Omanyolo otage tu londodha taga ti: “Momwenyo ohamu zi omadhiladhilo omawinayi, omadhipago, uuholume, oluhondelo, uufuthi, omalundilathano nokusheka.” (Mat. 15:19) Omutima gwetu gwopathaneko otagu vulu oku tu kengelela noku tu ningitha tu yukipalithe oonkatu dhetu ndhoka kaadhi li metsokumwe nehalo lyaKalunga. Otashi vulika kaatu dhimbulule shoka sha ningilwa omutima gwetu, sigo oosho twa gwile mepuko. Oshike tashi vulu oku tu kwathela tu tseye omadhiladhilo gomomitima dhetu manga inaatu katuka onkatu ya puka?

Kala ho lesha Ombiimbeli esiku kehe nokutedhatedha kwaashoka wa lesha.

Omuyapostoli Paulus okwa nyola a ti: “Oohapu dhaKalunga odhi na omwenyo nodhi na oonkondo dhokulonga sha. Odho odhi na omayego dhi vule egongamwele lyoongenge mbali. Otadhi tete e tadhi adha sigo okomwenyo nombepo.” Etumwalaka lyaKalunga ndyoka li li mOmbiimbeli otali “holola puuyelele omahalo nomadhiladhilo gomomitima dhaantu.” (Heb. 4:12) Ngele otwa kala hatu itala ko ngaashi Omanyolo taga ti otashi vulu oku tu kwathela tu tseye omadhiladhilo gomomitima dhetu. Inashi simanenena tuu tu kale hatu lesha Oohapu dhaKalunga esiku kehe nokutedhatedha kwaashoka tadhi ti, shoka tashi ke tu kwathela tu kale tu na omadhiladhilo ga fa gaJehova nosho wo etaloko lye!

Okutaamba ko omayele gopamanyolo nokutula miilonga omakotampango gOmbiimbeli otaku vulu okunwetha mo eiyuvo lyetu, sha hala okutya, okaana komomutima hoka hake ‘tu popile.’ (Rom. 9:1) Eiyuvo lyetu otali  vulu oku tu lombwela kaatu iyukipalithe omolwoonkatu dha puka ndhoka twa katuka. Natango mOmbiimbeli omu na iiholelwa mbyoka tayi vulu okukala ‘elondodho kutse.’ (1 Kor. 10:11) Oku yi holela otaku vulu oku tu kwathela kaatu katuke oonkatu dha puka. Oshike kehe gumwe gwomutse e na okuninga?

Galikana kuKalunga e ku kwathele wu tseye omadhiladhilo gomomutima gwoye.

Jehova oku li ‘omukonakoni gwoomwenyo.’ (1 Ondjal. 29:17) Ye ‘omunene wo e vule eiyuvo lyetu.’ (1 Joh. 3:20) Itatu vulu oku mu fundjaleka. Jehova ota vulu oku tu kwathela tu tseye omadhiladhilo gomomitima dhetu ngele otwe mu lombwele iimpwiyu yetu, omaiyuvo getu nosho wo omahalo getu okupitila megalikano. Otatu vulu nokuli oku mu pula ‘e tu shitile omutima omuyogoki.’ (Eps. 51:10) Egalikano otali vulu oku tu kwathela tu tseye kutya omitima dhetu otadhi tengele kombinga yini.

Kala ho pulakene nawa ngele wu li pokugongala kwopaKriste.

Okukala hatu pulakene nawa kwaashoka tashi popiwa pokugongala otaku vulu oku tu kwathela tu ikonakone muule womitima dhetu. Nonando otashi vulika kaatu pewe uuyelele uupe pokugongala kehe, okukala po ohaku tu kwathele tu uve ko nawa omakotampango gOmbiimbeli nosho wo iinima mbyoka tayi tu kwathele tu konakone omadhiladhilo gomomitima dhetu. Omatyokosha gaamwatate naamwameme ohage tu kwathele wo tu zule uuntu wetu womeni. (Omayel. 27:17) Ngele otwi itongola ko kegongalo nokukala ihaatu endathana nAakriste ooyakwetu pokugongala otashi vulu okukala sha nika oshiponga kutse. Okuninga ngaaka, otaku vulu oku tu ningitha tu ‘landule omakamba getu yene.’ (Omayel. 18:1) Onkee ano, oshi li pandunge tu ipule tatu ti: ‘Mbela oshi li ngaa omukalondjigilile gwandje okukala pokugongala kehe nokumona uuwanawa muko?’—Heb. 10:24, 25.

Molwaashoka omitima dhetu odhi na omakoto, otadhi vulu oku tu pukitha miinima oyindji. Ine yomuyo oyo mbika tayi landula: Okulalakanena omaliko, okunwa iikolitha, eendathano nosho wo omainyanyudho.

Okulalakanena omaliko.

Oshi li paunshitwe okukala twa hala okugwanitha po oompumbwe dhetu dhopalutu. Onkee Jesus okwa gandja oshiholelwa shoka shi li elondodho kutse kombinga yokukala tatu gandja eitulomo lya pitilila kiinima yopamaliko. Meyele limwe, Jesus okwa li a popi kombinga yomulumentu omuyamba ngoka a li e na iigandhi yu udha. Omulumentu ngoka ka li we e na mpoka ta pungula iilya ye mbyoka a li a teya momumvo omukwawo, moka wo a li a longo iilya oyindji. Okwa li a tokola okuhanagula po iigandhi ye, opo a tunge po yilwe iinene. Okwi ipopile a ti: “[‘Otandi] ka pungula iilya yandje neliko lyandje alihe. Nena otandi ilombwele ihe: Muntu ngoye! Owa pungulilwa ashihe shoka we shi pumbwa methimbo lyoomvula odhindji. Onkee fudha ihe, lya, nwa e to inyanyudha!’” Ihe omulumentu nguka omuyamba ka li a kaleke oshinima shimwe momadhiladhilo kutya omwenyo gwe ota vulu oku gu kuthwa uusiku mboka.—Luk. 12:16-20.

Sho tu uka moomvula dhuukokele, otashi vulika tu kale twa pwila owala mokuninga omalongekidho, opo tu ka kale tu na sha uuna tu li moshipundi shevululuko. Okudhiladhila ngaaka otaku vulu oku tu ningitha tu kale tatu ningi omaipopilo kutya inashi puka tu longe olutayima, nomomasiku moka tu na okugongala, nenge tu kale nokuli kaatu na ko nasha niinakugwanithwa yetu yopaKriste. Mbela katu na okukala twa kotokela oshinima shono? Nenge otashi vulika tu kale tu wete kutya oshi li nawa okuya miilonga yethimbo lyu udha  omanga tu li aagundjuka. Ihe mbela ohatu tompathana kutya otu na tango okukala tu na oshimaliwa, opo tu ye nawa muukokolindjila? Mbela katu na okuninga ngaashi tatu vulu ngashingeyi tu kale aayamba koshipala shaKalunga? Olye e shi ngele omutse gwe otagu kala kumwe nothingo ongula?

Okunwa iikolitha.

Omayeletumbulo 23:20 otaga ti: ‘Ino kala mokati kaamboka ya vuka mokunwa omaviinu.’ Ngele omuntu oku hole okunwa unene iikolitha, otashi vulika i ipopile kutya okunwa pandjigilile inaku puka. Otashi vulika a tye oha nu owala nelalakano lyokuthuwitha olutu, ihe iha nu a kolwe. Ngele ohatu nu nelalakano lyokuthuwitha olutu, nena otu na okukonakona nawa iikala yomomitima dhetu.

Eendathano.

Odhoshili kutya omathimbo gamwe itatu vulu okuhenuka okweendathana naamboka kaaye shi ooitaali, ngaashi kosikola, kiilonga nosho wo muukalele. Ihe okulyanga nayo, nokupanga uukuume wopothingo nayo, oku li oshinima shi ili. Mbela ohatu kala tatu ipopile kutya ohatu endathana nayo, molwaashoka ye na omaukwatya ogendji omawanawa? Ombiimbeli otayi tu londodha tayi ti: “Inamu pukithwa. ‘We ende nombudhi, nangoye oto ningi ombudhi.’” (1 Kor. 15:33) Ngaashi owala ondoya onshona tayi vulu okunyateka omeya ga yela, okupanga uukuume naantu mboka kaaye na etilokalunga otaku vulu wo okuyona po uupambepo wetu e tatu tameke okuholela iikala yuuyuni yokuzala, yokupopya nosho wo eihumbato lyawo.

Omainyanyudho.

Iinima yoshinanena yopauteknologi oye tu etela popepi omainyanyudho gi ili nogi ili. Gamwe gomugo kage shi omawanawa, go itaga opalele Omukriste. Paulus okwa nyola a ti: ‘Mokati keni inamu uvika iilonga ya nyata yoludhi kehe.’ (Ef. 5:3) Ongiini ngele omitima dhetu odhi hole okutala nenge okupulakena kiinima mbyoka ya nyata? Otashi vulika tu dhiladhile kutya omuntu owa pumbwa okuthuwa po nenge omainyanyudho, nenge tu tye iinima mbyono oyi li iinima yopaumwene. Ihe shoka twa pumbwa okuninga osho okukaleka omayele gaPaulus momitima dhetu, nokatu na okupitika tu tale nokupulakena konyata yoludhi kehe.

Ngele otwa ninga iihakanwa yomutima gwetu ngoka omunamakoto nosho wo ngele otu na ondjigilile yokuyukipalitha omapuko getu, otatu vulu okuninga omalunduluko. (Ef. 4:22-24) Natu tale kiiholelwa yooitaali ooyakwetu yaali, yopethimbo lyetu.

Omumwatate Miguel * okwa li e na okulundulula etaloko lye li na ko nasha niinima yopamaliko. Okwa ti: “Ngame nomukulukadhi gwandje nosho wo omumati gwetu ohatu kala moshilongo moka aantu ye wete kutya iinima yopauteknologi mbyoka opo tayi kondo nosho wo okukala nonkalamwenyo yuuzeko oyo ya simanenena. Ethimbo limwe onda li nda kala nokwiidhipagela po, opo ndi imonene iinima ayihe mbyoka nda hala muuyuni, tandi dhiladhila kutya otandi vulu oku shi ninga nopwaahe na okukala ndi hole omaliko. Onda li nde shi dhimbululula kutya okukala tandi tidha iinima yopamaliko oku li ondjila kaayi na ehulilo. Onda li nda galikana kuJehova shi na ko nasha netaloko lyandje nosho wo nomadhiladhilo gandje gomomutima. Onda li nde mu lombwele kutya ngame negumbo lyandje otwa hala oku mu longela ethimbo olindji. Otwa li twa tokola tu ninge onkalamwenyo yetu yanathangwa nokutembukila koshitopolwa hoka kwa li ku na ompumbwe onene. Nziya konima yaashoka otwa li twa ningi aakokolindjila. Otwa li twa dhimbulula kutya inatu pumbwa iinima oyindji yopamaliko, opo tu kale tu na onkalamwenyo ombwanawa notwa nyanyukwa shili.”

Oshimoniwa shaLee otashi ulike nkene okukonakona omutima gwe kwa li kwe mu kwathele e ethe po eendathano ewinayi. Lee okwa ti: “Omolwiilonga yandje, olundji onda li handi endathana naanangeshefa aakwiilongo. Onda li handi nyanyukilwa okukala pomitumba ndhoka nda li handi kala ndi na naanangeshefa mboka nonando onda li ndi shi shi nawa kutya pomitumba mpoka otapu ka nuwa sha pitilila. Olundji onda li handi iyadha ndi li pokukolwa, nonda kala handi ipe ombedhi aluhe konima. Onda li ndi na okukonakona nawa omutima gwandje. Omayele ngoka ge li mOohapu dhaKalunga nosho wo omayele gaakuluntugongalo oga li ga kwathele ndje ndi mone kutya onda hala owala okukala tandi endathana naantu mboka kaaye hole Jehova. Ngashingeyi ohandi ningi ongeshefa yandje okupitila mongodhi ngaashi tashi vulika, nokukala ndi na omwaalu gwookasitoma gwe eleka.”

Otwa pumbwa okwiikonakona nawa tu mone kutya omadhiladhilo gomomitima dhetu oge li ngiini. Sho tatu shi ningi, otu na okukonga ekwatho lyaJehova megalikano, nokukala tu shi kutya ‘okwa tseya omadhiladhilo getu gomonanguwi.’ (Eps. 44:21) Okwe tu pa wo Oohapu dhe, ndhoka dha fa oshitalelo shetu. (Jak. 1:22-25) Ohatu dhimbulukithwa wo iinima mbyoka ya simanenena miileshomwa yetu nosho wo pokugongala kwopaKriste. Ngele ohatu longitha omasiloshimpwiyu ngoka, otatu ka vula okutonatela omitima dhetu nokutsikila nokweenda mondjila yuuyuuki.