.” (Mat. 11:19) Eeno shili, iilonga yomuntu ohayi mu holola. Pashiholelwa, aantu yamwe moshilando shedhina Selters, shi li muNdowishi oya tala ko aamwatate naamwameme mboka haya longo moBetel moshilongo moka kutya onkalo yawo inayi fa yaantu ooyakwawo. Ihe aantu oyendji moshitopolwa oya li ya popile aamwatate muuwanawa taya ti: “Oonzapo ndhoka hadhi longo moBetel onkalamwenyo yadho oyi ili, ihe oshinima shimwe osho kutya dho ihadhi piyaganeke yalwe momudhingoloko.”

¹⁴ Aantu moshilando shedhina Moscow, shi li moRusia nayo oya li wo ya popi kutya Oonzapo dhaJehova ihadhi piyaganeke yalwe. Odha kala nokulundilwa iikando oyindji. Ihe muJuni 2010, Ompangu yUuthemba wOmuntu yaEuropa muStrasbourg, shi li moFulaanisa oya ti: “Kasha li pauyuuki sho ompangu [muMoscow] ya li ya taaguluka okatendo hoka taka gandja uuthemba wopalongelokalunga nosho wo wokugongala. Ompangu moshitopolwa shoka inayi gandja omatompelo ge shi ‘okuuviwa ko nogi ihwa po’ kutya mboka taya tamanekwa” oye na ondjo sho haya henge po ookuume kawo kopandjokana, haya humitha komeho omaidhipago, nonokutya kaye na ko nasha nuukolele wiilyo yomagumbo gawo. Shimwe ishewe “ompangu yomoshitopolwa kaya li yi na ondjele, noya li ya tulile po [aamwatate] oondjindikila ndhoka tadhi ya thindile kongudhi nodhi li wo kondje yekotampango.”

15. Aakriste yashili muuyuni awuhe ohaya landula ekotampango lyOmbiimbeli lini?

¹⁵ Oonzapo dhaJehova muMoscow nosho wo muuyuni auhe, odha li dha gwanitha po wo oshitegelelwa shimwe. Petrus okwe shi popi sho a nyola a ti: “OmolwOmuwa vulikeni kepangelo kehe lyokombanda yevi: Komupangeli Omuroma, ngoka e li kombanda yaayehe, nokaaleli mboka ye li kohi yepangelo  lye.” (1 Pet. 2:13, 14) Nonando Aakriste yashili kaye shi oshitopolwa shuuyuni mbuka wa kolokosha, ohaya vulika kaapangeli. Paulus okwa ti kutya poondondo mpoka ye li “oya tulwa po.” — Lesha Aaroma 13:1, 5-7.

16, 17. (a) Oshike tashi ulike kutya katu li ompinge nomapangelo? (b) Aawiliki yamwe yopapolotika oya popi shike kombinga yOonzapo dhaJehova?

¹⁶ Nonando Oonzapo dhaJehova ohadhi i ihumbata ngaashi ‘aakwiilongo muuyuni mbuka,’ ihadhi shi ningi molwaashoka dhi li ompinge nepangelo. Dho ihadhi keelele yamwe nenge dhi idhope miinima yawo ya pamba opolotika nenge okukandula po omikundu moshigwana. Oonzapo dhaJehova ihadhi idhopo miinima yopapolotika dha fa omalongelokalunga gamwe. Ihadhi kambadhala nando dhi lombwele aapangeli ya lundulule omilandu dhawo dhokulela aakwashigwana. Shono aantu haya popi kutya Oonzapo dhaJehova ohadhi kambadhala okutukulila epangelo oshipotha nenge oku li umba koshipundi ka shi na nando ekankameno lyasha.

¹⁷ Odha simaneka nodha tumbaleka aapangeli omolwoondondo ndhoka ye na, shoka shi li metsokumwe nomayele gaPetrus ngoka taga ti kutya ‘simanekeni aapangeli.’ (1 Pet. 2:17) Aapangeli yamwe oye shi popya kutya kapu na uunzapo washa mboka tawu ulike kutya Oonzapo dhaJehova odha nika oshiponga. Pashiholelwa, omunapolotika gumwe moNdowishi gwedhina Steffen Reiche, ngoka a li nale ominista muBrandenburg nokonima okwa ka ninga oshilyo shomutumba gwopashigwana, okwa ti kutya Oonzapo dhaJehova sho dha li tadhi hepekwa kongundu yaNazi odha li dhi ihumbata nawa. Nonando odha li tadhi hepekwa, odha li dha dhiginine eitaalo lyadho nodha li hadhi ungaunga naanandholongo ooyakwawo nombili. Okwa ti kutya uukwatya mbuka owa simanenena unene tuu kaantu yomoshilongo shaNdowishi, molwaashoka oyendji yomuyo ohaya ungaunga nonyanya naakwiilongo nenge naantu mboka ye na eitaalo nenge omadhiladhilo gopapolotika ga yooloka ko kugawo.

18. (a) Omolwashike tu holathane muuyuni awuhe? (b) Aantu yamwe mboka kaaye shi Oonzapo oya li ya ti ngiini?

¹⁸ Omuyapostoli Petrus okwa nyola a ti: “Simanekeni aantu ayehe, holeni ooitaali ooyakweni, tileni Kalunga.” (1 Pet. 2:17) Oonzapo dhaJehova ihadhi kala nando dha hala okuyemateka Kalunga, naashika ohashi dhi inyengitha dhi longe ehalo lye. Odha nyanyukwa okulongela Jehova nelalakano limwe dhi li oshitopolwa shuumwayinathana wa hangana muuyuni awuhe. Onkee ano, odhi ‘hole ooitaali ooyakwawo’ muuyuni awuhe. Mboka kaaye shi Oonzapo ohaya kala ya kuminwa ohole ya tya ngaaka, molwaashoka oya pumba mo muuyuni kunena. Pashiholelwa, omukiintu gumwe ngoka ha longo mehangano lyaapashiyoni, lyaAmerika, hu ulukile aantu omahala okwa li a kuminwa ohole ndjoka Oonzapo dhaJehova dha li dhu ulukile aamwahe mboka ya za kiilongo yilwe, poshigongi shoshitopolwa muNdowishi mo 2009. Okwa ti kutya shivalelwe a mone oshinima sha tya ngaaka. Omumwatate gumwe okwa ka popya konima ta ti: “Kehe shimwe omukiintu ngoka a popi kombinga yetu okwe shi popi nonkumwe notashi zi komutima.” Mbela ino uva nale aantu taya popi oshinima shu ukila kwaashono konima sho ya mono eihumbato lyOonzapo ewanawa poshigongi mpoka nangoye wa li?

19. Otu na okukala twa tokola toko okuninga shike, nomolwashike?

¹⁹ Okupitila momikalo ndhoka twa zi nokupopya nosho wo dhilwe, Oonzapo dhaJehova ohadhi ulike meityo lyolela kutya dho odhi li ‘aakwiilongo muuyuni mbuka’ tawu pangelwa kuSatana. Odha nyanyukwa okukala dhi li aakwiilongo nodha tokola toko okukala ngaaka. Odhi na etegameno lya kola noli na omakankameno kutya masiku otadhi ka mona uukwashigwana tawu kalele muuyuni uupe waKalunga wuuyuki. Mbela ino hala oku ka kala muuyuni mboka uupe?