1, 2. (a) Aantu oyendji ohaya ti okupondola oshike? (b) Ongiini to vulu okukonakona etaloko lyoye li na ko nasha nokupondola?

OMUNTU ngele a pondola nenge a sindana monkalamwenyo ongele naanaa a ninga shike? Ngele owa pula aantu epulo ndyoka, oto ka mona omayamukulo ga yoolokathana lela. Pashiholelwa, oyendji ohaya ti kutya omuntu ngoka e na oshimaliwa, eithano lyasha nenge a longekeka oye a pondola. Omanga yalwe ye wete kutya omuntu ngoka a pondola, oye ngoka e na ekwatathano ewanawa noyaandjawo, nookuume ke nenge naaniilonga pamwe naye. Omuntu ngoka ha longele Kalunga otashi vulika a dhiladhile kutya iinakugwanithwa mbyoka e na megongalo nenge shoka a longa muukalele otashi ulike kutya okwa pondola.

² Opo wu mone kutya owa tala ko ngiini okupondola, oto vulu okunyola omadhina gaantu mboka wu wete kutya oye shi pondola, ano tu tye, aantu mboka wu hole unene nowa simaneka. Mbela oye na omaukwatya omahokithi geni ga faathana? Aayamba nenge oohashike shalye? Mbela aanamadhina? Omayamukulo goye otaga ka ulika shoka shi li momutima gwoye, naashoka otashi ka nwetha mo noonkondo omahogololo ngoka to ningi monkalamwenyo yoye nosho wo shoka to lalakanene. — Luk. 6:45.

3. (a) Josua okwa li e na okuninga shike opo a kale omusindani monkalamwenyo ye? (b) Ngashingeyi otatu ka kundathana kombinga yashike?

³ Okukala twa pondola momeho gaJehova okwa simana lela, molwaashoka okukalamwenyo kwetu okwa kankamena kokukala twa hokiwa kuye. Sho Jehova a li a pe Josua oshinakugwanithwa shokufala Aaisraeli mEvi lyEuvaneko, okwe mu lombwele a kale ta lesha “omutenya nuusiku” Ompango ndjoka a li a pe Moses nokuvulika kwaayihe mbyoka ya nyolelwa mo. Kalunga okwa li e mu shilipaleke a ti: “Nena oto kala omusindani nomunelago.” (Jos. 1:7, 8) Owu shi shi tuu shili kutya Josua okwa li a sindana nenge tu tye e shi pondola. Ongiini kombinga yetu? Ongiini tatu vulu okumona ngele etaloko lyetu li na ko nasha nokupondola  olya fa ndyoka lyaKalunga? Opo tu mone omayamukulo gomapulo ngaka natu ka kundathaneni oonkalamwenyo dhaalumentu yaali ya tumbulwa mOmbiimbeli.

4. Omolwashike taku vulu okutiwa kutya Salomo okwa li a pondola monkalamwenyo?

⁴ Salomo okwa li a pondola momikalo odhindji. Omolwashike mbela? Omolwaashoka uule woomvula odhindji okwa kala ha tila noha vulika kuJehova ngoka a li e mu laleke nuuyamba kaaku na we. Dhimbulukwa kutya sho Jehova a li a pula Salomo a popye kutya okwa hala okupewa shike, omukwaniilwa okwa li a pula a pewe owino, opo a vule okuwilika oshigwana. Omolweindilo lye, Kalunga okwa li e mu laleke nuuyamba moku mu pa owino owindji nuuyamba. (Lesha 1 Aakwaniilwa 3:10-14.) Owino ye ‘oya li yi vule yaanandunge ayehe yokUuzilo noyomuEgipiti.’ Etumbalo lyaSalomo olya li lya “taandele niilongo ayihe yomuushiinda.” (1 Aak. 4:30, 31) Salomo okwa li omuyamba kaaku na we, molwaashoka okwa li ha mono oshingoli shondjundo yootona 25 omumvo kehe. (2 Ondjal. 9:13) Okwa li a pyokoka mokuungaunga naalelwa ye, mokutunga nosho wo miinima yopangeshefa. Ethimbo alihe sho Salomo a kala e na ekwatathano ewanawa naKalunga, okwa li a pondola shili monkalamwenyo ye. — 2 Ondjal. 9:22-24.

5. Salomo okwa li a thiki pehulithodhiladhilo lini li na ko nasha naamboka Kalunga a tala ko ya pondola?

⁵ Shoka Salomo a nyola membo lyOmuuvithi otashi ulike kutya ka li e na omadhiladhilo ga puka kutya okupondola nosho wo enyanyu otayi monika owala kwaamboka ye na sha noye na oondondo dhopombanda. Okwa nyola a ti: “Onde shi dhimbulula kutya omuntu mokukalamwenyo kwe ke na elago lilwe lyaa shi okunyanyukwa nokulonga uuwanawa. Naashika wo omuntu a lye ye a nwe noku nyanyukilwe iilonga yuupyakadhi we auhe — osho omagano gaKalunga.” (Omuuv. 3:12, 13) Okwa li a dhimbulula kutya iinima mbyoka otayi kala owala tayi nyanyukilwa komuntu ngoka a hokiwa kuKalunga noku na ekwatathano ewanawa naye. Salomo okwa popi shu uka a ti: “Ekota lyaashihe shu uvika, olyo ndika: Tila Kalunga nou dhiginine iipango ye, oshoka aantu ayehe osho ye na okuninga.” — Omuuv. 12:13.

6. Oshiholelwa shaSalomo otashi tu kwathele ngiini tu mone kutya okupondola kwashili okuni?

⁶ Uule woomvula odhindji Salomo okwa kala omutilikalunga. Ombiimbeli otayi tu lombwele kutya “okwa li e hole OMUWA e ta landula omalongo gahe David.” (1 Aak. 3:3) Mbela ku wete a li a pondola shili momukalo ngoka? Kalunga okwa li a wilike Salomo a tunge otempeli ombwambwambwambwa yelongelokalunga lyashili noku nyole omambo gatatu gOmbiimbeli. Odhoshili kutya tse itatu ka tegelela tu ninge ngaashi Salomo a li a ningi. Ihe oshiholelwa she sho a li omudhiginini kuKalunga oshi na oku tu kwathela tu konakone kutya okupondola kwashili okwa kwatela mo shike. Otashi ke tu kwathela wo tu mone kutya otu na oku shi enda ngiini opo natse tu pondole. Kalunga okwa li a nwetha mo Salomo a nyole kutya uuyamba, owino, esimano noonkondopangelo, iinima mbyoka aantu oyendji ya tala ko kutya omuntu ngoka e yi na okwa pondola, oyi li osima yowala. Iinima ya tya ngawo kayi na ekwatho lyasha noku yi lalakanena okwa fa ‘owala okutidha ombepo.’ Mbela ino shi mona kutya aayamba ohaya kala owala taya lalakanene omaliko ogendji? Olundji ohaya kala ye na uumbanda woku ga kanitha nosho wo kutya omaliko gawo otaga ka kuthwa po siku limwe kuyalwe. — Lesha Omuuvithi 2:8-11, 17; 5:10-12.

7, 8.  Osha li she ende ngiini Salomo a kale kee shi omudhiginini, nosha li she mu etele iizemo yini?

⁷ Otu shi shi nokutya konima yethimbo Salomo ina ka kala we omudhiginini. Ombiimbeli otayi ti: ‘Sho a kulupa aakiintu ye oye mu simanekitha iikalunga iikwiilongo. Ina dhiginina OMUWA, Kalunga ke, ngaashi he David a ningile. Salomo okwa yono kOMUWA.’ — 1 Aak. 11:4-6.

⁸ Molwaashoka Jehova ka li a nyanyukilwa shoka Salomo a ningi okwe mu lombwele a ti: “Sho wa teya ehangano lyetu nangoye noino vulika komautho gandje, otandi ku kutha  oshilongo e tandi shi pe gumwe gwomaapiya yoye.” (1 Aak. 11:11) Kashi nikitha tuu oluhodhi! Nonando Salomo okwa li a pondola momikalo odhindji, konima okwa li a yemateke Jehova. Salomo ina kala we omudhiginini kuJehova, oshinima shoka sha simanenena monkalamwenyo. Kehe gumwe gwomutse ota vulu okwiipula ta ti: ‘Mbela onda tokola ngaa toko ndi ilonge sha moshiholelwa shaSalomo opo ndi pondole monkalamwenyo?’

9. Pataloko lyuuyuni, mbela Paulus okwa li ngaa a pondola monkalamwenyo ye? Shi yelitha.

⁹ Onkalamwenyo yomuyapostoli Paulus oya yooloka ko thiluthilu kwaandjoka yomukwaniilwa Salomo. Paulus ka li ha kala kiipangelapundi ya longwa momayego goondjamba ye ka li ha li naakwaniilwa. Pehala lyaashono, opu na ethimbo ndyoka a li ha kala a sa ondjala, enota, uutalala nokwa li e na onkayi. (2 Kor. 11:24-27) Sho a li a taamba ko Jesus e li Mesiasa, Paulus ina kala we e na ondondo yasha ya simana melongelokalunga lyOshijuda. Onkee ano, aawiliki yelongelokalunga lyOshijuda oya kala ye mu tonde. Okwa li a tulwa mondholongo, a dhengwa noongola nonomamanya. Paulus okwa popi kutya ye nAakriste ooyakwawo oya li ya shekwa, ya hepekwa nokusithwa ohoni. Okwa ti: “Ethimbo alihe otse otwa fa oshilambo shiiyagaya muuyuni mbuka nondoya yevi ndika.” — 1 Kor. 4:11-13.

10. Omolwashike tashi vulika aantu ya li ye wete Paulus a hunutha ompito yokukala omusindani?

¹⁰ Manga omugundjuka Saulus inaa ninga omuyapostoli Paulus, okwa li te shi enditha nawa. Molwaashoka otashi vulika aavali ye ya li ye na sha, okwa li a longwa kuGamaliel ngoka a li a omulongi a simanekwa. Konima Paulus okwa nyola a ti: “Onda li ependa ndi vule Aajuda ooyakwetu oyendji yepipi lyandje mokukala meitaalo lyopaShijuda.” (Gal. 1:14) Saulus okwa li ha popi nawanawa Oshihebeli nOshigreka. Okwa li e na uukwashigwana waRoma naashoka osha li she mu ningitha a mone omauwanawa gi ikalekelwa nosho wo uuthemba wontumba, iinima mbyoka ya li hayi kala ya halika noonkondo kaantu oyendji. Ando okwa lalakanene okukala omusindani muuyuni, andola okwa ka ninga omuyamba nokukala a simanekwa. Pehala lyaashono, okwa li a hogolola okuninga oshinima shoka yalwe tashi vulika nokuli naakwanezimo ye yamwe ya li ye wete sha samapala. Omolwashike mbela?

11. Paulus okwa li a lenga iinima yini nokwa li e na omalalakano geni, nomolwashike?

¹¹ Paulus okwa li e hole Jehova nokwa li a hala okukala a hokiwa kuye, pehala lyokukala omuyamba nokwa simanekwa kaantu. Sho Paulus a mono ontseyo yashili, okwa kala a lenga ongushu yekulilo, uukalele wopaKriste nosho wo etegameno lyoku ka kala nomwenyo megulu, iinima mbyoka ya talika ko kuuyuni inaayi simana. Paulus okwa li a dhimbulula kutya opu na ompata ndjoka yi na okukandulwa po. Satana okwa li a popi kutya ota vulu okugamuna ko aantu ayehe kuKalunga.  (Job 1:9-11; 2:3-5) Paulus okwa li a tokola toko a kale omudhiginini kuKalunga nosho wo kelongelokalunga lyashili, kashi na nduno mbudhi kutya oku pite momamakelo ga fa peni. Aantu kunena muuyuni kaye na omalalakano ngoka.

12. Omolwashike wa hogolola okukala wi inekela muKalunga?

¹² Mbela nangoye owa tokola ngaa wa mana mo ngaashi Paulus? Nonando kashi shi oshipu okukala aluhe aadhiginini kuJehova, otu shi shi kutya ote ke tu laleka nuuyamba nota ka kala e tu hokwa, naashoka osho hashi ulike kutya omuntu okwa pondola shili monkalamwenyo. (Omayel. 10:22) Ohatu mono uuwanawa ngashingeyi notatu vulu wo okukala neinekelo kutya otatu ka mona omalaleko nuuyamba monakuyiwa. (Lesha Markus 10:29, 30.) Onkee ano, katu na okwiinekela ‘muuyamba womaliko gokombanda yevi, ihe otu na okukala twi inekela Kalunga ngoka he tu pe iinima ayihe kee na uuluya.’ Otu na ‘okwiigongelela eliko ndyoka tali ka ninga ekankameno lya kola monakuyiwa opo tu vule okwiimonena okukalamwenyo kwashili.’ (1 Tim. 6:17-19) Otatu vulu okukala tu na uushili kutya nando opu pite oomvula ethele nenge nokuli eyuvi otatu ka vula okupopya tatu ti: “Eeno, onda pondola lela monkalamwenyo yandje!”

13. Jesus okwa li a gandja omayele geni kombinga yokwiilikolela omaliko?

¹³ Jesus okwa popi kombinga yomaliko a ti: “Inamu ilikolela omaliko kombanda yevi, moka haga yonwa po koothithi nokoshushi noku na aafuthi yokuteya po nokuyaka po. Ihe ilikoleleni omaliko megulu, moka kaamu na oothithi noshushi yokuyona po, nokaamu na aafuthi yokuteya po nokuyaka po. Oshoka kokuma nkoka ku na eliko lyoye, oko ku na nomwenyo gwoye wo.” — Mat. 6:19-21.

14. Omolwashike kaashi li pandunge okwiilikolela omaliko kombanda yevi?

¹⁴ Kakele owala kiimaliwa, eliko lyomuntu lyokombanda yevi otali vulu okukala lya kwatela mo iinima oyindji. Otali vulu okukala lya kwatela mo iinima mbyoka Salomo a li a nyola kombinga yayo mbyoka yi na ko nasha nokupondola kwopantu, sha hala okutya, etumbalo, esimano nosho wo oonkondopangelo. Jesus okwa li a popi naanaa ngaashi Salomo a li a popi membo lyOmuuvithi kutya omaliko gomuuyuni ihaga kalelele. Ngaashi tashi vulika we shi mona maantu mboka ye ku kundukidha, omaliko agehe ngoka ye na ohaga vulu okuyonuka nokukana po nuupu. Omuprofesoli F. Dale Bruner okwa nyola kombinga yomaliko ngoka a ti: “Oshi shiwike nawa kutya esimano oshinima hashi kana po. Omuntu ngoka a li a simana ohela, nena ohashi vulika a kale a dhimbiwa nale. Ngoka e na sha nena, ongula ohashi vulika a kale kee na sha. . . . [Jesus] oku hole aantu. Ote ya ladhipike ya kale kokule nesimano lyopakathimbo ndyoka hali etele omuntu epolimano shampa lya tameke okukana po. [Esimano] ihali kalelele. Jesus ina hala aalongwa ye ki ipe uusama. ‘Esiku kehe uuyuni ohawu mpinyukile omuntu ngoka a li e wete e wu kwata ko.’” Nonando aantu oyendji otashi vulika ya tse kumwe noohapu ndhoka, yangapi haya kambadhala ya kaleke oonkalamwenyo dhawo metsokumwe noohapu ndhoka? Mbela ngoye osho ngaa to ka ninga?

15. Otu na okukambadhala tu pondole momukalo guni?

 ¹⁵ Aawiliki yamwe yomalongelokalunga oya kala nokuuvitha kutya osha puka okukala to lalakanene okupondola nosho wo kutya oonkambadhala ndhoka nadhi fulilwe okalambo. Dhimbulukwa kutya Jesus ina tya kutya okuninga oonkambadhala dha tya ngaaka okwa puka thiluthilu. Pehala lyaashono, okwa li ta kumagidha aalongwa ye ya lalakanene “omaliko megulu” ngoka ihaaga yonuka po. Shoka twa halelela osho okupondola momukalo ngoka Jehova a hokwa. Eeno, oohapu dhaJesus otadhi tu dhimbulukitha kutya otatu vulu okuhogolola shoka twa hala okulalakanena. Uushili owo kutya ohatu lalakanene shoka shi li momitima dhetu, molwaashoka osho tu wete shi na ongushu kutse.

16. Otatu vulu okukala neinekelo mushike?

¹⁶ Ngele otwa halelela shili okunyanyudha Jehova, otatu vulu okukala neinekelo kutya ote ke tu pa shoka twa pumbwa. Omathimbo gamwe otashi vulika tu kale twa sa ondjala nenge enota, ngaashi omuyapostoli Paulus. (1 Kor. 4:11) Ihe otatu vulu okukala neinekelo momayele gaJesus gopandunge ngoka taga ti: “Inamu kala mu na oshimpwiyu mu tye: ‘Otatu li shike?’ nenge: ‘Otatu nu shike?’ nenge: ‘Otatu zala shike?’ Ayihe mbika otayi lalakanenwa kaapagani. Oshoka Ho yeni yomegulu oku shi shi kutya omwa pumbwa mbika ayihe. Tangotango kongeni [uukwaniilwa waKalunga, NW] nuuyuuki we, nena mbika ayihe otamu yi gwedhelwa ko.” — Mat. 6:31-33.

17, 18. (a) Okupondola kwashili okwi ikolelela kushike? (b) Okupondola monkalamwenyo inaku ikolelela kushike?

¹⁷ Shoka tu na okukaleka momadhiladhilo, osho kutya okupondola kwashili ihaku zi mwaashoka twa tompola po nenge moondondo ndhoka dha simana pataloko lyuuyuni. Natango, okupondola kwashili inaku ikolelela kiinakugwanithwa mbyoka tu na megongalo lyopaKriste. Omalaleko nuuyamba giinakugwanithwa ohatu ga mono owala omolwuudhiginini wetu nokuvulika kuKalunga ngoka e tu shilipaleka a ti: “Omusilishimpwiyu kehe ota tegelelwa, a kale omwiinekelwa.” (1 Kor. 4:2) Otu na okukakatela uudhiginini wetu. Jesus okwa ti: “Ngoka ti idhidhimike sigo ehulilo, oye ta hupithwa.” (Mat. 10:22) Mbela ito shi zimine kutya okuhupithwa kwoye oku li euliko kutya owa pondola shili monkalamwenyo?

¹⁸ Ngele tatu tala kwaashoka twa zi nokukundathana, otatu vulu okumona kutya okukala aadhiginini kuKalunga inaku kwatela mo esimano, uulongelwe wetu, oshimaliwa shoka tu na nenge oondondo dhetu; sho natango okukala aadhiginini inaku ikolela koondunge, kuunongo nenge kokuvula kwetu. Kutya nduno otu iyadhe monkalo ya tya ngiini, otatu vulu okukala aadhiginini kuKalunga. Aapiya yaKalunga mboka ya li ko methelemumvo lyotango yamwe oya li aayamba omanga yalwe ya li oohepele. Paulus okwa li a lombwele Aakriste aayamba kutya oye na “okulonga uuwanawa, ya ninge aayamba yiilonga iiwanawa, haa gandja nohaa topolele yalwe momaliko gawo.” Aakriste ayehe kutya nduno aayamba nenge oohepele oya li taya vulu “okwiimonena okukalamwenyo kwashili.” (1 Tim. 6:17-19) Osho shi na okukala ngaaka nokunena. Atuheni otu na ompito ya faathana nosho wo oshinakugwanithwa shokukala aadhiginini nokukala “aayamba yiilonga iiwanawa.” Ngele otwa ningi ngaaka, otatu ka kala twa pondola momeho gOmushiti notatu ka kala tu na enyanyu lyokukala tu shi kutya otatu mu nyanyudha. — Omayel. 27:11.

19. Owa tokola toko okuninga po shike ngele tashi ya pokupondola?

¹⁹ Otashi vulika wu kale itoo vulu okulundulula oonkalo dhoye thiluthilu, ihe oto vulu okuungaunga nadho. Kambadhala wu kale omudhiginini kutya nduno oonkalo dhoye odha tya ngiini. Oto ka mona iizemo iiwanawa ngele owa ningi ngaaka. Kala wu na einekelo kutya Jehova ote ke ku laleka nuuyamba ngashingeyi nosigo aluhe. Ino dhimbwa nando oohapu ndhoka Jesus a li a lombwele Aakriste aagwayekwa a ti: ‘Idhidhimikeni ano sigo okusa, ongame otandi mu pe oshishani shomwenyo.’ (Eh. 2:10) Hoka oko lela okupondola kwashili!