1, 2. Iita yo yeneyene yini yi li konima yomweelo, noshike aapiya yaKalunga itaaya ka pumbwa okuninga pethimbo ndyoka?

MOMASIKU 30 gaKotoba 1938, aantu omamiliyona moAmerika oya li taya pulakene koradio, kopolohalama yi holike hoka kwa li haku kala iinyandwa. Ongulohi ndjoka okwa li ku na oshinyandwa shi ikolelela kembo lyomahokololo giifundja ge na ko nasha nuunongononi lyedhina The War of the Worlds. Aanyandi mboka ya li taya dhana ye li aatoolinkundana oya popi kutya kopulanete yedhina Mars okwa li kwa zi iishitwa mbyoka ya li tayi hanagula po evi. Nonando okwa li kwa tseyithwa kutya shoka oshinyandwa owala, aapulakeni oyendji oya li taya dhiladhila kutya oshinima shoka oshoshili noya li ya kwatwa kuumbanda. Yamwe oya li nokuli ya ningi oonkambadhala yi igamene kiishitwa mbyoka aniwa ya li tayi zi kopulanete yilwe.

² Kunena otwa tegelela iita yo yeneyene mbyoka yi li owala konima yomweelo. Ihe aantu oyendji inaya hala okwiitaala kutya iita mbyoka oyi li popepi. Iita mbyoka oya kala ya hunganekwa nale mOohapu dhaKalunga, Ombiimbeli, ihe hamembo lyomahokololo giifundja ge na ko nasha nuunongononi. Mbika iita yaArmagedon moka Kalunga ta ka kondja naamboka ye li ompinge naye. (Eh. 16:14-16) Miita mbika aapiya yaKalunga mboka ye li kombanda yevi itaya ka pumbwa okwiipopila kiishitwa mbyoka tayi ka za kopulanete yilwe. Ihe otaya ka haluthwa kiiningwanima iikumithi nosho wo kiinima iinene mbyoka tayi ka holola oonkondo dhaKalunga.

3. Otatu ka kundathana ehunganeko lini, nomolwashike tu na okugandja eitulomo kulyo?

³ Ehunganeko lyOmbiimbeli ndyoka li li muSakaria ontopolwa 14 otali tu lombwele oshindji kombinga yiita yaArmagedon. Nonando ehunganeko ndika olya li lya nyolwa oomvula 2 500 lwaampono dha ka pita, olya guma onkalamwenyo yetu kunena. (Rom. 15:4) Oshindji shoka sha popiwa mo osha faathana naanaa noonkalo ndhoka dha guma  oshigwana shaKalunga kunena, okuza ngaa sho Uukwaniilwa wopaMesiasa wa dhikwa po megulu, momumvo 1914 notamu popiwa iiningwanima mbyoka twa tegelela yi ka ningwe monakuyiwa yi li popepi. Ehunganeko ndika otali popi shi na ko nasha ‘nolusilu olunene’ nosho wo ‘nomeya omanamwenyo.’ (Sak. 14:4, 8, OB-1954) Olusilu nduka otalu dhana onkandangala ya simanenena mokugandja egameno kaalongeli yaJehova. Nongele otu uvu ko kutya omeya omanamwenyo otaga vulu oku tu etela uuwanawa wuni, itatu ka kala owala tu wete ompumbwe yoku ga nwa, ihe otatu ka kala twa hala oku ga nwa. Onkee ano, osha simana tu gandje eitulomo olindji kehunganeko ndika opo tu mone uuwanawa.—2 Pet. 1:19, 20.

4. (a) “Esiku lyOMUWA” nenge tu tye esiku lyaJehova olya li lya tameke uunake? (b) Oomvula omilongo manga omumvo 1914 inaagu thika, aalongeli yaJehova oya li yu uvitha kombinga yashike, naawiliki yuuyuni oya li yi inyenge ngiini?

⁴ Ehungenko ndyoka li li muSakaria ontopolwa 14 olya tameke noohapu tadhi popi “esiku lyOMUWA” nenge tu tye esiku lyaJehova. (Lesha Sakaria 14:1, 2.) Esiku ndika oshike? Olyo ‘esiku lyOmuwa’ ndyoka lya li lya tameke sho “uukwaniilwa wuuyuni” wa ningi “uukwaniilwa wOmuwa gwetu nosho wo waKristus gwe.” (Eh. 1:10; 11:15, NW) Esiku ndyoka olya li lya tameke mo 1914, sho Jesus a ningi omukwaniilwa gUukwaniilwa wopaMesiasa. Aapiya yaJehova oya li ya tseyithile aantu yomiigwana omimvo omilongo komeho yomumvo 1914 kutya ‘ethimbo lyaapagani’ otali hulu momumvo ngoka, nonokutya muuyuni otamu ka kala omaupyakadhi inaaga kala ko nale. (Luk. 21:24) Iigwana oya li yi inyenge ngiini? Pehala lyokupulakena kelondodho ndyoka li li pethimbo, aawiliki yopapolotika nosho wo yomalongelokalunga oya li ya sheke nokuhepeka aagwayekwa aalaadhi mboka ya li aauvithi yonkundana ombwanawa. Kungawo, aawiliki mbaka yuuyuni oya sheke Kalunga Omunankondoadhihe, molwaashoka aagwayekwa oye li aakalelipo yUukwaniilwa we, ye lile po ‘Jerusalem shomegulu,’ Uukwaniilwa wopaMesiasa mboka ye li oshitopolwa shawo.—Heb. 12:22, 28.

5, 6. (a) Iinima yini ya li ya hunganekwa kutya otayi ka ningilwa “Jerusalem” nosho wo ‘aakwashilongo’ yasho? (b) Oolye ya li ‘oshihupe shaantu’?

⁵ Sakaria okwa li a hunganeke shoka iigwana tayi ka ninga sho a ti: “Jerusalem otashi ka matukilwa.” “Jerusalem” otashi thaneke Uukwaniilwa wopaMesiasa mboka Kalunga a dhika po. Kombanda yevi oshi li lwe po ‘kaakwashilongo’ yasho mboka ye li oshihupe shAakriste aagwayekwa. (Fil. 3:20) Pethimbo lyIita yoTango yUuyuni, aakwatelikomeho moshitopolwa shehangano lyaJehova shokombanda yevi oya li ya “matukilwa” nenge tu tye ya kwatwa po e ta ya falwa kondholongo kuAtlanta moGeorgia moAmerika. ‘Omagumbo gawo oga li ga matukilwa’ sho aakwatelikomeho nosho wo aantu yalwe mboka ya li kaaye na ondjo ya ningilwa iinima kaayi li pauyuuki nokumonithwa iihuna. Mboka ya li ya ponokele aagwayekwa oye ya yugu uuyamba wawo mboka ya li ye na, sho ye ya indike ya taandelithe iileshomwa yawo. Oya li wo ya ngambeke iilonga yawo yokuuvitha Uukwaniilwa.

⁶ Nonando aaponokeli oya li ya ponokele oshigwana shaKalunga shoka sha li oshishona, ye shi lundile, ye shi pataneke noku shi hepeka nokuli, shika inashi vula okuhulitha po thiluthilu elongelokalunga lyashili. Opwa li pu na ‘oshihupe shaantu,’ sha hala okutya, oshihupe shaagwayekwa mboka ya li ya tindi ‘okukuthwa mo moshilando.’

7. Aagwayekwa oya tulila po aalongelikalunga yashili ayehe oshiholelwa shashike kunena?

⁷ Mbela ehunganeko ndika olya li lya gwanithwa thiluthilu pehulilo lyIita yoTango yUuyuni? Aawe. Oshihupe shaagwayekwa nosho wo ooyakwawo aadhiginini mboka ye na etegameno lyokukala kombanda yevi oya li taya ka ponokelwa kiigwana natango. (Eh. 12:17) Pashiholelwa, pethimbo lyIita Iitiyali yUuyuni aamwatate oya li ya hepekwa noonkondo. Oshiholelwa shAakriste  aagwayekwa aadhiginini otashi tu tsu omukumo kunena tu kale hatu idhidhimikile omamakelo kehe ngoka tage tu adha. Omamakelo ngoka oga kwatela mo omapataneko okuza kaakwanezimo, kaaniilonga nenge kaanasikola mboka haye tu sheke omolweitaalo lyetu. (1 Pet. 1:6, 7) Kashi na nduno mbudhi kutya ohaya kala peni, aalongelikalunga yashili oya tokola toko shi vulithe nale ‘ya kale ya thikama omuthika ye na elalakano limwe’ itaaya ‘tilithwa kaakondjithi yawo.’ (Fil. 1:27, 28) Openi nduno oshigwana shaJehova tashi ka mona egameno muuyuni mbuka wu shi tonde?—Joh. 15:17-19.

8. (a) MOmbiimbeli oondundu ohadhi vulu okuthaneka shike? (b) ‘Ondundu yomiolivi’ otayi thaneke shike?

⁸ Molwaashoka “oshilando” Jerusalem otashi thaneke Jerusalem shomegulu, ‘ondundu yomiolivi ndjoka yi li kuuzilo washo’ oyi na wo okukala yi na eityo lyopathaneko. Ondundu ndjoka otayi thaneke shike? Ongiini tayi ka “pambuka” pokati e tayi ningi oondundu mbali? Omolwashike Jehova e dhi ithana kutya ‘oondundu dhandje’? (OB-1954) (Lesha Sakaria 14:3-5.) MOmbiimbeli, oondundu ohadhi vulu okulongithwa pathaneko, okuthaneka omaukwaniilwa nenge omapangelo. Shimwe ishewe, Ombiimbeli oye shi popya olundji kutya omalaleko nuuyamba nosho wo egameno ohali zi kondundu yaKalunga. (Eps. 72:3; Jes. 25:6, 7) Onkee ano, ondundu yooholivi ndjoka Kalunga a tula kuuzilo waJerusalem sho sheneshene otayi thaneke uunamapangelo waJehova weshito alihe, mboka wu li epangelo lye lya shiga ko.

9. Omeityo lini ‘ondundu yomiolivi’ ya pambuka pokati?

⁹ Okutopolwa pokati kwondundu yomiolivi otaku thaneke shike? Ondundu ndjoka yi li kuuzilo waJerusalem oya pambuka pokati meityo ndyoka kutya Jehova okwa dhika po epangelo etiyali. Epangelo ndika etiyali olyo Uukwaniilwa wopaMesiasa mboka wu li miikaha yaJesus Kristus. Nomolwaashoka Jehova a popi oondundu dhi li mbali ndhoka dhe ya po sho ‘ondundu yomiolivi’ ya pambuka pokati e te yi ithana ‘oondundu dhandje.’ (Sak. 14:4) Oondundu adhihe ndhoka mbali odhe.

10. “Olusilu olunene” ndoka lu li pokati koondundu mbali otalu thaneke shike?

¹⁰ Sho ondundu yopathaneko ya pambuka pokati, oshipambu shimwe okuumbangalantu noshikwawo okuumbugantu, oompadhi dhaJehova odha kala dhi li koondundu adhihe. Kohi yoompadhi dhaJehova okwa holoka “olusilu olunene.” Olusilu nduka lwopathaneko otalu thaneke egameno lyopakalunga, ndyoka aapiya ye haya mono kuye e li omunamapangelo gweshito alihe naandyoka haya mono mUukwaniilwa wopaMesiasa wOmwana. Jehova ota ka shilipaleka kutya elongelokalunga lyashili ka li na siku nando li hulithwe po. Ondundu yomiolivi oya li ya pambuka pokati uunake? Osha li sha ningwa sho Uukwaniilwa wopaMesiasa wa dhikwa po pehulilo lyomathimbo gaapagani momumvo 1914. Uunake aalongelikalunga yashili ya li ya tameke okufadhukila kolusilu lwopathaneko?

11, 12. (a) Okufadhukila kolusilu lwopathaneko okwa li kwa tameke uunake? (b) Oshike tashi ulike kutya okwooko kwaJehova ku na oonkondo oku li noshigwana she?

¹¹ Jesus okwa li a londodha aalanduli ye a ti: “One tamu ka tondwa kaantu ayehe omolwandje.” (Mat. 24:9) Uutondwe mboka owa kala wa yaga kegonga okuza momumvo 1914, sho omasiku gahugunina gonkalelo ndjika ga tameke. Nonando oshihupe shaagwayekwa osha li sha ponokelwa nonyanya kaatondi pethimbo lyIita yoTango yUuyuni, haagwayekwa ayehe aadhiginini ya li ya dhipagwa. Momumvo 1919 oya li ya mangululwa muupika waBabiloni Oshinene, shoka tashi thaneke uukwaniilwa womalongelokalunga giifundja. (Eh. 11:11, 12) * Momumvo ngoka omo oshigwana shaJehova Kalunga sha li sha tameke okufadhukila kolusilu lwoondundu dhe.

¹² Okuza momumvo 1919 aalongelikalunga  yashili kombanda yevi alihe otaya tsikile nokumona egameno molusilu lwaJehova. Momukokomoko gwoomvula omilongo, omapangelo gamwe miilongo oyindji oga kala nokwiindika iilonga yOonzapo dhaJehova noku dhi ya moshipala kaadhi taandelithe iileshomwa yadho yopaMbiimbeli. Miilongo yimwe omu na natango oondjindikila ndhoka. Ihe nonando omapangelo oga kambadhale shi thike peni kage na esiku nando ga hulithe po elongelokalunga lyashili. Okwooko kwaJehova ku na oonkondo otaku kala aluhe noshigwana she.—Deut. 11:2.

13. Oshike tashi tu kwathele tu kale molusilu lwaJehova lwegameno, nomolwashike sha simanenena ngashingeyi tu kale mo shi vulithe nale?

¹³ Ngele otwa kala kombinga yaJehova nokukala aadhiginini moshili, Jehova nosho wo Omwana, Jesus Kristus, otaya ka shilipaleka kutya itaye etha nando osha shi tu ‘yuge mo moshikaha She.’ (Joh. 10:28, 29) Jehova okwi ilongekidha oku tu kwathela opo tu vule okuvulika kuye e li Omunamapangelo agehe nokukala aapangelwa aadhiginini yUukwaniilwa wopaMesiasa. Otu na okukala molusilu lwegameno, molwaashoka olusilu ndoka otalu ka kala lwa simanenena kaalongelikalunga yashili pethimbo lyuudhigu uunene mboka wu li popepipepi.

14, 15. Onkalo otayi ka kala ya tya ngiini kwaamboka ye li kondje yolusilu, mesiku ndyoka ‘OMUWA ta ka kondjitha’ aatondi ye?

¹⁴ Sho ehulilo lyonkalelo ndjika tali ende tali hedha popepi, Satana ota ka hila ko komupaya mokuponokela aapiya yaJehova. Opo nduno otaku ya esiku ‘lyOMUWA lyokukondjitha’ aatondi ye. Jehova ota ka shilipaleka kutya sho Satana ta ponoka otashi ka kala oshikando she shahugunina. Mesiku ndyoka, Omupangeli gweshito alihe ote ku ulika kutya ye Ofule shi vulithe piikando ayihe mbyoka ‘a kondjitha iigwana’ pomathimbo gonale.—Sak. 14:3.

¹⁵ Mesiku lyaKalunga lyokukondjitha aatondi ye, oshike tashi ka ningilwa mboka kaaye li ‘molusilu lwe olunene’ lwegameno? Kuyo ‘eluwa itali ka tenda,’ sha hala okutya, uuyelele waJehova itawu ke ya minikila. Mesiku ndyoka lyaJehova lyokukondjitha aatondi, “uukambe, omamulutiya, oongamelo nuusino—iinamwenyo ayihe,” mbyoka yi li endhindhiliko lyiikondjitho mbyoka iigwana hayi longitha itayi ka kala yi na ekwatho lyasha. Iikondjitho mbyoka otayi ka kwatwa ‘kuutalala wombambi,’ itayi ka longithwa sha, otayi ka kala ya fa ya kwatwa kuutalala wo wenewene. Jehova ota ka longitha wo omikithi nosho wo “uuvu welega etilithi.” Kutya nduno ote ke shi ninga lelalela nenge hasho, uuvu welega etilithi otawu ka mweneka mboka taye tu tilitha. Mesiku ndyoka “omeho gawo nomalaka gawo otaga ka ola” meityo ndyoka kutya aaponokeli yetu otaya ka dhenga mombepo notaya ka mwenekwa. (Sak. 14:6, 7, 12, 15) Kapu na okakololo kombanda yevi hoka ehanagulo lyaJehova itaali ka adha. Omatangakwiita agehe kombanda yevi otage ki imanga uukuni kumwe naSatana e taga ningi etangakwiita enenenene. (Eh. 19:19-21) Ihe “mesiku ndyoka omidhimba dhaantu mboka ya dhipagwa kOMUWA, otadhi ka langathana okuza kooha dhuuyuni sigo okooha oonkwawo.”—Jer. 25:32, 33.

16. Omapulo geni tu na okwiipula shi na ko nasha nesiku lyaKalunga lyokukondjitha aatondi ye sho tali hedha popepi, notatu ka pumbwa okuninga shike?

¹⁶ Iita ohayi etele aantu aluhe okumona iihuna, nokuli naamboka taya ka sindana. Iikulya ohashi vulika yi ka kale ya pumba. Mboka ye na omaliko ohashi vulika ye ga kanithe. Onkalo yaantu ohashi vulika yi nayipale. Uuthemba waantu ohashi vulika wu kale wa ngambekwa. Ngele otwi iyadha momaupyakadhi ngoka, otatu ki inyenga ngiini? Mbela otatu ka kwatwa kehaluko? Mbela otatu ki iteka eitaalo lyetu sho tu li moothina? Mbela otatu ka kanitha etegameno e tatu tonyala? Itashi ka kala tuu sha simanenena tu kale twi inekela moonkondo dhaJehova dho ku tu hupitha notu kale molusilu lwegameno lye pethimbo lyuudhigu uunene!—Lesha Habakuk 3:17, 18.

17, 18. (a) ‘Omeya omanamwenyo’ oshike? (b) ‘Efuta lya sa’ nosho wo ‘Efuta lyopokati’ otali thaneke shike? (c) Sho wa taalela onakuyiwa, owa tokola toko okuninga shike?

¹⁷ Konima yaArmagedon ‘omeya omanamwenyo’ otaga ka kala taga tondoka sigo aluhe okuza moshipangelapundi shUukwaniilwa wopaMesiasa. ‘Omeya ngaka omanamwenyo’ ogo omasiloshimpwiyu gaJehova ngoka te ke tu pa monkalamwenyo yetu ayihe. ‘Efuta lya sa’ nosho wo ‘Efuta lyopokati’ otali thaneke shike? Agehe otagu ulike kaantu. Oshe eleka sho Efuta lya sa tali thaneke oombila moka mu na oonakusa. Molwaashoka mEfuta lyopokati omu na omwenyo, oshi li she eleka sho tali thaneke ‘ongundu onene’ ndjoka tayi ka hupa puArmagedon. (Lesha Sakaria 14:8, 9; Eh. 7:9-15) Kungawo, oongundu adhihe mbali otadhi ka mangululwa muupika weso ndyoka twa thigulula kuAdam sho tadhi ka kala nokunwa omeya omanamwenyo gopathaneko ‘momulonga gwomeya gomwenyo.’—Eh. 22:1, 2.

¹⁸ Omolwegameno lyaJehova, otatu ka hupa pehulilo lyonkalelo ndjika ya kolokosha, noku ya muuyuni uupe waKalunga wuuyuuki. Nonando otu tondike kiigwana ayihe, natu kale twa tokola toko tu kale aapangelwa yUukwaniilwa waKalunga aadhiginini nokukala twa tokola toko tu kale molusilu lwegameno lyaJehova.