Uuna gumwe ngoka tu hole a si, oshi li paunshitwe tu lile molwaashoka otatu ke mu yuulukwa. Nonando Jesus okwa li e hole Lasarus, ka li a lili molweso lyaLasarus. Okwa li a lili molwaashoka e etela ohenda ookuume naakwanezimo ye, ngaashi tashi ulikwa moovelise dhilwe dhontopolwa ndjoka yaJohannes. — Joh. 11:36.

Sho Jesus u uvu tango kutya Lasarus ote ehama, ka li a yi nziya kuye e ke mu aludhe. Ehokololo ota li ti: “[Jesus] sho u uvu kutya Lasarus ota alukwa, okwa kala natango omasiku gaali pehala mpoka a adhika.” (Joh. 11:6) Omolwashike Jesus inaaya ko mbala? Omolwaashoka okwa li e shi ningi nelalakano. Okwa ti: “Uuvu mboka itau ka fala Lasarus meso, ihe owokusimanekitha Kalunga, nOmuna gwaKalunga opo wo a simanekithwe kuwo.” (Joh. 11:4) Uuvu wa Lasarus kawa li ‘woku mu fala’ meso. Jesus okwa li a hala eso lyaLasarus li ‘simanekithe Kalunga.’ Ngiini mbela? Jesus okwa li e li pokulonga oshikumithalonga oshinene shokuyumudha kuume ke omuholike.

Jesus sho a li ta kundathana naalongwa ye pompito ndjika, okwa li a yelekanitha eso noomposi. Shoka osho molwaashoka e ya lombwele kutya okwa li ‘a hala a ye ko a ka penduthe [Lasarus].’ (Joh. 11:11) Jesus sho a li ta ka yumudha Lasarus, okwa li te ke mu pendutha moomposi ngaashi omuvali ta pendula okanona ke hoka ka kotha po. Onkee ano kapwa li etompelo lyasha lyokukala u uvite uuwehamwe omolweso lyaLasarus.

Oshike nduno sha li shi inyengitha Jesus a lile? Natango, oovelise montopolwa ndjoka otadhi tu pe eyamukulo. Sho Jesus a mono omumwayinakadhona gwaLasarus Maria nosho wo yalwe taya lili, “okwa hendwa komutima noku uvu uudhigu meni lye.” Moku ya mona sho yu uvite uuwehame okwa li a “hendwa komutima.” Shoka osho molwaashoka ‘Jesus a lili.’ Osha li sha yemateke Jesus noonkondo sho a mono ookuume ke aaholike ya nika oluhodhi. — Joh. 11:33, 35.

Ehokololo ndika otali ulike kutya Jesus oku na oonkondo nota vulu okugalulila aaholike yetu mboka ya sa momwenyo nosho wo uukolele muuyuni uupe mboka tawu ya. Otali tu kwathele wo tu uve ko kutya Jesus oha kala u uvitile uukwawo wanankali mboka ya kanithila aaholike yawo meso. Mehokololo ndika otatu ilongo mo wo kutya otu na okukala hatu uvile olukeno mboka ya nika oluhodhi omolweso lyaaholike yawo.

Jesus okwa li e shi shi kutya ota ka yumudha Lasarus. Ihe okwa li a lili molwaashoka okwa li e hole noonkondo ookuume ke nokwa li e yu uvitile olukeno. Sha faathana, olukeno lwetu otalu ke tu inyengitha tu ‘lile pamwe naamboka taa lili.’ (Rom. 12:15) Okulila hoka ihaku ulike kutya omuntu ke na eitaalo meyumuko. Kashi li tuu mondjila sho Jesus a tula po oshiholelwa shokuuvila olukeno mboka ya nika oluhodhi sho a lili shili nokuli nonando okwa li ta ka yumudha Lasarus.