Oto dhimbulukwa?
Owa lesha ngaa nawa iifo yOshungolangelo mbyoka opo ya zi ko? Tala nduno ngele oto vulu okuyamukula omapulo taga landula:
Oshike tashi ke tu kwathela tu pangele elaka lyetu?
Otu na okukonakona tango omitima dhetu, pehala lyokukala twa limbililwa aamwatate. Otu na wo okwiikonakona kutya omolwashike tatu ya dhiladhilile iinima iiwinayi. Mbela ohatu ya popile muuwinayi, opo yalwe ye ya tale ko ye li pevi, yo ye tu tale ko tu li nawa tu ya vule? Okupopila yalwe muuwinayi ohaku nayipaleke owala onkalo. — 8/15 epandja 21.
Kalunga oha dhimine po ngiini nokudhimbwa omayono gaamboka yi itedhulula?
Jehova oku uvanekela mboka a hokwa, a ti: “Otandi dhimi po omayono gawo, nuulunde wawo itandi u dhimbulukwa we.” (Jer. 31:34) Oha dhimi po omayono pakankameno lyekuliloyambo. Uuna e tu dhimine po, oha dhimbwa omayono ngoka meityo ndyoka kutya ke na esiku e ke tu geele monakuyiwa omolwago. — 10/1, epandja 32.
Sho esiku lyaJehova tali hedha popepi, iiningwanima yini twa tegelela yi ka ningwe?
Aantu otaye ki igidha “ombili negameno!” Iigwana otayi ka ponokela Babiloni Oshinene noku shi hanagula po. Oshigwana shaKalunga otashi ka ponokelwa. Otaku ka landula iita yaArmagedon, nokonima yaashono Satana noompwidhuli dhe otaya ka umbilwa molumbogo lwomuule. — 9/15, epandja 4.
Okukala kaatu shi kutya ehulilo otali ya uunake otashi tu etele uuwanawa wuni?
Okukala kaatu shi kutya ehulilo otali ya uunake, otashi gandja ompito tu ulike shoka shi li momitima dhetu. Otashi tu pe ompito yokunyanyudha omutima gwaKalunga. Otashi tu ladhipike tu kale hatu ningi omaiyambo monkalamwenyo notashi tu kwathele tu kale twi inekela thiluthilu muKalunga nosho wo mOohapu dhe. Natango ishewe, otashi tu kwathele tu idhidhimikile omaudhigu. — 9/15, epandja 24-25.
Kalunga ota ka kutha po ngiini eyonuko ndyoka aantu ye eta?
Kalunga masiku ote ke eta uuyuni uupe moka tamu ka kala uuyuuki, moka aantu mboka owala hayu ulukilathana ohole noye hole Kalunga taya ka pitikwa okukala mo. (2 Pet. 3:13) Jesus, Omukwaniilwa gwomegulu, ota ka kutha po eyonuko ndyoka aantu ye eta. (Jes. 33:24; Eh. 21:4) — 10/1, epandja 7.
Oolye taya thanekwa ‘koonyothi heyali’ ndhoka dhi li moshikaha shaJesus shokolulyo ndhoka dha popiwa mEhololo 1:16, 20?
Otadhi thaneke aakuluntugongalo aagwayekwa naashoka tashi popiwa kombinga yadho otashi vulu wo okuukithwa kaakuluntugongalo ayehe momagongalo. — 10/15, epandja 14.
Omakotampango gOmbiimbeli geni tage tu kwathele tu mone kutya Kalunga okwa tala ko ngiini okuhila omakaya?
Kalunga okwa hala tu kale twa simaneka omwenyo. (Deut. 5:17) Okwa tegelela tu kale tu mu hole notu hole yalwe. (Mark. 12:28-31) Okwa hala tu yande omikalo dha nyata. (2 Kor. 7:1) — 10/1, epandja 15.
Jesus okwa li u ulike ngiini iikala yeifupipiko mbyoka ya popiwa muJesaja 50:4, 5?
Oovelise ndhoka otadhi ti kutya ngoka ‘a longwa shoka e na okutya’ ita ka “shuna monima.” Jesus okwa li u ulike iikala yeifupipiko nokwa li a gandja eitulomo lela kwaashoka He a li e mu longo. Jesus okwa li a halelela okwiilonga kuJehova, nokwa li i ilongo sha lela moshiholelwa shaKalunga sheifupipiko shokusila ohenda aantu aalunde. — 11/15, epandja 11.
Uuwanawa wuni tatu ka mona ngele ohatu ulukile yalwe ohenda nenge olukeno?
Ngele ohatu ulukile aantu ooyakwetu ohenda nenge olukeno, otatu ka tseya nawa Kalunga, naashoka otashi ka gwedha ko kenyanyu lyetu. (1 Joh. 4:7; Mat. 5:7, 8) Shimwe ishewe, Jehova okwa hokwa mboka hayu ulukile yalwe ohenda nenge olukeno. (Omayel. 19:17) — 10/1, epandja 20.
