1, 2. (a) Osha li she ende ngiini opo wu ninge etokolo lyokulongela Kalunga? (b) Otatu vulu okupula omapulo geni shi na ko nasha nuuthiga wetu wopambepo?

AANTU omamiliyona oya ninga ehogololo lyopandunge lyokulongela Jehova Kalunga nokulandula lela ondjila ndjoka Jesus Kristus a li e yi ende. (Mat. 16:24; 1 Pet. 2:21) Eiyapulo lyetu kuKalunga oli li oshinima sha kwata miiti. Ehogololo lyetu ndyoka kalya li owala lya kankamena kontseyo onshona yomanyolo omashona ngoka twa li twi ilongo, ihe okokukonakona lela Oohapu dhaKalunga. Kungawo, otwa li twa tseya uuyelele mboka wa li wa koleke eitaalo lyetu kombinga yuuthiga mboka Jehova ta ka pa ‘mboka ye mu tseya, noya tseya wo Jesus Kristus, ngoka e mu tumu.’ — Joh. 17:3; Rom. 12:2.

² Opo tu kale tu na ekwatathano ewanawa naTate yetu gwomegulu, otu na okuninga omahogololo ngoka tage mu nyanyudha. Oshitopolwa shika otashi ka kundathana kombinga yomapulo ngaka ga simana: Otu na uuthiga washike? Otu na oku wu tala ko ngiini? Ongiini tatu vulu okushilipaleka kutya otatu ka thigulula uuthiga wetu? Oshike tashi ke tu kwathela tu ninge omahogololo gopandunge?

3. Uuthiga washike tawu ka pewa (a) aagwayekwa nosho wo (b) ‘Oonzi dhilwe’?

³ Omwaalu omushona gwAakriste ogu na etegameno lyoku ka mona “eliko enene, ndyoka itaali wapa okwoola, [okuyonuka] nokuhula po” ndyoka lyi li uuthembahenda kaawu shi okuyelekwa nasha woku ka pangela pamwe naKristus megulu. (1 Pet. 1:3, 4) Opo Aakriste mbaka ya pewe uuthiga mboka, oye na ‘okuvalululwa.’ (Joh. 3:1-3) Dho ‘oonzi dhilwe’ dhaJesus omamiliyona, ndhoka tadhi ambidhidha aalanduli ye aagwayekwa mokuuvitha onkundana ombwanawa yUukwaniilwa waKalunga otadhi ka mona uuthiga washike? (Joh. 10:16) Oonzi dhilwe otadhi ka mona uuthiga mboka  inaawu vula okumonika kooAdam naEva sho ya yono. Uuthiga mboka owomwenyo gwaaluhe kombanda yevi hoka itaaku ka kala we okumona iihuna, eso nosho wo elilagano. (Eh. 21:1-4) Onkee ano, Jesus okwa li u uvanekele omukolokoshi ngoka a si pamwe naye a ti: ‘Ongame tandi ku lombwele nena tuu ndjika, oto ka kala pamwe nangame mOparadisa.’ — Luk. 23:43.

4. Ohatu nyanyukilwa nale omalaleko nuuyamba geni?

⁴ Nokunena, ohatu tyapula iinima yontumba yuuthiga wetu. Molwaashoka ohatu ulike kutya otu na eitaalo ‘mekuliloyambo lyaKristus Jesus,’ otu na ombili yokomutima nosho wo ekwatathano lyopothingo naKalunga. (Rom. 3:23-25) Otu na euvoko lya yela kombinga yomauvaneko ga dhenga mbanda kaaku na we ngoka ge li mOohapu dhaKalunga. Shimwe ishewe, otu na enyanyu enene sho tu li oshitopolwa shuumwayinathana wopaigwana uunahole. Nokashi li tuu uuthembahenda shili okukala tu li yamwe yomOonzapo dhaJehova! Nomolwaashoka twa lenga uuthiga wetu.

5. Satana okwa li a kambadhala okuningila oshigwana shaKalunga shike, noshike tashi vulu oku tu kwathela tu kandeke omakotokelo ge?

⁵ Opo kaatu kanithe uuthiga wetu mbuka wondilo, otu na okukala twa kotokela oomwigo dhaSatana. Satana okwa kala aluhe ta kambadhala okunwetha mo oshigwana shaKalunga opo shi ninge omahogololo ngoka tage shi ningitha shi kanithe uuthiga washo. (Num. 25:1-3, 9) Molwaashoka Satana oku shi shi kutya oku na ko owala okathimbo okafupi, ota ningi oonkambadhala a mana mo e tu pukithe. (Lesha Ehololo 12:12, 17.) Ngele otwa hala ‘okukandeka omakotokelo omawinayi gomuhindadhi,’ otu na okukala aluhe twa lenga uuthiga wetu. (Ef. 6:11) Metsokumwe naashika, otatu ki ilonga koshiholelwa shaEsau omwanamati gwatatekululwa Isak shoka shi li elondodho kutse.

6, 7. Esau oye lye, nokwa li e na okuthigulula shike?

⁶ Oomvula tadhi ihilile 4 000 dha ka pita, Isak naRebekka oya li ya pulumutha aakwana Esau naJakob. Sho aakwana taya ende taya koko, oya li ye na iikala ya yoolokathana noya li haya ningi iinima ya yoolokatha. “Esau okwa ningi omukongo omunene, omulumentu e hole mombuga ihe Jakob okwa li omumweni [“kee na oshipo,” NW] e hole pegumbo.” (Gen. 25:27) Omutoloki gumwe gwOmbiimbeli, Robert Alter, okwa ti kutya oshitya shOshihebeli shoka sha tolokwa “omumweni” nenge ‘omukeenoshipo,’ otashi ulike “kuudhiginini nenge kokwaa na ondjo.”

⁷ Sho Esau naJakob ya li ye na oomvula 15, tatekulululwa gwawo Abraham okwa si, ihe euvaneko ndyoka Jehova a li u uvanekele Abraham kalya li lya si naye. Konima yethimbo, Jehova okwa li u uvanekele ishewe Isak kutya iigwana ayihe otayi ka lalekwa nuuyamba okupitila moluvalo lwaAbraham. (Lesha Genesis 26:3-5.) Euvaneko ndyoka olya li lya holola kutya Mesiasa ngoka e li “oluvalo” oludhiginini ndwoka lwa popiwa muGenesis 3:15, otalu ka za moluvalo lwaAbraham. Omwanamati gwaIsak gwosheeli, Esau, oye a li e na uuthemba wokugwanithilwa po euvaneko ndyoka. Kasha li tuu uuthiga wa dhenga mbanda mboka wa li wa tegelela Esau! Ihe mbela Esau okwa li ngaa u ulike olupandu?

8, 9. (a) Esau okwa li a ningi ehogololo lini li na ko nasha nuuthiga we? (b) Konima yoomvula dhontumba, Esau okwa li a dhimbulula shike kombinga yehogololo lye nokwa li i inyenge ngiini?

⁸ Esiku limwe sho Esau a li a zi kuukongo, okwa adha Jakob “a tula po oshigali.” Esau okwa ti kuye: “Onde etwa mo kondjala, pe ndje wo moshigali shoye oshitiligane.” Jakob okwa yamukula a ti: “Otandi shi ku pe ashike, ngele oto pe ndje uuthemba woye wuusheeli.” Esau okwa li a hogolola po shike? Shoka tashi kumitha, okwa ti: “Uuthemba wuusheeli otau kwatha ndje shike?” Eeno, Esau okwa li a hogolola okayaha koshigali pehala lyuuthemba we wuusheeli! Opo Jakob a kale e na uushili kutya Esau ota landitha po uuthemba we wuusheeli, Jakob okwa ti: “Gana tango kutya oto pe ndje uuthemba woye.” Nopwaahe na okukwatakwata, Esau okwa landitha po uuthemba we wuusheeli. Konima sho Esau a gana, “Jakob okwe mu pe oshikwiila noshigali.  Okwa li ihe ye e ta nu nokwa zi po. Osho ngaaka Esau a dhini uuthemba we wuusheeli.” — Gen. 25:29-34.

⁹ Konima yoomvula dhontumba, sho Isak a li e wete kutya oku li pokusa, Rebekka okwa li a ningi omalongekidho opo a shilipaleke kutya Jakob ota ka mona shili uuthemba wuusheeli mboka Esau a kanitha. Konima yethimbo sho Esau a dhimbulula kutya okwa li a ningi ehogololo kaali li pandunge, okwa li i indile Isak a ti: “Tate, yambeka ndje wo! . . . Ino thigila ndje po nando eyambeko?” Sho Isak e mu lombwele kutya ita vulu okulundula eyambeko ndyoka a pe Jakob, ‘Esau okwa tameke okulila.’ — Gen. 27:30-38.

10. Jehova okwa li a tala ko ngiini Esau naJakob, nomolwashike?

¹⁰ Iikala yaEsau oyi iwetikile ngiini mOmanyolo? Esau okwa li ulike kutya okugwanitha po omahalo ge gopanyama okwa simanenena kuye shi vulithe oku ka mona omalaleko nuuyamba monakuyiwa ngoka ga li taga ka za muuthiga we. Esau ka li a lenga uuthemba we wuusheeli nokwa li u ulike kutya ka li e hole lela Kalunga. Oshikwawo, Esau okwa li i ipwililikile oshizemo shehogololo lye shoka sha li tashi ka guma oluvalo lwe. Mepingathano naye, Jakob okwa li e na lela olupandu lwuuthiga we. Pashiholelwa, Jakob okwa li a katuka metsokumwe nelombwelo lyaavali ye sho a li e na okuhogolola omukulukadhi. (Gen. 27:46–28:3) Molwaashoka Jakob okwa li a ningi ehogololo ndika lya li lya pumbwa okukala neidhidhimiko neiyambo, okwa li a ningi hekulululwa gwaMesiasa. Kalunga okwa li a tala ko ngiini Esau naJakob? Jehova okwa li a popi okupitila momupolofeti Maleaki a ti: ‘Onda li ndi hole Jakob nonda tondo Esau.’ — Mal. 1:2, 3.

11. (a) Omolwashike oshiholelwa shaEsau sha guma Aakriste kunena? (b) Omolwashike Paulus a li a popi kombinga yoluhondelo sho a hokolola shoka Esau a li a ningi?

¹¹ Mbela shoka Ombiimbeli ya popya kombinga yaEsau osha guma Aakriste kunena? Eeno, lela. Omuyapostoli Paulus okwa li a londodha ooitaali ooyakwawo ya kale ya kotoka, “kwaa kale ngoka ta ningi omuholume nomulunde ngaashi Esau, ngoka a landitha po uuthemba we okukala omukuluntu kumukwawo omolwokulya kumwe akuke.” (Heb. 12:16) Elondodho ndyoka olya kwatela mo natango Aakriste kunena. Otu na okukala twa lenga iinima yopambepo opo kaatu sindwe komahalo gopanyama e tatu kanitha uuthiga wetu wopambepo. Omolwashike Paulus a li a popi kombinga yoluhondelo sho a hokolola shoka Esau a li a ningi? Omolwaashoka okukala netaloko lya fa lyaEsau lyopanyama ohaku ningitha omuntu a hogolole nuupu omainyanyudho ngoka inaaga yogoka, ngaashi oluhondelo pehala lyiinima yopambepo.

12. (a) Satana oha tula ngiini omamakelo mondjila yetu? (b) Gandja oshiholelwa shopamanyolo shoka tashi vulu oku ku kwathela uuna wu wete oshidhigu okuninga ehogololo.

¹² Tu li aapiya yaJehova katu na okukambadhala  okukonga oonkalo ndhoka tadhi vulu oku tu fala moluhondelo. Pehala lyaashono, otu na okugalikana kuJehova opo e tu hupithe uuna pu na ngoka a hala oku tu makela kaatu vulike kuYe. (Mat. 6:13) Ihe Satana oha kambadhala aluhe okunkundipaleka uupambepo wetu sho tatu kambadhala okukakatela uudhiginini wetu muuyuni mbuka wa kolokosha. (Ef. 6:12) E li kalunga konkalelo ndjika yiinima ya kolokosha, Ondiyapoli oyi shi nawa nkene yi na okulongitha omahalo getu gokwaahagwanenena mokutula mondjila yetu omamakelo ngoka haga adha aantu ayehe. (1 Kor. 10:8, 13) Pashiholelwa, kala ando wa fa wu iwete wu li monkalo ndjoka tayi ku pe ompito wu gwanithe po ehalo lyontumba momukalo inaagu yogoka. Mbela oto ka hogolola po shike? Mbela oto ka kala wa fa Esau e to ti: ‘Endelela! Shi pe ndje!’ Nenge oto ka sinda emakelo ndyoka e to yi ontuku ngaashi Josef, omwanamati gwaJakob a li a ningi sho a li ta makelwa komukulukadhi gwaPotifar? — Lesha Genesis 39:10-12.

13. (a) Ongiini oyendji kunena ya li ya katuka ngaashi Josef, ihe ongiini yamwe ya li ya katuka ngaashi Esau? (b) Iiholelwa yaamboka ya li ya katuka ngaashi Esau otayi tu longo shike?

¹³ Aamwatate naamwameme oyendji oya li yi iyadha moonkalo moka ya li ye na okuhogolola ngele otaya ka ninga ngaashi Esau nenge ongaashi Josef. Oyendji oya li ya ningi omahogololo gopandunge noya li ya nyanyudha omwenyo gwaJehova. (Omayel. 27:11) Nonando ongawo, sho yamwe yomooitaali ooyakwetu ya li ya makelwa oya li ya katuka ngaashi Esau, noya tula uuthiga wawo wopambepo moshiponga. Uushili owu iwetikile mwaashoka kutya oyendji ohaya geelwa nokukondwa omumvo kehe omolwoluhondelo. Inashi simanenena tuu tu kale twa longekidha omitima dhetu komeho yethimbo manga inaatu iyadha moonkalo ndhoka tadhi makele uudhiginini wetu! (Eps. 78:8) Otatu vulu okukatuka oonkatu dhi li mbali lwaampoka ndhoka tadhi ke tu kwathela tu kondjithe omamakelo nokuninga omahogololo gomondjila konahiya.

14. Okudhiladhila komapulo geni taku ke tu kwathela tu ‘tonde shaa shoka oshiwinayi, nokudhiginina shoka oshiwanawa’?

¹⁴ Onkatu yotango oya kwatela mo okudhiladhila kiilanduliko yoonkatu dhetu. Olupandu lwetu lwuuthiga wetu wopambepo otalu ka kala lwomuule ngele otwa kala tu hole Jehova noonkondo, Omugandji gwuuthiga mboka. Shoshili osho kutya, ngele otu hole omuntu gwontumba, itatu ka kala twa hala oku mu uvitha nayi. Pehala lyaashono, ohatu kambadhala tu kale twa hokiwa kuye. Molwaashoka osho shi li ngawo, otashi ka kala shi li nawa tu dhiladhile kiilanduliko mbyoka tatu ka mona nosho wo nkene tayi ka guma yalwe ngele otwi igandja komahalo gopanyama inaaga yogoka. Otu na okwiipula tatu ti: ‘Mbela oonkatu dhandje dhokwiihola mwene otadhi ka guma ngiini ekwatathano lyandje naJehova? Mbela oonkatu dhandje dha puka otadhi ka guma ngiini yaandjetu? Otadhi ka guma ngiini aamwatate naamwameme megongalo? Mbela itandi ka pundukitha yalwe?’ (Fil. 1:10) Otatu vulu wo okwiipula tatu ti: ‘Mbela okwiinyanyudha kwopakathimbo okuhwepo, ku vulithe iilanduliko yinikitha oluhodhi? Mbela onda hala ndi ka kale nda fa Esau, ndi ka lile nayi sho tandi dhimbulula shoka nda ninga?’ (Heb. 12:17) Okudhiladhila komapulo ngoka otaku ke tu kwathela tu ‘tonde shaa shoka oshiwinayi, nokudhiginina shoka oshiwanawa.’ (Rom. 12:9) Ohole yokuhola Jehova oyo unene tayi ke tu inyengitha tu kale twa dhamenena uuthiga wetu. — Eps. 73:28.

15. Oshike tashi ke tu kwathela tu vule okukondjitha omamakelo ngoka haga tula uupambepo wetu moshiponga?

¹⁵ Onkatu ontiyali oya kwatela mo okukala twi ilongekidhila okukondjitha omamakelo. Jehova okwa tula po omasiloshimpwiyu ogendji goku tu kwathela tu kondjithe omamakelo ngoka ge li muuyuni mbuka ngoka haga tula uupambepo wetu moshiponga. Momasiloshimpwiyu ngoka omwa kwatelwa ekonakonombiimbeli, okugongala  kwopaKriste, uukalele womomapya nosho wo egalikano. (1 Kor. 15:58) Ethimbo kehe tatu mbumbulile Jehova shoka shi li momitima dhetu, nosho wo uuna tatu kutha ombinga muukalele ohashi tu kwathele tu vule okukondjitha omamakelo. (Lesha 1 Timoteus 6:12, 19.) Okukala kwetu twi ilongekidha lela okukondjitha omamakelo okwi ikolelela owala koonkambadhala ndhoka tatu ningi. (Gal. 6:7) Ontopolwa ontiyali yOmayeletumbulo oya popya kombinga yoshinima shika.

16, 17. Oshike tashi ke tu kwathela tu ninge omahogololo gopandunge?

¹⁶ Ontopolwa onti-2 yOmayeletumbulo otayi tu ladhipike tu konge owino noondunge. Uukwatya mbuka ohawu tu kwathele tu hogolole pokati kaashoka shi li mondjila naashoka sha puka, nokukala tu na eipangelo pehala lyokukala twa pwila owala momainyanyudho. Ihe otatu vulu owala okupondola ngele otwa halelela okuninga oonkambadhala. Okuulika uushili wetumbulo ndyoka lya popiwa metetekelo, Ombiimbeli ota yi ti: ‘Mumwandje, ngele to taamba oohapu dhandje noto dhiginine iipango yandje, opo to gameke okutsi kwoye kowino, nomutima gwoye tagu ipamba koondunge, eeno, ngele oto ithana omayele, nokoondunge to yeluthile ewi lyoye, ngele oto dhi kongo ngaashi oshisiliveli noto dhi shilile ngaashi eliko lya holekwa, nena oto ka uva ko etilo okutila OMUWA e to ka mona ontseyo okutseya Kalunga. OMUWA ota gandja owino, mokana ke otamu piti ontseyo noondunge.’ — Omayel. 2:1-6.

¹⁷ Osha yela kutya, opo tu pondole mokukala tu na uukwatya mboka tawu ke tu kwathela tu ninge omahogololo gopandunge, otu na okugwanitha po shoka sha popiwa mOmayeletumbulo. Ngele otwe etha oohapu dhaJehova dhi mwethe mo uuntu wetu womeni, ngele ohatu galikana twaa na ezimbuko kuKalunga e tu wilike, nosho wo ngele otwa kala nokukonga ontseyo yaKalunga ngaashi eliko lya holekwa, nena otatu ka vula okukondjitha omamakelo.

18. Owa tokola toko wu kale to ningi shike nomolwashike?

¹⁸ Jehova oha gandja ontseyo, omayele, oondunge nowino kwaamboka taya longo nuudhiginini ya mone omagano ngoka. Sho tatu ningi oonkambadhala dha mana mo dhoku ga konga noku ga tula miilonga, otatu ka hedha popepyeelela naJehova, omugandji gwomagano ngoka. Nokuli, ekwatathano lyetu lyopothingo naJehova Kalunga otali ke tu gamena uuna twi iyadha twa taalelwa kemakelo. Okuhedha popepi naJehova nokukala tu na etilosimaneko otaku ke tu gamena kaatu yone. (Eps. 25:14; Jak. 4:8) Uukuume wetu naJehova nokutula miilonga uunongo wopakalunga otawu ke tu kwathela tu ninge omahogololo ngoka taga ka nyanyudha omutima gwaJehova nokugamena uuthiga wetu.