OSHINIMA shika osha li sha ningwa muAuguste mo 1936. Osha li sha ningilwa mUuwa, nenge tu tye megumbo lyomukwaniilwa gwaSwaziland. Robert naGeorge Nisbet oya li owala opo ya dhana omusika nosho wo iipopiwa mbyoka ya li ya kwatwa yomumwatate J. F. Rutherford mohauto yi na omambako. Omukwaniilwa Sobhuza II okwa li a nyanyukwa tuu shili! George okwa ti: “Otwa li twa sa ohoni, molwaashoka omukwaniilwa okwa li a hala okulanda po oteipa, oomusika niipopiwa ya kwatwa, nosho wo omambako ngoka twa li tatu longitha okuuvitha etumwalaka lyUukwaniilwa.”

Robert okwa popi te mu pe ombili kutya iinima mbyoka itayi landithwa. Omolwashike mbela? Omolwaashoka hayo ooyene yayo. Omukwaniilwa okwa li a hala okuuva kutya mwene gwayo olye.

Robert okwa li e mu yamukula kutya, “iinima ayihe oyOmukwaniilwa gulwe.” Opo nduno Sobhuza okwa pula kutya Omukwaniilwa ngoka oguni. Robert okwa ti: “OJesus Kristus, Omukwaniilwa gwUukwaniilwa waKalunga.”

Sobhuza okwa li e shi zimine nesimaneko enene a ti: “Aaye, ngoka Omukwaniilwa omunene. Inandi hala ndi kuthe po nando osha she.”

Robert okwa nyola a ti: ‘Onda li nda kuminwa uukwatya welenga enene, omukwaniilwa Sobhuza. Okwa li ha popi Oshiingilisa nawa kee na uuntsa noka li ha lile okathima koluko noku shi okupopiwa naye nuupu. Onda li nda kuutumba naye mombelewa ye uule wominute 45 lwaampono, omanga George ta dhana omusika pondje.

Robert okwa gwedha ko a ti: ‘Konima yethimbo mesiku ndyoka, otwa li twa talelepo osikola yaSwazi National hoka twa li twa mono oshimoniwa oshihokithi kaaku na we. Otwa li tu uvithile omukuluntusikola nokwa li a pulakene nawa. Sho twe mu lombwele kutya otu na oteipa notwa hala osikola ayihe yi pulakene kiipopiwa mbyoka ya kwatwa, okwa li a nyanyukwa noonkondo nokwa lombwele aalongwa tayi ihilile pethele ya kuutumbe pomwiidhi opo ya pulakene. Otwa li twa lombwelwa kutya osikola ndjika yopombanda ohayi longo aamati Oshiingilisa, uunamapya, okulonga miikunino, okuhonga iipilangi, okutunga, nomwaalu; aakadhona oya li haya longwa uupangi, iilonga yomegumbo, nosho wo omaithano galwe ga simana.’ Yinakulu yelenga ndika enene oye a li a toto po osikola ndjoka.

Kuyele momumvo 1933, Omukwaniilwa Sobhuza okwa kala ha pulakene nenyanyu kaakokolindjila mboka ya li haya talele po Uuwa.  Oshikando shimwe, okwa li nokuli a gongele aakwiita ye mboka haye mu tonatele ye li 100 ya pulakene ketumwalaka lyUukwaniilwa ndyoka lya kwatwa. Okwa li a pula a kale ha tuminwa iifo yetu pandjigilile nokwa kala he yi taamba ko. Omathimbo hamale, Omukwaniilwa okwa ka kala e na ongulumambo konyala yi na iileshomwa ayihe yehangano. Nonando iileshomwa yetu oya li yi indikwa kepangelo lyaBritania ndyoka lya li tali ya kolonyeke pethimbo lyiita iitiyali yuuyuni, okwa kala e yi dhiginina lela.

Omukwaniilwa Sobhuza II okwa li a tsikile nokutaamba ko nombili Oonzapo mUuwa puLobamba, nokwa li nokuli hi ithana aasita ye ye ya pulakene kiipopiwa yawo yopaMbiimbeli. Manga Onzapo yedhina Helvie Mashazi tayi kundathana Mateus ontopolwa 23, ongundu yaasita oya li ye mu nukile noya kambadhala ye mu kondjithe a kuutumbe. Ihe Omukwaniilwa okwa li a yi mo olunyala, nokwa li a pula omumwatate Mashazi a tsikile. Shimwe ishewe, Omukwaniilwa okwa li a lombwele aapulakeni ya nyole omanyolo agehe ngoka ga li ga tumbulwa moshipopiwa.

Oshikando shimwe sho omumwatate gumwe omukokolindjila a li ta gandja oshipopiwa, aasita yane mboka ya li po, oya li ya tanaunine konima uukunde woheema dhawo sho ya pulakene kusho e taya ti: “Katu shi we aasita ihe ngashingeyi tse Oonzapo dhaJehova.” Opo nduno oya li ya pula omukokolindjila ngele oku na omambo ga fa ngoka ge niwe kElenga Enene.

Okuza mo 1930 nasha sigo eso lye mo 1982, Elenga Enene olya kala lya simaneka Oonzapo dhaJehova nokalya li lya pitike dhi hepekwe molwaashoka ihaadhi kutha ombinga momikalondjigilile dhaSwazi. Onkee ano, Oonzapo odha li dhi na etompelo ewanawa lyoku mu pandula, nodha li dha lili oosa dhe.

Sho kwa ka thikwa petameko lyo 2013, moSwaziland omwa li mu na aauvithi yUukwaniilwa ye vulithe po 3 000. Moshilongo moka mu na owala aantu ye vulithe pemiliyona limwe, maantu 384 omu na omuuvithi 1. Aakokolindjila ye vulithe 260 oya li yi ipyakidhila momagongalo ge li 90, naantu 7 496 oya li pEdhimbuluko mo 2012. Osha yela kutya, opu na lela ompito yoomwaalu ngoka gu indjipale. Omatalelopo ngoka gopetameko koSwaziland mo 1930 nasha oga li ga dhike po ekankameno lya kola shili. — Iinima mbyoka ya ningwa mondjokonona yOonzapo dhaJehova moSouth Africa.